كل عيد و انتوا طيبين

كل عيد و انتم طيبين و بخير و العيد الجاي تكونوا على عرفات بأذن الله

سلام

Happy Birthday

كل سنة و انتي طيبة..انا بقول كدا للمدونة بسبب مرور عام كامل على انشائها لان زي النهاردة من سنة اخدت المبادرة اني اعمل مدونة خاصة بيا و اقول فيها كل اللي نفسي اتكلم فيه و افضفض بيه لان بجد من خلال المدونة ديه قدرت اخرج فيها كلام كتير كان في دماغي كنت عايز اشارك بيه و اعرف رأي الناس فيه مواضيع كتير كانت بتقلق راحتي و بتشغل تفكيري و اللي استريحت كتير جدا بعد ما كتبتها و شاركت الناس بيها و اللي بجد كانوا عامل مهم جدا بسبب اراءهم و مناقشتهم لي الكلام المطروح و اللي بجد استفدت كتير من افكارهم و خبراتهم سواء بتعليقهم على الموضوع او في مدوناتهم الخاصة و اللي من خلالها اتعرفت بناس قلما لما الواحد يلاقي زيهم حواليه.. في خلال السنة ديه قدرت اعيد تقييم حاجات كتير يمكن مكنتش واضحة قدامي و اللي حاولت على اد ما اقدر اني اشارك بيها علشان اعرف هل انا على صواب ام اخطأت..المهم خطوة انشاء المدونة ديه كانت خطوة مهمة بالنسبة ليا و ان شاء الله تعيش معايا لانها هتكون بمثابة عملية ثوثيق لكل اللي مريت بيه على مر حياتي فعلشان كدا بوقلك يا مدونة كل سنة و انتي معايا دايما

في النهاية احب اقول اني بعتذر عن انشغالي الفترة ديه لان الفترة ديه يمكن تكون فترة انتقالية مهمة محتاجة تركيز و وقفة (مش بتاعة العيد) لأعادة تقييم حاجات كتير يمكن تكون ليها الاثر على مجرى حياتي

تحياتي لكم جميعا

سلام

Pessimism VS optimism

اخيرا كتبت البوست ده اللي بصراحة اتأخر كتير جدا لكن الحقيقة كان نسبيا غصب عني لان الفترة اللي فاتت ديه كان فيها بعض الاحداث و المشاكل و الورق اللي كان لازم يخلص و اللي كان من ضمن الاحداث ديه كشف الجيش بتاعي اللي كان الاسبوع اللي فات و اللي الحمد لله اخدت فيها اعفاء نهائي بسبب النظر هما تقريبا قالوا يلا يا ابني من هنا الجيش مش ناقص قتلى و نظرك ما ينفعش لان ممكن تضرب في العساكر بتوعنا بدل العدو ولا حاجة ( هما طبعا مقالوش كدا بس انا افترضت كدا يعني ) هما بصراحة كانوا يومين مملين جدا و طوال جدا بس الحمد لله خلصت من الخطوة ديه لانها كانت مهمة و كانت كفيلة انها توقف زي ما بيقولوا المراكب السايره لان معظم اماكن العمل بتطلب الموقف من التجنيد و الحوارات ديه

طيب قبل ما نبدأ موضوعنا النهاردة عايز بس اعلن عن بدأ نشاط مدونة جديدة مدونة عملناها رغبة مننا في نشر نور لازم يضيء قلوب كل الناس نور يا رب يقدر و لازم يمس قلب كل شخص لان هوا النور اللي هيهدينا للخير في دنيانا و حسن مثوانا في الاخرة ايوه هوا نور الاسلام ، الدين القيم و المنهج اللي ربنا شرعه لينا علشان يكون اسلوب و منهج لينا في الحياة الدنيا و يكون منقذنا و وسيلتنا للنجاة من عذاب النار و قائدنا لجنات الخلد..في المدونة ديه عايزين نقول يا جماعة ان الاسلام دين يسر و ليس دين عسر عايزين مع بعضنا نبتدي نغير من تعاملتنا في الدنيا بمنهج سوي و قلوب و عقول سليمة عايزين نبتدي مع بعض صفحة جديدة مع نفسنا و مع ربنا علشان يكون لينا المعين و القائد و نورنا في الحياة..يارب قدرنا على طاعتك و حسن عبادتك...فمعا بنور الاسلام نتقرب الي الله

