It is a matter of choice

و انا على النت لقيت شخص قال المقولة ديه فعجبتني اوي و خلتني افكر في نقط كتير بتحيرني الاخ ده بئى قال ايه

Life is a stream of choices given to us.

عايز يقول ان الحياة هي سيل متدفق من الخيارات المتاحة لينا

عجبتني جدا و رديت و قولته لكن الاهم ان احنا نتخذ القرار الصائب في الوقت المناسب و الحقيقة ان ديه النقطة اللي بتدفعني للتفكير فيها خصوصا بعد بعض المواقف اللي حصلت في الفترة الاخيرة و اللي تجلى فيها مدى اهمية ان احنا نختار او نقرر ايه القرار اللي هنتخذه و خصوصا لما يكون القرار ده هيأثر سواء بالسلب او بالايجاب على حياتنا المستقبلية

لكن المشكلة ان الواحد بطبيعته بيتمنى ان اختيارته و قرارته اللي هيتخذها ديه تكون صائبة الا اني زي ما قولت انها مشكلة لاننا مش هنعرف اذا كان القرار اللي هنتخذه ده هوا القرار الصائب ولا لأ و هل هوا ده الوقت المناسب لاتخاذ القرار ده ولا لأ لكن المفروض ان ده ميكونش عائق لينا لاني اعتقد ان احنا لازم نتخذ القرار اللي احنا شايفين ان هوا الاصلح لينا حاليا و في المستقبل كمان و اذا الايام بعد كدا لم تثبت ان القرار اللي اتخذناه في الماضي ده لم يكن القرار الصائب فا اعتقد ان مش لازم نندم لان ممكن يكون كان القرار ده هوا الانسب في وقتها

و فيه مشكلة تانية كمان لما يكون القرار اللي انت هتتخذه ده من الخيارات المتاحة قدامك مش متعلق بشخصك و بحياتك بس لأ ده متعلق كمان بحياة و بمستقبل اشخاص حواليك سواء كانوا من العيلة او من الاصدقاء لان يمكن يكون قرارك ده قاسي او مناسب للاشخاص دول و للسبب ده بيكون اتخاذ قرار في الحالة ديه صعب و محتاج تفكير اكتر و المشكلة كمان ان ممكن يكون الاشخاص دول منتظرينك انك تتخذ قرار مناسب ليهم من وجهة نظرهم على الاقل لكن انت شايف العكس ان قرار زي ده مش هيكون مناسب ليهم لانك انت نفسك مش هتقدر تتأقلم مع القرار ده او بمعنى اصح انك يمكن تتخذ قرار مش مناسب ليهم لكن انت شايف ان هوا مناسب ليك و ليهم في نفس الوقت علشان كدا لازم يفهموا حاجة زي كدا و لازم يعرفوا ان قرارات بعض الاشخص قد تكون في مصلحتهم في النهاية بالرغم من ان ممكن متكونش لمصلحتهم في الوقت الحالي

هوا يمكن الموضوع غريب شويه بس ديه حاجة بتقابلنا كل يوم و لازم نتخذ قرار و نختار اختيار واحد اللي احنا شايفينه انسب لينا و للي حوالينا كمان علشان كدا زي ما هوا باين من عنوان التدوينة ان المشكلة فعلا هي مشكلة اختيار

داء الانتخة

مش عارف هوا دا عيب فينا ولا فيرس ولا موروثات جينية مصاب بيها الشعب (او علشان مش نعمم جزء كبير من الشعب) ولا ايه بالظبط بس اعتقد ان جزء كبير فعلا من الناس او بمعنى اصح من الموظفين و العاملين في الدولة
مصابين بداء الانتخة

هوا بصراحة انا قعدت ادور على مصطلح نقدر نطلقه على المرض ده بس لقيت ان ده مش بطال و داء الانتخة مقصود بيه بكل بساطة عدم رغبة الموظفين و العاملين بالقطاعات المختلفة بالدولة بالعمل يعني من الاخر لو يقدروا انهم يقدروا يقعدوا في بيوتهم طول الشهر و مرتبهم يجيلهم اخر الشهر على الجاهز من غير ما يكتبوا ورقة هيعملوا كدا او علشان اكون دقيق معاكوا ان ده هوا اللي بيحصل بالظبط علشان اكون واضح احب اشاركوا بالصورة ديه اللي التقطت من احدى المصالح الحكومية اللي بتقوم باعمال خدمية عن طريق قريب ليا اللي شاركنا بالظبط بالمهازل اللي بتحصل و اللي انا متأكد انها لا تخفى على الكثير منكم

