مقتطفات

السلام عليكم

في البداية احب اقول بس كل سنة الناس كلها طيبة وبخير و رمضان كريم هوا صحيح رمضان قرب يخلص بس مش مشكلة بردو رمضان كريم (: .. المهم الواحد رجع اخيراً تاني بعد فترة كبيرة جدا من اخر بوست بس بصراحة الدنيا كانت متلعبكة اخر حاجة و انتوا عارفيين رمضان الوقت فيه بيبئى عامل ازاي و ده السبب اللي الواحد فيه مبيحسش بالوقت و بيحس ان الوقت عدى بسرعة اوي و ده بيزعلنا لان بجد رمضان شهر لا يعوض ربنا يعيده علينا ان شاء الله و الناس تكون بخير

اما بالنسبة للبوست ده فا محدش يسألني دا ايه هوا هيكون كوكتيل كدا مقتطفات سريعة من حاجات بس كنت عايز اقولها و خصوصا اني مصدقت اجيب وقت مركز فيه و محدش موجود في البيت يضايقني و اكتب براحتي

-------------

في البداية بس احب اقول شكرا للناس اللي علقت على اخر بوست و اللي بجد كانوا سند و يمكن يكونوا هما صح بس في رأيهم بالرغم من اني مازلت حاسس نفس الاحساس لكن هتغلب عليه بالاستمرار في الكتابة و كنت عايز اوضح بس ان في ناس اعتقدت اني هسيب التدوين و مش هرجع تاني بس ده طبعا ما اعتقدش ان هوا هيحصل لان التدوين بئى بالفعل خلاصي لاني بفضفض لنفسي قبل اي حد تاني و بجد استريحت لما كنت بخرج الحاجات اللي كانت بتشغل تفكيري و استريحت اكتر لما لقيت تعقيب ناس عليها يأما اكدولي حاجات مش كنت متأكد منها يأما فتحولي نقط و زوايا جديدة مكنتش شايفها يأما كانوا سند و عون للشخص في الوقت اللي بيحتاج فيه كل واحد مننا لوجود اشخاص بقربه حريصين عليه .. فا ديه نقطة بس كنت عايز اوضحها و اشكر بشدة الناس ديه

-------------

قد ايه النجاح ده شيء جميل بمعنى انك مثلا شاركت في نشاط و تعبت فيه و اجهدت جدا جدا لكن بمجرد انك تلاقي تعبك ده انتهى بالنجاح و اصبحت الاول على مجموعتك في النشاط او التدريب اللي كنت بتقوم بيه ده بتنسى كل لحظة تعب و كل لحظة اجهاد حسيتها لانك بتلاقي تعبك جيه بفايدة و علشان اكون واضح كان تدريب عندنا في شغلي و كان المفروض نكون موجودين كل يوم الصبح للتدريب بجانب شفتات عملنا فتخيل بئى ضيف ده كله للرمضان و انت اصلا يدوب مش نمت كفاية يدوب ساعتين تلاتة بالعافية و مطلوب منك انك تركز في تدريب و شغلك و انت اصلا يدوب شايف قدامك و بعد ده كله تلاقيك مرة واحدة نجحت بالشكل ده بجد احساس جميل اوي

-------------


اعتقد ان المقولة بالشكل ده احسن " شق طريقك باحترامك للاخرين بدلا من ان تشقه بسيفك " بجد لقيت ان كدا احسن لان بالفعل احترامك للاخرين هيفتحلك ابواب كتيرة اوي (حتى لو كان باب اتوبيس بعد موقف مريت بيه) بمجرد انك احترمت الناس بتلاقي المعاملة متغيرة بالفعل لدرجة بتجبر اشخاص اصلا مش كويسين انهم يعاملوك بكل الاحترام فقط لانك احترمتهم و عاملتهم بالشكل المناسب و قد ايه الاحترام ده ممكن تظهره للاشخاص دول بكلمات بسيطة جدا المفروض مش نهملها و نظهر احترامنا للناس اللي تستحق الاحترام و اللي متستحقش يعني انا مثلا بالنسبة ليا كشخص اللي يحترمني اشيله فوق راسي حتى لو مش هيساعدني في حاجة او كان مجرد شخص ما اعرفوش اما العكس بئى اللي بيعاملني بقلة الاحترام فا الشخص ده مش يهمني في شيء حتى لو هيديني الدنيا كلها