جميل جدا..دلوقتي بئى نبدا نتكلم على الموضوع اللي كنت عايز اتكلم عليه من فترة كبيرة و الحقيقة ان في الفترة اللي فاتت ديه حصل الكثير من المواقف اللي زودت عندي الرغبة في الكتابة عن الموضوع ده و من احد اهم المواقف ديه لما كنا في قعده كدا و جاء صديق ليا و قلي انت نظرتك للحياة تشائمية و ده مش شيء كويس..الحقيقة ان الراجل ده لما قلي الكلام ده مغلطش لا الحقيقة ان المشكلة مش فيا المشكلة في الدنيا اللي احنا عايشيين فيها و الحقيقة انا اجلت مناقشتي معاه لغاية ما ينزل البوست ده اللي عايز اوضح فيه الحتة بتاعه التشاؤم و التفاؤل و الحوارات ديه

اولا ليه اصلا الانسان بيكون متشائم اكيد لما بيشوف ان الحاجات اللي بتحصل قدامه في الدنيا مش كويسة و مش بس كدا دا كمان لا تبشر بالخير في المستقبل و ان الاحداث اللي بتحصل قدامنا في الحياة متديناش سبب علشان نتفائل ان الوضع القائم ده هيتحسن او يتغير بالرغم من رغبة الشخص ده الداخلية في ان الوضع ده لازم يتحسن للاحسن

الا ان دايما في مشكلة بالنسبة للموضوع ده و الكل دايما بيغفلها و هي ارتباط التشاؤم بالواقعية بمعنى ان سيدي الفاضل اني مثلا احب اشوف نفسي او نظرتي للحياة ديه اللي انت ممكن توصفها على انها تشاؤمية انا افضل اني اوصفها بانها واقعية لان زي ما قولت ان الواقع اللي بنعيشه غالبا ما بيفرض علينا شعور نفسي ما ، اللي بعض الناس بتحب تشوفه من ناحية ايجابية و ان الاحداث ديه مثلا ان شاء الله الى زوال و الخير جاي و ديه بتبئى نظرة تفاؤليه للحياة و بعض الناس بتحب تشوف للاحداث ديه ممكن بنظرة سلبية او تقدروا تقولوا بسواد و ان المستقبل مظلم لان الوضع الحالي او الواقع بيقول ان المستقبل لا يبشر ابدا بالخير و الحقيقة ان الاتنين نقدر نعتبرهم نظرتين مختلفين للحياة و احب ان الناس هنا تفصل بين التشاؤم ده و التشاؤم اللي هوا بمعنى التطير او الطيرة لان مش ده المقصود هنا لان تشاؤم التطير ده حاجة تانيه

