Thursday, November 13, 2008

انا و زميلي و البلح

مرة كنت ماشي مع واحد زميلي و كنت حابب اعرف رأيه في موضوع مضايقني المهم سألته و بقوله

انا : تفتكر الناس كلها عارفة حدودها كويس ؟؟
قالي : تقصد اي بالظبط ؟؟
قولتله : المفروض ان كل واحد لينا بيكون له حدود المفروض لا يتعداها مش كدا ؟؟
قالي : كلامك مظبوط و ده شيء طبيعي مش محتاج انك تسأل فيه
رديت : جميل بس اللي مش طبيعي انك بالرغم من ان الناس المفروض عارفة ده كويس بتلاقيهم بيتدخلوا في شؤون ناس تانية بطريقة مستفزة جدا لكن الغريب ان الناس اللي تم التخطي على حدودهم مش شايفين ده ان هوا تخطي على حدودهم و بالتالي اللي انا شايفه تخطي على حدود الناس من وجهة نظري انا مش شرط يكون تخطي على حدود الناس من وجهة نظرهم هما
زميلي : بمعنى ؟؟؟
انا : بمعنى ان حدود كل شخص اصبحت نسبية بتختلف من شخص لأخر و ده يخلينا نقع في مشكلة كبيرة جدا
زميلي بيسأل: و ايه هي المشكلة ديه بئى ان شاء الله ؟؟
انا : ان كدا حضرتك مش هنعرف ايه حدود الشخص اللي قدامنا ده لأن كدا ممكن نتخطى حدودنا معاه
(اللي ممكن تكون في صورة سؤال شخصي) من غير ما نعرف اعتقاداً مننا ان كدا مش تخطينا حدودنا معاه و العكس صحيح تماماً ، اعتقادنا بأن ديه حدود شخص اللي المفروض مش نتخطاها و يمكن ميكنش صحيح هيخلينا ناخد موقف سلبي شويه خوف مننا ان احنا نتخطى حدودنا مع العلم ان ممكن تكون الحدود مرنة مع الشخص ده بالذات و بالتالي يبئى انا كدا خسرت مساحة كنت ممكن اقرب فيها للشخص ده بس خوفاً مني اني اتخطى حدودي خلاني اتراجع
زميلي : و بعدين ؟؟
انا بئى : كدا المفروض ان الحل الوحيد للخروج من المأزق ده هوا اني اخد الخطوات اللي انا اخاف انها ممكن تكون تعدي على حدود الشخص املاً مني اني اكون مخطئ و ان الشخص ده ميكنش شايف ان ده تخطي على حدودي بس المشكلة انك هتواجه حاجز الخوف اللي هيفضل يقولك حاسب انت كدا ممكن تكون بتتخطى حدودك خليك في السيف سايد احسن لكن يفضل جواك الرغبة اللي بتتدفعك لأستكشاف المساحة ديه فضولاً منك لمعرفتها

للأسف كنت منتظر رد من زميلي ده و ببص عليه كدا لقيت على وشه اترسمت ملامح غريبة انا عارفها كويس و بتتمثل في ارتفاع حاجب و نزول اخر و فاه متسع و عينين بتبصلي بغرابة شديدة و سألني سؤال بالفعل خلاني محتار

رد عليا و سألني :

هوا الموضوع له علاقة بالبلح ؟؟؟

ـــــــــــــــــــــــــــــــــ

ملحوطة : لو محدش فهم حاجة ميقلقش شيء طبيعي
محلوظة تانية : آسف جداً لعدم قدرتي على المتابعة
تحياتي


Wednesday, October 15, 2008

Blog Action Day 2008 " Poverty " الفقر

الفقر


ببساطة شديدة جدا النهاردة حابب اني اشارك زي ما قولت قبل كدا في يوم عالمي بيرعاه الموقع ده و الموضوع بيتلخص في ان الناس كلها من المجتمع المدني و اللي مش مدني سواء في هيئة مؤسسات خيرية او مصالح حكومية هينشروا سواء في مدوانتهم او مواقعهم الشخصية عن موضوع واحد و الموضوع السنة ديه هيكون عن الفقر في العالم



الواحد للأسف كان حابب يستعد اكتر لليوم ده بس للأسف الموضوع علشان يخرج كما يجب كان محتاج تركيز و بحث مضني علشان اقدر اخرج بكل اللي عايز اقوله لكن عموما خلونا ندردش شويه و نحاول بقدر الامكان نسقط كلامنا على البلد اللي تعبانا معاها و اللي منقدرش نستغنى عنها و هي مصر


و نقول في البداية كدا هوا يعني ايه فقر و دا سؤال سهل و هوا لما يكون الواحد لا يمتلك من مال مثلا ما يغطي احتياجاته و متطلباته و متطلبات معيشة اسرته و اطفاله بس دا كلامنا احنا لكن الناس بتوع الاقتصاد كان ليهم تعريف تاني للفقير و هوا الشخص اللي دخله تقريبا اقل من دولار واحد يوميا يعني لو حسبناها بسعر الصرف هيكون تقريبا بما يعادل 5 جنيه في اليوم و في فقراء مش قوي يعني و دول دخلهم بما يعادل 2.5 دولار في اليوم و دول عددهم في العالم بسم الله ما شاء الله تلاتة مليار بني ادم (للعلم بس عدد سكان العالم تقريبا في سبتمبر 2008 كان تقريبا 6.6 مليار شخص) يعني تقريبا بردو بسعر الصرف ما يعادل 15 جنيه في اليوم يعني 450 في الشهر يعني معنى كدا اللي دخله الشهري 450 او اقل يعتبر نفسه من الفقراء ( علشان كدا تقريبا 52 % من الشعب المصري يعتبروا تحت خط الفقر حسب اخر احصائية ) .. و ناخد بالنا كمان ان المعيار اللي هما بيقيسوا عليه هوا قياساً على الاحتياجات و المتطلبات الاساسية اللي كل واحد فينا بيحتاجها و ميقدرش يستغنى عنها و هي تلت حاجات ( المأكل و المشرب و الملبس و المسكن ) و ده يعتبر تعريف الفقر من وجهة نظر الاقتصاد و سبق ما قولت ان يعتبر ما يقرب من نصف سكان العالم تقريبا يعتبروا من الفقراء وده طبعا شيء مفزع و خصوصا بعد ما نطلع على بعض الحقائق و الارقام من اخر الاحصائيات و اللي هنلاقي فيها بجد قمة اللامساوة و عدم العدالة في توزيع الثروات و اللي اتمنى ان يتسع الوقت لسردها


