قريب كنت بتفرج على فيلم بس مكنتش مركز معاه لاني شوفته مرة قبل كــدا لكن المرة ديه سمعت جملة علقت معايا اوي مكنتش اخدت بالي منها
الجملة كانت
" We like people for their qualities, but love them for their defects. "
عايز يقول ان احنا بنعجب بالناس لصفاتهم الحسنة لكن بنحبهم و بنعشقهم لعيوبهمعجبتني الجملة ديه لاني لقيت فيها حاجة مكنتش شايفها و فهمتها من منظوري انالكن كنت عايز اعرف رائيكم انتم ايه و ايه اللي فهمتوه من الجملة ديهو متفقين معاها ولا لأ ؟ و نتناقش فيها سوا .....
شوفت امبارح صورة في جريدة من الجرايد مش فاكر كانت ايه لطفلة مدفونة في وسط حطام منزل مهدم في غزة الحقيقة كنت عايز احط الصورة ديه بس لانها كانت تكفي انها تعبر عن الوضع اللي بيمر بيه اهالي غزة المهم دورت في جوجل بعد ما عملت بحث عن اطفال غزة لكن للأسف مقدرتش استحمل اخلص الصفحة التانية من الصور و المشاهد المفزعة اللي شوفتها وعملت بحث تاني على غزة في بيكازا ومقدرتش اكمل الصفحة الاولى من نتايج البحث من هول اللي شوفته بجد حرام علينا انا مش فاهم ازاي قادرين نعيش مع كل اللي بيحصل للناس في غزة سوري يعني طظ في فتح و حماس و لعبة السياسة القذرة اللي الواحد بئى مش عارف مين الصح و مين الغلط و مين المسؤل و مين الضحية و مين الجاني لكن اللي اعرفه كويس ان فيه عائلات بالكامل بتموت لم يقترفوا اي ذنب الا انهم في بلد اسمها فلسطين و بينتموا لينا احنا العرب اللي يبدو ان احنا بيعنا القضية لكن اللي باع القضية انظمتنا الفاسدة و اللي احنا كشعوب من تصرافتهم براء بالرغم من ان احنا مسؤلين بشكل او بأخر عن انظمتنا و سكوتنا على ظلمهم مش عارف اقول اي بصراحة لكن لكم الله يا اهالي غزة لانه هوا ارحم بيكوا من أي حد و عذراً مش هقدر اشارك بالصورة ديه لأني لقيت انها ولا حاجة مقارنة باللي بيحصل في غزة مكرهتش نفسي قد ما كرهتها دلوقتي لاحساسي بالعجز حسبنا الله ونعم الوكيل
مرة كنت ماشي مع واحد زميلي و كنت حابب اعرف رأيه في موضوع مضايقني المهم سألته و بقوله
انا : تفتكر الناس كلها عارفة حدودها كويس ؟؟ قالي : تقصد اي بالظبط ؟؟ قولتله : المفروض ان كل واحد لينا بيكون له حدود المفروض لا يتعداها مش كدا ؟؟ قالي : كلامك مظبوط و ده شيء طبيعي مش محتاج انك تسأل فيه رديت : جميل بس اللي مش طبيعي انك بالرغم من ان الناس المفروض عارفة ده كويس بتلاقيهم بيتدخلوا في شؤون ناس تانية بطريقة مستفزة جدا لكن الغريب ان الناس اللي تم التخطي على حدودهم مش شايفين ده ان هوا تخطي على حدودهم و بالتالي اللي انا شايفه تخطي على حدود الناس من وجهة نظري انا مش شرط يكون تخطي على حدود الناس من وجهة نظرهم هما زميلي : بمعنى ؟؟؟ انا : بمعنى ان حدود كل شخص اصبحت نسبية بتختلف من شخص لأخر و ده يخلينا نقع في مشكلة كبيرة جدا زميلي بيسأل: و ايه هي المشكلة ديه بئى ان شاء الله ؟؟ انا : ان كدا حضرتك مش هنعرف ايه حدود الشخص اللي قدامنا ده لأن كدا ممكن نتخطى حدودنا معاه (اللي ممكن تكون في صورة سؤال شخصي) من غير ما نعرف اعتقاداً مننا ان كدا مش تخطينا حدودنا معاه و العكس صحيح تماماً ، اعتقادنا بأن ديه حدود شخص اللي المفروض مش نتخطاها و يمكن ميكنش صحيح هيخلينا ناخد موقف سلبي شويه خوف مننا ان احنا نتخطى حدودنا مع العلم ان ممكن تكون الحدود مرنة مع الشخص ده بالذات و بالتالي يبئى انا كدا خسرت مساحة كنت ممكن اقرب فيها للشخص ده بس خوفاً مني اني اتخطى حدودي خلاني اتراجع زميلي : و بعدين ؟؟ انا بئى : كدا المفروض ان الحل الوحيد للخروج من المأزق ده هوا اني اخد الخطوات اللي انا اخاف انها ممكن تكون تعدي على حدود الشخص املاً مني اني اكون مخطئ و ان الشخص ده ميكنش شايف ان ده تخطي على حدودي بس المشكلة انك هتواجه حاجز الخوف اللي هيفضل يقولك حاسب انت كدا ممكن تكون بتتخطى حدودك خليك في السيف سايد احسن لكن يفضل جواك الرغبة اللي بتتدفعك لأستكشاف المساحة ديه فضولاً منك لمعرفتها
للأسف كنت منتظر رد من زميلي ده و ببص عليه كدا لقيت على وشه اترسمت ملامح غريبة انا عارفها كويس و بتتمثل في ارتفاع حاجب و نزول اخر و فاه متسع و عينين بتبصلي بغرابة شديدة و سألني سؤال بالفعل خلاني محتار
رد عليا و سألني :
هوا الموضوع له علاقة بالبلح ؟؟؟
ـــــــــــــــــــــــــــــــــ
ملحوطة : لو محدش فهم حاجة ميقلقش شيء طبيعي محلوظة تانية : آسف جداً لعدم قدرتي على المتابعة تحياتي
ببساطة شديدة جدا النهاردة حابب اني اشارك زي ما قولت قبل كدا في يوم عالمي بيرعاه الموقع ده و الموضوع بيتلخص في ان الناس كلها من المجتمع المدني و اللي مش مدني سواء في هيئة مؤسسات خيرية او مصالح حكومية هينشروا سواء في مدوانتهم او مواقعهم الشخصية عن موضوع واحد و الموضوع السنة ديه هيكون عن الفقر في العالم
الواحد للأسف كان حابب يستعد اكتر لليوم ده بس للأسف الموضوع علشان يخرج كما يجب كان محتاج تركيز و بحث مضني علشان اقدر اخرج بكل اللي عايز اقوله لكن عموما خلونا ندردش شويه و نحاول بقدر الامكان نسقط كلامنا على البلد اللي تعبانا معاها و اللي منقدرش نستغنى عنها و هي مصر
و نقول في البداية كدا هوا يعني ايه فقر و دا سؤال سهل و هوا لما يكون الواحد لا يمتلك من مال مثلا ما يغطي احتياجاته و متطلباته و متطلبات معيشة اسرته و اطفاله بس دا كلامنا احنا لكن الناس بتوع الاقتصاد كان ليهم تعريف تاني للفقير و هوا الشخص اللي دخله تقريبا اقل من دولار واحد يوميا يعني لو حسبناها بسعر الصرف هيكون تقريبا بما يعادل 5 جنيه في اليوم و في فقراء مش قوي يعني و دول دخلهم بما يعادل 2.5 دولار في اليوم و دول عددهم في العالم بسم الله ما شاء الله تلاتة مليار بني ادم (للعلم بس عدد سكان العالم تقريبا في سبتمبر 2008 كان تقريبا 