علشان اوضح اكتر احب اتكلم في نقطة كمان يمكن توصل للناس انا عايز اقول ايه او ايه المعنى اللي انا اقصده و عايز اوصله و ان دايما في هناك مقوله الحقيقة بعتبرها مقولة غبية و هي بتقول يا عم انظر لنصف الكوب المليان او نص الكوباية المليان و متبصش للنصف الفارغ و ده في تشبيه بان بان انظر احسن للجانب المشرق و متبصش للجانب المظلم للموضوع طيب و ليه يا بشر انظر لنصف الكوبايه المليان اللي هوا المفروض لازم يكون مليان اصلا طيب ما انا انظر لنصف الكوب الفارغ و اعرف هوا ليه فارغ لان المشكلة هنا مش في النصف المليان المشكلة هنا في النصف الفارغ و ازاي اقدر املاه و اشوف ايه الاسباب اللي ادت ان النصف ده يكون فارغ علشان اقدر املا الكوبايه كلها و ما اكتفيش فقط بوجود النصف المليان منا ممكن لما اشوف النصف المليان ده افقد الدافع اللي هيدفعني لملأ النصف الفارغ من الكوب ( يارب يكون حد فاهم حاجة ) و ياريت ميجيش حد يقولي ما تكتفي بالنصف المليان و احمد ربنا على اللي معاك طبعا ربنا بنحمده في كل وقت و راضيين و شاكريين بما قسمه لينا لكن ليه نتوقف و نكتفي بشيء او مرحلة معين و نقول كويس كدا طالما نقدر نوصل بيه لاعلى حاجة نقدر نوصلها ( كدا هنرجع لأيه لو شاطرين ؟ ) ..انا حبيت اذكر بس المقوله ديه لان دايما بيضرب بيها في الجزء بتاع النظرة التشؤمية و التفاؤلية و ياريت تكون الجزء ده وضح انا اقصد ايه او يكون المعنى اللي عايز اوصله مفهوم علشان ميتفهمش بس غلط

طيب الحقيقة ان النظرة التشاؤميه ديه او اسمحولي استبدلها بالنظرة الواقعية ديه للحياة لطالما كانت هي في مكاناها لان العالم كل شويه بيثبت ان اصحاب النظرة الواقعية ديه بيكون ليهم الغلبه لان احساسهم بالواقع بتثبته الايام يوم بعد يوم يعني مثلا اوضحلكوا انا اقصد ايه في بعض المقولات اللي وردت على لسان كثير من الناس علشان هنقدر منها نخرج بالمعنى اللي عايز اوصله بمعنى الواقعية اللي اقصدة مش التشائمية

واحد قال الكلمة ديه و الحقيقة من خلالها عايز اوضح نقطة مهمة جدا جدا

" The nice part about being a pessimist is that you are constantly being either proven right or pleasantly surprised. "

و هوا عايز يقول ان احسن حاجة في كونك متشائم على حد وصفه ( واقعي على حد وصفي ) انك دايما و باستمرار ياما بتثبت انك على صواب او انك بتدهش بسرور او بتتفاجأ بسرور و الحقيقة انا عايز اقول ايه ان الواقعي ده لانه شايف ان الواقع ده لا يبشر بان هيحصل حاجة كويسة و ان اللي جاي هيكون اسوأ و هوا قال كدا بناء على نظرته للواقع فلما ييجي فعلا الاسوء يحصل هيكون فعلا دايما على صواب لان هوا كان متوقعه بسبب الاحداث الحالية لكن الجزء الاجمل بئى ان لو الاسوء ده محصلش هيندهش بس هيندهش بسرور و يكون فرحان لان هوا اصلا مش نفسه ان الاسوء ده يحصل بس الواقع بيقول كدا فلما يحصل حاجة كويسة هيكون هوا سعيد لاني انا افرحلك يا راجل لما حاجة كويسة تحصل بالرغم من انها مكنتش مثلا متوقع حدوثها و عايز كمان بئى اربط بالجزء ده حاجة من اقول العرب قديما على لسان واحد اسمه الحليمي لما قال " التشاؤم سوء ظن بالله تعالى بغير سبب محقق، والتفاؤل حسن ظن به، والمؤمن مأمور بحسن الظن بالله تعالى على كل حال " خدوا بالكوا من حتة بغير سبب محقق ديه لان انا لما هشوف الواقع ولا اتفائل خير فهناك اسباب لذلك يعني حاشا لله مش هسيء الظن ابدا بربنا لان ربنا اصلا هوا ملاذنا الوحيد و كل شيء باذن هو بامره و كلنا لازم يكون عندنا حسن الظن بالله لكن في النفس الوقت احنا امُرنا باننا ناخد بالاسباب علشان كدا لما اتوقع الاسوء يبئى ما اسأتش الظن بالله و يمكن اكون اخذت بالاسباب

و اللي جايه ديه كمان مقوله بتوضح ان بردو اللي له النظرة المتشائمة ( الواقعية ) ديه غالبا ما يساء ظنه لان غالبا ما بيصدق توقعاته في النهاية و كانت بتقول

"A pessimist is never disappointed."

