Saturday, January 26, 2008

التعليم و سوق العمل

اولا احب اعتذر عن انشغالي عن المدونة و حشتني و الله و وحشوني الناس بس للاسف الوقت بئى اضيق من ان الواحد يكون متواجد و الحقيقة ان انشغالي ده طبعا مش بارادتي و السبب اللي يمكن بعض الناس تعرفه و البعض لأ، اني الحمد لله ربنا وفقني لشغل و الحقيقة هوا شغل كويس جدا لان المجال شيق بالنسبة ليا و كنت طول عمري احب اني ادرس في مجال زي ده الا و هوا مجال الطيران المدني .. الا ان هناك سبب واحد مخليني سعيد جدا و هوا هوا نفس السبب اللي مخليني حزين جدا و مضايق جدا و السبب ان طبيعة العمل ده بعيدة تماما عن مجال دراستي يعني تقدروا كدا تقولوا دا في الشرق و ده في الغرب و الحقيقة انا سعيد بالسبب ده لاني مكنتش حابب اصلا مجال التجارة و كنت باتمنى و بطلب من ربنا اني لما اشتغل ما اشتغلش في مجال المحاسبة و الحوارات المتخلفة ديه ( بالنسبة ليا طبعا ) فيبدو ان ربنا استجاب لدعائي و وفقني للعمل ده .. اما بئى انا حزين و مضايق لنفس السبب لاني حاسس ان اربع سنين دراسة قضتهم في الكلية كانوا في الهوا او بمعنى اصح في الزبالة .. هما اكيد طبعا مش في الزبالة لاني اكيد استفدت من الاربع سنين دول لو مكنش على مستوى التعليم او المستوى الاكاديمي اللي ممكن تعتبرها كمعلومات عامة هيكون على الاقل بالنسبة للخبرات الحياتية اللي اكتسبتها من الفترة ديه و بردو لسبب كمان و هوا يبئى اسمنا حاصلين على مؤهلات عليا لكن بسبب سوء الحالة التعليمية في بلدنا فاصبح كل الخريجين بيتميزوا بشيء واحد و ان هما من المؤهلات العليا ( لكن المؤهلات ديه هتؤهله لأيه الله اعلم ) .. اللي اقصده هنا ان اصبح كل الخرييجين متساويين مع بعضهم و مفيش فرق بين كل واحد بيحمل شهادة ايه المهم ان هوا بيحمل شهادة وخلاص بغض النظر عن مجال دراسته كان ايه اصلا و ديه في حد ذاتها مشكلة لان اصحاب المؤهلات اللي يمكن متكونش متعلقة اصلا بعملاً ما من قريب او بعيد هيشغلوا اماكن الناس الحاصلين اصلا على الشهادة اللي ليها الاحقية في انها تشتغل في المكان ده ( كلام مكلكع مش كدا ؟ ) اللي اقصده ان في حاله منيله بنيله من الشتات الي بيمر بيها الشباب تبتدي من اول يوم دخلوا في الكلية بيحلموا بشهادة هتمكنهم بعد كدا ان هما يشغلوا اماكن معينة و بعد انقضاء اربع سنين ( او خمسة او سبعة ) من الضغوط النفسية و حرقة الدم و الاعصاب يلاقي اصبح بيحمل شهادة ليست لها قيمة الا اذا هوا عملها قيمة بأن هوا يدعمها بالكورسات المختلفة و المعرفة اللي لازم يحصلها من مصادر خارجية اللي هتمكنه من ان هوا يوصل لاماكن الشهادة وحدها ليست كفيلة بانها توصله ليها ( يعني عايز ايه من الاخر ؟ ) .. من الاخر عايز اقول ان في الفترة الاخيرة ديه احتكيت كتير ببعض مساعي الشباب و اللي انا واحد منهم في السعي وراء عمل لا ينسف ( او يُدمر علشان حبايبنا البعدا ) اربع سنين او اكتر من الدراسة ( اللي يمكن هوا مكنش عايزها اصلا ) و يجد عمل اقل بكثير من ان هوا يدفن فيه نفسه بعد دراسة الفترة ديه كلها و اذا وجدوا العمل ده هيلاقوا ان العائد المادي اصلا ممكن ميكفيش حتى الموصلات و ده اللي هيدفعه ان هوا يسعى ورا عمل يمكن يرضيه من الجانب المادي الا انه لا يساوي بالمرة قدراته و مؤهلاته الحقيقة .. الا ان طبعا ده مش حالة عامة لاني في فعلا فرص جميلة جدا تطلب مؤهل الشخص ده و العائد المادي كويس جدا لكن للاسف الفرص ديه قليلة جدا و طبعا لا تكفي لاعداد الخريجيين المهولة