ديه الصورة


طبعا ليا كذا تعليق على الصورة بس قبل نكمل موضوعنا و هي زي ما انتوا شايفين كدا الاجزاء المشار اليها بالاسهم اللي لونها احمر و كنت اشير فيها للهمزة او الهمزات اللي موجودين على الكلمات التلاتة و الحقيقة انا كنت ضعيف في النحو في المدرسة و مكنش دايس اوي بصراحة في قواعد الصرف و النحو لكن اللي متأكد منه ان الهمزات ديه مش في مكانها بالمرة و بس ديه حاجة كدا في السكة علشان نبين مدى جهل الناس بقواعد اللغة حتى البسيطة منها و خصوصا لو كان اللي كاتب الورقة ديه مهندس او بمعنى اصح مؤهل عالي المهم قضية اللغة ديه مش قضيتنا دلوقتي خلينا في اللي احنا بنتكلم فيه و نييجي بعد كدا لي النقطة التانية في الصورة و هي الكلمة اللي حطيت تحتها خطين و هي كلمة يومياً و الحقيقة ديه اللي دفعتني اني اكتب في النقطة ديه بمعنى ان المفروض ان احنا بنروح اشغالنا كل يوم يعني كلمة يوميأً ديه المفروض انها كلمة بديهية مش محتاجة ان صاحب الورقة ديه (المدير المسئول عن ادارة المكان) يكتبها في الورقة و يطلب من الموظفين و العاملين انهم يكونوا موجودين يوميا الساعة التاسعة صباحاً لكن الحقيقة المؤسفة طبعا انها مش بديهية لان كتير من الموظفين المصابين بداء الانتخة ميعرفوش حاجة اسمها الانتظام في العمل و الالتزام بالاعمال الموكلة اليه بل عدم ذهابه للعمل نهائياً و بردو مازال بيتقاضى مرتبه بصفة دورية بالرغم من ان هوا مش بيقوم بأي اعمال تذكر

ايوه للاسف فيه في كل مصلحة او قطاع الحكومي منهم طبعا كم من التسيب و الاهمال اللي لا احد يتخيلهم يعني لما في ناس مش بتروح شغلها الا يوم واحد في الشهر و هوا اليوم اللي بيقبضوا فيه مرتبهم و بقية الشهر كله في بيتهم و بيتكتب حضور في شغله يبئى اسمه تسيب و اهمال و قلة ادب و استهبال و قول كل اللي انت عايزه .. لما يكون بعض الناس مرضى و مش بيروحوا شغلهم و مرضهم ده كمان يمنعهم تماماً من اداء عملهم لكن بردو مش بيروحوا و مرتبهم بيروحلهم البيت يبئى اسمه اهمال و تسيب و في النقطة ديه بالذات محدش يقولي زي المسؤلين عن ادارة المكان و اللي بيسهلولهم حاجة زي كدا ان الناس ديه مريضة و بلاش نقطع عيشهم دول غلابة و هيجيبوا العلاج منين و كل الكلام ده كله لاني هرد عليهم و اقولهم مرضهم على رأسي من فوق (في حاجة اسمها تأمين صحي و اذا كان التأمين منيل بنيلة ديه مش مشكلتي دلوقتي) لكن في حاجة اسمها الحق حق و مش من الحق ابدا ان الناس دول يشغلوا مراكز المفروض انهم شغالين و شايفين شغلهم و هما اصلا مرضى و اللي بسبب حاجة زي كدا هيشغلوا اماكن كانت ممكن ناس تحل محلهم و يقوموا بشغلهم او بمعنى اصح احق منهم بالعمل لقدرتهم الصحية على القيام بالاعمال ديه .. و بردو يبئى اسمه اهمال و تسيب و استهبال لما الموظفين يتفقوا انهم يقسموا نفسهم مجموعتين على الايام بمعنى اني مجموعة تكون من الساعة 9 للساعة 11 و يروحوا المجموعة التانية تكمل بعد 11 علشان متبأش المكاتب فاضية و كذا دواليك و يبدلوا مع بعض النص يمشي 11 و نص يكمل و النص اللي كمل في اليوم اللي بعده يمشي بدري و النص اللي مشي بدري امبارح هوا اللي يكمل و هكذا طبعا انا عارف ان الكلام ده اغلبنا بنشوفه و عارفينه و يمكن في حاجات اسوء من كدا بكتير لكن السؤال ليه ده كله ؟؟