6.6 مليار شخص) يعني تقريبا بردو بسعر الصرف ما يعادل 15 جنيه في اليوم يعني 450 في الشهر يعني معنى كدا اللي دخله الشهري 450 او اقل يعتبر نفسه من الفقراء ( علشان كدا تقريبا 52 % من الشعب المصري يعتبروا تحت خط الفقر حسب اخر احصائية ) .. و ناخد بالنا كمان ان المعيار اللي هما بيقيسوا عليه هوا قياساً على الاحتياجات و المتطلبات الاساسية اللي كل واحد فينا بيحتاجها و ميقدرش يستغنى عنها و هي تلت حاجات ( المأكل و المشرب و الملبس و المسكن ) و ده يعتبر تعريف الفقر من وجهة نظر الاقتصاد و سبق ما قولت ان يعتبر ما يقرب من نصف سكان العالم تقريبا يعتبروا من الفقراء وده طبعا شيء مفزع و خصوصا بعد ما نطلع على بعض الحقائق و الارقام من اخر الاحصائيات و اللي هنلاقي فيها بجد قمة اللامساوة و عدم العدالة في توزيع الثروات و اللي اتمنى ان يتسع الوقت لسردها
اما عن مسببات الفقر فا طبعا فيه اسباب كتير جدا جدا قسموها هما لاسباب بيئية و بتتمثل في تأكل رقعة الاراضي المزروعة بسبب التجريف مثلا او عوامل تانية اثرت على النشاط الزراعي نفسه و عوامل تانية زي التصحر مثلا او ظواهر بيئية يكون ليها تأثير كبير على الزراعة زي تغيير المناخ و الجفاف .. فا ديه كلها تعتبر من العوامل البيئية اللي تأثير على الزراعة و لو لاحظتوا ان كانت معظم النقط بتدور تقريبا في فلك الزراعة لان ده امر مفروغ منه و هو ان الزراعة هي المهد او الاساس اللي بتقوم عليه اي حضارة فالزاراعة تعتبر الخطوة الاولى علشان كدا النقطة ديه لازم نهتم فيها في مصر بشكل جدي و خصوصا ان مشاكل كتير من مشاكلنا ممكن يبتدي حلها اذا اهتمينا بالنقطة ديه على الاقل لو قدرنا ان احنا نوفر لشعبنا قوته لان احنا بنصرف كتير جدا (عن طريق الاستيراد ) علشان نقدر نسد احتياجات ما يقرب من 81 مليون مصري فأذا اهتمينا بالزراعة حق الاهتمام و قدرنا نوفر الاغذية اللي بيحتاجها الشعب المصري و اللي بيعتمد عليها اعتماد كلي و خصوصا الاستراتيجي منها زي القمح هنكون قطعنا شوط كبير في تحسين وضعنا الاقتصادي و منه لرفع مستوى معيشة المواطن المصري و بالتالي انتشاله من خط الفقر اللي نصف سكان مصر قافشين فيه
اسف ان كنت خرجت من مسببات الفقر بس كان لازماً عليا اني اتكلم عن مصر و خصوصا في النقطة ديه نرجع بئى للمسببات و اللي بيتمثلوا بقيتهم في مسببات اقتصادية نتيجة الوضع الاقتصادي السيء اللي بتعيشه الكثير من الدول و خصوصا طبعا الدول النامية والمسببات الاقتصادية ديه غالبا ما بتكون بسبب الانظمة الاقتصادية اللي ببتبعها الدول ديه و سوء ادارة الدولة لمواردها و انها ازاي تقدر تستغلها الاستغلال الامثل .. فيه اسباب تانية كمان و هي اسباب سياسية و بردو بسبب الانظمة السياسة القائمة على ادارة اعمال الدولة و اللي ممكن تكون سبب في انها تفقر شعبها زي مثلا استبداد حكام بعض الدول و تفننهم هما و