طيب ليه ؟؟

عايز اعرف اي ذنب اقترفهوه الشباب دول بانهم يستحقوا بأن تهان كرامتهم باعمال لا تليق ابدا بدراستهم و خصوصا لما تكون الدراسات ديه دراسات مهمة لكن للاسف ملهاش عمل او بمعنى اصح التخصص ده لا يلاقي الاهتمام الكافي من الجهات المسؤلة ( و مش شرط تكون الجهات ديه حكومة ) ؟؟

الا اني الحقيقة عارف ايه هوا الذنب اللي اقترفوه و اللي يمكن هما ملهمش ذنب فيه الذنب ده انهم في دولة زي دولتنا المبجلة اللي اسمها جمهورية مصر العربية اللي القائمين على حكمها يكاد لا يعنيهم الشيء ده اللي اسمه كرامة المواطن المصري بالرغم من ادعائهم عكس كدا .. و اهدار كرامة المواطن مش محتاجة كلام لان اكيد كلنا بنمر بيها و عارفينها كويس و مفيش بني ادم عايش في مصر مبيعانيش من كدا .. يلا ما علينا

على فكرة مش ده الموضوع اللي انا كنت عايز اتكلم فيه اصلا انا كنت عايز اتكلم في موضوع تاني خالص لكن تقدروا تقولوا ان استرسلت زيادة عن اللزوم في المقدمة فنخلي الموضوع التاني للبوست الجاي و اللي هيكون عنوانه ( اذا بليتم فاستتروا ) .. يلا اشوفكم على خير و اتمنى للجميع حياة طيبة و كريمة و بالتوفيق للناس كلهم و على رأسهم الشباب اللي كل يوم همومهم بتزيد عن اليوم اللي قبله

تحياتي للجميع

سلام

6 comments:

يا مراكبي said...

الموضوع ده أهم موضوع على فكرة .. أنا بألمس المشكلة دي كل يوم لما بنيجي نوظ ناس لأن المتوفرين كتير لكن مالهومش أي علاقة بإحتياحات سوق العمل .. ودي على فكرة مسؤلية الدولة مش الأفراد .. لأن الدولة هي اللي لازم توجه التعليم نحو إحتياجات سوق العمل .. لكن تقول لمين؟ دولة مالهاش تخطيط من أساسة

إشتغلت إيه في الطيران المدني؟ أنا ليا معرفة واسهة جدا بكل تفاصيل المجال ده على فكرة

Shreef said...

فعلا يا بشمهندس ديه مشكلة كبيرة و زي ما حضرتك ذكرت المتوفرين ليس لهم علاقة بسوق العمل لان في الغالب ما يتم دراسته بتكون حاجات مش متخصصة اوي كما يجب بالمجال المطلوب دراسته و بصراحة المشكلة مشكلة المنظومة ككل بكل اطرافها حتى الافراد نفسهم بالرغم من الافراد طبعا مش في ايديهم قوي انهم يغيروا الوضع لانهم تابعين للمنظومة ديه و مش هيقدروا يغيروا الوضع القائم طبعا بالرغم من قدرهم على تحقيق ده

المهم انا اشتغلت ضابط اتصالات يا بشمهندس..المهم تحياتي لحضرتك و شكرا لرأيك و حضورك الدائم و خصوصا انك دايما بتضيف للموضوع الخبرة العملية و التطبيقية للموضوع..تحياتي ليك..سلام

mohamed emera said...

