Thursday, May 21, 2009

مصر و شعبها و حكومتها و الانفلونزا

بصراحة الموضوع الاخراني ده بتاع انفلونزا الخنازير خلاني اتأكد او اعرف حاجات كتير مكنتش عارفها و هنا مش هتكلم عن الانفلونزا ديه كمرض و عن الحوارات الخاصة بيها اللي كلنا عارفينها لكن عايز اتكلم عن استجابتنا احنا كمصريين و كحكومة للموضوع كله لاني كنت معتقد اه ان احنا متخلفين لكن للأسف مكنتش اعرف ان احنا في قمة التخلف والغباء ومتعصبين وهمجيين كمان و قول كل اللي انت عايز تقوله ليه بئى ؟؟؟ لان الواحد اتفرج على مهازل بمعنى الكلمة سواء من استجابة الحكومة و تجاوب الشعب مع المرض و الموضوع كله و خصوصا ان الموضوع تشعب بطريقة غريبة لدرجة انه خرج من مجرد كونه مرض كأي مرض و اتحول في بلدنا بس علشان يكون مشكلة اقتصادية و دينية و اجتماعية بالاضافة لكونه مشكلة صحية و ده ببساطة شديدة لقدرتنا العبقرية على جعل اي مشكلة اكبر من حجمها عشرات بل مئات المرات .. و لو ابتدينا بتجاوب الحكومة مع المرض هنلاقي ان هما اخدوا اول قرار بذبح و اعدام جميع الخنازير الموجودة في مصر (و اللي كان لا يختلف كتير مع القرار اللي اخذته لكما قررت بأعدام كافة الطيور حتى غير المصابة منها ايام انفولنزا الطيور و اللي عمل مشكلة كبيرة) و ده طبعا حل غير منطقي بالمرة لانه مش علشان عايز اتفادى حدوث مشكلة اقضي على العامل اللي (ممكن) يكون اساس للمشكلة ديه مش علشان الانفلونزا بتصيب الخنازير اعدم كل الخنازير الموجودة في البلد و خصوصا ان الفيرس مش اساسه الخنازير لكن اصاب الخنازير زي ما اصاب الطيور زي ما بيصيب البشر لان فيرس الانفلونزا واحد لكنه بيتحور لاكثر من صورة و خصوصا كمان ان كل الاصابات اللي حصلت كانت بسبب اختلاط البشر ببعض مش اختلاط البشر بالخنازير و علشان كدا منظمة الصحة العالمية استغربت للقرار و قالت ان علشان اللبس ده هتبطل تستخدم كلمة انفلونزا الخنازير كمصطلح للمرض و هتستخدم مسمى تاني


المهم القرار كان غبي لكن ممكن يكونوا مدركين ان هوا قرار غبي لان كان هدفهم اصلا حاجة تانية و هي حاجة متعلقة بالخنازير نفسها في مصر و طرق تربيتها و اماكن تربيتها و خصوصا بعد ما شوفنا ان اساس تربيتها و تغذيتها قائم اصلا على مقالب الزبالة و اللي موجودة في وسط اماكن سكنية و علشان كدا لقوا ان ديه فرصة لا تعوض علشان يخلصوا من عدة مشاكل في بعض و هما عندهم حق انها مشكلة لكن اللي صدمني و اثر فيا بجد الناس اللي قايمين على تربية الحيوانات ديه لان شوفنا قد ايه هما ناس معدمين و تربية الخنازير ديه هي مصدر رزقهم الوحيد (بغض النظر عن مسألة حرام ولا حلال مش ديه نقطتنا كل واحد عارف الحرام من الحلال و هوا اللي بيتحمل وزرها و قياساً على كدا الخمور و اللي بيقبلوا انهم يشتغلوا فيها) و ان بقرار زي ده كان بمثابة اعدام ليهم و خصوصا انهم يعني رضيوا بعمل زي ده وسط مقالب الزبالة و بيحاولوا يعيشوا و راضيين و في الاخر كمان بعد ده كله جاي تاخد منهم مصدر رزقهم و مش هنسى الراجل اللي شوفته كان على العاشرة مساءا تقريبا لما قال خلاص يعدمونا احنا كمان مع الخنازير علشان تبئى مرة واحدة و خلصنا فتخيلوا قد ايه كان قرار صعب بالرغم من الحكومة قالت انها هتعوض الناس ديه بملغ معين و بالفعل كان فيه تعويضات لكن اقل من اللي قالوا عليها و احنا عارفيين كلام الحكومة .. علشان كدا سواء كانوا الناس دول مسيحين او مسلمين فبجد هيعانوا كتير جدا بسبب قرارات غير محسوبة