اما عن مسببات الفقر فا طبعا فيه اسباب كتير جدا جدا قسموها هما لاسباب بيئية و بتتمثل في تأكل رقعة الاراضي المزروعة بسبب التجريف مثلا او عوامل تانية اثرت على النشاط الزراعي نفسه و عوامل تانية زي التصحر مثلا او ظواهر بيئية يكون ليها تأثير كبير على الزراعة زي تغيير المناخ و الجفاف .. فا ديه كلها تعتبر من العوامل البيئية اللي تأثير على الزراعة و لو لاحظتوا ان كانت معظم النقط بتدور تقريبا في فلك الزراعة لان ده امر مفروغ منه و هو ان الزراعة هي المهد او الاساس اللي بتقوم عليه اي حضارة فالزاراعة تعتبر الخطوة الاولى علشان كدا النقطة ديه لازم نهتم فيها في مصر بشكل جدي و خصوصا ان مشاكل كتير من مشاكلنا ممكن يبتدي حلها اذا اهتمينا بالنقطة ديه على الاقل لو قدرنا ان احنا نوفر لشعبنا قوته لان احنا بنصرف كتير جدا (عن طريق الاستيراد ) علشان نقدر نسد احتياجات ما يقرب من 81 مليون مصري فأذا اهتمينا بالزراعة حق الاهتمام و قدرنا نوفر الاغذية اللي بيحتاجها الشعب المصري و اللي بيعتمد عليها اعتماد كلي و خصوصا الاستراتيجي منها زي القمح هنكون قطعنا شوط كبير في تحسين وضعنا الاقتصادي و منه لرفع مستوى معيشة المواطن المصري و بالتالي انتشاله من خط الفقر اللي نصف سكان مصر قافشين فيه


اسف ان كنت خرجت من مسببات الفقر بس كان لازماً عليا اني اتكلم عن مصر و خصوصا في النقطة ديه نرجع بئى للمسببات و اللي بيتمثلوا بقيتهم في مسببات اقتصادية نتيجة الوضع الاقتصادي السيء اللي بتعيشه الكثير من الدول و خصوصا طبعا الدول النامية والمسببات الاقتصادية ديه غالبا ما بتكون بسبب الانظمة الاقتصادية اللي ببتبعها الدول ديه و سوء ادارة الدولة لمواردها و انها ازاي تقدر تستغلها الاستغلال الامثل .. فيه اسباب تانية كمان و هي اسباب سياسية و بردو بسبب الانظمة السياسة القائمة على ادارة اعمال الدولة و اللي ممكن تكون سبب في انها تفقر شعبها زي مثلا استبداد حكام بعض الدول و تفننهم هما و الحاشية اللي حواليهم في نهب ثروات بلادهم و قمع شعوبهم و اعتقد ان الامثلة ديه موجود منها في افريقيا و اللي بينتج كمان عن سوء الادارة السياسية ديه ظهور النزاعات اللي بتخلق انقسامات داخل البلد نفسها و اللي قد ينتج عنها نزاعات مسلحة و ينقسم الشعب لميلشيات و احزاب سياسية شغلتها انهم يقتلوا في بعض و المظلوم في الوسط بقية الشعب الغلبان اللي مش طالب اكتر من قوت يومه


في بئى كمان عوامل اجتماعية بردو قد تكون سبب في اسباب الفقر زي الكثافة السكانية مثلا بس احنا لينا وقفة في الكثافة السكانية و هي ان الكثافة ديه لازم الدول تستغلها لانها تعتبر الثروة البشرية او قوة العمالة زي ما بيحبوا يسموها بتوع الاقتصاد و ممكن ناخد دولة ضربت لنا اجمل مثال عن كيفية استغلال القوة البشرية كمحرك و دافع للاقتصاد مش العكس و هي الصين و اللي يزيد عدد سكانها عن 1 مليار و 300 مليون و شويه كمان بني ادم و اهي وصلت لمستوى اصبحت تهدد فيه دول العالم المتقدم بسبب سرعة نمو الاقتصاد الصيني و تهديد صناعات كانت حكر على الدول الصناعية الكبرى فا الصين هنا قدرت بالفعل تستغل قوة العمالة ديه في انها تحقق اللي قدرت توصله لغاية دلوقتي و للاسف في مصر كل شويه بيتكلموا عن الزيادة السكانية و انها السبب في المشاكل ديه كلها طيب ليها مش تستغل الثروة ديه شوف تقدر تتطلع منها ايه شوف تقدر تتطلع منها كام عالم يكونوا سبب في تقدم انشطة كتير في بلدنا شوف تقدر تتطلع كام دكتور كام مهندس كام باحث لكن الاهم يكونوا كفء بجد مش زي اللي بيتخرجوا دلوقتي و هما ليسوا ابدا على الكفاءة المطلوبة بشهادتهم هما ، شوف تقدر تتطلع كام عامل مطلع بالفعل يقدر يتعامل و يتطور مع التكنولوجيا المستحدثة في مجال تخصصه .. المشكلة مشكلة منظومة متكاملة مش مشكلة عدد سكان اذا قدرت تظبط كل نواحي المنظومة ديه من سياسي للتعليمي لاجتماعي لوعي ثقافي هتقدر تخلق من السكان دول اللي يحققولك النهضة فعلاً و متقولش مفيش موارد علشان نقدر نحقق ده كله لأ فيه موارد بس بطل غباء و استغلها بئى صح