السلام عليكم
موضوع جميل ياشريف
بس مش عارف اعلق اقول ايه
اقولك لا تعليق
ربنا يهديينا ويعوض تعبنا خير
تحياتى

Shreef said...

mohamed

بالظبط كدا يا محمد هتقول اللي انت قولته ده و هوا ان ربنا يعوض تعبنا خير لان ربنا هوا الوحيد اللي عارف قدر المعاناه اللي بنعانيها حتى لو كانت على المستوى النفسي و ربنا يجزي كل شخص خير يا رب و يوفق الناس كلها لانهم بصراحة في دوامة اسمها الحياة بكل ما فيها من مصاعب..يلا ما علينا..شكرا على ردك يا مان..سلام

dark angel said...

بص يا استاذ شريف انا معاك اوي في كل كلامك صدقني انا من اكتر الناس اللي تشتيت المجهود بياثر فيها نفسيا و عصبيا و كل الحاجات دي
درسنا و كان نفسنا ندخل كليات معينة عشان دي ميولنا
كنا بندرس كيمياء و فيزياء و احياء و بعدين عشان نظام التعليم رحنا تجارةو ماشي عدينااااها
طلعنا من الكلية يا مولايا كما خلقتني اسالني انا اخدت ايه هقوللك العنواين و مش فاكرة حاجة تانية
و جيت بعد كدة لقيت اني لازم اخد كورسات و لازم يكون عندي خبرة دةلو حبيت اشتغل في مجالي اساسا
و اهم من دة كله الكوسة
طب كان ليه الاربع سنين اساسا نفسي افهم...مش هقول يا خسارة الوقت اللي راح في الكلية على الاقل طلعنا منها بحاجات اهم من التعليم حاجات احنا اللي دورنا عليها و اكتسبناها مش الكلية اللي اديتهالنا
يللا بقى
معلش يا شريف طلعت اسوأ ما عندي ناحية التعليم بس بجد شكراااا انك فتحت الموضوع دة مين عالم جايز حاجة تتغير لما ...معرفش لما ايه
بوست رائع فعلا و ربنا يوفقك في المجال اللي انت فيه

Shreef said...

dark angel

اولا احب ارحب بحضرتك جدا و ارحب بمشاركتك و اللي بتمثل مشاركة من واحد من اللي عانوا بالفعل من المشكلة ديه و اللي هنفضل نعاني منها لفترة كبيرة و انا سعيد جدا بزيارتك ديه و ان شاء الله تسعدنا بتعليقاتك المفيدة دايما .. المهم الحقيقة انا مش هقول كلام بعد كلامك لانك وصفت بالظبط الحالة اللي كلنا مرينا بيها و وصفت بدقة شديدة الحالة الي انا شخصيا مريت بيها و ده يثبت ان كلنا للاسف بلا استثناء في نفس المركبة المتخلفة و بندور في نفس الفلك اللي مش عارف هيوصل بينا لغاية فين الحقيقة اني مش عارف الحالة ديه هتنتهي امتي يمكن لما كل حاجة في بلدنا تتغير بما فيها ثقافة شعب باكمله و ثقافة دولة و حكومات تتبنى خطة طموحة توصل بينا فعلا لمكان افضل من دلوقتي بكتير و ما اعتقدش ان احنا قريبين من الحالة ديه .. و بعدين بتعتذر على ايه انا مقدر تماما كمية الاسى و الحسرة اللي جواك و انت بتقول الكلام ده لان كلنا مرينا بنفس الاحساس ده .. عموما ان شاء الله ربنا يوفق الجميع و يتولانا برحمته في ظل ظروف هو وحده الاعلم بيها .. اشكرك مرة تانية على مشاركتك الجميلة ديه .. تحياتي ليك .. سلام