Thursday, February 19, 2009

What Do You Think ?

قريب كنت بتفرج على فيلم بس مكنتش مركز معاه لاني شوفته مرة قبل كــدا
لكن المرة ديه سمعت جملة علقت معايا اوي مكنتش اخدت بالي منها

الجملة كانت

" We like people for their qualities, but love them for their defects. "

عايز يقول ان احنا بنعجب بالناس لصفاتهم الحسنة لكن بنحبهم و بنعشقهم لعيوبهم عجبتني الجملة ديه لاني لقيت فيها حاجة مكنتش شايفها و فهمتها من منظوري انا لكن كنت عايز اعرف رائيكم انتم ايه و ايه اللي فهمتوه من الجملة ديه و متفقين معاها ولا لأ ؟ و نتناقش فيها سوا
.....

14 comments:

محمد حويحي said...


الجمله صحيحه جدا .. البعض بيقاوح في حقيقه زي دي .. لكن فعلا اللي بلفت نظر الواحد لشخص عن التاني .. هي العيوب .. اللي باختلافها بختلف انطباعنا عن البشر
:)

Shreef said...

عقل مهوي

ايه السرعة ديه
:D

بالفعل الجملة صحيحة و متأكد ان الناس هتقاوح بس لسبب بسيط مش علشان هما غلط لأ علشان تعريف كل واحد فينا لكلمة عيوب هيختلف عن التاني لان بالفعل زي ما انت قولت العيوب اللي نقصدها هي الاختلافات اللي بتميز البشر عن بعضيها و اللي مش شرط تكون سيئة

شكراً لتعقيبك و سعيد بمتابعتك
تحياتي :)

قلب ينبض لله said...

بصراحة أول ماقريت الجمله مافهمتش حاجة
بس لما جيبت الناس اللي معجبة بيهم لائتني فعلا معجبة بيم بسبب أمكانياتهم ومهاراتهم وشخصيتهم

ولما فكرت في الحد اللي ممكن أحبه وأتعليء بيه لائتني ها أحبة وأعشقه مهما كانت عيوبه

بس دا بعد ما احبه طبعا
لكن لو شوفت عيوبه دي قبل ما أحبه ها أحبه برده:)

لأن مراية الحب عامية هي مش عامية أوي يعني بس بتستهبل:D

Shreef said...

قلب ينبض لله

اهلا رضوى اخبارك ايه ؟ يا رب تكوني بخير

المهم اولا بس كنت حابب اقول ان مش المقصود بالعيوب الصفات السيئة اللي ممكن تكون في الشخص ده زي مثلا الكذب او الخيانة و كدا لكن نقصد الحاجات اللي ممكن ينظر ليه على انها عيوب لكن وجودها في الشخصة بتكسبه صفة متميزة و بتجعله مختلف عن الاخرين و ده اللي بيجذبنا ليه ولو عايزة تعبير ادق ممكن تقري النصف التاني من تعليق مها اللي بجد قال كل اللي دار في دماغي و خلاني اتعلق بالمقولة ديه .. الجملة مش صعبة لكن مش هيفهمها كويس الا اللي طبقها على الواقع زي ما انتي عملتي بالظبط

قولتي نقطة جميلة اوي يا رضوى و هي ان مراية الحب مش عامية اوي بس احنا اللي بنستهبل لان بالفعل ساعات كتير احنا اللي بنختار ان احنا نتغاضى عن بعض عيوب الطرف الاخر اللي ممكن نعتقد انها مش هتأثر على علاقتنا بيه و انا شايف ان ده احسن لان لو اعتبرنا ان بالفعل مراية الحب عامية فده ممكن يكون سبب في ان احنا مش هنشوف اصلا عيوب الطرف الاخر ده اللي ممكن تكون كل الناس شايفها

عموما شكراً لمشاركتك و بعتذر مرة تانية عن التقصير في المتابعة .. بالتوفيق دايما يا رب

سلام

Shreef said...