اسف للمرة التانية ان كنت خرجت عن موضوعنا و اللي شكله كدا هيطول و ربنا يستر المهم من بقية العوامل الاجتماعية اللي ممكن تكون بتأثر كمان حاجة زي هجرة العقول و هي ان اصحاب العلم او الحرفة و المهنة بيهارجوا لاماكن يعرفوا فيها ينتفعوا بالفعل باللي بيمتلكوه من علم او مهنة و بالتالي فبلادهم الاصلية هتعاني من فقر في الكوادر اللي يمكن تكون في امس الحاجة ليها علشان تحقق نهضة في بلدها و بردو يمكن احنا في مصر بنعاني من الموضوع ده و بيني و بينكم انا التمس العذر للعقول ديه اللي بتهاجر لان يمكن لو مكنتش هاجرت مكنتش وصلت للي وصلتله ده لكن لا التمس ليه العذر في استمرارها هناك للابد اظن لابد لها من عودة علشان بلدهم تقدر تنتفع بعلمهم اللي حصلوه بره .. و باقي شويه عوامل اجتماعية كمان زي بئى الحروب اللي كفيلة انها تهدم دولة و تشرد شعبها وتخليهم يشحتوا كمان فكل اللي فات ده كان من المسببات اللي ممكن تكون سبب في الفقر اللي بتمر بيه الشعوب و في الغالب بيجتمع عوامل كتيرة من العوامل ديه في دول واحدة و بالتالي بتخليها من افقر شعوب العالم


طيب اظن كدا وضحنا يعني ايه فقر و ايه اللي ممكن يسبب الفقر ده .. طيب ايه حلوله ؟؟ ازاي نقدر نقضي على الفقر في العالم و في بلدنا ؟؟ هل بالفعل نقدر نقضي عليه ؟؟


ايوه نقدر نقضي عليه بس الاول انا هقول اللي انا شايفه ازاي نقضي عليه من وجهة نظري يعني انا شايف ان الفقر اذا كان ليه مسببات مختلفة لكن الموضوع كله اشبه بالسلسلة اللي حلقاتها كلها لازم تكون متصلة ببعضيها علشان تكون السلسلة ديه و اي فقد في حلقة من حلقاته هتتكسر السلسلة ديه و المشكلة هتحصل و لو جينا نتكلم بالاخص على الفقر هنلاقي ان السياسة في العالم او سياسة بعض الدول بالتحديد او سياسة بعض المنظمات الدولية زي الامم المتحدة ليها الاثر الاكبر في انها تكون السبب و الحل لمشكلة الفقر بمعنى ان لو جينا بصينا لبعض الدول الاكثر فقرا هنلاقيها بتعاني الاول مش مشاكل سياسية بتتمثل في حكامها او النزاعات اللي فيها فا بتتدخل المنظمات الدولية لحل و تصفية النزاعات ديه بدون اي تحيز لدول كبرى ( عظمى ) لتحقيق مصالح في الدول ديه فده هيكون او خطوة لحل مشكلة الفقر في الدول ديه لان بحل النزاعات ديه هتسمح لمؤسسات المجتمع المدني و العمل الخيري في انهم يبتدوا مع البلد ديه خطوة خطوة لغاية ما تقف على رجليها و مش بس مؤسسات المجتمع المدني و كمان مؤسسات دولية زي البنك الدولي و صندوق النقد الدولي و اللي هيتتدخلوا مش بس بالنقد دا هيتتخلوا كمان بمتابعة النظام الاقتصادي للدولة ديه علشان يضمنوا انها بالفعل هتتحق نهضة اقتصادية لكن الاهم ان ميكونش فيه اي تدخلات من اي نوع تعرض سير العملية ديه للفشل و المقصود بده طبعا تدخل دول عظمى بسياستها زي ماما امريكا مثلا لتحقيق اغراض مصالح شخصية لان عمرها ابدا ما كانت حريصة على مصلحة غيرها .. فالكلام ده كنت اقصد بيها الدول اللي هي متبهدلة خالص يعني حاجة زي الصومال كدا


اما بئى لو جينا نتكلم عن دولة مش فقيرة لكن للاسف بسبب سوء ادارتها بتعاني من الفقر و الاهمال دولة زي دولتنا كدا الحبيبة مصر فا انا شايف ان مشكلتنا بتتمثل في سوء ادارة فقط يعني عندنا كل حاجة عندنا الامن عندنا الموارد عندنا الثروة البشرية عندنا العقول الكويسة جدا بس مشكلتنا هي سوء ادارة من القائمين على ادارة الدولة بكل نواحيها بمعنى ان لو تولى امور الدولة ديه ناس فعلا اصحاب رؤية و علم و ضمير هيقدروا يغيروا منها تماما .. احنا مشكلتنا فينا مش في اي حاجة تانية بأيدينا نحلها بس المهم البداية