و الحقيقة اني في اسباب كتيرة بتسبب المشكلة ديه مثلا يعني ان المصالح و القطاعات الحكومية ديه بسبب ان الحكومة عايزة تشغل اكبر عدد ممكن علشان تقلل من البطالة وقعت في مشكلة كبيرة جدا و هي العمالة الزائدة ان مثلا المكان اللي بتكلم عليه ده فيه عدد موظفيين جدا لدرجة ان المكان اصلا مش متسع ليهم و بيضطر بعض الموظفين انهم يقعدوا في المطبخ بتاع المكان ده لعدم وجود مكان يتسع للعدد ده كله من الموظفين اللي المفروض ان هما يقوموا بالعمل اللي يقدر يقوم بيه عدد من الموظفين لا يتخطى عددهم عدد اصابع الايدين و العمالة الزيادة هل اللي بيستخبى وراها الناس اللي مش بيروحوا شغلهم و الناس اللي مرضى و هكذا

و بصراحة هوا في اسباب كتير بتسبب داء الانتخة ده زي انعدام الرقابة و الوسايط و المحسوبية و العشم اللي كنت عايز اتكلم عن كل نقطة فيهم بس مش قادر الحقيقة لكن اللي عايز اعرفه بجد بئى هوا هل فعلا الموظفين مش عايزين يشتغلوا هل فعلا داء الانتخة ده فينا وراثة بان احنا كشعب او جزء كبير منه عايزين نأنتخ في بيوتنا و مش عايز نعمل حاجة و مرتباتنا تجيلنا علي البيوت ؟ لان لو كدا فعلا تبئى مشكلة يبئى بأي حق بئى بنشتكي من الفساد و الحال السيء اللي وصلت ليه بلدنا و احنا اصلا السبب فيه .. بأي حق بنقول ان احنا عايزين نحقق نهضة و نعلو بشأن البلد ديه و احنا اصلا مش عايزين نشتغل و نقعد في بيوتنا ؟؟ يمكن صحيح الادارة نفسها و طبيعة العمل و انعدام الرقابة و التخلف في النظم الادارية اللي بتُتبع لادارة مصالحنا الحكومية هي السبب في الانتخة اللي احنا فيها ديه لكن بردو في نفس الوقت فين احنا من ضمايرنا ازاي هنحلل مرتباتنا ديه و احنا اصلا ما اشتغلناش ببصلة

و علشان كل الكلام اللي فاتت ده كله خلاني افكر فعلياً عن مدى قدرة المصالح و القطاعات الحكومية ديه بالقيام باعمالها بالكفاءة المطلوبة و يخلينا نفكر جدياً في استبدال القطاعات ديه بالقطاع الخاص اللي اكيد اكيد مش هتكون في نفس الكفتة اللي بتحصل في المصالح ديه لان طبعا معروف ازاي الشغل بيتم في القطاع الخاص اللي طبعا لا يسمح بوجود تجاوزات زي اللي بتحصل ديه هوا صحيح هيكون في بعض المشاكل زي ان القطاع الخاص هيشغل الحد الادنى من الاشخاص القادريين على القيام بالعمل المطلوب و ده يسبب زيادة في البطالة لكن على الاقل هنضمن ان هيكون اكثر كفاءة من القطاع الحكومي في القيام بالعمل ده و انا بتكلم في الحالة المثالية

عموما في النهاية بس حبيت اتكلم عن النقطة اللي خنقاني ديه بالرغم من اني متكلمتش بما فيه الكفاية و يمكن الدنيا ملخبطة شويه لاني مجهد حبتين بس المهم اكون قدرت اوصل النقطة اللي عايز اقولها و انا متأكد ان الحوار ده ليه زوايا و حوارات كتير ممكن نتشعب فيها و اللي على استعداد كامل اني اتناقش في اي نقطة محددة اي حد يحب يتناقش فيها

