و للارهاب اقنعة

اولا كالمعتاد احب اعتذر عن تاخيري لان انتوا عارفين حبة مشغول على شوية النت فاصل على شويه اخويا محتل الجهاز على حبتين مخنوق من الليلة كلها فكل ده بيعمل كوكتيل لذيذ من الخنقة..المهم

النهاردة انا عايز اتكلم عن موضوع مهم جدا و طبيعي جدا بالنسبة لينا كلنا كمصريين و الموضوع دا ان ايه الفترة اللي فاتت ديه مسك عندنا البلد مدير امن جديد غير اللي كان ماسك اصلا و طبعا مع احترامي لمدير الامن القديم اللي انا معرفوش اصلا الا انه احسن ان هوا سابها لان البلد كانت في حالة سيئة من الفلتان الامني المتمثل في انتشار توزيع الحشيش و البانجو و ان بئى بالساهل تقدر تحصل على الحاجات ديه مهما كان سنك طبعا و انتشار كمان البلطجية اللي بيتعدوا على خلق ربنا و زي ميكونوا متخلقوش الا لجر الشكل و الخناقات و الفتونة دا غير طبعا جرايم حصلت كانت غريبة عن مجتمعنا زي القتل مثلا و الاغتصاب المهم فطبعا مدير الامن القديم خلع و مسك مكانه واحد جديد..طيب و ماله

مدير الامن الجديد بئى طبعا جاي جديد و عايز يبين نفسه ان هوا اللي هنا و هوا اللي هناك فراح الراجل ده لامم حواليه بتوع الامن المركزي و نزل يتمشى في البلد يا مرحب يا حاج بس نزل يعمل ايه بئى طبعا نزل اول حاجة بيعملوه هو و امثاله ان يبص على الاشغالات اللي في الشارع و يبدأ حملة تطهير لكل اللي في الشارع من اشغالات يعني اللي هوا مقصود بيه الانضباط ينزلوا يلموا كل حاجة اللي له لازمة و اللي ملوش و ارمي يا ريس في العربية النص نقل..دا مش كدا و بس دا كمان كانوا بيوقعوا التند (جمع تندة) بتاع المحلات و يهدوه طيب ليه يا عم التند ديه عملالك ايه طيب يا باشا يا بيه و التند ديه اصلا مترخصه فيقولولهم يا باشا احنا معانا رخص بالتند ديه فيردوا ببرود طبعا تعالا و اعمل رخص جديدة -اه ياولاد الهبلة مهم معاهم رخص اصلا- ...المهم يا ريت طبعا كانت على التند وبس لأ و الارصفة كمان ساعات في محلات بتبئى معليه الرصيف بتعهم شويه و ده مش من حقهم فطبعا بتوع الامن لازم يتصرفوا و انا نسيت اقولوكوا ان كان معاهم بلدوزر من الصغططين دول فهوب لو معجبوش رصيف من دول يروح البلدوزر داخل فيه شمال مدغدغه ميت حته طيب و اصحاب المحلات ديه محدش بيعترض ؟؟ لا يا ريس كانوا بيعترضوا بس اللي يعترض من دول بتوع الامن المركزي موجودين ياخد العلقة الصح من هنا و يترمي زي الباقي في البوكس و من كتر البهدلة اللي الناس شافتها سمعت ان في ناس ماتت في الاسواق بس انا بقول سمعت يعني معرفش الكلام ده صح ولا غلط..طيب هو ايه يا عم مفيش حد صور الكلام ده ؟؟ لأ ازاي يا راجل في ناس صورت الكلام ده بس لسوء حظهم بتوع الامن شفوهم و طبعا كالمعتاد خدوا العلقة التمام و الموبيلات اتسحبت...طبعا القلق اللي حصل ده كله بسبب انه مدير امن جديد فلازم يعمل الشويتين دول في الاول علشان يبين ان الراجل حامي و بتاع لكن بعد كدا للأسف بترجع ريما لعادتها القديمة و يرجعوا للطرمخة من تاني ودا طبعا مش غريبة لاننا عرفين كويس ان احنا اكيد في مصر...و طبعا من الاطلاع الجرايد ان الحوار ده مش عندنا بس دا للأسف في مناطق كتير من البلد و اخرهم الللي حصل فيها قلق جامد المطرية تقريبا الي بئى اشبه بارهاب دولة زي ما اقصد بعنوان التدوينة

