غيبت كتير عن المدونة مش لاسباب حرجة يعني لكن لانشغالي فقط مش اكتر
و حاولت اكتب كذا مرة عن كل اللي مريت بيه الفترة اللي فاتت
و اللي فيها حاجات كتير محيراني و اتمنى اني الاقي ليها تفسير
لكن فجأة و انا بكتب حسيت ان الكلام ملهوش اي معنى و اني ضيعت جزء مهم من حياتي
في فلسفة جوفاء لا هتودي ولا تجيب
و ان الكلام اللي بقوله
مجرد كلام فارغ
!!!
و حاولت اكتب كذا مرة عن كل اللي مريت بيه الفترة اللي فاتت
و اللي فيها حاجات كتير محيراني و اتمنى اني الاقي ليها تفسير
لكن فجأة و انا بكتب حسيت ان الكلام ملهوش اي معنى و اني ضيعت جزء مهم من حياتي
في فلسفة جوفاء لا هتودي ولا تجيب
و ان الكلام اللي بقوله
مجرد كلام فارغ
!!!
14 comments:
و ان الكلام اللي بقوله
مجرد كلام فارغ
!!!
تقصد كلامك هنا في المدونة؟
لو دا قصدك
تبئي فعلا غريبه
لأني ماحسيتش بتفاهة اللي قولته هنا في المدونة بالعكس كلامك كان بيعجبني جداوأفكارك كمان
بص بتحصل كتييير أننا نفتكر أن كلامنا تافه وماولش لازمة بس أسمحلي خلي الناس هي اللي تحكم
وحمدالله علي سلامتك وماتبئاش تطول فترة غيابك تاني علشان الأفكار اللي بتجيلك دي ماتجيش تاني
السلام عليكم
ازيك ياشريف عامل ايييييه
انا جيت اشوف اقرء كلامك زى العادة بس كنت بقالى مدة مش بقرا اى حاجة
المهم لقيت انك بتقول على كلامك كلام فارغ
فكرت دلوقت طالما انت بتقول كلام فارغ يبقى اللى بيقرالك كمان دول ليه يقروا كلام فارغ مع انهم اصحابك تقريبا وبيعجبك تفكيرهم وثقافتهم
وما اعتقدش انهم هيضيعو وقتهم فى كلام فارغ وخاااصه ان كلامك غالبا ما بيكون طويل جدا يعنى
شريف مش كل فكرة تيجى فجاه فى تفكيرك تتعتبرها حقيقه غير لما تفكر فيها كويس
انت كلامك مش كلام فارغ ابدا ارجو اعادة النظر او التفكير
تحياتى وسلامى
منتظر الجديييييييد
السلام عليكم
ازيك ياشريف بجد بقالنا كتير جدا مش نعرف عنك اي حاجة لا في المدونة ولا الواقع "بعد حادث النظارة يعني "الحمد لله
شريف عايزه اقول رايي في موضوع انك فكرت ان كلامك كلام فارغ
شريف انا مش هاجاملك واقول انك انسان مثقف وبتعرف تفيد من حولك وتستفيد من خبراتهم لان الحقيقة لا تستحق الابراز في معظم الاحيان ودي حقيقة
ممكن صحيح كنت بتطيل في بعض الاحيان وبتصمت في اخرى ولكنه لغرض بنفسك او حتى لسبب يستدعي ذلك
شريف بعيدا عن رايي الشخصي او كونه اجماع ان كلامك مش فارغ
فانا لي وجهة نظر تخصني في الموضوع ده وهي ان الانسان ايا كان مثقف او جاهل متعلم او امي مش بيعمل تصرف في حياته او يقول كلام يقال عنه فارغ
ممكن في احيان احنا بنرى الاوقات اللي ضاعت في الكلام كان ممكن نستخدمها في اشياء اخرى وممكن نرى تصرفاتنا تافهه ويراها الجميع كذلك
لكن مالا ندركه انه لولا تصرفاتنا تلك "التافهه"ماكانت افكارنا وتصرفاتنا الان "الاكثر تعقلا"لولا اننا قلنا كلام تافه ماادركنا انه تافه ولو نصحنا اهل الارض اجمع
الكلمة لها معنى وفكره وراي خاص لو مش كنت قلتها مش كنت هاتدرك ا تتمسك بها وتكررها ام تدعها وتبتعد عن قولها
كلماتك تبني افكارك
مابالك بقى ان كان من يقول الكلمات يتحراها ويدركها وليست مجرد هباءا (وطبعا مش اقصد اننا نلقي بالكلمات دون وعي)
اقصد انها افكار داخلك خرجتها ولما شفتها لم تصر جزءامنك الان فقط تستطيع ان تحكم عليها وانت ايضا اعطيت الاخرين فرصة الحكم عليها لو كانت تافهه مااضاعوا الوقت في قراءتها مرارا