-------------

شهر رمضان ده بالفعل شهر الخير شيء جميل لما تلاقي الناس بتسعى انها تعمل الخير فيه لكن حابب بس اني امسك نقطة اعلق عليها و الفت النظر ليها و هي ان من ضمن اعمال الخير ديه الناس اللي بتزور الايتام و المرضى و بتحاول تخفف عنهم وحدتهم و تشاركهم فرحتهم وتساعدهم بقدر الامكان بس احب اقول بس ان يا جماعة الايتام و المرضى دول موجودين طول السنة مش في رمضان بس بمعنى ان ياريت ميكنش فعل الخير ده و اللي هوا شيء جميل جدا قاصر على شهر رمضان فقط عايزين الناس تتابع فعل الخير و تستمر على الزيارات و المساعدة و تكون بصفة دورية كل شهر مثلا ونشوف الاماكن اللي بجد محتاجة مساعدة و مقفيش حد واخد باله منها (مش اللي بيتعملها اعلانات كل يوم في التلفزيون) يعني شوف الاماكن اللي الناس اهملتها و خد عهد على نفسك انك هتكون موجود مع الناس ديه بصفة دورية و تشوف احتياجتهم و متطلباتهم و متنساش ان مش اللي بتحتاجه الاماكن ديه مساعدات مادية فقط بالعكس ده زيارتك و وجودك في وسطيهم اهم الف مرة من اي مبلغ ممكن تساعد بيه .. اللي عايز اقوله ان جميل فعل الخير و الاجمل لو كنت دائم عليه مش في شهر واحد

-------------

احنا ناس و الله محترمين جدا و خصوصا في شهر رمضان و كلنا بنحاول نتقرب اكثر الي الله و ديه فرصة ان الاجر مضاعف و كل واحد بيحاول يجتهد على قد ما يقدر و علشان كدا في اولى الليالي الفردية و لله الحمد نشلوا الشبشب بتاعي (ناس محترمين جدا) و ده بردو اجتهاد من الناس انهم يجمعوا اكبر عدد من الشباشب فا ربنا يهديهم يا رب و ان والله مسامح اللي خده بس كنت اتمنى ان اللي بيسرق ده حتى يستحي من ربنا و ميسرقش في رمضان (في رمضان و في غيره بس اهو) يعني في الوقت اللي الناس كلها بتحاول تتقرب بطاعة هوا بيقوم بمعصية عموما ربنا يهدي الجميع

-------------

اه بالمناسبة يوم 15 اكتوبر هيكون للمرة التانية زي السنة اللي فاتت اليوم العالمي للتدوين و اللي في السنة اللي فاتت اتكلموا عن البيئة و عن تأثيرنا عليها انما المرة ديه بئى اختاروا انهم يتكلموا عن الفقر في العالم و الالاف اللي بتموت يوميا من الجوع و اغلبيتهم طبعا في افريقيا فا فكرة اليوم قائمة على ان كل المدونين في العالم بيجتمعوا على انهم يختاروا موضوع محدد و ينشروا فيه و كل واحد حسب وجهة نظره للموضوع و ايه الحلول اللي ممكن تخلص العالم من المشكلة ديه و هكذا يعني على امل انهم يوصلوا الموضوع ده لاكبر عدد من الناس و اللي هما قراء المدونين دول يمكن يغير و لو حاجة بسيطة و نقدر ن خلاله نساعد اللي محتاج فعلا و اللي عايز اقوله ان مش شرط نتكلم عن الفقر في العالم ممكن مثلا نتكلم عن الفقر في بلادنا و ايه اللي بنعاني منه و ده لينك السايت اللي بينظم الحوار ده ممكن تتطلع عليه لو حابب تشارك في اليوم ده و اتمنى ان عد من المدونين العرب يشاركوا في الحوار ده علشان يكون لينا وجود في مجتمع التدوين الدولي و نشارك العالم كله نفس الفكرة

-------------

و الله الناس بتوع جوجل دول ناس محترمين جدا دايما بيطوروا و بيسهلوا علينا المتابعة و خصوصا بعد الاضافات الجميلة اللي عملوها على بلوجر و اللي اخرها كان حكاية الفولوينج او انك تتابع يعني تحديثات المدونات اللي بتحب تتابعها من الداش بورد و كمان تعلن انك فولور لمدونة معينة و تضيف جادجيد كمان للموضوع ده (لسه شايف الموضوع ده النهاردة) .. بصراحة انا معجب جدا بالشركة ديه افكارهم جميلة جدا و بيربطك بالدنيا كلها من خلال اكونت واحد من خلاله تقدر تستخدم خدمات جوجل كلها و الاجمل كمان ان كلها مجاناً فا احقاقاً للحق يعني الناس ديه زي الفل و بجد جوجل اصبح و هتكون امبراطورية فعلا بتهدد عرش ميكروسوفت في مجال البرمجيات و خدمات الانترنت .. بجد ربنا يزيدكوا كمان و كمان