نيجي بئى للجانب الديني و القلق و المشاكل اللي حصلت ديه كلها و بصراحة مكنش ذنب الحكومة بل ذنب الناس و خصوصا بعد ما تابعت ردود فعلهم على النت و كان من المسلمين والمسيحين على حداً سواء و كانت البداية لما ناس قالت ظهر الحق و علشان كدا ربنا محرم اكل الخنازير و مصدقوا مسكوا حاجة و كانت نقطة غريبة اوي طيب اشمعنى مسكتوا في النقطة ديه طيب ما كان فيه قبلها انفلونزا الطيور ولا لحقتوا نسيتوا اللي عايز اقوله ان ربنا مش محتاج يجيب مرض في حاجة محرمها علشان نتأكد من حكمته في تحريمها لان احنا علينا الطاعة بغض النظر عن الضرر او المنفعة اللي هيعود علينا من الحاجة ديه و كمان لقيت ناس كتير مستغربة اوي و بتقول "ايه ده كل الخنازير ديه في مصر امال احنا دولة اسلامية ازاي" بصراحة مش عارف ارد على الناس ديه و اقول ايه يعني الخنازير هي اللي جات اوي على الوجيعة طيب ما تتكلموا على الخمور اللي السياحة لا تقوم لها قائمة من غيرها ولا تتكلموا عن نوادي الليل و اللي بيمارس فيها ولا المخدرات ولا البلاوي اللي معششة في البلد و هي ابعد ما تكون عن الاسلام .. و النقطة التانية بردو اللي استغربتلها جدا رد فعل المسيحين في مصر و خصوصا لما اعتبروا ان قرار ذبح و اعدام جميع الخنازير بمثابة اضطهاد ليهم و ده مش صحيح لان لو فرضنا ان ديه كانت هتكون سبب رئيسي من اسباب انتشار المرض (مجرد افتراض) هل بردو هتقولوا لا الخنازير متدبحش و ده اضطهاد و الكلام الكبير ده ؟؟ لأ طبعاً لأن المفروض ان الغاية هي دفع الضرر بقدر الامكان حتى لو كان على حساب حاجة مهمة بالنسبة لينا و هرجع اقارن بالطيور اللي كانت مهمة لي 100% من الشعب المصري مش 10% بس و مع ذلك اخذوا قرار بذبحها (بغض النظر متفقين مع القرار ده او لأ) .. لكن يمكن يكونوا مسيحين الداخل براء من القلق ده و يكون المتهم الرئيسي هم من يلقبون نفسهم بأقباط المهجر و على رأسهم اللي اسمه مايكل منير تقريباً و مش شايف انهم بيعملوا اكتر من انهم بيقلبوا الرأي العام في الخارج على مصر بأنها بتضهد المسيحين و كلام فراغ كتير كدا ملوش اي لازمة .. يا جماعة انا مش مع حد ضد حد لكن بصراحة قمة الغباء و التفكير المحدود لان مصر هي الدولة الوحيدة (على ما اعتقد يعني) اللي حصل فيها ازمة دينية بسبب الموضوع ده


بصراحة كدا من الاخر احنا وصل بينا الحال لمستوى سيء جدا (انيل مما كنت متوقع بصراحة) علشان كدا بدعي ربنا انه يسبب لينا الاسباب و يخرجنا من الوضع السيء ده و يرجع لينا تاني عقولنا و اخلاقنا و يردنا للدين رداً جميلاً و يستر علينا من الانفلونزا ديه لان لو دخلت مصر (أذا مكنتش دخلت اصلا) هنتبهدل بهدلة سودا نتيجة الكثافة السكانية العالية وقلة الوعي و النظام و الاهتمام سواء من الشعب اومن الجهات المسئولة


عموما اسف جداً لطول البوست لكن بصراحة قولت اهو يكون جرعة مكثفة و خصوصاً اني بعدت عن التدوين الفترة اللي فاتت بالرغم من متابعتي لبقية المدونات لكن اهو ربنا يسهل .. تحياتي لكم جميعا

10 comments:

يا مراكبي said...

موضوع جيد

من أهم النقاط اللي عجبتني فيه هي المقارنة بين حالة أنفلوانزا الطيور وأنفلوانزا الخنازير


وأحلى نقطة هي موضوع إن الناس إتفاجئت بكمية الخنازير دي وتساءلت: هو إحنا مش دولة إسلامية؟

ونسيوا إن الدولة الإسلامية دي فيها خمور ورقص وكباريهات برضه .. سبحان الله على الزهايمر اللي موجود عند الشعب

بك أستجير said...

أنا بتفق مع يا مراكبى فى رأيه

للأسف الناس دلوقتى بقت تمشى وكأن مغمى عليها
هو ده حالنا
إفرجها يارب وحسبى الله ونعم الوكيل فى اللى كان السبب فى حياتنا كده
وشكرا ليك ياشريف على الموضوع

maha zein said...