طيب ده اللي حصل طيب ما تيجي نتكلم جد شويه و دا الحوار الللي انا دخلت فيه مع زمايلي في جدال طويل و كان السؤال عبارة عن هل الناس تستاهل اللي بيجرالهم ؟؟ مش هكون ظالم للناس لو قولت اه لكن بردو مش هكون منصف..بمعنى ان فعلا الامن مزودها حبتين و مبتبقاش طالبة له ده كله او بمعنى اصح كتير منكم بيقول يا عم سيب الناس تاكل عيش ليه نعمل فيهم ده كله..هقول لسيادتك انك متقدرش تنكر ان في من الناس دول اللي مزودينها فعلا ان الاشغالات اللي بيعملوها في السكة بتقفل الطرق فعلا و خنق على المرور اكتر مهو متخنق يعني يوم من الايام اللي كان حال فيهم القلق ده ماشي من شارع اللي يعتبر شارع تجاري او زي سوق كدا فخير اللهم اجعله خير لقيت الشارع فااااااضي و وااااسع بطريقة غريبة لدرجة يمكن كانت اول مرة اشوفها ان لما شالوا الاشغالات اللي في الشارع ديه فعلا الطريق وسع اللي اقصده ان انت كصاحب محل مش من حققك انك تحط قدام محلك اي حاجة م اللي بتبيعها تحت الرصيف بشويه زي ما انت من حققك انك تبيع من حقي كدولة ان الشارع بتاعي يكون فاضي للناس و انت بردو كمحل مش منحققك انك تعلي الرصيف فوق المتر مثلا زي اخينا اللي فوق..اللي اقصده ان بتكلم بمنطق حقي و حقك صحيح ان الحكومة معندهاش حكاية حق المواطن ديه هوا حقها بس الا ان ساعات بشوف ان ممكن يكون ليهم حق في الحملات الي زي ديه دون المساس طبعا بالشخص و التعرض ليه بالضرب مثلا زي ما هما بيعملوا يعني علشان محدش يفهمني غلط علشان ان مشجعش سلوك زي ده بانك ترهب الناس بالطريقة ديه و تعاملهم بالطريقة ديه لكن في نفس الوقت اه الناس ساعات مبتعرفش ايه اللي ليها و ايه اللي عليها..علشان كدا لما تيجي تجاوب على السؤال خد في اعتبارك حقي و حقك بالرغم من ان معظم كلامي بيكون على الحالة المثالية..انا مش مع الحكومة و لا مع الناس انا مع اللي انا شايفه صح...علشان كدا عايز اعرف رأيكوا في الليلة ديه

بس دا اللي كنت عايز اققوله اما دلوقتي احب اسيبكوا مع فيديو كنت شوفته على جروب لناجي العلي على الفيس بووك فيديو لي واحدة من شعب، شعب بردو متعرض لارهاب دولة، انصحكم انكم تشوفوا الفيديو اللي بجد ابكاني على حالنا و حال الشعب ده