------------

بس اعتقد ديه النقط اللي كنت عايز اسردها سريعا علشان اخرجها من دماغي لان الحاجات اللي بكتبها هنا زي ما تقولوا كدا الاوت بوت بتاع دماغي او نتاج تفكير فا اللي بكتب هنا بفضي مساحة في دماغي علشان اشغلها تاني بحاجات تانية و اجي اصدعكوا بيها ..عموما كل سنة و الناس كلها طيبة و بما ان العيد خلاص قريب
فا احب اقول بردو للناس كلها عيد سعيد عليكوا ان شاء الله

تحياتي لكم جميعا
و السلام ختام

غريبة ؟؟

غيبت كتير عن المدونة مش لاسباب حرجة يعني لكن لانشغالي فقط مش اكتر

و حاولت اكتب كذا مرة عن كل اللي مريت بيه الفترة اللي فاتت

و اللي فيها حاجات كتير محيراني و اتمنى اني الاقي ليها تفسير

لكن فجأة و انا بكتب حسيت ان الكلام ملهوش اي معنى و اني ضيعت جزء مهم من حياتي

في فلسفة جوفاء لا هتودي ولا تجيب

و ان الكلام اللي بقوله

مجرد كلام فارغ

!!!

It is a matter of choice

و انا على النت لقيت شخص قال المقولة ديه فعجبتني اوي و خلتني افكر في نقط كتير بتحيرني الاخ ده بئى قال ايه

Life is a stream of choices given to us.

عايز يقول ان الحياة هي سيل متدفق من الخيارات المتاحة لينا

عجبتني جدا و رديت و قولته لكن الاهم ان احنا نتخذ القرار الصائب في الوقت المناسب و الحقيقة ان ديه النقطة اللي بتدفعني للتفكير فيها خصوصا بعد بعض المواقف اللي حصلت في الفترة الاخيرة و اللي تجلى فيها مدى اهمية ان احنا نختار او نقرر ايه القرار اللي هنتخذه و خصوصا لما يكون القرار ده هيأثر سواء بالسلب او بالايجاب على حياتنا المستقبلية

لكن المشكلة ان الواحد بطبيعته بيتمنى ان اختيارته و قرارته اللي هيتخذها ديه تكون صائبة الا اني زي ما قولت انها مشكلة لاننا مش هنعرف اذا كان القرار اللي هنتخذه ده هوا القرار الصائب ولا لأ و هل هوا ده الوقت المناسب لاتخاذ القرار ده ولا لأ لكن المفروض ان ده ميكونش عائق لينا لاني اعتقد ان احنا لازم نتخذ القرار اللي احنا شايفين ان هوا الاصلح لينا حاليا و في المستقبل كمان و اذا الايام بعد كدا لم تثبت ان القرار اللي اتخذناه في الماضي ده لم يكن القرار الصائب فا اعتقد ان مش لازم نندم لان ممكن يكون كان القرار ده هوا الانسب في وقتها

و فيه مشكلة تانية كمان لما يكون القرار اللي انت هتتخذه ده من الخيارات المتاحة قدامك مش متعلق بشخصك و بحياتك بس لأ ده متعلق كمان بحياة و بمستقبل اشخاص حواليك سواء كانوا من العيلة او من الاصدقاء لان يمكن يكون قرارك ده قاسي او مناسب للاشخاص دول و للسبب ده بيكون اتخاذ قرار في الحالة ديه صعب و محتاج تفكير اكتر و المشكلة كمان ان ممكن يكون الاشخاص دول منتظرينك انك تتخذ قرار مناسب ليهم من وجهة نظرهم على الاقل لكن انت شايف العكس ان قرار زي ده مش هيكون مناسب ليهم لانك انت نفسك مش هتقدر تتأقلم مع القرار ده او بمعنى اصح انك يمكن تتخذ قرار مش مناسب ليهم لكن انت شايف ان هوا مناسب ليك و ليهم في نفس الوقت علشان كدا لازم يفهموا حاجة زي كدا و لازم يعرفوا ان قرارات بعض الاشخص قد تكون في مصلحتهم في النهاية بالرغم من ان ممكن متكونش لمصلحتهم في الوقت الحالي