الحاشية اللي حواليهم في نهب ثروات بلادهم و قمع شعوبهم و اعتقد ان الامثلة ديه موجود منها في افريقيا و اللي بينتج كمان عن سوء الادارة السياسية ديه ظهور النزاعات اللي بتخلق انقسامات داخل البلد نفسها و اللي قد ينتج عنها نزاعات مسلحة و ينقسم الشعب لميلشيات و احزاب سياسية شغلتها انهم يقتلوا في بعض و المظلوم في الوسط بقية الشعب الغلبان اللي مش طالب اكتر من قوت يومه
في بئى كمان عوامل اجتماعية بردو قد تكون سبب في اسباب الفقر زي الكثافة السكانية مثلا بس احنا لينا وقفة في الكثافة السكانية و هي ان الكثافة ديه لازم الدول تستغلها لانها تعتبر الثروة البشرية او قوة العمالة زي ما بيحبوا يسموها بتوع الاقتصاد و ممكن ناخد دولة ضربت لنا اجمل مثال عن كيفية استغلال القوة البشرية كمحرك و دافع للاقتصاد مش العكس و هي الصين و اللي يزيد عدد سكانها عن 1 مليار و 300 مليون و شويه كمان بني ادم و اهي وصلت لمستوى اصبحت تهدد فيه دول العالم المتقدم بسبب سرعة نمو الاقتصاد الصيني و تهديد صناعات كانت حكر على الدول الصناعية الكبرى فا الصين هنا قدرت بالفعل تستغل قوة العمالة ديه في انها تحقق اللي قدرت توصله لغاية دلوقتي و للاسف في مصر كل شويه بيتكلموا عن الزيادة السكانية و انها السبب في المشاكل ديه كلها طيب ليها مش تستغل الثروة ديه شوف تقدر تتطلع منها ايه شوف تقدر تتطلع منها كام عالم يكونوا سبب في تقدم انشطة كتير في بلدنا شوف تقدر تتطلع كام دكتور كام مهندس كام باحث لكن الاهم يكونوا كفء بجد مش زي اللي بيتخرجوا دلوقتي و هما ليسوا ابدا على الكفاءة المطلوبة بشهادتهم هما ، شوف تقدر تتطلع كام عامل مطلع بالفعل يقدر يتعامل و يتطور مع التكنولوجيا المستحدثة في مجال تخصصه .. المشكلة مشكلة منظومة متكاملة مش مشكلة عدد سكان اذا قدرت تظبط كل نواحي المنظومة ديه من سياسي للتعليمي لاجتماعي لوعي ثقافي هتقدر تخلق من السكان دول اللي يحققولك النهضة فعلاً و متقولش مفيش موارد علشان نقدر نحقق ده كله لأ فيه موارد بس بطل غباء و استغلها بئى صح
اسف للمرة التانية ان كنت خرجت عن موضوعنا و اللي شكله كدا هيطول و ربنا يستر المهم من بقية العوامل الاجتماعية اللي ممكن تكون بتأثر كمان حاجة زي هجرة العقول و هي ان اصحاب العلم او الحرفة و المهنة بيهارجوا لاماكن يعرفوا فيها ينتفعوا بالفعل باللي بيمتلكوه من علم او مهنة و بالتالي فبلادهم الاصلية هتعاني من فقر في الكوادر اللي يمكن تكون في امس الحاجة ليها علشان تحقق نهضة في بلدها و بردو يمكن احنا في مصر بنعاني من الموضوع ده و بيني و بينكم انا التمس العذر للعقول ديه اللي بتهاجر لان يمكن لو مكنتش هاجرت مكنتش وصلت للي وصلتله ده لكن لا التمس ليه العذر في استمرارها هناك للابد اظن لابد لها من عودة علشان بلدهم تقدر تنتفع بعلمهم اللي حصلوه بره .. و باقي شويه عوامل اجتماعية كمان زي بئى الحروب اللي كفيلة انها تهدم دولة و تشرد شعبها وتخليهم يشحتوا كمان فكل اللي فات ده كان من المسببات اللي ممكن تكون سبب في الفقر اللي بتمر بيه الشعوب و في الغالب بيجتمع عوامل كتيرة من العوامل ديه في دول واحدة و بالتالي بتخليها من افقر شعوب العالم