و يمكن بردو يكون وجهة نظره صحيحة لان زي ما قولت غالبا ما بتصدق التوقعات ديه لان ده حال الدنيا

اما المقولة اللي جاية ديه عجبتني اوي اوي بصراحة و كانت بتقول

"The difference between an optimist and a pessimist? An optimist laughs to forget, but a pessimist forgets to laugh."

وهي بتقول ان الفرق بين المتفائل و المتشائم ان المتفائل بيضحك علشان ينسى انما المتشائم ( الواقعي ) نسي ان هوا يضحك و ده بيبين الفرق بين الاتنين و عن حالة المتفائل اللي بردو الدنيا ما انصفتوش في نظرته التفائليه و بيضحك على ينسى كل اللي بيشوفه اما المتشائم ده فنسي يضحك اصلا بسبب الهموم اللي شايلها على اساس النظرة السوداوية الواقعية اللي غرقان بيها حتى اذنيه في الدنيا ديه ( فلا عجب ان الناس استغربت و قولولي بتحب الفرح زينا - لا تعليق ) هنفرح ازاي و مفيش حاجة بتثبتنا و بتمسكنا بالدنيا غير حاجة واحدة بس و هي زي ما اتفقنا حسن الظن بالله سبحانه و تعالى و اللي بيدينا امل احسن في بكره

لكن الحقيقة علشان اكون منصف ان حتى النظرة الواقعية ديه او التشائمية زي ما تحبوا تسموها ممكن فعلا تكون سبب في انها تدي يأس و تحبط الشخص في ان هوا يستغل فرص قدامه و يرفضها بغباءه بسبب ان شايف ان الوضع نحس فعلا و ده بالظبط هوا سوء الظن بالله و عدم التوكل عليه و الحقيقة اللي ممكن توضح كدا مقوله عجبتني بردو و هي لي هاري ترومن لما قال

"A pessimist is one who makes difficulties of his opportunities and an optimist is one who makes opportunities of his difficulties."

و بيقول ان المتشائم هوا الشخص اللي بيعمل عقبات و صعوبات للفرص اللي جياله و ممكن ينتهزها بينما المتفائل هو اللي بيعمل فرص ممكن ينتهزها من الصعوبات و المشاكل اللي ممكن تقابله بالرغم من كلامه ده بردو في حد ذاته نظره تفاؤليه مش واقعية

بالرغم من ان الناس مش عجبها اني بطول بس لازم اطول علشان اوضح بالظبط اللي اقصده و اللي عايز اقوله و الله انا مش متشائم انا افضل اني اشوف الواقع و الاسباب و اتحرك و افكر على هذا الاساس اه يمكن اكون كئيب حبتين بس مش متشائم علشان كدا بحب اقول انا يمكن يكون اصحابي بيقولوا عليا متشائم لكن انا احب اقول على نفسي واقعي و في نفس الوقت انا متأكد ان محدش عنده كمية الامل اللي انا بنظر بيها للدنيا انها ممكن تيجي في يوم ممكن تكون مكان احسن لينا كلنا علشان كدا سيبكوا بئى من مقولات الناس اللي فاتت ديه كلها و اقول انا كلمتي خذوها على لساني زي ما انا شايف الموضوع ده و احب اقول

