Thursday, January 08, 2009

لكي الله يا غزة

شوفت امبارح صورة في جريدة من الجرايد مش فاكر كانت ايه لطفلة مدفونة في وسط حطام منزل مهدم في غزة
الحقيقة كنت عايز احط الصورة ديه بس لانها كانت تكفي انها تعبر عن الوضع اللي بيمر بيه اهالي غزة
المهم دورت في جوجل بعد ما عملت بحث عن اطفال غزة لكن للأسف مقدرتش استحمل اخلص الصفحة التانية من الصور و المشاهد المفزعة اللي شوفتها وعملت بحث تاني على غزة في بيكازا ومقدرتش اكمل الصفحة الاولى من نتايج البحث من هول اللي شوفته بجد حرام علينا انا مش فاهم ازاي قادرين نعيش مع كل اللي بيحصل للناس في غزة
سوري يعني طظ في فتح و حماس و لعبة السياسة القذرة اللي الواحد بئى مش عارف مين الصح و مين الغلط
و مين المسؤل و مين الضحية و مين الجاني
لكن اللي اعرفه كويس ان فيه عائلات بالكامل بتموت
لم يقترفوا اي ذنب الا انهم في بلد اسمها فلسطين و بينتموا لينا احنا العرب اللي يبدو ان احنا بيعنا القضية لكن اللي باع القضية انظمتنا الفاسدة و اللي احنا كشعوب من تصرافتهم براء
بالرغم من ان احنا مسؤلين بشكل او بأخر عن انظمتنا و سكوتنا على ظلمهم
مش عارف اقول اي بصراحة لكن لكم الله يا اهالي غزة لانه هوا ارحم بيكوا من أي حد
و عذراً مش هقدر اشارك بالصورة ديه لأني لقيت انها ولا حاجة مقارنة باللي بيحصل في غزة
مكرهتش نفسي قد ما كرهتها دلوقتي لاحساسي بالعجز
حسبنا الله ونعم الوكيل

6 comments:

قلب ينبض لله said...

زي ما أنت قولت كدا غزة مالهاش غير ربنا

بجد اللي بيحصل دا مخلي الواحد يتمني أن يكون هناك علشان يموت ويستشهد أن شايفة أن اللي بيموت بيستريح العذاب كله للعايشين

ربنا يفرج كربهم ويزيح عنهم يااااااااااارب

maha said...

سلام عليك يا شريف
انا تعبت من الموضوع ده
انا بفكر في الاحداث بس للاسف مش زي ما المفروض احسها
ممكن نرجع بالزمن لكام سنة و انا في مدرستي ...ايام الانتفاضة بسبب دخول شارون داخل المسجد
يومها كتبت مقاله و قلتها في الازاعة و لان كان ممنوع طبعا المظاهرات فاتمنع ان اي طالبة تصقف حتي ..طبعا حسيت بالاحباط لان رد الفعل لللي جانبي بعد كلامي هو الصمت ..بعد ما بدا اليوم الدراسي بدات الاقي اعجاب المدرسين و البنات من كلامي و حماسي و فهمت رفض الادارة لتوضيع ابسط رد فعل
برضه كان منتشر اوي بين الكبار ان لازم ناخد بالنا نسكت لان في الاخر الكلام مش هيجيب فايده - ده رائ الكبار يعني - و ان من زمان و احنا متضايقين و بنشجب و ندين ..و ان اي حاجة بنعملها ان كانت مقاطعة او رفض للمارسات فهي ملهاش اي اثر ..
المهم كان اللي حوالينا بياكدولنا ان مهما عملنا او قلنا او اي شئ حصل مننا بسبب حماستنا فهو حماسة شباب تافهه........ز
انتهت احداث الانتفاضة و بقي الوضع علي ما هو عليه من اذلال و تشويه لكل معني انساني في بلد كانت مسري رسولي ص ..و لما جت احداث غزة محستش بنفس التفاعل ..رن في بالي نفس تعليقات الكبار لينا زمان
يمكن عشان كده اشفقت علي كل اللي زعلانين و بيبكوا
يمكن عشان كده مش حاسة ان في ايدي حاجة
هي يمكن سلبية مني
بس بسبب اللي حصل من احباط قبل كده
..
هو ردي سلبي اوي ؟
.
سلام
مها

صبرني يارب said...

تمام الى انت فهمته

كلهم بيقامروا ويتاجروا بدم الناس الغلابه وكلهم عندي مازالوا فى كفه واحده

لعيبه فى ماتش سياسي قذر

لنا الله

عالمى ازرق said...

نحتسبهم عند الله شهداء بأذن الله

Shreef said...

قلب ينبض لله

بالظبط اللي بيموت فعلا بيستريح او على الاقل اعتبري الموت تكفير عن ذنبه اللي ارتكبه في حق الناس ديه بصمته و ضعفه .. يمكن يكون فعلا راحة لكن اتمنى بجد ان نقدر ننفعهم و احنا عايشيين ولا هنبئى زي قلتنا

شكرا ليكي و اقول بعدك
اللهم آمين
و آسف للتأخر في الرد
تحياتي

ـــــــــــــــــــــ

Maha

مش ردك هوا اللي سلبي يا مها اللي طلعنا عليه هوا اللي ربى فينا السلبية ديه بس هي بردو مش سلبية لاننا قومنا باللي نقدر نعمله زي تبرعات مادية او بالدم او ادوية اللي عايز اقوله ان لو كنا مش عملنا حاجة خالص تبئى قمة السلبية لكن نفسنا نعمل حاجات كتير و مش قادرين ده ضعف مننا و اسبابه كتير داخلية في المقام الاول .. عموما يا مها شكرا لمشاركتك و اسف جداً لاني اتأخرت في الرد بس مجهد بدنياً و نفسياً حبتين و شكرا لوجودك الدائم
:)
تحياتي

Shreef said...

صبرني يا رب

المشكلة يا فندم ان الواحد بئى مشتت بجد مبقيناش عارفين الحقيقة فين و يمكن ده هدف من اهداف ناس شغلتها انها تشوه الحقيقة و مش في ايدنا اللي اننا ندعي ان ربنا يظهر الحق و ينصره بأذنه ان شاء الله

شكرا لزيارتك و اسمحيلي اسجل اعجابي الشديد بالقصة اللي بتكتبيها على حلقات و اللي بجد بستمتع جدا و ان بقراها و كنت اتمنى اشارك في نقاشها لكن الوقت مش بيسعفني و في انتظار المزيد دايما

تحياتي

_______________________

عالمي ازرق

ان شاء الله و بالفعل ده في حد ذاته نصر كبير و نتمنى ان احنا ننول الشرف ده .. اللهم ارزقنا الشهادة في سبيلك .. شكرا لتعقيبك
دمتي بكل خير