سلام

جيد..!!..يا راااجل

بسم الله الرحمن الرحيم

الصورة اللي جايه ديه بصراحة كانت مفاجأة ليه

ايوه انا الحمد لله نجحت في سنة البكالريوس بتقدير 66% عندنا يعني جيد..طبعا المفاجأة كانت في تقدير جيد لاني بيني و بينكوا دي اول مرة اعرف فيها تقديري لان مش كل سنة كنت بطلع صافي..لكن اللي عرفته ان ده مش التقدير التراكمي ده بتاع رابعة بس و التراكمي لسه هعرفه بعدين و بالمنظر اللي مشيت بيه طول السنين في الكلية فأكيد هتصفى على مقبول عموما كل اللي يجيبه ربنا كويس انا مش هكون زعلان على تقديري بالرغم من انه ممكن يكون سبب في عوائق ممكن تقابلني في حياتي العملية و خصوصا ان المقياس في بلدنا في الغالب بيبئى بالورق و مش بالكفاءة الفعلية للشخص

_____________________________________________


دا كان اولا اما ثانيا بئى فهو حاجة كنت عاملها ممكن تكون الناس استغربتلها و هي الاستطلاع اللي في السيد بار و هو استطلاع كان بيسأل هو انت لابس نظارة و لا نظرك ستة على ستة و سبب الاستطلاع ده لما كنت شوفت صور لبعض مقابلات المدونين و لقيت ان كان في كتير منهم لابسين نظارات فطبعا اللمبة نورت و قولت هو كلنا بنلبس نظارات علشان بنقعد قدام الكمبيوتر كتير و على طول نظرنا بيضعف بسبب الشاشات و القعدة لفترات طويلة و خصوصا كمان لاني نسيت اقولوكوا اني من اصحاب النظارات بردو و بسبب القعدة لفترات طويلة دايما الوالدة تقولي يا ابني نظرك حافظ على الشويه اللي بقايلنك فيكون ردي المعتاد ضربوا الاعور على عينه

اما بئى عن نتايج الاستفتاء فكانت في صالح النظرية لان جاوب على الاستفتاء ده تلاتين بني ادم

حداشر منهم قالوا ايوه احنا لابسين نظارات و دول طبعا حبايبي لاني بعز اللي لابسين نظارات بصراحة مع ان الناس بتفتكرنا دحيحة او بمعنى اصح جيجز (الكلمة ديه هيفهموها طبعا اللي يفهموها حاجة كدا امريكاني) المهم ده طبعا مش صحيح و الا مكنش دا يبئى حالنا ادي اخرها تجارة..و العشرة دول كانوا بيمثلوا الاغلبية بنسبة 37 في الميه

اما المجموعة التانيه كان عددهم 8 و دول اللي قالوا ان نظرهم 6/6 طبعا ربنا يكملهم بنظرهم لان احنا اصحاب النظارات مدركين تماما معنى كلمة النظر دا انا بدعي و الله على طول للراجل اللي اخترع النظارات..فطبعا ربنا يكملكوا بنظركوا كمان و كمان

اما عن المجموعة التالتة فكانت للي لابسين عدسات و دا يا عيني كان شخص واحد بنسبة 3 في المية و غالبا هتكون بنت لانهم بيخافوا ان النظارة تكون شكلها مش حلو بالنسبة ليها مع ان ده مش صحيح لاني بردو بصراحة بحترم البنت اللي لابسة نظارة اكتر و محدش يسأل ليه هو كدا الطيور على اشكالها تقع حاجة غريبة اوي..طبعا انا مش معترض على العدسات بس اعرف انها ممكن تسبب مشاكل للعين حساسية و ما شابه المهم مش دخلنا دلوقتي

