Tuesday, October 13, 2009

الصحة في مصر 1

السلام عليكم

المرة ديه عدى وقت كبير على اخر تدوينة و ده بسبب ظروف كانت قوية و اللي ليها علاقة وثيقة بعنوان البوست لان الظروف اللي مريت بيها كانت استمرار لحالات الوفاة اللي بدأت بجدتي في التدوينة اللي فاتت لكن المرة ديه كانت لناس اكثر قرباً و هوا والدي (ادعو له بالرحمة و المغفرة) اللي توفاه الله من اكثر من شهرين تقريباً و اللي كان مصاب بالتهاب الكبد الوبائي فيرس سي و اللي فضل عايش بيه لفترة كبيرة بيعافر مع المرض الا ان في الفترة الاخيرة تطورت الاعراض و اصبحت حالة صعبة و حرجة للغاية و اللي ادت في النهاية للوفاة و طبعا الحمد لله على كل شيء لان الموت مكتوب علينا كلنا و ده قضاء الله و قدره و مهما طال بينا الزمن او قصر فالنهاية حتمية و صدق رسول الله صلى الله عليه و سلم حيث قال "عش ما شئت فإنك ميت وأحبب من شئت فإنك مفارقه" الا ان طبعا الامر لم ينتهي عند والدي لان بعديه بفترة قصيرة تعب عمي بردو و اللي مصاب ايضاً بنفس المرض فيرس سي و اللي تتطورت معاه الاعراض حتى وصل الامر ايضا للوفاة بعد وفاة والدي بشهر تقريباً و بكدا يكونوا حصلوا عمي اللي هو اكبرهم سناً و اللي اتوفى بردو بنفس المرض في بداية السنة ديه و اللي اسأل الله لهم الرحم و المغفرة و ان يكرم نزلهم و يطهرهم و يزكيهم و يسكنهم الفردوس الاعلى من الجنة هم و جميع الموتى و موتى المسلمين اللهم آمين يا رب العلمين

اللي عايز اقوله بئى و اللي بالفعل موضوع من اخطر ما يمكن و هو الصحة في مصر لاني رافقت الحالات ديه كلها في المستشفيات الحكومية و اللي خلاني اشوف حجات كتيرة اوي و اشوف مدى الفساد و الاهمال و القذارة الموجودة في نظامنا الصحي بالكامل و ابتدي الاول بكمية الامراض و اولهم المرض ده اللي هو التهاب الكبد الوبائي سواء فيرس بي او سي اللي وصل اعداد المرضى بيه في مصر الى اعداد مخيفة فعلا و اللي قدروها بعدد عشرين مليون مصري مصابين بالمرض ده و العدد مستمر و اللي بجد حاجة مفزعة يعني انتوا مش متخيلين العدد 20 مليون مصري يعني بنسبة 18% تقريبا من تعداد سكان مصر و السبب في الاعداد الكبيرة ديه ان مسببات المرض ده كانت جزء منها في الماضي بسبب تطعيم بحقن معينة و هي اللي نقلت الفيرس ده لاجيال بالكامل و اللي هوا جيل والدي و عمي يعني جيل الخمسينات تقريباً و جزء من المسببات موجود حاليا و هوا طبعا الاغذية اللي بيستخدم في زراعتها المبيدات و المياه الملوثة ولا تصلح اصلا للأستهلاك الادمي و الاهمال المتواجد في المستشفيات و اللي بيسمح بأنتقال الدم الملوث بالفيرس للناس السليمة و بينتهي الامر باصابتهم بالفيرس و كل ده بيخلي اعداد المرضى بتقفز بصورة جنونية و اللي للأسف كمان مش قاصر على كبار السن لأ دول كمان الشباب و بأعداد كبيرة للأسف مصابين بالفيرس اللعين ده و الاطفال كمان .. فأنا عايز اعرف فين المؤسسات الصحية في مصر من الكلام ده و بيعملوا ايه و على رأسهم الجبلي ؟؟

للأسف طبعا هما مش فاضيين لان المشكلة في مصر مش مشكلة التهاب كبد وبائي و بس المشكلة مشكلة امراض بالكوم و بأعداد تخليك تقول و مين في مصر دلوقتي سليم لان يوجد في مصر ما يقرب من اربعة ملايين مصاب بالسكر و خمسة ملايين مصاب بالفشل الكلوي دا غير ما يقرب من ربع مليون مصاب بالسرطان غير بقية الامراض التانية و اللي كنت قريتها في احصائية على احد المواقع لكني مش لاقيها للأسف لكن عموما يبقى الوضع سيء اللي اقصى حد و غير مقبول بالمرة لكن طبعا مين اللي هيقول الكلام ده اذا كان تقريبا بالارقام ديه 50% من الشعب المصري مريض بامراض ينتظر بها الوفاة و النصف الاخر بيجري على علاج النص الاولاني و مش ملاحق