بس كدا
سلام

احساس بالعجز

امبارح و انا راجع من تدريبي كالمعتاد و بركب الموصلات بردو كالمعتاد و بعد ما الميكروباص حمل لقينا السواق بيقولنا يا جماعة الاجرة زادت خمسين قرش و طبعا احنا متوقعين حاجة زي كدا لان دا شيء طبيعي المهم بعد ما مشينا و لمينا الاجرة بالزيادة اللي اتفرضت طبعا بسبب قرارات زيادة السولار و البنزين لقينا السواق بيقولنا


و الله على عيني يا جماعة الزيادة ديه بس اعمل ايه العيشة بئت زفت زفت كل حاجة غليت و كل حاجة بئت نار الواحد مش عارف يلاحق ازاي و ازاي يجيب اي حاجة عياله محتجاها .. الرز بئى بكام و الزيت بئى بكام و السكر دا حتى العيش في بلدنا بيصرفوا لكل اسرة سبع ارغفة عيش بس ، السبعة دول ميكفوش حتى ولادي طيب اعمل ايه حرام اللي بيحصل فينا ده .. ديه مبقتش عيشه

و هوا بيتكلم صوته راح ببص في المراية اللي قدامه علشان اشوفه لقيته بيبكي و هوا بيندب حاله و حال العيشة و اللي عايشينها بصراحة شديدة محدش حتى قدر يواسيه و يقوله اي حاجة تهديه لان نواسيه ازاي و احنا محتاجين اللي يواسينا كلنا بس بجد الموقف كان سيء اوي بجد اخرسنا كلنا و خلى كل واحد يسرح في حاله و حاله الناس اللي مش لاقيه و اللي الاسعار بتشويهم يعني السواق ده على الاقل ليه مصدر رزق بيصرف عليه و على اسرته و قال كل ده على حاله فما بالكم باللي ملوش مصدر رزق او مصدر زهيد او محدود هيكون حاله ايه ؟؟ كل ده بيخلي الواحد عنده احساس بالعجز يعني عايز تساعد الناس عايز تعملهم اي حاجة بس مش عارف لان انت نفسك اصلا محتاج المساعدة لان ببساطة شديدة كلنا في مركب واحد لكن نفسك تغير و نفسك يكون فيه امل في بكره امل يتحقق على ايديك بس للاسف بتحس ان الامل ده بيموت جواك يوم بعد يوم .. بجد حاجة صعبة

و بعد اللي يحصل ده كله كل ما امشي الاقي الحاجة شيرين تطلعلي كدا من اي حته و تقول " مشربتش من نيلها طيب جربت تغنيلها " و الله يا شيرين شريبنا من نيلها و جربنا نغنيلها (لان ده اللي بنقدر عليه اصلا) و جربنا نمشي في شوراعها و نحكيلها (مهي الناس ماشية عماله تكلم نفسها ما هما كدا بيحكوا ليها) بس بصراحة يا شيرين مصر بئت بتستهبل اوي و نيلها بئى ملوث و شوارعها كلها زبالة حتى الاغاني بئت كلها نفاق فبعد اذنك شويه يا شيرين مش عايز اسمع صوتك تاني

سلام

جمال المرأة

يقال ان عندما تتحدث المرأة تفقد نصف جمالها .. نعم سيدي قد اتفق معك فيما قلت
و لكن دعني ازيد عليك و اقول
ان أحياناً اخرى عندما تتحدث المرأة تأسرك بجمالها

استمراراً لمسلسل الغباء

مش عارف انا بقالي كام يوم كدا مضطهد اي تصرفات غبية او غير عقلانية للبني ادمين و كل ما خلاص هقتنع بأن التصرفات ديه ممكن تكون ناتجة من تلقائية الاشخاص ديه و ليس بقصد الغباء منهم ييجي حوار يرجعني تاني للأقتناع بأن الغباء او التخلف مستشري فعلا و ليست تلك مجرد تلقائية منهم المهم ايه اللي حصل بئى من كام يوم كدا وصلي كالمعتاد رسايل من اللي بتوصل للناس سواء و بيكون فيها ذِكر او ايه قرآنيه او حكمة او ما شابه يعني الا ان الحقيقة الرسالة اياها اللي هنتكلم عليها النهاردة كانت مختلفة ( و متخلفة ) شويه لدرجة تخليني اعتقد انها ممكن تكون بالفعل نكتة المهم نص الرسالة كان ايه بئى