المتشائم ما هو الا شخص متفائل و لكنه اكثر واقعية

احب اسمع رائيكم في الموضوع و سورري على الاطالة

سلام

انا اُدون للبيئة

بسم الله الرحمن الرحيم

النهاردة يوم 15 اكتوبر و النهاردة يعتبر يوم عالمي للمدونين طبعا انا على يقين ان الكثير من المدونين ميعرفوش اصلا اليوم ده بتاع ايه لكن اقولوكوا انا اليوم ده بتاع ايه...شوفت الموضوع ده على موقع بلوجر نفسه في البلوج بتاع بلوجر المهم الحملة ديه عبارة عن يوم عالمي هيجتمع فيه اكتر من 14000 مدونة على مستوى العالم علشان يتكلموا عن موضوع واحد وهوا موضوع البيئة عايزين يخلوا المدونين كلهم يجتمعوا في اليوم ده و كل واحد يشارك بموضوع متعلق بالبيئة و يوصل لمستمعيه اهمية الحفاظ على البيئة ديه اللي كلنا عايشين فيها و اللي باتت مهددة فعلا بسبب افعال البشر زي مهنتكلم دلوقتي فبصراحة حبيت اني اشارك مع الناس دول بان احنا لازم نوصل رسالة للناس اللي بتقرالنا و على فكرة ديه المرة الاولى اللي بتنظم فيها الحدث ده و هيتكرر كل سنة...فعلشان كدا بوست النهادره هنتكلم فيه على البيئة بتاعتنا و ندردش شويه عنها و اللي عايز يعرف اكتر عن الحوار ده يا أما يدخل على الموقع بتاع الحدث ده او ممكن تشوفوا الفيديو ده اللي يعتبر برومو عن الحوار ده كله

طيب..اولا زي ما احنا عارفين بالنسبة هنا لبلدنا الجميلة ديه ان احنا شعب جاهل (متفهمونيش غلط) اقصد ان احنا شعب تقريبا عنده جهل بيئي بان ازاي نحافظ على بيئتنا و نحميها من التلوث و ايه الطرق اللي ممكن نحمي بيها البيئة ديه و بعدين اصلا لما نفك جهل الامية بتاع القراءة و الكتابة نبئى نبص للجهل البيئي علشان نحل مشكلتة و ديه قضية تانيه سيبنا منها دلوقتي اللي اقصده مثلا لو سئلت واحد و تقلوا ازاي بتحافظ على البيئة هيقولك زي مهو مكتوب على الشيبسي من ورا حافظوا على نظافة مدينتكم و انه يرمي الكيس بعد كدا في الزبالة و تلاقيه في الاخر اصلا بيرميه في الشارع ممكن يكون ده اقصى علم عنده بالمحافظة على البيئة و بعدين له حق اصل مين اللي هيوعيه لكن بردو عليه غلط ان اذا ملقاش حد يوعيه لازم يسعى بنفسه و يعرف ازاي يقدر يحمي و يساهم في الحفاظ على البيئة اللي هوا عايش فيها