طيب اظن كدا وضحنا يعني ايه فقر و ايه اللي ممكن يسبب الفقر ده .. طيب ايه حلوله ؟؟ ازاي نقدر نقضي على الفقر في العالم و في بلدنا ؟؟ هل بالفعل نقدر نقضي عليه ؟؟
ايوه نقدر نقضي عليه بس الاول انا هقول اللي انا شايفه ازاي نقضي عليه من وجهة نظري يعني انا شايف ان الفقر اذا كان ليه مسببات مختلفة لكن الموضوع كله اشبه بالسلسلة اللي حلقاتها كلها لازم تكون متصلة ببعضيها علشان تكون السلسلة ديه و اي فقد في حلقة من حلقاته هتتكسر السلسلة ديه و المشكلة هتحصل و لو جينا نتكلم بالاخص على الفقر هنلاقي ان السياسة في العالم او سياسة بعض الدول بالتحديد او سياسة بعض المنظمات الدولية زي الامم المتحدة ليها الاثر الاكبر في انها تكون السبب و الحل لمشكلة الفقر بمعنى ان لو جينا بصينا لبعض الدول الاكثر فقرا هنلاقيها بتعاني الاول مش مشاكل سياسية بتتمثل في حكامها او النزاعات اللي فيها فا بتتدخل المنظمات الدولية لحل و تصفية النزاعات ديه بدون اي تحيز لدول كبرى ( عظمى ) لتحقيق مصالح في الدول ديه فده هيكون او خطوة لحل مشكلة الفقر في الدول ديه لان بحل النزاعات ديه هتسمح لمؤسسات المجتمع المدني و العمل الخيري في انهم يبتدوا مع البلد ديه خطوة خطوة لغاية ما تقف على رجليها و مش بس مؤسسات المجتمع المدني و كمان مؤسسات دولية زي البنك الدولي و صندوق النقد الدولي و اللي هيتتدخلوا مش بس بالنقد دا هيتتخلوا كمان بمتابعة النظام الاقتصادي للدولة ديه علشان يضمنوا انها بالفعل هتتحق نهضة اقتصادية لكن الاهم ان ميكونش فيه اي تدخلات من اي نوع تعرض سير العملية ديه للفشل و المقصود بده طبعا تدخل دول عظمى بسياستها زي ماما امريكا مثلا لتحقيق اغراض مصالح شخصية لان عمرها ابدا ما كانت حريصة على مصلحة غيرها .. فالكلام ده كنت اقصد بيها الدول اللي هي متبهدلة خالص يعني حاجة زي الصومال كدا
اما بئى لو جينا نتكلم عن دولة مش فقيرة لكن للاسف بسبب سوء ادارتها بتعاني من الفقر و الاهمال دولة زي دولتنا كدا الحبيبة مصر فا انا شايف ان مشكلتنا بتتمثل في سوء ادارة فقط يعني عندنا كل حاجة عندنا الامن عندنا الموارد عندنا الثروة البشرية عندنا العقول الكويسة جدا بس مشكلتنا هي سوء ادارة من القائمين على ادارة الدولة بكل نواحيها بمعنى ان لو تولى امور الدولة ديه ناس فعلا اصحاب رؤية و علم و ضمير هيقدروا يغيروا منها تماما .. احنا مشكلتنا فينا مش في اي حاجة تانية بأيدينا نحلها بس المهم البداية