طيب انا بقول كفاية كدا لاني طولت جدا دا اولا طبعا و ثانيا لاني راجع من شغلي تعبان اصلا بس اصريت اني لازم اشارك في اليوم ده و بصراحة كان نفسي اكتب اكتر عندي لسه كلام كتير كنت عايز اقوله بس بصراحة الوقت لا يسمح بالمرة و خصوصا كمان اني بحاول اجيب المعلومات من مصادر الموثوق منها علشان تكون الارقام و المعلومات صحيحة و ده كله محتاج بحث كام يوم علشان يخرج موضوع متناسق لكن اهو الواحد حاول بقدر الامكان ان هوا يتكلم عن الموضوع ده و اتمنى اني اكون قدرت اضيف شيء ولو ضئيل جدا و الحقيقية مش مصدق ان فات سنة كاملة على حوار يوم التدوين ده لان من سنة بالظبط و في نفس اليوم كتبت بردو موضوع ليوم التدوين العالمي بس كان عن البيئة عموما سعيد بردو اني قدرت اكتب الموضوع ده و هسيبكوا مع بعض اللينكات اللي اتمنى انكوا تتطلعوا عليها علشان نشوف قد ايه الفقر مشكلة كبيرة في العالم


اولا دا لينك الموقع اللي بينظم اليوم ده و اتمنى انكوا تسجلوا عليه

Blog Action Day


اللينك ده بئى هتلاقوا عليه حقائق مفزعة عن الفقر و قد ايه فيه عدم عدالة في توزيع الثروات

Poverty Facts & Stats

اللينك ده بئى عبارة عن قناة على اليوتيوب عبارة عن شباب اخذوا على عاتقهم محاربة الفقر في العالم سافروا لاماكن بعيدة
فيها قد ايه ناس معدمة مطالبهم في الحياة بسيطة و قد ايه الشباب دول بيحاولوا يساعدوا على قد ما يقدروا
The Uncultured Project

عموما اسف ان كنت طولت
تحياتي لكم جميعا
سلام

Wednesday, September 24, 2008

مقتطفات

السلام عليكم

في البداية احب اقول بس كل سنة الناس كلها طيبة وبخير و رمضان كريم هوا صحيح رمضان قرب يخلص بس مش مشكلة بردو رمضان كريم (: .. المهم الواحد رجع اخيراً تاني بعد فترة كبيرة جدا من اخر بوست بس بصراحة الدنيا كانت متلعبكة اخر حاجة و انتوا عارفيين رمضان الوقت فيه بيبئى عامل ازاي و ده السبب اللي الواحد فيه مبيحسش بالوقت و بيحس ان الوقت عدى بسرعة اوي و ده بيزعلنا لان بجد رمضان شهر لا يعوض ربنا يعيده علينا ان شاء الله و الناس تكون بخير

اما بالنسبة للبوست ده فا محدش يسألني دا ايه هوا هيكون كوكتيل كدا مقتطفات سريعة من حاجات بس كنت عايز اقولها و خصوصا اني مصدقت اجيب وقت مركز فيه و محدش موجود في البيت يضايقني و اكتب براحتي

-------------

في البداية بس احب اقول شكرا للناس اللي علقت على اخر بوست و اللي بجد كانوا سند و يمكن يكونوا هما صح بس في رأيهم بالرغم من اني مازلت حاسس نفس الاحساس لكن هتغلب عليه بالاستمرار في الكتابة و كنت عايز اوضح بس ان في ناس اعتقدت اني هسيب التدوين و مش هرجع تاني بس ده طبعا ما اعتقدش ان هوا هيحصل لان التدوين بئى بالفعل خلاصي لاني بفضفض لنفسي قبل اي حد تاني و بجد استريحت لما كنت بخرج الحاجات اللي كانت بتشغل تفكيري و استريحت اكتر لما لقيت تعقيب ناس عليها يأما اكدولي حاجات مش كنت متأكد منها يأما فتحولي نقط و زوايا جديدة مكنتش شايفها يأما كانوا سند و عون للشخص في الوقت اللي بيحتاج فيه كل واحد مننا لوجود اشخاص بقربه حريصين عليه .. فا ديه نقطة بس كنت عايز اوضحها و اشكر بشدة الناس ديه

-------------

قد ايه النجاح ده شيء جميل بمعنى انك مثلا شاركت في نشاط و تعبت فيه و اجهدت جدا جدا لكن بمجرد انك تلاقي تعبك ده انتهى بالنجاح و اصبحت الاول على مجموعتك في النشاط او التدريب اللي كنت بتقوم بيه ده بتنسى كل لحظة تعب و كل لحظة اجهاد حسيتها لانك بتلاقي تعبك جيه بفايدة و علشان اكون واضح كان تدريب عندنا في شغلي و كان المفروض نكون موجودين كل يوم الصبح للتدريب بجانب شفتات عملنا فتخيل بئى ضيف ده كله للرمضان و انت اصلا يدوب مش نمت كفاية يدوب ساعتين تلاتة بالعافية و مطلوب منك انك تركز في تدريب و شغلك و انت اصلا يدوب شايف قدامك و بعد ده كله تلاقيك مرة واحدة نجحت بالشكل ده بجد احساس جميل اوي