اما بئى المجموعة الرابعة فديه المجموعة اللي انا متغاظ منها جدا و محترمهم جدا جدا بالرغم من غلاستهم سورري يعني المهم دول كانوا الحتة بتاعة بتسأل ليه و كان عددهم عشر بني ادمين و كانوا بنسبة تلاتة و تلاتين في الميه..متغاظ منهم ليه بئى لان بالرغم من اني كاتب العنوان جاوب و متسألش ليه الا انهم اصروا على انهم يختاروا بتسأل ليه طيب حد فيكوا يقولي طيب انت حاتطها ليه اصلا هقولوا علشان اعرف الناس دول و اشوف كام واحد هيعمل كدا ليه بئى لاني بحترم الناس دول زي ما سبق و قولت لان فضولهم غلب اتجاههم للاجابة على السؤال و دول اللي عايزين يعرفوا سبب كل حاجة و مينجرفوش ورا الاجابة بسرعة دون المعرفة الحقيقية اللي دفعتني لطرح السؤال ده و دا طبعا شيء كويس لان الفضول لمعرفة سبب كل حاجة عمرها ما كانت شيء سيء الا انها متعبة جدا يعني مثلا كانوا هيعملوا ايه لو مريحتهمش و قولتهم على السبب

الحوار ده عايزين تعتبروه تهييس براحتكوا ولا انتوا نسيتوا عنوان المدونة

عموما تحياتي لكم جميعا

سلام

الى من اهواها

عبثا ما اكتب سيدتي

أحساسي اكبر من لغتي

و شعوري نحوكِ يتخطى صوتي

يتخطى حنجرتي

عبثا اكتب مادامت

كلماتي اوسع من شفتي

اكرهها كل كتاباتي

مشكلتي انكِ مشكلتي

نزار قباني

perfectionism

بسم الله الرحمن الرحيم

اولا احب اعتذر عن التأخير لكن كالمعتاد انتوا عارفيين الدنيا و مشاغلها غير كدا او كدا يبدو ان الواحد هيدخل في الجد علطول و يبتدي فعلا يسعى ورا المستقبل اللي بيتمناه. اما ثانيا فهو موضوع البوست ده و انا شايف انه موضوع مهم جدا جدا و يمكن اهميته تكمن في ان القرار الناتج عن الموضوع ده لانه ممكن يحدد كتير في مستقبل الانسان و قراراته اللي بيتخذها على مر حياته

الموضوع ده له شقين الشق الاول هيكون تمهيد للشق التاني

اما الشق الاول ممكن يتلخص في كلمة واحدة بس

"الكمال"

طبعا في ناس هتقول دلوقتي حالا الكمال لله وحده. طبعا يا عم الكمال لله وحده و انتا شفتني قولت غير كدا طبعا بلا ادنى شك الكمال لله وحده لكن اللي انا اقصده يا سيدي الكمال على مستوى البشر و عارف كويس طبعا ان مفيش بشر كامل و دا شيء انا متأكد منه لكن لما اقصد الكمال على مستوى البشر يبئى اقصد اقصى الدرجات اللي ممكن يبلغها الانسان في سعيه للكمال سواء في الاخلاق او العلم او الرياضة او اي مجال من المجالات لان سعينا ورا الكمال ده من اللي اتفطرنا عليها و ربنا حببه في نفوسنا علشان يعلى بالانسان لاعلى الدرجات. احب اكرر تاني علشان حبيابنا اللي انا عارفهم مفيش بشر كامل و ده صحيح لكن مش غلط ان الانسان يسعى ورا الكمال او يسعى ان يوصل لاعلى درجة موجودة في المجال اللي بيسعى فيه

لكن المشكلة هنا في نقطة هل الانسان بيوصل فعلا للكمال بمعنى اذا كان الانسان بيبذل كل الجهد للوصول للهدف السامي ده هل فعلا بيوصل للكمال؟؟ لو حد فيكوا رد عليا و قال لأ هقوله طيب و سيادتك عرفت منين ما يمكن يكون وصل لاعلى نقطة يقدر يوصلها بشر فعلا في المجال ده و وصل فيه لمبلغ العلم او القدرة (مع ان ده ممكن يكون مستحيل) و ممكن حد يقولي ايوه دا وصل للكمال في مجاله هقوله و انتا عرفت منين ما يمكن لسه في حاجات تانيه لسه مقدرش يوصلها!!... المشكلة اللي هنا هي ازاي هتحكم على اي شيء او شخص ان وصل لمرحلة الكمال اذا كنا احنا اصلا منعرفش هي درجة الكمال ديه، منعرفش هل قدرنا نحقق كل اللي نقدر نحققه ولا احنا مسعيناش كفايه للوصول للمرحلة ديه و خلي بالكوا في كلامي هنا على الكمال زي ماسبق و قولت الكمال في اي مجال سواء رياضة مثلا او علم او اي حاجة او حتى اخلاق علشان متفتكروش اني اقصد الكمال في شخص بوجود كل الصفات الحسنة فيه ان ممكن يكون الكمال حتى في مكان واحد او حته واحدة.