لكن يبدو ان احنا عندنا مشكلة عويصة اوي و ديه بئى فينا كلنا كبشر ان احنا عايشين في الدنيا ديه و فاكرين ان احنا ملناش تأثير على المكان اللي احنا عايشين فيه او على الكوكب كله حتى لان الناس فاكرة ان الكوكب اكبر من احنا ممكن نأثر على كوكب بالحجم ده لكن للاسف ده مش صحيح احنا لينا تأثير سلبي جدا على كوكب الارض و بدأ يتجلى التأثير ده في بما يسمى بالاحتباس الحراري و اللي هوا ببساطة ظاهرة بيحصل فيها ارتفاع لدرجة حرارة الارض بسبب زيادة نسبب بعض الغازات الضارة للغلاف الجوي زي ثاني اكسيد الكربون و الميثان مثلا و الغازات ديه طبعا سببها نشاطات الانسان اللي بيقوم بيها من صناعة لعوادم السيارات لعدة اسباب تانيه بتساهم كتير جدا في زيادة نسب الغاز ديه وده شرح بسيط للظاهرة ديه و الظاهرة ديه الحقيقة هتتسبب مشاكل كتير جدا جدا لو احنا كبشر مبدأناش ناخد بالنا من الظاهرة ديه لانها هي السبب في التغيرات المناخية اللي بدأنا نشاهدها زي الزيادة الملحوظة في عدد الاعاصير و الاضطرابات اللي بقينا نشوفها في الفصول المختلفة في مواعيدها و الفيضانات اللي بتجتاح العالم دا غير طبعا ذوبان الاقطاب بسبب ارتفاع درجة الحرارة و ده بدوره هيؤدي الي غرق الكثير و الكثير من المناطق المنخفضة بالنسبة لمستوى سطح البحر دا غير طبعا زيادة ظاهرة اسمها ظاهرة النينيو و الظاهرة ديه مشكلتها انها تعمل فيضان و اعاصير في مناطق و تلاقيها عملت جفاف و قحط في اماكن تانيه و ده هيسبب زيادة المناطق الجافة جفافا و بالذات طبعا في القارة الافريقية علشان تتبهدل اكتر مهي متبهدلة اصلا فطبعا هتجف منابع الانهار و ده هيهدد مناطق كتيرة مش بقلة الميه بس و بقلة الغذاء كمان

طبعا ده كلام بسيط عن اللي ممكن يحصل و الكلام اللي فات مش كلام هرتله دا كلام عن دراسة و علم من اكثر علماء الارض خبرة و الناس دول اكثر الناس صدقا لانهم بيتكلموا بالارقام مش من فراغ او ده بالنسبة ليا على الاقل..لمن ان مش عايز اتوغل في قصة الاحتباس ديه لان ممكن نفردلها موضوع لوحده لكن كنت عايز القي الضوء بس على مدى اثر الانسان و نشاطاته عل الارض و اد ايه الضرر ممكن يكون كارثي

طيب ايه اللي ممكن نعمله اقولكوا ممكن نعمل كتير لكن بالنسبة لينا في مصر ممكن متفرقش اوي لان احنا اسهاماتنا في الثلوث المسبب للظاهرة العالمية ديه ضئيل مش زي دول تانية مثلا زي امريكا و الصين و الاتحاد الاوربي و اليابان لكن ده مش معناه ان احنا معندناش تلوث لأ مصر من اكثر الدول اللي حالتنا حالا دا كفاية القاهرة لوحديها اللي تعتبر من المدن شديدة الكثافة السكانية و شديدة التلوث كمان و طبعا التلوث ده مش قاصر على التلوث في الجو دا تلوث في الجو و البر و البحر و تحت الارض و في كل حتة بسم الله ما شاء الله يعني و اكيد طبعا ان الحكومة ليها دور كبير جدا في كدا بس مش معنى كدا بردو ان احنا كبشر منقدرش نتصرف في حدود المتاح لينا يعني مثلا الاقتصاد في استهلاك الكهرباء مثلا ممكن الناس تقولك ايه يا عم انت خايف من الفواتير ولا ايه هقولوا يا سيدي ابدا لانك لما انت بتقتصد في استهلاك الكهربا هتقلل من الكهربا اللي انت بتسحبها و بالتالي لما الناس تعمل كدا هتجبر الشركة المنتجة للكهربة انها تقلل من انتاجها ده و اللي بتستخدم في انتاج الكهربة ديه البترول اللي بيكون عامل مهم في تلوث الجو فشوف لما كلنا نقلل من استهلاك الكهربا هنساهم بشكل غير ملحوظ في نظافة الجو اللي كلنا بنستنشقه و له تأثير كبير على صحتنا و مش معنى كدا اني بقولك متستخدمش كهربا لا استخدم زي ما انت عايز لكن للي ضروري و اللي انت محتاجة فعلا زي متشغلش الاضاءة في الاوض اللي انت مش قاعد فيها و اظبط التكييف على درجة مرتفعة نسبيا و متشغلوش بردو في الاوض اللي انت مش قاعد فيها يعني و الحقيقة في امثلة كتير ممكن تقولك ازاي تقتصد في الاستهلاك ده و الحقيقة ان الحكومة ليها دور في التوعية ديه و خير دليل على كدا اللي عاملاه دولة عربية اللي هي الكويت لو كنتوا بتابعوا الفضائية بتاعتها كنت هتشوف ده فز ماقولتلك بعض النشاطات اللي ممكن نعملها ممكن تفرق جدا في نظافة المحيط اللي حوالينا