عموماً اعذروني يمكن كلامي مش مرتب لكن حبيت ابتدي الموضوع و مكنتش ملاقي الوقت المناسب الحقيقة بسبب ظروف شغلي لكن ان شاء الله يتبع لان لسه عايزين نتكلم عن المستشفيات و العك اللي بيحصل فيها و عن بقية الامراض و ازاي المفروض الحكومة تتعامل معاها عموما نكمل في الجزء التاني ان شاء الله
تحياتي لكم جميعاً و اسأل الله ان يديم عليكم نعمة الصحة و العافية و العمر المديد

سلام



10 comments:

يا مراكبي said...

أولا البقاء لله

تعازينا الغالية للوالد والعم

أسكنهم الله فسيح جناته بإذن الله

ثانيا .. بلا شك أن الأرقام التي ذكرتها هي مخيفة ومرعبة .. وهي إن دلت على شيء فإنما تدل على أن هناك مخططا محمكما لتدمير صحة هذا الشعب وإستنزاف قدراته

لنا الله

Tamer Nabil Moussa said...

السلام عليكم

ربنا يرحم الوالد والعم ويدخلهم فسيح جناتة

كل ما كتبت موجود فى بلدنا واكثر من كدة ومفيش اهتمام لان محدش مهتم غير بالفلوس وبس

وربنا يصلح الحال


مع خالص تحياتى

Shreef said...

يا مراكبي

الدوام لله وحده يا بشمهندس و جزاك الله كل خير .. و بالنسبة لحكاية المخطط ده كنت الاول اشكك في حاجة زي كدا لكن بصراحة لما لقيت ان الحال بالشكل ده و كمية الامراض ديه اللي اصابت تقريباً كل الفئات العمرية فالموضوع اصبح مقلق جدا و خطير على امن مصر القومي و ربنا يستر بجد على البلد ديه في المستقبل القريب .. شكراً للتعقيب و تحياتي لحضرتك

Shreef said...

تامر نبيل

و عليكم السلام و الرحمة و ربنا يرحمنا جميعاً برحمته الواسعة يا استاذ تامر و اؤكد لحضرتك بالفعل ان كله مهتم بالفلوس و بس لان الموضوع من اوله لاخره اتحول لتجارة و للاسف على حساب صحة الشعب ده هتقول ايه بئى فساد في كل حتة فيكي يا بلد و ضمير منعدم .. شكراً للتعقيب و ربا يستر :)
تحياتي

IBN BAHYA - إبــن بهيـــــــــــــة said...

كل سنه وأنت .. والجميع بخير وطيبين
ومتحررين
أرق تحياتي

Ana keda said...

البقاء لله
بجد ربنا يبارك فيك انت ويخليك لاهلك وتبقى نعم الرجل والعوض والسند
ادعيلهم ربنا يعينك بجد جمل تقيل جدا ان كل الناس الى بنحبهم يروحوا مرة واحدة كده
واصعب حاجة انك تفقد حد
اما عن الصحة فدى قضية مفروغ منها فى مصر هى البلد مش فاضية لحاجة اصلا ربنا ياخدهم

عابرة السبيل said...

البقاء لله
وربنا يصبركم

Anonymous said...

البقاء والدوام لله وربنا يسكنه فسيح جناته ويرحمه ويرحمنا جميعاً

الاحصائيات والكلام اللى انت قلته للاسف مصدمنيش لانه حقيقة بقينا كلنا مدركينها وليس شئ جديد وبنسمع ونقرا ونسكت ومازلنا مصرين على الصمت او حتى مازلنا مستمرين فى عادات غير صحية نفعلها كافراد فى حياتنا اليومية ومازلنا مصرين على القاء كل شئ والاصرار على كلمة سيبها على الله
ونعم بالله كله على الله بس مش بالطريقة دى

عالمى ازرق said...

كل سنه وانت طيب ياشريف
ودايما متألق كده يارب
وحشنى أطل على مساحتك اوى بجد
عيد اضحى سعيد عليك وعلى كل اللى بتحبهم

Shreef said...

IBN BAHYA, ANA Keda, عابرة السبيل ام بقلظ باشا, hend...hanady, عالمي أزرق

أشكركم جميعا على شعوركم وأسف جدا لتأخري في الرد .. تحياتي للجميع