Wednesday, July 01, 2009

البقاء لله وحده

احساس صعب اوي لما بنفقد الناس الطيبة اللي حوالينا اللي بيخلوا للحياة معنى و خصوصا لما نكون متعلقين بيهم اوي سواء كانت برابط الصداقة او القرابة لكن كمان ادراكنا بأن حياة كل فرد فينا الي زوال هي اللي بتهون على الواحد شويه فراقهم .. انا بقول الكلام ده لاني خلال الاسبوع اللي فات فقدت شخص غالي عندي شخصياً و غالي عندنا كلنا كعائلة و هي جدتي اللي اتوفت من اسبوع تقريبا و اللي وفاتها كان امر متوقع بسبب مرضها اللي اشتد عليها الفترة الاخيرة و خصوصا انه كان ملازمها فترة كبيرة لكن طبعا بحكم السن و الشيخوخة عموما اصبح الجسم غير قادر على تحمل مشاق المرض و مشاق الحياة اكتر من كدا الى ان توفاها الله اللي اسئله الرحمة و المغفرة لها و لكل اموات المسلمين يا رب .. لكن زي ما قولت فقدانها كان شيء صعب علينا كلنا لانها كانت الحضن اللي ضمنا كلنا اجيال متتالية و اللي كلنا اتربينا على ايدها و اللي بالفعل كانت و نعم التربية اللي يشهدلها الكثير من الناس
جدتي كانت ام زي الكثير من الامهات في مصر اللي عانوا علشان يقدروا يوفروا لابنائهم متطلبات الحياة و خصوصا بعد ان تخلى الزوج عن مسؤليته تجاه اولاده و بالرغم من الحالة المادية الصعبة اللي كانت بتمر بيها الا انها قدرت انها تتحمل مسؤلية اولادها و تشتغل و توفرلهم المال المطلوب علشان يقدروا يكملوا تعليمهم و يعيشوا حياة كريمة و يقدروا بالتالي يوفروا حياة كويسة لاولادهم و هكذا على مر الاجيال المتتالية يعني بالفعل هي كانت مثال للست اللي بيقولوا عليها بميت راجل وبالفعل قدرت الحمد لله انها تحقق لولادها حياة كريمة بالرغم من كل الظروف الصعبة اللي عصفت بيهم

انا لو فضلت اتكلم عليها و على احتوائها لينا و للناس كلها اللي حوالينا و اللي بيكنوا ليها كل الحب مش هقدر اوفيها حقها مقدرش الا اني دلوقتي ادعيلها ان ربنا يرحمها و يغفر ليها و يتجاوز عن سيئاتها و يرزقها الفردوس الاعلى من الجنة مع النبيين و الشهداء و الصديقين و الصحابة وحسن اولائك رفيقا و يبدلها بيتاً خيراً من بيتها و زوج خير من زوجها و ان يجعل قبرها روضة من رياض الجنة آمين آمين يا رب العالمين

جدتي تعبتي كتير في حياتك و جه الوقت علشان ترتاحي
اسألكم الدعاء لها و لجميع المسلمين الاحياء منهم و الاموات

تحياتي

7 comments:

قلب ينبض لله said...

البقاء والدوام الله
ربنا يرحمها ويسكنها فسيح جناته
ربنا معاك ويصبرك

Bella said...

رحمها الله رحمة واسعة واسكنها فسيح جناته وألهمكم الصبر والسلوان

أكثر من الدعاء لها

ربنا يتغمدها برحمته

البقاء لله وحده

شد حيلك ياشريف

سلسبيل said...

البقاء لله ياشريف
ربنا يصبركم
ويرحمها ويسكنها فسيح جناته

Shreef said...

قلب ينبض لله
رضوى شكراً على تعقيبك و دعائك
تحياتي


Bella
استاذة بيلا بالفعل الدعاء هو اللي هيبقى ليها دلوقتي و العمل الصالح كمان .. تحياتي لحضرنك


سلسبيل
آمين يا رب و يصبر كل من يفقد شخص عزيز و غالي عليه .. تحياتي

يا مراكبي said...

انا لله وانا اليه راجعون

البقاء لله

بك أستجير said...

أخى شريف
البقاء لله وحده
اللهم إرحمها وأغفر لها وتجاوز عن خطايها
واللهم يلهمكم الصبر

"كل من عليها فان ويبقى وجه ربك ذو الجلال والإكرام"

عالمى ازرق said...

البقاء لله
ربنا يرحمها ويغفر لها ويسكنها جنته مع عباده الصالحين اللهم آمين
وربنا يرزقك الصبر على فراقها ويجازيك بيه خير الجزاء يارب