-------------


اعتقد ان المقولة بالشكل ده احسن " شق طريقك باحترامك للاخرين بدلا من ان تشقه بسيفك " بجد لقيت ان كدا احسن لان بالفعل احترامك للاخرين هيفتحلك ابواب كتيرة اوي (حتى لو كان باب اتوبيس بعد موقف مريت بيه) بمجرد انك احترمت الناس بتلاقي المعاملة متغيرة بالفعل لدرجة بتجبر اشخاص اصلا مش كويسين انهم يعاملوك بكل الاحترام فقط لانك احترمتهم و عاملتهم بالشكل المناسب و قد ايه الاحترام ده ممكن تظهره للاشخاص دول بكلمات بسيطة جدا المفروض مش نهملها و نظهر احترامنا للناس اللي تستحق الاحترام و اللي متستحقش يعني انا مثلا بالنسبة ليا كشخص اللي يحترمني اشيله فوق راسي حتى لو مش هيساعدني في حاجة او كان مجرد شخص ما اعرفوش اما العكس بئى اللي بيعاملني بقلة الاحترام فا الشخص ده مش يهمني في شيء حتى لو هيديني الدنيا كلها

-------------

شهر رمضان ده بالفعل شهر الخير شيء جميل لما تلاقي الناس بتسعى انها تعمل الخير فيه لكن حابب بس اني امسك نقطة اعلق عليها و الفت النظر ليها و هي ان من ضمن اعمال الخير ديه الناس اللي بتزور الايتام و المرضى و بتحاول تخفف عنهم وحدتهم و تشاركهم فرحتهم وتساعدهم بقدر الامكان بس احب اقول بس ان يا جماعة الايتام و المرضى دول موجودين طول السنة مش في رمضان بس بمعنى ان ياريت ميكنش فعل الخير ده و اللي هوا شيء جميل جدا قاصر على شهر رمضان فقط عايزين الناس تتابع فعل الخير و تستمر على الزيارات و المساعدة و تكون بصفة دورية كل شهر مثلا ونشوف الاماكن اللي بجد محتاجة مساعدة و مقفيش حد واخد باله منها (مش اللي بيتعملها اعلانات كل يوم في التلفزيون) يعني شوف الاماكن اللي الناس اهملتها و خد عهد على نفسك انك هتكون موجود مع الناس ديه بصفة دورية و تشوف احتياجتهم و متطلباتهم و متنساش ان مش اللي بتحتاجه الاماكن ديه مساعدات مادية فقط بالعكس ده زيارتك و وجودك في وسطيهم اهم الف مرة من اي مبلغ ممكن تساعد بيه .. اللي عايز اقوله ان جميل فعل الخير و الاجمل لو كنت دائم عليه مش في شهر واحد

-------------

احنا ناس و الله محترمين جدا و خصوصا في شهر رمضان و كلنا بنحاول نتقرب اكثر الي الله و ديه فرصة ان الاجر مضاعف و كل واحد بيحاول يجتهد على قد ما يقدر و علشان كدا في اولى الليالي الفردية و لله الحمد نشلوا الشبشب بتاعي (ناس محترمين جدا) و ده بردو اجتهاد من الناس انهم يجمعوا اكبر عدد من الشباشب فا ربنا يهديهم يا رب و ان والله مسامح اللي خده بس كنت اتمنى ان اللي بيسرق ده حتى يستحي من ربنا و ميسرقش في رمضان (في رمضان و في غيره بس اهو) يعني في الوقت اللي الناس كلها بتحاول تتقرب بطاعة هوا بيقوم بمعصية عموما ربنا يهدي الجميع

-------------

اه بالمناسبة يوم 15 اكتوبر هيكون للمرة التانية زي السنة اللي فاتت اليوم العالمي للتدوين و اللي في السنة اللي فاتت اتكلموا عن البيئة و عن تأثيرنا عليها انما المرة ديه بئى اختاروا انهم يتكلموا عن الفقر في العالم و الالاف اللي بتموت يوميا من الجوع و اغلبيتهم طبعا في افريقيا فا فكرة اليوم قائمة على ان كل المدونين في العالم بيجتمعوا على انهم يختاروا موضوع محدد و ينشروا فيه و كل واحد حسب وجهة نظره للموضوع و ايه الحلول اللي ممكن تخلص العالم من المشكلة ديه و هكذا يعني على امل انهم يوصلوا الموضوع ده لاكبر عدد من الناس و اللي هما قراء المدونين دول يمكن يغير و لو حاجة بسيطة و نقدر ن خلاله نساعد اللي محتاج فعلا و اللي عايز اقوله ان مش شرط نتكلم عن الفقر في العالم ممكن مثلا نتكلم عن الفقر في بلادنا و ايه اللي بنعاني منه و ده لينك السايت اللي بينظم الحوار ده ممكن تتطلع عليه لو حابب تشارك في اليوم ده و اتمنى ان عد من المدونين العرب يشاركوا في الحوار ده علشان يكون لينا وجود في مجتمع التدوين الدولي و نشارك العالم كله نفس الفكرة

-------------

و الله الناس بتوع جوجل دول ناس محترمين جدا دايما بيطوروا و بيسهلوا علينا المتابعة و خصوصا بعد الاضافات الجميلة اللي عملوها على بلوجر و اللي اخرها كان حكاية الفولوينج او انك تتابع يعني تحديثات المدونات اللي بتحب تتابعها من الداش بورد و كمان تعلن انك فولور لمدونة معينة و تضيف جادجيد كمان للموضوع ده (لسه شايف الموضوع ده النهاردة) .. بصراحة انا معجب جدا بالشركة ديه افكارهم جميلة جدا و بيربطك بالدنيا كلها من خلال اكونت واحد من خلاله تقدر تستخدم خدمات جوجل كلها و الاجمل كمان ان كلها مجاناً فا احقاقاً للحق يعني الناس ديه زي الفل و بجد جوجل اصبح و هتكون امبراطورية فعلا بتهدد عرش ميكروسوفت في مجال البرمجيات و خدمات الانترنت .. بجد ربنا يزيدكوا كمان و كمان