طيب ممكن نعمل ايه كمان ممكن نهتم بالزراعة ايدينا في ايد الحكومة بين قوسين طبعا و ايد الناس اللي ممكن نقوم بيها بتشجير اماكن كتير ممكن تكون مستنقعات او اكوام زبالة لمناطق خضرة اللي اكيد هتساهم في نظافة البية سواء بالنسبة للتارب من الجو او امتصاص ثاني اكسيد الكربون و تقليل التلوث السمعي دا غير طبعا المنظر الجمالي اللي بيضفيه المناطق الخضرة على المكان علشان كدا العالم كله دلوقتي بئى يتجه لزيادة الخضرة و ده كان شعار يوم البيئة العالمي السنة اللي فاتت او اللي قبليها تقريبا و ده بردو اللي قدرت تحققه دولة عربية بحترمها جدا هلي الامارات مش فاكر فين بالظبط في دبي ولا ابو ظبي بس قدرو فعلا يحولوا مناطق صحراوية كبيرة جدا لخضار و اتمنى ان احنا نعمل حاجة زيهم

طيب ممكن نعمل ايه كمان اه و الله ممكن نبص بردو للزبالة بتاعتنا اللي بتتاخد (دا اذا كانت بتتاخد اصلا) و بعد كدا بتتحرق و تتسبب في تلوث الجو بطريقة فظيعة ممكن بئى نبئى زي الناس المحترمة و ناخد على ايد بعض الافكار اللي موجودة فعلا و نهتم ببما يسمى باعادة التصنيع يعني دلوقتي ناخد كل حاجة على كدا زي الزجاج و البلاستك و الورق و نعيد تصنيعهم لان اللي ممكن كتير من الناس ميعرفوش ان اعادة التصنيع ده مش بس بيخلينا نعيد استخدام الحاجة القديمة و بس دا بيوفر كتير جدا جدا في الطاقة اللي هتستخدم اصلا لتصنيع الشيء ده من جديد لان الطاقة ديه زي ما اتفقنا بتتاخد من اللي بينتجوها و خلاص احنا عرفنا انتاجها بيسبب ايه في باعدة التصنيع هنحقق نقطتتين مهمين جدا جدا و هما ان احنا اتخلصنا من الزبالة بطريقة نضيفه جدا جدا جدا بدون اي ضرر و في نفس الوقت قدرنا نوفر طاقة كتير جدا كانت هتستخدم في تصنيع الشيء ده من البداية و للاسف في دول العالم المتحضر قامت صناعات باكملها على فكرة اعادة التصنيع ديه لكن اتمنى انها تتاخد في مصر على حجم اكبر من كدا بدعم حكومي علشان توفر على نفسها كتير لان للاسف لو عندنا حكومات واعيد هتعرف ازاي تتخلص من مشكالها اللي هي الزبالة و توفر من طاقتها اللي بتتفع فيها فلوس اللي هي الكهربه و تشغل شبابها و بالتالي هتقلل من البطالة لان الحوار محتاج ايادي عاملة كتير لكن طبعا انتوا عارفين حال البلد اللي احنا عايشين فيها اللي حتى الزبالة مش عارفين يلموها ازاي اصلا مع ان ممكن تتحل هوا لو اعتمدت على الشعب حق الاعتماد