قبل ما تزهقوا وتقولوا انت عايز ايه مننا يا عم و ايه كل الكلام الغريب اللي انت بتقوله ده ارد انا و اقول اصبر يا عم انا جايلك في الكلام زي ما قولت اللي فات كان تمهيد للشق التاني اللي هو ده، الشق اللي يمكن يكون بيمس كل شخص فينا و بيأثر على تصرفاته و هو ان للأسف نقطة الكمال ديه مش غاية بس لكن للأسف ديه كمان مرض. ايوه مرض بيصيب الشخص اللي بيحاول يسعى للكمال في اي حاجة و الناس دول بيسموهم ان انجلش

Perfectionists

او بمعنى اصح الناس اللي بيسعوا بجهد انهم يوصلوا للكمال في كل اللي بيعملوه و خلوا بالكوا الناس دول ممكن يكون فيهم انتوا وانا و ناس كتير من اللي حوالينا اللي من خصائصهم انهم بيقللوا من شأن الشيء اللي بيعملوه و انجزوه (حتى لو كان ممتاز) لانهم معتقدين انهم ممكن يحققوه فيه افضل من كدا و دايما بينتقدوا نفسهم و صفاتهم حتى لو كانت صفات كويسة لانهم عايزين الاكوس (محدش يتريق انا اقصد الاحسن) و على فكرة من الناس دول من اللي بيقدروا انهم يحققوا انجازات هايلة جدا لانهم عمرهم ما هيكتفوا باللي انجزوه. لكن بيكون مرض لما تحط لنفسك اهداف عالية صعب انك توصلها و بالتالي هتعود عليك بالكبت و العقد النفسية لما ما تحققهاش

حد فيكوا يقولي طيب ايه المشكلة ؟ المشكلة سيادتك مش في سعيك ورا الكمال المشكلة ان لما يكون السعي ده بيمثل عائق اكتر منه حافز بمعنى ان ممكن تكون شايف نفسك انك مش هتقدر تحقق نسبة 100% نجاح للشيء اللي انت عايز تعمله مع رفضك للنسب اللي اقل من كدا يعني بمعنى اصح يأما 100% يأما 0% او بالمعنى اللي انا عايز اوصله بئى هو في صعوبة تحصيل الكمال ده في وجود الظروف المحيطة بيك اللي اكيد هتمنعك من انك تقدر تحقق الانجاز اللي انت عايز توصله و تبدأ تسأل نفسك هل هقدر احقق الدرجة ديه في اللي لنا عايز احققه ولا لأ.

المهم تخليص الليلة ديه كلها هل ممكن الانسان يوصل لاعلى درجة في اللي عايز يعمله اذا سعى حق السعي ولا الواحد بيحط لنفسه متطلبات عالية مش ممكن و لا يمكن انه يقدر يوصلها مهما عمل و بالتالي ييأس من حتى التفكير في الوصول للشيء ده؟؟

المشكلة ان الموضوع كبير و له مداخل تانيه و زوايا تانيه مقدرتش اصيغها في الكلام فالحقيقة ديه نقطة بتؤرقني فعلا لكن مش عارف انا قدرت اوصل لكوا اللي عايز اقوله ولا لأ، انا حاولت استرسل في الكتابة و اوضح على اد ما اقدر لكن اذا مفهمتوش حاجة فاعتبروها تخاريف مجنون