هو موضوع انفلونزا الخنازير هو عقاب ربنا للغفلة اللى بقينا فيها
سواء انفلونزا خنازير
سواء انفلونزا طيور
سواء اي عقاب من اي نوع اخر
يعني تنبيهات للانسان انه يفوق من غفلته
ويتذكر بأن فيروس صغير ممكن يسبب الرعب ده كله للبشر مهما وصلوا بعلمهم

بس موضوع دبح الخنازير
وخاصة الخنازير المصرية ذي ما حضرتك وضحت كان قرار كويس مع تعويض الناس اللى اتضرروا ومحاولة ايجاد عمل اخر لهم
لان فعلا البيئة عندنا في مصر وخاصة بيئة تربية الخنازير بيئة مشجعة لظهور كل انواع الامراض
خاصة المحور واللى فيه
ده كأن المكان ده موبوء بكل الروايح اللى فيه والارف اللى فيه
هو قرار صائب للوقاية وتجنب انتشار المرض في المناطق السكنية دي
لكن طبعا لا ضرر ولا ضرار
يعني مع التعويضات

ربنا يرحمنا ويخفف عنا
و يحفظك ويعزك

واحد يعرفك said...

موضوع جميل

تقبل مرورى يا صاحبى

Shreef said...

يا مراكبي

بالفعل يا بشمهندس المقارنة ديه كانت ضرورية لأن الوضع مش هيختلف في الحالتين و كان لازم نتعلم من اخطاء التجربة الاولى لكن من امتى و احنا بنتعلم من اخطائنا .. و بالنسبة للنقطة التانية نرفزتني جداً و حسستني ان الناس عايشة في كوكب تاني بجد احنا امرنا غريب اوي .. عموما شكراً لتعقيب حضرتك و رأيك اللي اسعدني جدا .. تحياتي

Shreef said...

بك استجير

اكيد طبعا لازم يكون مغمى عليها من كتر المخدرات اللي في البلد و لو مكنتش المخدرات هيبئى الهموم اللي بيشيلها المواطن المطحون يوم ورا يوم .. ان شاء الله هييجي الوقت اللي هنفوق فيه بس المهم ميتأخرش اوي يعني احسن ييجي وميلقيش حد :)
شكراً لمشاركتك و اتمنى انها متكنش اخر زيارة .. تحياتي

Shreef said...

Maha Zein

اكيد ده ابتلاء من ربنا و تنبيه زي ما حضرتك قولتي لكن يبدو ان احنا مصممين ان احنا نفضل في غفلة تقريباً احنا معجبين بالغفلة ديه لان اللي بيعتبر بالغفلة ديه هما الناس اللي ليهم عقل او بلفظ قرءاني (اولي الالباب) فيمكن علشان كدا احنا مش عارفين نفوق لان الناس بطلت تستخدم عقلها او تعبت من استخدام عقلها .. اما بالنسبة لموضوع دبح كل الخنازير انا مش معترض على دبحهم عموما انا اللي مضايقني فكرة دبحهم لاعتقادهم بان كدا هيوقفوا انفلونزا الخنازير و ده مش صحيح تماماً لكن انا وجودهم مش فارق معايا دول حتى طرق تربيتهم تجيب امراض وبلاوي تانية بغض النظر عن الانفلونزا فا بس ديه النقطة اللي اقصدها .. عموما متشكر جدا لتعقيبك على الموضوع و اسف للتأخر في الرد عليه .. تحياتي

------------------

واحد يعرفني

شكرا ليك على رأيك و اسعدني مرورك
تحياتي

eltamaz elmithaly said...




خدمات شركة ركن الامثل بالمنطقة الشرقيه 0502644550 وتقديم كافة الخدمات المنزلية

شركة كشف تسربات المياه بالاحساء
شركة تسليك مجارى بالجبيل
شركة مكافحة حشرات بالجبيل
شركة تنظيف منازل بالجبيل
شركة تسليك مجارى بالخبر
شركة مكافحة حشرات بالخبر
شركة تسليك مجارى بالدمام
شركة مكافحة حشرات بالدمام
شركة تسليك مجارى بالقطيف
شركة مكافحة حشرات بالقطيف

eltamaz elmithaly said...



شركة المثالية للتنظيف بالدمام
شركة المثالية لتنظيف المنازل بالدمام
شركة المثالية لتنظيف الفلل بالدمام
شركة المثالية لتنظيف الشقق بالدمام
شركة المثالية لتنظيف المجالس بالدمام
شركة المثالية لتنظيف السجاد بالدمام
شركة المثالية لرش المبيدات بالدمام
شركة المثالية لمكافحة الحشرات بالدمام
شركة المثالية لمكافحة النمل الابيض بالدمام

eltamaz elmithaly said...




شركة المثالية للتنظيف بالخبر
شركة المثالية لتنظيف المنازل بالخبر
شركة المثالية لتنظيف الفلل بالخبر
شركة المثالية لتنظيف الشقق بالخبر
شركة المثالية لتنظيف المجالس بالخبر
شركة المثالية لتنظيف السجاد بالخبر
شركة المثالية لرش المبيدات بالخبر
شركة المثالية لمكافحة الحشرات بالخبر
شركة المثالية لتنظيف البيوت بالخبر
شركة المثالية لتنظيف الكنب بالخبر