وانت ياشريف مثقف وتعلم متى تتكلم ولما ممكن الاخرين لا يعلمون لما
ولكنه حكمهم عليك
شريف لاتتبع الافكار السلبيه ابدا
حتى كلامنا التافه اسمه كلام خفيف يروح عن القلب مش تجهد عقلك بتلك الافكار
عذرا للاطاله
تحياتي
سلام
اتمنى اشوف شريف تاني
هعتبر نفسي ما شفتش البوست دا
سلام عليك يا شريف
مين اللي قال ان اللي بنمر بيه كلام فارغ ؟؟
اي حاجة انت بتعملها او بتحصلك مش بتحصل من فراغ ...دي حاجة محسوبة كويس اوي و اللي بيتحكم فيها ربك الحكيم
بس ممكن احنا مش فاهمينها لان عقلنا اضعف من اننا نعرف كل حاجة
حتي لو كنت بدات تكتب و لاقيت ان كلامك مش ليه نفس المعني اللي المفروض يكون عليه
كفاية انك تكتب و تسجل موقف حصلك
ممكن في يوم ترجعله و تضحك عليه و ممكن تتعلم منه كل ما يمر بذاكرتك ..
ااقولك اقتراح ؟؟
اكتب كل اللي حصلك الفترة اللي فاتت و و متقراش كلامك و بعد ما تكتب كل حاجة ابدا اقرا كلامك و متمسحش اي موقف او حدث حصلك و اللي تلاقيه مناسب للعرض نزله في بوست و اللي تلاقيه خاص بيك احتفظ بيه عندك في درافت ..المهم مدام كتبت متمسحش كلامك ..لان ده شئ مؤلم جدا
يلاااااا
انا منتظرة بوست في ااقرب وقت
:)
سلام
مها
معلش اتاخرت في الرد عالبوست دة مع اني اول ما شفته قلت اني لازم ارد عليه
بس انت عارف ان عندي ظروف امتحانات و كدة المهم ما علينا
في البوست الاخير ليك وصفت كلامك انه فلسفة جوفاء لا هتودي و لا هتجيب
سؤال طيب ...انت عرفت منين انها لا هتودي و لا هتجيب
بمعنى يوم اما يكون عندي تساؤلات او مواقف مش شايفلها تفسير و احتفظت بيها لنفسي من غير مشاركتي للناس بيها متهيالي ساعتها يبقى كلامي فعلا ساعتها ممكن اقول عليه كلام اجوف لانه ساعتها متناقشتش فيه مع حد و لا عرفت راي حد فيه...و للا ايه رايك
حاجة تانية كمان...من كلامي معاك اخر مرة عرفنا مشكلتنا ايه و ليه شايفين ان مفيش فايدة...عشان بندور على اللي مش موجود(المدينة الفاضلة )مش بندور عليها لاة بنتعامل في حياتنا باعتبار اننا في مدينة فاضلة بنتعامل مع الناس بمثالية بلاش بمثالية بس بنحاول نوصل لاقرب حاجة من المثالية و بنستنى ان الناس بردو هتكون معانا كدة لا و كمان الدنيا هتحلو لما انا اتعامل كويس (طبعا دة مبيحصلش )
طب ليه ميحصلش :D
عارفة ان كلامي جنان لمنتهى الحدود و جايز ميكونش راكب على بعضه بس بجد ليه نفقد الامل اني ممكن اكون في مدينة فاضلة بلاش يا سيدي مدينة فاضلة احنا ناس مش طماعة ممكن عالاقل المحيط اللي حواليا يكون زيه زيي بيدور على المثالية ...مش ممكن نعمل لنفسنا مجال بيجذب الناس اللي زينا حوالينا :D :D
وبعدين عشان مبقاش كدابة شخصيا يعني انا مش بتعامل كدة ومستنية مقابل قصدي يعني اني بعمل كدة عشان اكيد هييجي يوم احسن ....اصله مينفعش كل يوم يبقى زي اللي قبله
مينفعش ان الناس كلها تتطلع وحشة
مينفعش كل النا تكون شافاني واحدة فارغة او كلامي فارغ
اكيد في ناس زيي
وليه اقول اني انا اللي تفكيري و فلسفتي جوفاء ليه ميكونوش هما ...لازم ابقى واثقة في نفسي و في قدراتي و في منطقي اللي عايشة بيه في حياتي
عارف كلمة السر ايه اقصد يعني الكلمة اللي مصبراني (بكرة هيبقى احسن) امتى بكرة دة جاي دة في علم الغيب بس جاي يعني جاي و عشان يبقى احسن بناسه كمان اعامل الناس زي ما احب انهم يعاملوني