----------------------------------
تحذير هام جدا // اذا وجدت مكالمه على موبايلك من رقم مجهول او دولى او وجدت صوره شبح وكتابه غير مفهومه لا تقوم بالرد اطلاقا هذه المكالمه عباره عن اشعاع فيروسى يدخل الى المخ مباشره ومن يصاب به يموت فى خلال عشره ايام هذه الاخبار من مستشفى بالسعوديه وبها 30 حاله مصابه بلغ هذه الرساله ارجوك ولا تجعلها تتوقف
----------------------------------

انا نقلت الرسالة ديه زي ما جاتني بالظبط و مازودتش حرف او نقصت حرف و بصراحة استفزتني لدرجة شديدة لدرجة ان لولا ان اللي بعت الرسالة ديه واحد زميل كنت بجد شتمته على ان هوا يمرر رسالة بالتخلف ده قال اشعاع فيروسي قال ( يااااا صلاة العيد ) .. لا و الله اشعاع فيروسي اقسم بالله العظيم ان ديه اول مرة في حياتي اسمع فيها كلمة اشعاع فيروسي ديه و طبعا انا مش هناقش الرسالة ديه لاني بالرغم من اني لم اتأكد من صحة الخبر ( و مش ناوي اتأكد ) اللي اني متأكد تماماً من انها هزار او واحد دمه خفيف شويه و حب يهزر مع الناس و مش هلومه انما اللوم هيكون على المتخلفين اللي نقلوا الرسالة ديه اعتقاداً منهم بصحتها

طيب

انا بقول الحوار ده كله ليه بئى علشان اضرب مثل بس ان في بعض التصرفات اللي الناس بتقوم بيها بتكون فعلا بتنم عن حاجة من الاتنين يا اما غباء يا اما جهل لو في حالة الجهل ممكن نتعلم لكن في حالة الغباء هيكون صعب جدا ان احنا نصلح في الجزء ده و خد من التصرفات ديه حاجات كتير بنمر بيه كلنا و مش بنمر بيه بس لأ و بنقوم بيها كمان لاني بأنتقادي لافعال و تصرفات الناس لا يجعلني ابدا منزه او اعلى من الخطأ ده او اني اقوم بتصرفات زي ديه لكن هتكون حاجات بتختلف عن الحاجات اللي بيقع فيها الناس لاني طبعا مش هقدر انتقدها و انا مصاب بيها اصلا يعني اللي عايز اقوله ان ايوه يمكن كل واحد فينا غبي على طريقته الخاصة لكن يا بني ادمين في حاجات اعتقد يعني انها مش محتاجة عبقرية جبارة علشان نقدر نميز اذا كانت غلط او صح او تصرف غبي او سليم و ده السبب في اني ذكرت المقولة لفولتير في البوست اللي قبل فات و اللي كانت عايزة تقول ببساطة ان حتى البديهية اللي المفروض يتسم بيها الناس كلها او الاشخاص الطبيعين مش شائعة او موجودة يعني و ده شيء اعتقد ان كتير مننا ممكن يكون حاسه لو مش على المستوى الشخصي في تعاملاته مع الناس ممكن يقيسها على مستوى البلد و الحاجات اللي بتحصل فيها و تصرفات القائمين على شوؤنها اللي مش محتاجة عبقرية او عقول ذرية علشان ندرك قصور في مجال معين او في كل المجالات بمعنى اصح و ازاي نقدر نعالج و نحل المشاكل ديه الا انك تلاقي تصرفات او افعال يعني مش عارف اقول ايه لكن لو جبت تلميذ نجيب من الثانوي او من كلياتنا المرموقة و قولته فكر ازاي نحل المشكلة ديه هيجيبلنا حلول عجزت عن انتاجها من يدعون بأنهم مسؤلين عننا مش كدا ولا ايه ؟