طيب انا بقول كفاية كدا لاني طولت جدا دا اولا طبعا و ثانيا لاني راجع من شغلي تعبان اصلا بس اصريت اني لازم اشارك في اليوم ده و بصراحة كان نفسي اكتب اكتر عندي لسه كلام كتير كنت عايز اقوله بس بصراحة الوقت لا يسمح بالمرة و خصوصا كمان اني بحاول اجيب المعلومات من مصادر الموثوق منها علشان تكون الارقام و المعلومات صحيحة و ده كله محتاج بحث كام يوم علشان يخرج موضوع متناسق لكن اهو الواحد حاول بقدر الامكان ان هوا يتكلم عن الموضوع ده و اتمنى اني اكون قدرت اضيف شيء ولو ضئيل جدا و الحقيقية مش مصدق ان فات سنة كاملة على حوار يوم التدوين ده لان من سنة بالظبط و في نفس اليوم كتبت بردو موضوع ليوم التدوين العالمي بس كان عن البيئة عموما سعيد بردو اني قدرت اكتب الموضوع ده و هسيبكوا مع بعض اللينكات اللي اتمنى انكوا تتطلعوا عليها علشان نشوف قد ايه الفقر مشكلة كبيرة في العالم
اولا دا لينك الموقع اللي بينظم اليوم ده و اتمنى انكوا تسجلوا عليه
اللينك ده بئى عبارة عن قناة على اليوتيوب عبارة عن شباب اخذوا على عاتقهم محاربة الفقر في العالم سافروا لاماكن بعيدة فيها قد ايه ناس معدمة مطالبهم في الحياة بسيطة و قد ايه الشباب دول بيحاولوا يساعدوا على قد ما يقدروا The Uncultured Project عموما اسف ان كنت طولت
تحياتي لكم جميعا
سلام
في البداية احب اقول بس كل سنة الناس كلها طيبة وبخير و رمضان كريم هوا صحيح رمضان قرب يخلص بس مش مشكلة بردو رمضان كريم (: .. المهم الواحد رجع اخيراً تاني بعد فترة كبيرة جدا من اخر بوست بس بصراحة الدنيا كانت متلعبكة اخر حاجة و انتوا عارفيين رمضان الوقت فيه بيبئى عامل ازاي و ده السبب اللي الواحد فيه مبيحسش بالوقت و بيحس ان الوقت عدى بسرعة اوي و ده بيزعلنا لان بجد رمضان شهر لا يعوض ربنا يعيده علينا ان شاء الله و الناس تكون بخير
اما بالنسبة للبوست ده فا محدش يسألني دا ايه هوا هيكون كوكتيل كدا مقتطفات سريعة من حاجات بس كنت عايز اقولها و خصوصا اني مصدقت اجيب وقت مركز فيه و محدش موجود في البيت يضايقني و اكتب براحتي
-------------
في البداية بس احب اقول شكرا للناس اللي علقت على اخر بوست و اللي بجد كانوا سند و يمكن يكونوا هما صح بس في رأيهم بالرغم من اني مازلت حاسس نفس الاحساس لكن هتغلب عليه بالاستمرار في الكتابة و كنت عايز اوضح بس ان في ناس اعتقدت اني هسيب التدوين و مش هرجع تاني بس ده طبعا ما اعتقدش ان هوا هيحصل لان التدوين بئى بالفعل خلاصي لاني بفضفض لنفسي قبل اي حد تاني و بجد استريحت لما كنت بخرج الحاجات اللي كانت بتشغل تفكيري و استريحت اكتر لما لقيت تعقيب ناس عليها يأما اكدولي حاجات مش كنت متأكد منها يأما فتحولي نقط و زوايا جديدة مكنتش شايفها يأما كانوا سند و عون للشخص في الوقت اللي بيحتاج فيه كل واحد مننا لوجود اشخاص بقربه حريصين عليه .. فا ديه نقطة بس كنت عايز اوضحها و اشكر بشدة الناس ديه
-------------