هخسر حاجة ؟؟؟لاة بالعكس لو في يوم حسيت باحباط و زعل شوية مش هضحك عليك هزعل فعلا و ممكن اقفل عليا اودة و اعيط من غير سبب لمجرد اني اطلع شحنة .....عندي حل تاني ودة اللي عايزة اوصلله من المحاضرة اللي كاتباها دي ::
بدل ما اعيط و اكتم في نفسي اكتب ممكن الاقي اني مش لوحدي اللي كدة ممكن الاقي اللي يصبرني اني اكمل لحد بكرة اللي هوة احسن دة
معرفش دة كله اتكتب امتى متنساش انا حذرتك اني هطول
على الله بس يكون كلام راكب على بعضه عشان احيانا اما الواحد بيطول الكلام بيتوه من بعضه
يللا سلام
ايه دة انا طولت بجد :D :D
معذرة يا استاذنا
يا رب تكون بخير بقى و سيبك من موضوع ان كلامك اجوف مش هيودي و لا يجيب
شريف
مدونتك جميله وافكارك هايله تدل علي شخص مثقف وصاحب فكر محترم
ساعات بنحس ان فيه احاسيس وافكار بتبقي كبيرة ومهمه اوي طول ماهي جوانا
وماخرجتش لحد
وبمجرد مابنحاول نطلعها بنقول لنفسنا
ايه الحاجات العبيطه دي
بقي انا شاغله نفسي طووول المده دي بالكلام ده؟؟
صراحه هو احساس متعب
انك تحس انك ضيعت فتره كبيره من حياتك زي مانت بتقول علي اوهام وافكار فلسفيه
بس صدقني دا مش صح
والاحساس دا مش حقيقي
الحكايه دي كانت بتحصللي برضه لما ببعد عن التدوين فتره طويله وافضل اقول هكتب عن كذا بس اما افضي
وبعدين احس ان الحماس خف واني يمكن عشان ماكتبتش عن الموضوع من اول ماحصل حسيت بفتور من مساله الكتابه عنه
انا تفسيري هو مش ان الكلام فارغ او انك كنت غلط
بس يمكن لانك استهلكت ذهنك في التفكير ف نقطه بعينها
فلما كتبتها بعد كده حسيت انها حاجه مكرره بالنسبالك
غير لو كتبتها ف لحظتها
اكتب اول باول
اكتب اي حاجه مهما حسيت انها كلام فارغ
فيها ايه ياسيدي ولا هو الكلام بفلوس
اتمني اني اشوف جديدك قريب وسعيده جدا جدا بالتعرف علي مدونتك :)
قلب ينبض لله
اكيد كلامي اللي هنا في المدونة يا فندم و لان اللي بكتبه هنا هو اللي دايما بيشغل تفكيري و المدونة هي المكان اللي بقدر اخرج فيه الكلام ده بس لا اخفي عليكي ا الواحد تعب فعلا و خصوصا لما يلاقي كلامه ليس له قيمة قياسا على الواقع اللي عايشينه .. عموما الله يسلمك و متشكر جدا لرأيك و لاهتمامك اللي اسعدني و ان شاء الله الشعور اللي معتريني ده اتخلص منه في اقرب وقت ممكن لانه بجد خانقني و خصوصا اني مش قادر اقتنع بأي حاجة او احاول فهمها حتى
تحياتي ليكي
-----------------------------
محمد
و عليكم السلام ورحمة الله و بركاته
عاااش من شافك يا راجل اقصد في الوسط التدويني يعني ما احنا كنا لسه مع بعض امبارح :) المهم مش عارف و الله حضرتك بقولك هما بيقروا ليه يمكن لان كلنا كنا مخدوعين او يمكن لان الكلام كان عقلاني في ظاهره او بالفعل هوا عقلاني تماماً لكن يبدو ان الدنيا هي اللي مجنونة و الناس كمان او مش عارف هو اللي اعرفه ان في حاجة غريبة جدا مش مفهومة في دنيتنا ديه يمكن الحياة نفسها .. الغريب بئى حضرتك ان الفكرة ديه مازلت بتفرض نفسها عليا بغباء و انا لا قادر اصرفها بأني اقنع نفسي بعكس الكلام ده بالبراهين و الدلائل ولا قادر افكر اصلا في الموضوع نفسه لاني اقنعت نفسي بان حتى تفكيري و محاولة تحليلي للموضوع ده تتضيع وقت .. لكن الحقيقة سعيد جدا باراء الناس و تعليقاتهم اللي قفشت في كل تعليق فيهم جوهر مهم جدا ممكن اقدر من خلاله اني اخرج نفسي من الحالة المتخلفة ديه .. عموما شكرا يا مان على رأيك و على مساندتك .. تحياتي ليك و ربنا يوفقك في كريرك الجديد و ان شاء الله نسمع عنك خير قريب بأذن الله