هوا يمكن الموضوع غريب شويه بس ديه حاجة بتقابلنا كل يوم و لازم نتخذ قرار و نختار اختيار واحد اللي احنا شايفينه انسب لينا و للي حوالينا كمان علشان كدا زي ما هوا باين من عنوان التدوينة ان المشكلة فعلا هي مشكلة اختيار

داء الانتخة

مش عارف هوا دا عيب فينا ولا فيرس ولا موروثات جينية مصاب بيها الشعب (او علشان مش نعمم جزء كبير من الشعب) ولا ايه بالظبط بس اعتقد ان جزء كبير فعلا من الناس او بمعنى اصح من الموظفين و العاملين في الدولة
مصابين بداء الانتخة

هوا بصراحة انا قعدت ادور على مصطلح نقدر نطلقه على المرض ده بس لقيت ان ده مش بطال و داء الانتخة مقصود بيه بكل بساطة عدم رغبة الموظفين و العاملين بالقطاعات المختلفة بالدولة بالعمل يعني من الاخر لو يقدروا انهم يقدروا يقعدوا في بيوتهم طول الشهر و مرتبهم يجيلهم اخر الشهر على الجاهز من غير ما يكتبوا ورقة هيعملوا كدا او علشان اكون دقيق معاكوا ان ده هوا اللي بيحصل بالظبط علشان اكون واضح احب اشاركوا بالصورة ديه اللي التقطت من احدى المصالح الحكومية اللي بتقوم باعمال خدمية عن طريق قريب ليا اللي شاركنا بالظبط بالمهازل اللي بتحصل و اللي انا متأكد انها لا تخفى على الكثير منكم

ديه الصورة


طبعا ليا كذا تعليق على الصورة بس قبل نكمل موضوعنا و هي زي ما انتوا شايفين كدا الاجزاء المشار اليها بالاسهم اللي لونها احمر و كنت اشير فيها للهمزة او الهمزات اللي موجودين على الكلمات التلاتة و الحقيقة انا كنت ضعيف في النحو في المدرسة و مكنش دايس اوي بصراحة في قواعد الصرف و النحو لكن اللي متأكد منه ان الهمزات ديه مش في مكانها بالمرة و بس ديه حاجة كدا في السكة علشان نبين مدى جهل الناس بقواعد اللغة حتى البسيطة منها و خصوصا لو كان اللي كاتب الورقة ديه مهندس او بمعنى اصح مؤهل عالي المهم قضية اللغة ديه مش قضيتنا دلوقتي خلينا في اللي احنا بنتكلم فيه و نييجي بعد كدا لي النقطة التانية في الصورة و هي الكلمة اللي حطيت تحتها خطين و هي كلمة يومياً و الحقيقة ديه اللي دفعتني اني اكتب في النقطة ديه بمعنى ان المفروض ان احنا بنروح اشغالنا كل يوم يعني كلمة يوميأً ديه المفروض انها كلمة بديهية مش محتاجة ان صاحب الورقة ديه (المدير المسئول عن ادارة المكان) يكتبها في الورقة و يطلب من الموظفين و العاملين انهم يكونوا موجودين يوميا الساعة التاسعة صباحاً لكن الحقيقة المؤسفة طبعا انها مش بديهية لان كتير من الموظفين المصابين بداء الانتخة ميعرفوش حاجة اسمها الانتظام في العمل و الالتزام بالاعمال الموكلة اليه بل عدم ذهابه للعمل نهائياً و بردو مازال بيتقاضى مرتبه بصفة دورية بالرغم من ان هوا مش بيقوم بأي اعمال تذكر