سلام

اخيراً..اخيراً

اخيرا و بعد عناء اربع سنين من الكفاح المتواصل خلصت دراسة و خلصت امتحاناتي في كلية التجارة..خلصت يدوب

قبل ما كانت هتخلص عليا انتهيت من الكلية ديه اللي تعبتني فعلا و بصراحة انا سعيد جدا ان خلصنا بعد كل اللي شوفناه في الكلية سعيد اني مش هشوف اشكال دكاترة بيطلعوا علينا البلاء..هستريح من الموظفين اللي بيكلموك من طرف مناخيرهم زي ما تكون بتشحت منهم..هستريح من الطلبة اللي مش فارقة معاهم اي حاجة في الدنيا غير انهم يقضوا وقت لذيذ لا جايين لا تعليم و لا زفت هستريح من مقررات و مواد يكاد نكون مبندرسهمش اصلا من قلة ما يقال فيها من شرح و كثرة ما يطبق عليك منها او مواد مش هتفيدك في حياتك العملية اصلا..المهم فعلا الواحد سعيد فعلا بس للأسف السعادة ديه ما استمرتش كتير فجأة بعد ساعات من انتهاء اخر امتحان حسيت بفراغ كبير

ادركت ان الفراغ ده جاي من الحيز اللي كان بيشغله التعليم في عقولنا و حياتنا لكن بمجرد اما ادركت ان الشيء ده اللي كان بيشغل وقتنا انتهى فحسيت فعلا بالفراغ. اكيد طبعا الفراغ ده مش هيستمر لطالما كنت مدرك ان فترة الكلية او حياتي كلها لغاية اللحظة ديه هي كانت الجزء الاسهل من حياتنا الجزء اللي مكنش علينا في اي مسؤلية و كانوا اهالينا هما المسؤلين عنا لكن و من دلوقتي فعلا هتبدي الحياة الفعلية اللي كل واحد فينا لازم يتملك زمام اموره في الحياه. الحياة اللي هيبدو انها هتكون قاسية علينا المشكلة ان الواحد مش عارف يبتدي ازاي حتى لو عارف و في نيتك انك في حاجات انت عايز تعملها و متأكد ان هيكون فيها خلاصك و بدايتك الحقيقية الا ان الناس مبتشجعكش عليها او بمعنى اصح بتحبط احلامك اللي ممكن تكون هي سر نجاحك

فعلا الموضوع كبير انتوا ايه رأيكوا من بعد ما ننتهي من الدراسة اللي الخطوات اللي الواحد ممكن يتتبعها على الاقل علشان يضمن مكان لنفسه في سوء العمل او بمعنى اصح سوق العمل محتاج مني ايه علشان اقدر اوفره ليه؟ انا بوجه السؤال ده للناس اللي بدأوا مسيرتهم فعلا في الدنيا ديه على الاقل اللي وصل منهم لمراكز كويسه

لكن الحقيقة في نقطة تانية بتؤرقني فعلا و هي ببساطة هل الواحد ينجرف لروتين الحياة المعتاد اللي الناس كلها بتمر بيه زي البحث عن عمل و بعد كده يكون نفسه و يدور على عروسه و يتجوز و يخلف ولاد و بنات و يعيشوا في تبات و نبات ولا يحاول يسعى ورا حلم و انا بكررها (حلم) كان الواحد بيتمنى انه يقدر يحققه و يقوم بالحاجة اللي نفسه و منى عينيه انه يوصلها هل السعي ورا الحلم ده يعتبر جنون اذا مكنش الحلم ده مستحيل؟

المهم احب اقول اني سعيد جدا اني رجعت للمدونة تاني و حبايبنا اللي افتقدتهم بجد و احب اقول في النهاية اني سعيد فعلا بوجود ناس من امثالكوا اللي بحترم ارائهم فعلا...لكم مني كل الاحترام و التقدير

سلام