قد ايه النجاح ده شيء جميل بمعنى انك مثلا شاركت في نشاط و تعبت فيه و اجهدت جدا جدا لكن بمجرد انك تلاقي تعبك ده انتهى بالنجاح و اصبحت الاول على مجموعتك في النشاط او التدريب اللي كنت بتقوم بيه ده بتنسى كل لحظة تعب و كل لحظة اجهاد حسيتها لانك بتلاقي تعبك جيه بفايدة و علشان اكون واضح كان تدريب عندنا في شغلي و كان المفروض نكون موجودين كل يوم الصبح للتدريب بجانب شفتات عملنا فتخيل بئى ضيف ده كله للرمضان و انت اصلا يدوب مش نمت كفاية يدوب ساعتين تلاتة بالعافية و مطلوب منك انك تركز في تدريب و شغلك و انت اصلا يدوب شايف قدامك و بعد ده كله تلاقيك مرة واحدة نجحت بالشكل ده بجد احساس جميل اوي
-------------
اعتقد ان المقولة بالشكل ده احسن " شق طريقك باحترامك للاخرين بدلا من ان تشقه بسيفك " بجد لقيت ان كدا احسن لان بالفعل احترامك للاخرين هيفتحلك ابواب كتيرة اوي (حتى لو كان باب اتوبيس بعد موقف مريت بيه) بمجرد انك احترمت الناس بتلاقي المعاملة متغيرة بالفعل لدرجة بتجبر اشخاص اصلا مش كويسين انهم يعاملوك بكل الاحترام فقط لانك احترمتهم و عاملتهم بالشكل المناسب و قد ايه الاحترام ده ممكن تظهره للاشخاص دول بكلمات بسيطة جدا المفروض مش نهملها و نظهر احترامنا للناس اللي تستحق الاحترام و اللي متستحقش يعني انا مثلا بالنسبة ليا كشخص اللي يحترمني اشيله فوق راسي حتى لو مش هيساعدني في حاجة او كان مجرد شخص ما اعرفوش اما العكس بئى اللي بيعاملني بقلة الاحترام فا الشخص ده مش يهمني في شيء حتى لو هيديني الدنيا كلها
-------------
شهر رمضان ده بالفعل شهر الخير شيء جميل لما تلاقي الناس بتسعى انها تعمل الخير فيه لكن حابب بس اني امسك نقطة اعلق عليها و الفت النظر ليها و هي ان من ضمن اعمال الخير ديه الناس اللي بتزور الايتام و المرضى و بتحاول تخفف عنهم وحدتهم و تشاركهم فرحتهم وتساعدهم بقدر الامكان بس احب اقول بس ان يا جماعة الايتام و المرضى دول موجودين طول السنة مش في رمضان بس بمعنى ان ياريت ميكنش فعل الخير ده و اللي هوا شيء جميل جدا قاصر على شهر رمضان فقط عايزين الناس تتابع فعل الخير و تستمر على الزيارات و المساعدة و تكون بصفة دورية كل شهر مثلا ونشوف الاماكن اللي بجد محتاجة مساعدة و مقفيش حد واخد باله منها (مش اللي بيتعملها اعلانات كل يوم في التلفزيون) يعني شوف الاماكن اللي الناس اهملتها و خد عهد على نفسك انك هتكون موجود مع الناس ديه بصفة دورية و تشوف احتياجتهم و متطلباتهم و متنساش ان مش اللي بتحتاجه الاماكن ديه مساعدات مادية فقط بالعكس ده زيارتك و وجودك في وسطيهم اهم الف مرة من اي مبلغ ممكن تساعد بيه .. اللي عايز اقوله ان جميل فعل الخير و الاجمل لو كنت دائم عليه مش في شهر واحد
-------------