ايوه للاسف فيه في كل مصلحة او قطاع الحكومي منهم طبعا كم من التسيب و الاهمال اللي لا احد يتخيلهم يعني لما في ناس مش بتروح شغلها الا يوم واحد في الشهر و هوا اليوم اللي بيقبضوا فيه مرتبهم و بقية الشهر كله في بيتهم و بيتكتب حضور في شغله يبئى اسمه تسيب و اهمال و قلة ادب و استهبال و قول كل اللي انت عايزه .. لما يكون بعض الناس مرضى و مش بيروحوا شغلهم و مرضهم ده كمان يمنعهم تماماً من اداء عملهم لكن بردو مش بيروحوا و مرتبهم بيروحلهم البيت يبئى اسمه اهمال و تسيب و في النقطة ديه بالذات محدش يقولي زي المسؤلين عن ادارة المكان و اللي بيسهلولهم حاجة زي كدا ان الناس ديه مريضة و بلاش نقطع عيشهم دول غلابة و هيجيبوا العلاج منين و كل الكلام ده كله لاني هرد عليهم و اقولهم مرضهم على رأسي من فوق (في حاجة اسمها تأمين صحي و اذا كان التأمين منيل بنيلة ديه مش مشكلتي دلوقتي) لكن في حاجة اسمها الحق حق و مش من الحق ابدا ان الناس دول يشغلوا مراكز المفروض انهم شغالين و شايفين شغلهم و هما اصلا مرضى و اللي بسبب حاجة زي كدا هيشغلوا اماكن كانت ممكن ناس تحل محلهم و يقوموا بشغلهم او بمعنى اصح احق منهم بالعمل لقدرتهم الصحية على القيام بالاعمال ديه .. و بردو يبئى اسمه اهمال و تسيب و استهبال لما الموظفين يتفقوا انهم يقسموا نفسهم مجموعتين على الايام بمعنى اني مجموعة تكون من الساعة 9 للساعة 11 و يروحوا المجموعة التانية تكمل بعد 11 علشان متبأش المكاتب فاضية و كذا دواليك و يبدلوا مع بعض النص يمشي 11 و نص يكمل و النص اللي كمل في اليوم اللي بعده يمشي بدري و النص اللي مشي بدري امبارح هوا اللي يكمل و هكذا طبعا انا عارف ان الكلام ده اغلبنا بنشوفه و عارفينه و يمكن في حاجات اسوء من كدا بكتير لكن السؤال ليه ده كله ؟؟

و الحقيقة اني في اسباب كتيرة بتسبب المشكلة ديه مثلا يعني ان المصالح و القطاعات الحكومية ديه بسبب ان الحكومة عايزة تشغل اكبر عدد ممكن علشان تقلل من البطالة وقعت في مشكلة كبيرة جدا و هي العمالة الزائدة ان مثلا المكان اللي بتكلم عليه ده فيه عدد موظفيين جدا لدرجة ان المكان اصلا مش متسع ليهم و بيضطر بعض الموظفين انهم يقعدوا في المطبخ بتاع المكان ده لعدم وجود مكان يتسع للعدد ده كله من الموظفين اللي المفروض ان هما يقوموا بالعمل اللي يقدر يقوم بيه عدد من الموظفين لا يتخطى عددهم عدد اصابع الايدين و العمالة الزيادة هل اللي بيستخبى وراها الناس اللي مش بيروحوا شغلهم و الناس اللي مرضى و هكذا

و بصراحة هوا في اسباب كتير بتسبب داء الانتخة ده زي انعدام الرقابة و الوسايط و المحسوبية و العشم اللي كنت عايز اتكلم عن كل نقطة فيهم بس مش قادر الحقيقة لكن اللي عايز اعرفه بجد بئى هوا هل فعلا الموظفين مش عايزين يشتغلوا هل فعلا داء الانتخة ده فينا وراثة بان احنا كشعب او جزء كبير منه عايزين نأنتخ في بيوتنا و مش عايز نعمل حاجة و مرتباتنا تجيلنا علي البيوت ؟ لان لو كدا فعلا تبئى مشكلة يبئى بأي حق بئى بنشتكي من الفساد و الحال السيء اللي وصلت ليه بلدنا و احنا اصلا السبب فيه .. بأي حق بنقول ان احنا عايزين نحقق نهضة و نعلو بشأن البلد ديه و احنا اصلا مش عايزين نشتغل و نقعد في بيوتنا ؟؟ يمكن صحيح الادارة نفسها و طبيعة العمل و انعدام الرقابة و التخلف في النظم الادارية اللي بتُتبع لادارة مصالحنا الحكومية هي السبب في الانتخة اللي احنا فيها ديه لكن بردو في نفس الوقت فين احنا من ضمايرنا ازاي هنحلل مرتباتنا ديه و احنا اصلا ما اشتغلناش ببصلة