Maha

اهلا اهلا باستاذتنا (اللي مش صغنونة ابدا :) ) و اللي هفترض انها مها صاحبة غربة وطن لأختلاف البروفايل بتاعك اللي هوا تقريباً بروفايل جديد بمدونة جديدة اللي هي ليكي و بس (ربنا يوفقك يا رب) .. المهم دايما كدا يا مها بتقصري عليا الطريق و بتمسكي الخلاصة تسلمي بجد بس اسمحيلي اعلق على تعليقك بالعكس يعني النص التاني الاول اللي بالفعل قال كل اللي كنت عايز اقوله لكن كنت منتظر رأي الناس و مين هيتفق معايا .. المهم بالفعل الشخص ده ممكن تكون فيه صفة و تكون هي السبب في انك تتعلقي بالشخص ده و مثال على كده ان الواحد ممكن يتعلق بشخص ما ممكن تكون واخداه عزة النفس شويه لدرجة تخلي الناس تعتقد ان ده غرور ( او حتى الناس تعتقد ليه قد يكون بالفعل غرور ) لكن انتي شايفه فيه الثقة بالنفس و قوة الشخصية اللي مدركة ان عقله هو سر تميزه و ده بالظبط المقصود ان الصفة ديه هي اللي بتكسبه النكهة المميزة (على حد تعبيرك) و اللي يمكن بالفعل لو حاول يتخلى عنها اعتقاداً منه بان ده ضروري لتغيير وجهة نظر الناس ليه تكون سبب في ضياع النكهة ديه لأن الاكيد ان النكهة ديه مش هيتذوقها و يحس بمدى جمال طعمها الا قلة من الناس و عادة هيكونوا الناس اللي طريقة تفكيرهم مش تقليدية

اما الجزء الاول من التعليق و اللي بردو مهم جداً لانك وضحتي فكرة مهمة جدا و هي ان احنا مش ملايكة و من المهم ان احنا نلتمس لبعضنا العذر في حاجات بالفعل قد نكون وقعنا فيها سهو او صدقيني حتى لو متعمدين لاننا ببساطة بشر لكن في الغالب بتوصلي للمرحلة اللي بتلاقي كل الاعذار اللي بتلتمسيها للطرف الاخر خلصت و بالتالي بيكون وصل لنقطة اللاعودة و منه لله اللي كان السبب .. ما علينا

المهم شكرا لمشاركتك يا مها اللي دايما بتسعدني و طبعا لازم تكون مقالية علشان مش نتحرم من التحليلات ديه و اعذريني على الغيبة ديه بس نعمل ايه فين النفس و بالتوفيق في حياتك دايما يا رب و تحققي كل اللي تتمنيه و انا بتابع والله الناس بس غالباً على الجوجل ريدر

تحياتي الشديدة
سلام

maha said...

سلام عليك يا شريف
ده تحديث للكومنت اللي كنت كتبته
بالغلط كنت دخلت باكونت تاني
:)
بس الاساسي غربة وطن
..
و ده الكومنت
اول مرة يكون الكومنت بعد الرد من صاحب المدونة
:)
.............

"سلام عليك يا شريف
يااه ايه الغيبة الطويلة دي
اخيرا عوده و بسؤال هيكون اجابته مقاليه مطوله مني :)
كالعاده يعني :)
ممم
بنعشق الناس بسبب عيوبها ؟؟؟
اه ليه لا ؟
يمكن لان لما بنعرف عيون اللي قدامنا بنشوفه انسا فعلا
بنعرف ساعتها ان اللي قدامنا انسان و لازم نخلي بالنا انه مش ملاك ..فبنتقبل منه اي سهو و انه مش هيكون 100% معصوم من الخطا او انه يزعلنا ..بس مش معني كده ان اللي قدامنا يتمادي في الغلط لو اكتشف من معاملتنا معاه اننا متفهمين ...ساعتها يبقي استعمل حبنا ليه عذر لخطاء اتعود انه يعمله و الحجة
"ما احنا متفاهمين "
...
بس تعرف يا شريف ..ساعات عيوب انسان هي اللي تكون سبب في انك تتعلق بيه
بمعني ان لو حد فيه طبع معين ممكن يضايق اللي حواليه ممكن يكون سبب انه يخذب انتباهك و يخليك تتعلق بانسان ..و ممكن يكون العيب هو صفة بتميز االانسان ده ..يمكن لو حول بعد كده يصلحها ..يفقد الانسان نكهته المميزة و الطبع المحبب فيه
ممم
بس
فرحانه اوي ان اخيرا رجعت ببوست جديد
متتاخرش تاني
و بوستات غربة وطن بقت كتيرة منتظرة تعليقك عليها
:)
ادعيلي كتيييييييييير"
سلام
مها

mohamed emera said...