------------

بس اعتقد ديه النقط اللي كنت عايز اسردها سريعا علشان اخرجها من دماغي لان الحاجات اللي بكتبها هنا زي ما تقولوا كدا الاوت بوت بتاع دماغي او نتاج تفكير فا اللي بكتب هنا بفضي مساحة في دماغي علشان اشغلها تاني بحاجات تانية و اجي اصدعكوا بيها ..عموما كل سنة و الناس كلها طيبة و بما ان العيد خلاص قريب
فا احب اقول بردو للناس كلها عيد سعيد عليكوا ان شاء الله

تحياتي لكم جميعا
و السلام ختام

Monday, August 18, 2008

غريبة ؟؟

غيبت كتير عن المدونة مش لاسباب حرجة يعني لكن لانشغالي فقط مش اكتر

و حاولت اكتب كذا مرة عن كل اللي مريت بيه الفترة اللي فاتت

و اللي فيها حاجات كتير محيراني و اتمنى اني الاقي ليها تفسير

لكن فجأة و انا بكتب حسيت ان الكلام ملهوش اي معنى و اني ضيعت جزء مهم من حياتي

في فلسفة جوفاء لا هتودي ولا تجيب

و ان الكلام اللي بقوله

مجرد كلام فارغ

!!!

Friday, June 27, 2008

It is a matter of choice

و انا على النت لقيت شخص قال المقولة ديه فعجبتني اوي و خلتني افكر في نقط كتير بتحيرني الاخ ده بئى قال ايه

Life is a stream of choices given to us.

عايز يقول ان الحياة هي سيل متدفق من الخيارات المتاحة لينا

عجبتني جدا و رديت و قولته لكن الاهم ان احنا نتخذ القرار الصائب في الوقت المناسب و الحقيقة ان ديه النقطة اللي بتدفعني للتفكير فيها خصوصا بعد بعض المواقف اللي حصلت في الفترة الاخيرة و اللي تجلى فيها مدى اهمية ان احنا نختار او نقرر ايه القرار اللي هنتخذه و خصوصا لما يكون القرار ده هيأثر سواء بالسلب او بالايجاب على حياتنا المستقبلية

لكن المشكلة ان الواحد بطبيعته بيتمنى ان اختيارته و قرارته اللي هيتخذها ديه تكون صائبة الا اني زي ما قولت انها مشكلة لاننا مش هنعرف اذا كان القرار اللي هنتخذه ده هوا القرار الصائب ولا لأ و هل هوا ده الوقت المناسب لاتخاذ القرار ده ولا لأ لكن المفروض ان ده ميكونش عائق لينا لاني اعتقد ان احنا لازم نتخذ القرار اللي احنا شايفين ان هوا الاصلح لينا حاليا و في المستقبل كمان و اذا الايام بعد كدا لم تثبت ان القرار اللي اتخذناه في الماضي ده لم يكن القرار الصائب فا اعتقد ان مش لازم نندم لان ممكن يكون كان القرار ده هوا الانسب في وقتها

و فيه مشكلة تانية كمان لما يكون القرار اللي انت هتتخذه ده من الخيارات المتاحة قدامك مش متعلق بشخصك و بحياتك بس لأ ده متعلق كمان بحياة و بمستقبل اشخاص حواليك سواء كانوا من العيلة او من الاصدقاء لان يمكن يكون قرارك ده قاسي او مناسب للاشخاص دول و للسبب ده بيكون اتخاذ قرار في الحالة ديه صعب و محتاج تفكير اكتر و المشكلة كمان ان ممكن يكون الاشخاص دول منتظرينك انك تتخذ قرار مناسب ليهم من وجهة نظرهم على الاقل لكن انت شايف العكس ان قرار زي ده مش هيكون مناسب ليهم لانك انت نفسك مش هتقدر تتأقلم مع القرار ده او بمعنى اصح انك يمكن تتخذ قرار مش مناسب ليهم لكن انت شايف ان هوا مناسب ليك و ليهم في نفس الوقت علشان كدا لازم يفهموا حاجة زي كدا و لازم يعرفوا ان قرارات بعض الاشخص قد تكون في مصلحتهم في النهاية بالرغم من ان ممكن متكونش لمصلحتهم في الوقت الحالي

هوا يمكن الموضوع غريب شويه بس ديه حاجة بتقابلنا كل يوم و لازم نتخذ قرار و نختار اختيار واحد اللي احنا شايفينه انسب لينا و للي حوالينا كمان علشان كدا زي ما هوا باين من عنوان التدوينة ان المشكلة فعلا هي مشكلة
اختيار

Thursday, June 12, 2008

داء الانتخة

مش عارف هوا دا عيب فينا ولا فيرس ولا موروثات جينية مصاب بيها الشعب (او علشان مش نعمم جزء كبير من الشعب) ولا ايه بالظبط بس اعتقد ان جزء كبير فعلا من الناس او بمعنى اصح من الموظفين و العاملين في الدولة
مصابين بداء الانتخة