سلام
دينا
و عليكم السلام و رحمة الله و بركاته
انا الحمد لله كويس المهم اولا احب اشكرك بس على الكلام اللي قولتله و اللي قولتي عليه مش مجاملة اما ثانياً فالحقيقة تعقيبك كان جميل جدا لان فيه كذا نقطة بردو عجبوني جدا يمكن يكون فيهم خلاصة الموضوع كله اولهم في ان يمكن بالفعل يكون الانسان اضاع وقت في الكلام كان ممكن انه يستغلها في حاجات تانية او ان شئتي الدقة يمكن التفكير في حاجات معينة فرض عليه قيود معينه اضاعت من حياته حاجات كانت ممكن تغير مجرى حياته لو كان محبسش نفسه بسور من الافكار اللي اثبتت انها كانت مش في مكانها
النقطة التانية و اللي كانت جميلة فعلا و هي كلماتك تبني افكارك و تحليلك لنقطة ان افكارنا التافهة بينتج عنها تصرفات اكثر عقلانية لان بعد تصرفاتنا التافهة ديه او اللي احنا شايفيين انها كدا هتخلينا بعد كدا نوصل لفكر بالفعل اكثر تعقلاً على حد تعبيرك الجميل لكن المشكلة كمان ان تلك الافكار قد لم تكن تافه اصلا من البداية و بالتالي فلن تقودنا الي افكار اكثر تعقلا بمعنى ان في الحالة اللي بتكلم عنها هنا في البوست هي تقريبا عكس النتقطة اللي انتي ذكرتيها ديه بالظبط
و بعدين يا فندم يبدو ان الافكار السبية تأبى الا انها تفرض نفسها علينا غصب عننا و خصوصا اذا كان اللي حواليكي بيأكد و يقوي وجود تلك الافكار السلبية و ليتنا نستطيع ان لا نجهد عقولنا بتلك الافكار لانها شأنها شأن بقية الافكار اللي لازم تاخد حقها من التفكير
عموما شكرا يا دينا لتعقيبك
دمتي بكل خير
تحياتي
---------------------------------
يا صاحبة الخيط
ليه يا روفي كنت اتمنى انك تثري الموضوع برأيك اللي اكيد هيكون مختلف كالمعتاد لان بحترم جدا جدا ارائك و افكارك
لكن انتي يعتبر عقبتي تعقيب جميل جدا جدا على الموضوع ده هتعرفيه و هقولك عليه
عموما تحياتي و بالتوفيق دايما و شكراً على المرور
سلام
اكتب لنفسك
اكتب علشان لما ترجع تقرأة تفتكر انت كنت فين ومشيت مشوار اد اية
علشان تلاقي اجابة عن سؤال
او تغير اجابة على سؤال
مفيش كلام بيتكتب هو كلام فارغ
يا احنا اللي بنملاه يا احنا اللي بنفرغة
اشكرك
سمراء
بتحصل
عادى
مش قادره اعدلك كام بوست كتبته وكان نقصلى كليكه بابلش بس
ونفس الفجأه بتاعتك ألاقينى قفلت الكمبيوتر كله
يمكن برضه عشان بحس انه كلام فارغ
او يمكن بقول لنفسى الناس ذنبها ايه تضيع وقتها عشان تشوف كلام واحده بتريح نفسها بالكتابه
مش هقولك اكتب
بس هاقول انى هدخل تانى اقرا كلامك الى انت شايفه يستحق القرايه
ايه رأيك فى المسؤليه ده:))
اوعى تقفل البلوج انا بهزر اكتب والى مش عاجبه ياعم مش هيعلق
تحياتى
شيماء:)
كل سنه وانت طيب
رمضان كريم
مش ناوى تخلينا نرجع نقرأ لك تانى على المدونه
فى انتظار عودتك وجديدك
لكل كلمة اذن ولعل اذنك ليست لكلماتك لتشعر بأهميتها
ولكن هناك اذان كثيرة تشعر بقيمتها
دا تعليقي اللي مفهمتوش بإمتناعي عن التعليق
يااااااااااااارب ترجع قريب ربنا يبلغك ليلة القدر
Post a Comment