السلام عليكم
ازيك يا شريف عامل ايه واحشنى جدا
جميله الجمله دى فعلا بنعجب بالناس للميزاتهم
بس بنحبهم مش لعيوبهم بس لا رغم معرفتنا بعيوبهم بنحبهم كدة كلهم على بعضهم وغالبا مش بنبقى شايفين عيوب لانها بالنسبالنا بتبقى مش باينه يمكن يكون الحب اعمى زى ما بيقولوا بس انا مش شايف كدة
انا شايف ان مميزات من نحب تجعلنا لا نرى عيوبه وتمتد لتجعلنا نقبل عيوب الاخرين وعلم بان كل انسان ليس كامل
تحياتى وسلامى اشوفك بين حروفك
سلاااااااااام

يا مراكبي said...

الكلام ده مش صحيح

ده حتى الناس اللي بنحبهم أحيانا بنكرههم بسبب عيوبهم الل بتظهر بعد كده

مش ممكن حد يكون عنده عيوب ونلاقي نفسنا بنحبه .. لازم يكون فيه صفات كويسة تحببنا فيه

Shreef said...

Maha

ولا يهمك يا مها انا استغربت بس لان البروفايل كان متغير فكنت عايز اتأكد مش اكتر و شكراً لتعليقك المهم جداً
بالتوفيق يارب في حياتك
تحياتي

Shreef said...

محمد

و عليكم السلام و رحمة الله و بركاته انا الحمد لله كويس يا مان .. المهم ممكن بالفعل يكون تعلقنا بالشخص ده يخلينا نتجاهل رؤية عيوبه و نركز اكتر على مميزاته او لاننا مش عايزين نشوف عيوبه لكن النقطة اللي كنت اقصدها لما تكون العيوب ديه هي سبب رئيسي من اسباب تعلقنا بالاشخاص دول

عموما شكراً يا محمد على مشاركتك
تحياتي و بالتوفيق يا مان

Shreef said...

يا مراكبي

اهلا اهلا بالبشمهندس .. يمكن حضرتك ليك تصور تاني لفكرة العيوب لكن يا هندسة زي ما سبق و اتكلمنا ان مش نقصد بالعيوب حاجة تمس الاخلاق مثلا بالاضافة ان حضرتك قولت ان الشخص لازم يكون فيه صفات كويسة تحببنا فيه لكن لا يمنع وجود بعض العيوب اللي قد نتعايش معاها او بالعكس ممكن نحبها قد يكون عيب مثلا زي هوس بحاجة معينة ممكن نكره هوس الشخص بالحاجة ديه و في نفس الوقت ممكن تكون السبب الرئيسي لحبنا ليه .. عموما ده رأي حضرتك و اللي اكيد ليك تعبر عن وجهة نظرك .. تحياتي لحضرتك يا بشمهندس و ابئى خلينا نشوفك كتير

سلام

بك أستجير said...

فعلا الجمله جميله ومعنها كبير كمان
حتى تلاقى العيب فى الإنسان بيديله طعم يمكن يكون هو ده حلاوه الإنسان

تقبل مرورى وتحياتى لك

عالمى ازرق said...

بجد عجبتنى جدا جدا
فعلا الحب غير مرتبط بالمزايا دايما او العصاء لانه ساعتها بيكون حب مسبب بيزول مع زوال السبب
انما الحب الحقيقي انت بتحب شخص على بعضه بعيوبه قبل مزاياه

تحياتى لك

Shreef said...

بك استجير

مش كدا بردو :) فعلا الحاجات ديه هي اللي بتدي للأنسان طعم .. شكراً لمرورك و مشاركتك .. تحياتي

ـــــــــــــــــــــــــــــــ

عالمي ازرق

اهلا اهلا فينك كدا من زمان سعيد بزيراتك دايماً .. عجبتني اوي كلمة حب مسبب ديه لانه بالفعل هيزول بزوال الاسباب علشان كدا لازم نحاول ان يكون حبنا للناس حب مش مسبب بحاجات معينة علشان نضمن استمراره .. عموماً سعيد جدا ان الجملة عجبتك و شكرا لزيارتك .. دمتي بكل خير .. تقبلي تحياتي