هوا بصراحة انا قعدت ادور على مصطلح نقدر نطلقه على المرض ده بس لقيت ان ده مش بطال و داء الانتخة مقصود بيه بكل بساطة عدم رغبة الموظفين و العاملين بالقطاعات المختلفة بالدولة بالعمل يعني من الاخر لو يقدروا انهم يقدروا يقعدوا في بيوتهم طول الشهر و مرتبهم يجيلهم اخر الشهر على الجاهز من غير ما يكتبوا ورقة هيعملوا كدا او علشان اكون دقيق معاكوا ان ده هوا اللي بيحصل بالظبط علشان اكون واضح احب اشاركوا بالصورة ديه اللي التقطت من احدى المصالح الحكومية اللي بتقوم باعمال خدمية عن طريق قريب ليا اللي شاركنا بالظبط بالمهازل اللي بتحصل و اللي انا متأكد انها لا تخفى على الكثير منكم

ديه الصورة


طبعا ليا كذا تعليق على الصورة بس قبل نكمل موضوعنا و هي زي ما انتوا شايفين كدا الاجزاء المشار اليها بالاسهم اللي لونها احمر و كنت اشير فيها للهمزة او الهمزات اللي موجودين على الكلمات التلاتة و الحقيقة انا كنت ضعيف في النحو في المدرسة و مكنش دايس اوي بصراحة في قواعد الصرف و النحو لكن اللي متأكد منه ان الهمزات ديه مش في مكانها بالمرة و بس ديه حاجة كدا في السكة علشان نبين مدى جهل الناس بقواعد اللغة حتى البسيطة منها و خصوصا لو كان اللي كاتب الورقة ديه مهندس او بمعنى اصح مؤهل عالي المهم قضية اللغة ديه مش قضيتنا دلوقتي خلينا في اللي احنا بنتكلم فيه و نييجي بعد كدا لي النقطة التانية في الصورة و هي الكلمة اللي حطيت تحتها خطين و هي كلمة يومياً و الحقيقة ديه اللي دفعتني اني اكتب في النقطة ديه بمعنى ان المفروض ان احنا بنروح اشغالنا كل يوم يعني كلمة يوميأً ديه المفروض انها كلمة بديهية مش محتاجة ان صاحب الورقة ديه (المدير المسئول عن ادارة المكان) يكتبها في الورقة و يطلب من الموظفين و العاملين انهم يكونوا موجودين يوميا الساعة التاسعة صباحاً لكن الحقيقة المؤسفة طبعا انها مش بديهية لان كتير من الموظفين المصابين بداء الانتخة ميعرفوش حاجة اسمها الانتظام في العمل و الالتزام بالاعمال الموكلة اليه بل عدم ذهابه للعمل نهائياً و بردو مازال بيتقاضى مرتبه بصفة دورية بالرغم من ان هوا مش بيقوم بأي اعمال تذكر

ايوه للاسف فيه في كل مصلحة او قطاع الحكومي منهم طبعا كم من التسيب و الاهمال اللي لا احد يتخيلهم يعني لما في ناس مش بتروح شغلها الا يوم واحد في الشهر و هوا اليوم اللي بيقبضوا فيه مرتبهم و بقية الشهر كله في بيتهم و بيتكتب حضور في شغله يبئى اسمه تسيب و اهمال و قلة ادب و استهبال و قول كل اللي انت عايزه .. لما يكون بعض الناس مرضى و مش بيروحوا شغلهم و مرضهم ده كمان يمنعهم تماماً من اداء عملهم لكن بردو مش بيروحوا و مرتبهم بيروحلهم البيت يبئى اسمه اهمال و تسيب و في النقطة ديه بالذات محدش يقولي زي المسؤلين عن ادارة المكان و اللي بيسهلولهم حاجة زي كدا ان الناس ديه مريضة و بلاش نقطع عيشهم دول غلابة و هيجيبوا العلاج منين و كل الكلام ده كله لاني هرد عليهم و اقولهم مرضهم على رأسي من فوق (في حاجة اسمها تأمين صحي و اذا كان التأمين منيل بنيلة ديه مش مشكلتي دلوقتي) لكن في حاجة اسمها الحق حق و مش من الحق ابدا ان الناس دول يشغلوا مراكز المفروض انهم شغالين و شايفين شغلهم و هما اصلا مرضى و اللي بسبب حاجة زي كدا هيشغلوا اماكن كانت ممكن ناس تحل محلهم و يقوموا بشغلهم او بمعنى اصح احق منهم بالعمل لقدرتهم الصحية على القيام بالاعمال ديه .. و بردو يبئى اسمه اهمال و تسيب و استهبال لما الموظفين يتفقوا انهم يقسموا نفسهم مجموعتين على الايام بمعنى اني مجموعة تكون من الساعة 9 للساعة 11 و يروحوا المجموعة التانية تكمل بعد 11 علشان متبأش المكاتب فاضية و كذا دواليك و يبدلوا مع بعض النص يمشي 11 و نص يكمل و النص اللي كمل في اليوم اللي بعده يمشي بدري و النص اللي مشي بدري امبارح هوا اللي يكمل و هكذا
طبعا انا عارف ان الكلام ده اغلبنا بنشوفه و عارفينه و يمكن في حاجات اسوء من كدا بكتير لكن السؤال ليه ده كله ؟؟

و الحقيقة اني في اسباب كتيرة بتسبب المشكلة ديه مثلا يعني ان المصالح و القطاعات الحكومية ديه بسبب ان الحكومة عايزة تشغل اكبر عدد ممكن علشان تقلل من البطالة وقعت في مشكلة كبيرة جدا و هي العمالة الزائدة ان مثلا المكان اللي بتكلم عليه ده فيه عدد موظفيين جدا لدرجة ان المكان اصلا مش متسع ليهم و بيضطر بعض الموظفين انهم يقعدوا في المطبخ بتاع المكان ده لعدم وجود مكان يتسع للعدد ده كله من الموظفين اللي المفروض ان هما يقوموا بالعمل اللي يقدر يقوم بيه عدد من الموظفين لا يتخطى عددهم عدد اصابع الايدين و العمالة الزيادة هل اللي بيستخبى وراها الناس اللي مش بيروحوا شغلهم و الناس اللي مرضى و هكذا