الحقيقة ان النقطة المتعلقة بالبوست ده كنت عايز افردلها بوست تاني بشكل تاني لكن مواقف معينة هي اللي فرضت عليا انا هوا يخرج بالشكل فا كنت عايز اقول ان البني ادم مش غبي كدا ربنا و هبنا اغلى و اجمل و اروع و احسن هدية ممكن تتخيلها و هي العقل اللي ربنا ميز ادم و ابناءه بيه و قال على العقل ان هوا احب شيء ليه كما جاء عن رب العزة في الحديث القدسي على لسان سيدنا محمد صلى الله عليه و سلم " عندما خلق الله العقل .. قال له أقبل فأقبل .. ثم أدبر فأدبر ثم قال .. ما خلفت خلقا أعز على منك .. بك أجازى وبك أعاقب " يعني اللي عايز اقوله حاجة بالجمال ده ربنا مش وهبها لينا من فراغ لو كل واحد مننا يعني حكم عقله في امور حياتنا و امورنا الدنيويه و علاقتنا ببعض هنوصل لجمال الحياة اللي يجب ان تكون عليه اصلا الحياة برفضنا لكل سلوك او فعل غبي او جاهل من شأنه ان هوا يعكر صفو حياتنا

لكن الحقيقة في هنا سؤال مهم جدا جدا جدا جدا برشت ( من البرشوت ) على دماغي مرة واحدة و انا بكتب البوست ده متعلق اوي بالجزء اللي فات ده و لقيته فعلا ان ممكن يكون منطقي و السؤال هوا هل الانسان اللي هوا البني ادم يعني المفروض او من الطبيعي ان هوا يكون غبي ؟؟ بمعنى ان فيه تصرفات كتير بتحصل قدامنا في الحياة واضحة تماما انها غبية الا ان الناس بردو بتصر على انها تقوم بيها حاجة مثلا زي التدخين او ادمان المخدرات ديه افعال مثلا غبية جدا و مش محتاجة كتير مننا علشان نعرف ان اد ايه بيضر صحتنا و بتسبب في دمار صحتنا دمار شامل و هتؤدي للوفاة بعد كدا الا انك تلاقي بعض الناس مصممة انها تستمر على العادات المتخلفة ديه فلما نيجي نطبق بئى على السؤال و نقول هل من الطبيعي ان يكون في امثال الناس ديه علشان الافعال ديه تكون موجودة بمعني ان الناس ديه لو حكمت عقلها هتبطل الحاجات السيئة ديه و لو بطلت العادات السيئة ديه هنبقى مجتمعات جميلة و زي الفل و ده الشيء اللي مش المفروض يحصل في دنيتنا ديه يعني لازم يكون في غباء علشان مينفعش الحياة تكون حلوة و تمام يعني اللي اقصده ان لازم يكون في حاجة غلط في الدنيا لان مينفعش يكون في خير بس لازم يكون خير و شر و طبعا علشان الخير يتجازى في الاخرة و الشر بردو يتجازى فعلشان كدا بقول ان تقريبا الافعال ديه لازم تكون موجودة او من الطبيعي تكون موجودة علشان ديه حكمه ربنا في خلقه و طبعا انا هنا مش بتكلم على حوار التدخين و الادمان على وجه الخصوص انما دول انا كنت بضرب بيهم مثال فقط و ممكن ناخد على نفس الشاكلة حاجات كتير فعلشان كدا طرحت السؤال ده و الحقيقة ان اذا افترضنا صحة السؤال ده هيهون على الواحد حاجات كتير باعتبار ان اصبح ده امرا واقع بالرغم من ان ساعات الواحد مش بيحب ان هوا يتقبل حاجات كتير كأمر مواقع غير قابل تغيره


المهم احب في النهاية بعد ما خرجت النرفزة اللي كانت فيه اني اقول اسف ان كنت طولت وده امر طبيعي طبعا الا اني اتمنى ان يكون اللي كتبته مفهوم بالرغم من اني مش فاهم حاجة اصلا و ديه حاجة بردو بتؤرقني لكن الحقيقة بستريح لما بشارك باللي في دماغي ده يمكن الاقي اجابات مقنعة بالرغم من اني عارف بردو ان مش هلاقي لان بردو يبدو ان المفروض كمان ان نعيش في الدنيا مش فاهمين حاجة اه و في حاجة كمان اسف للناس كلها اذا كنت انشغلت عن متابعتهم بس للاسف الفترة اللي فاتت كان ورايا كم امتحانات و مازلت الحقيقة لكن ربنا يستر و نخلص من الحوار ده على خير

بــــــــــــــس كدا

سلام