للاسف في حاجات كتير ممكن نقوم بيها لكن للاسف في الغالب بتكون فيه هيئة ما مسئولة عن التوعيه و انها تاخد بايد الناس لكن بردو احنا في النهاية لينا رب اسمه الكريم (حكومة بتفهم من عندك يا رب) للاسف ان عايز اكتب كمان عن الطرق اللي ممكن نحاول بيها ان احنا نحافظ على بلدنا و المكان اللي عايشيين فيه لكن كل ما اشوف حاجة الاقي ان احنا بعاد جدا عن ان احنا نحقق حاجة زي كدا لان للاسف ازا كنا محتاجين حكومة واعية فبردو عايزين كمان شعب واعي يعرف ازاي يتأقلم مع المتغيرات ديه و ايديهم في ايد بعض يحققوا المستحيل فحتى دا كمان مش شايفه

طبعا البوست ده ممكن يكون غريب عن الحالة العامة لغالبية الناس ممكن يستغربوا حتى انا ليه بكتب في حاجة زي كدا الا اني انا من المهتمين بالقضايا العالمية ديه و بتابع دايما اخر الاخبار عن كل الحاجات ديه لان احنا كلنا بشر كلنا راكبين نفس المركبة لو مخدناش بايد بعض المركبة ديه مش هتمشي دا بالعكس هتخرب مننا و هتخرب في الاخر و المركبة ديه طبعا اللي هيا كوكب الارض لازم نوحد جهودنا علشان نقضي على كل ما يعكر صفو الحياة على سطح الارض بالظبط زي ما عملنا مع طبقة الاوزون و اللي بفضل الجهود العالمية بدأ الثقب ده فعلا في التقلص ايوه نقدر نعمل كتير احنا بشر ربنا ادانا حاجتين مهمين الارض اللي عايشين عليها و اللي سبحان من خلق لو تعرفوا اد ايه قدرة الكوكب ده على التكيف مع الظروف اللي بيمر بيها لكن للاسف مبقاش يقدر لان احنا كبشر بئينا قاسيين عليه اوي و ربنا وهبنا بردو العقل اللي قدرنا بيه ان احنا ندرك كويس المشاكل ديه و كمان المقدرة ان احنا نقدر نعرف الحلول للمشاكل ديه ولا احنا دايما كدا بنتكلم بس و بنكر بس و مفيش فعل لأ في ناس شغالة و ناس بتنام و تصحي على المشاكل ديه و جل تفكيرهم في انهم يوصلونا لبر الامان علشان كدا بحمد ربنا على وجود ناس زي ديه و ان مش كل العالم زينا في مصر و بدعيلهم ان ربنا يديهم على اد نيتهم و يوفقهم و يزدهم علم على علمهم

انا اتكلمت كتير و صدقوني ممكن اتكلم اكتر و اكتر لولا ان الساعة داخله على تلاته بعد منتصف الليل و عايز انام بصراحة لان ضهري وجعني من كتر القاعدة و الكتابة لكن اتمنى اني مجهودي ده ميروحش هباء و يستفاد بيه ولو حتى شخص واحد عموما الموضوع مفتوح للنقاش و ابداء الاراء المختلفة و في النهاية احب اقول اني سعيد بمشاركتي في اليوم العالمي للمدونين للبيئة و اتمنى اني اكون على اد الحدث..يلا كفاية عليا و عليكوا

سلام

عيد سعيد

بسم الله الرحمن الرحيم

كل سنة و انتوا طيبين و عيد سعيد علينا كلنا ان شاء الله و اسف ان كنت مشغول اليومين دول عن الناس الحلوين دول لكن ان شاء الله هيكون لينا كلام كتير و كلام كبير اوي اوي بس بعد اما كلنا نعيد..يلا اسيبكوا دلوقتي...سلام و كل سنة و انتوا كلكوا بخير و سعادة

سلام