احنا ناس و الله محترمين جدا و خصوصا في شهر رمضان و كلنا بنحاول نتقرب اكثر الي الله و ديه فرصة ان الاجر مضاعف و كل واحد بيحاول يجتهد على قد ما يقدر و علشان كدا في اولى الليالي الفردية و لله الحمد نشلوا الشبشب بتاعي (ناس محترمين جدا) و ده بردو اجتهاد من الناس انهم يجمعوا اكبر عدد من الشباشب فا ربنا يهديهم يا رب و ان والله مسامح اللي خده بس كنت اتمنى ان اللي بيسرق ده حتى يستحي من ربنا و ميسرقش في رمضان (في رمضان و في غيره بس اهو) يعني في الوقت اللي الناس كلها بتحاول تتقرب بطاعة هوا بيقوم بمعصية عموما ربنا يهدي الجميع
-------------
اه بالمناسبة يوم 15 اكتوبر هيكون للمرة التانية زي السنة اللي فاتت اليوم العالمي للتدوين و اللي في السنة اللي فاتت اتكلموا عن البيئة و عن تأثيرنا عليها انما المرة ديه بئى اختاروا انهم يتكلموا عن الفقر في العالم و الالاف اللي بتموت يوميا من الجوع و اغلبيتهم طبعا في افريقيا فا فكرة اليوم قائمة على ان كل المدونين في العالم بيجتمعوا على انهم يختاروا موضوع محدد و ينشروا فيه و كل واحد حسب وجهة نظره للموضوع و ايه الحلول اللي ممكن تخلص العالم من المشكلة ديه و هكذا يعني على امل انهم يوصلوا الموضوع ده لاكبر عدد من الناس و اللي هما قراء المدونين دول يمكن يغير و لو حاجة بسيطة و نقدر ن خلاله نساعد اللي محتاج فعلا و اللي عايز اقوله ان مش شرط نتكلم عن الفقر في العالم ممكن مثلا نتكلم عن الفقر في بلادنا و ايه اللي بنعاني منه و ده لينك السايت اللي بينظم الحوار ده ممكن تتطلع عليه لو حابب تشارك في اليوم ده و اتمنى ان عد من المدونين العرب يشاركوا في الحوار ده علشان يكون لينا وجود في مجتمع التدوين الدولي و نشارك العالم كله نفس الفكرة
-------------
و الله الناس بتوع جوجل دول ناس محترمين جدا دايما بيطوروا و بيسهلوا علينا المتابعة و خصوصا بعد الاضافات الجميلة اللي عملوها على بلوجر و اللي اخرها كان حكاية الفولوينج او انك تتابع يعني تحديثات المدونات اللي بتحب تتابعها من الداش بورد و كمان تعلن انك فولور لمدونة معينة و تضيف جادجيد كمان للموضوع ده (لسه شايف الموضوع ده النهاردة) .. بصراحة انا معجب جدا بالشركة ديه افكارهم جميلة جدا و بيربطك بالدنيا كلها من خلال اكونت واحد من خلاله تقدر تستخدم خدمات جوجل كلها و الاجمل كمان ان كلها مجاناً فا احقاقاً للحق يعني الناس ديه زي الفل و بجد جوجل اصبح و هتكون امبراطورية فعلا بتهدد عرش ميكروسوفت في مجال البرمجيات و خدمات الانترنت .. بجد ربنا يزيدكوا كمان و كمان
------------
بس اعتقد ديه النقط اللي كنت عايز اسردها سريعا علشان اخرجها من دماغي لان الحاجات اللي بكتبها هنا زي ما تقولوا كدا الاوت بوت بتاع دماغي او نتاج تفكير فا اللي بكتب هنا بفضي مساحة في دماغي علشان اشغلها تاني بحاجات تانية و اجي اصدعكوا بيها ..عموما كل سنة و الناس كلها طيبة و بما ان العيد خلاص قريب فا احب اقول بردو للناس كلها عيد سعيد عليكوا ان شاء الله
-------------
-------------