و علشان كل الكلام اللي فاتت ده كله خلاني افكر فعلياً عن مدى قدرة المصالح و القطاعات الحكومية ديه بالقيام باعمالها بالكفاءة المطلوبة و يخلينا نفكر جدياً في استبدال القطاعات ديه بالقطاع الخاص اللي اكيد اكيد مش هتكون في نفس الكفتة اللي بتحصل في المصالح ديه لان طبعا معروف ازاي الشغل بيتم في القطاع الخاص اللي طبعا لا يسمح بوجود تجاوزات زي اللي بتحصل ديه هوا صحيح هيكون في بعض المشاكل زي ان القطاع الخاص هيشغل الحد الادنى من الاشخاص القادريين على القيام بالعمل المطلوب و ده يسبب زيادة في البطالة لكن على الاقل هنضمن ان هيكون اكثر كفاءة من القطاع الحكومي في القيام بالعمل ده و انا بتكلم في الحالة المثالية

عموما في النهاية بس حبيت اتكلم عن النقطة اللي خنقاني ديه بالرغم من اني متكلمتش بما فيه الكفاية و يمكن الدنيا ملخبطة شويه لاني مجهد حبتين بس المهم اكون قدرت اوصل النقطة اللي عايز اقولها و انا متأكد ان الحوار ده ليه زوايا و حوارات كتير ممكن نتشعب فيها و اللي على استعداد كامل اني اتناقش في اي نقطة محددة اي حد يحب يتناقش فيها

بس كدا
سلام

احساس بالعجز

امبارح و انا راجع من تدريبي كالمعتاد و بركب الموصلات بردو كالمعتاد و بعد ما الميكروباص حمل لقينا السواق بيقولنا يا جماعة الاجرة زادت خمسين قرش و طبعا احنا متوقعين حاجة زي كدا لان دا شيء طبيعي المهم بعد ما مشينا و لمينا الاجرة بالزيادة اللي اتفرضت طبعا بسبب قرارات زيادة السولار و البنزين لقينا السواق بيقولنا


و الله على عيني يا جماعة الزيادة ديه بس اعمل ايه العيشة بئت زفت زفت كل حاجة غليت و كل حاجة بئت نار الواحد مش عارف يلاحق ازاي و ازاي يجيب اي حاجة عياله محتجاها .. الرز بئى بكام و الزيت بئى بكام و السكر دا حتى العيش في بلدنا بيصرفوا لكل اسرة سبع ارغفة عيش بس ، السبعة دول ميكفوش حتى ولادي طيب اعمل ايه حرام اللي بيحصل فينا ده .. ديه مبقتش عيشه

و هوا بيتكلم صوته راح ببص في المراية اللي قدامه علشان اشوفه لقيته بيبكي و هوا بيندب حاله و حال العيشة و اللي عايشينها بصراحة شديدة محدش حتى قدر يواسيه و يقوله اي حاجة تهديه لان نواسيه ازاي و احنا محتاجين اللي يواسينا كلنا بس بجد الموقف كان سيء اوي بجد اخرسنا كلنا و خلى كل واحد يسرح في حاله و حاله الناس اللي مش لاقيه و اللي الاسعار بتشويهم يعني السواق ده على الاقل ليه مصدر رزق بيصرف عليه و على اسرته و قال كل ده على حاله فما بالكم باللي ملوش مصدر رزق او مصدر زهيد او محدود هيكون حاله ايه ؟؟ كل ده بيخلي الواحد عنده احساس بالعجز يعني عايز تساعد الناس عايز تعملهم اي حاجة بس مش عارف لان انت نفسك اصلا محتاج المساعدة لان ببساطة شديدة كلنا في مركب واحد لكن نفسك تغير و نفسك يكون فيه امل في بكره امل يتحقق على ايديك بس للاسف بتحس ان الامل ده بيموت جواك يوم بعد يوم .. بجد حاجة صعبة

و بعد اللي يحصل ده كله كل ما امشي الاقي الحاجة شيرين تطلعلي كدا من اي حته و تقول " مشربتش من نيلها طيب جربت تغنيلها " و الله يا شيرين شريبنا من نيلها و جربنا نغنيلها (لان ده اللي بنقدر عليه اصلا) و جربنا نمشي في شوراعها و نحكيلها (مهي الناس ماشية عماله تكلم نفسها ما هما كدا بيحكوا ليها) بس بصراحة يا شيرين مصر بئت بتستهبل اوي و نيلها بئى ملوث و شوارعها كلها زبالة حتى الاغاني بئت كلها نفاق فبعد اذنك شويه يا شيرين مش عايز اسمع صوتك تاني

سلام