و بصراحة هوا في اسباب كتير بتسبب داء الانتخة ده زي انعدام الرقابة و الوسايط و المحسوبية و العشم اللي كنت عايز اتكلم عن كل نقطة فيهم بس مش قادر الحقيقة لكن اللي عايز اعرفه بجد بئى هوا هل فعلا الموظفين مش عايزين يشتغلوا هل فعلا داء الانتخة ده فينا وراثة بان احنا كشعب او جزء كبير منه عايزين نأنتخ في بيوتنا و مش عايز نعمل حاجة و مرتباتنا تجيلنا علي البيوت ؟ لان لو كدا فعلا تبئى مشكلة يبئى بأي حق بئى بنشتكي من الفساد و الحال السيء اللي وصلت ليه بلدنا و احنا اصلا السبب فيه .. بأي حق بنقول ان احنا عايزين نحقق نهضة و نعلو بشأن البلد ديه و احنا اصلا مش عايزين نشتغل و نقعد في بيوتنا ؟؟ يمكن صحيح الادارة نفسها و طبيعة العمل و انعدام الرقابة و التخلف في النظم الادارية اللي بتُتبع لادارة مصالحنا الحكومية هي السبب في الانتخة اللي احنا فيها ديه لكن بردو في نفس الوقت فين احنا من ضمايرنا ازاي هنحلل مرتباتنا ديه و احنا اصلا ما اشتغلناش ببصلة

و علشان كل الكلام اللي فاتت ده كله خلاني افكر فعلياً عن مدى قدرة المصالح و القطاعات الحكومية ديه بالقيام باعمالها بالكفاءة المطلوبة و يخلينا نفكر جدياً في استبدال القطاعات ديه بالقطاع الخاص اللي اكيد اكيد مش هتكون في نفس الكفتة اللي بتحصل في المصالح ديه لان طبعا معروف ازاي الشغل بيتم في القطاع الخاص اللي طبعا لا يسمح بوجود تجاوزات زي اللي بتحصل ديه هوا صحيح هيكون في بعض المشاكل زي ان القطاع الخاص هيشغل الحد الادنى من الاشخاص القادريين على القيام بالعمل المطلوب و ده يسبب زيادة في البطالة لكن على الاقل هنضمن ان هيكون اكثر كفاءة من القطاع الحكومي في القيام بالعمل ده و انا بتكلم في الحالة المثالية

عموما في النهاية بس حبيت اتكلم عن النقطة اللي خنقاني ديه بالرغم من اني متكلمتش بما فيه الكفاية و يمكن الدنيا ملخبطة شويه لاني مجهد حبتين بس المهم اكون قدرت اوصل النقطة اللي عايز اقولها و انا متأكد ان الحوار ده ليه زوايا و حوارات كتير ممكن نتشعب فيها و اللي على استعداد كامل اني اتناقش في اي نقطة محددة اي حد يحب يتناقش فيها

بس كدا
سلام

Friday, May 09, 2008

احساس بالعجز

امبارح و انا راجع من تدريبي كالمعتاد و بركب الموصلات بردو كالمعتاد و بعد ما الميكروباص حمل لقينا السواق بيقولنا يا جماعة الاجرة زادت خمسين قرش و طبعا احنا متوقعين حاجة زي كدا لان دا شيء طبيعي المهم بعد ما مشينا و لمينا الاجرة بالزيادة اللي اتفرضت طبعا بسبب قرارات زيادة السولار و البنزين لقينا السواق بيقولنا


و الله على عيني يا جماعة الزيادة ديه بس اعمل ايه العيشة بئت زفت زفت كل حاجة غليت و كل حاجة بئت نار الواحد مش عارف يلاحق ازاي و ازاي يجيب اي حاجة عياله محتجاها .. الرز بئى بكام و الزيت بئى بكام و السكر دا حتى العيش في بلدنا بيصرفوا لكل اسرة سبع ارغفة عيش بس ، السبعة دول ميكفوش حتى ولادي طيب اعمل ايه حرام اللي بيحصل فينا ده .. ديه مبقتش عيشه

و هوا بيتكلم صوته راح ببص في المراية اللي قدامه علشان اشوفه لقيته بيبكي و هوا بيندب حاله و حال العيشة و اللي عايشينها بصراحة شديدة محدش حتى قدر يواسيه و يقوله اي حاجة تهديه لان نواسيه ازاي و احنا محتاجين اللي يواسينا كلنا بس بجد الموقف كان سيء اوي بجد اخرسنا كلنا و خلى كل واحد يسرح في حاله و حاله الناس اللي مش لاقيه و اللي الاسعار بتشويهم يعني السواق ده على الاقل ليه مصدر رزق بيصرف عليه و على اسرته و قال كل ده على حاله فما بالكم باللي ملوش مصدر رزق او مصدر زهيد او محدود هيكون حاله ايه ؟؟ كل ده بيخلي الواحد عنده احساس بالعجز يعني عايز تساعد الناس عايز تعملهم اي حاجة بس مش عارف لان انت نفسك اصلا محتاج المساعدة لان ببساطة شديدة كلنا في مركب واحد لكن نفسك تغير و نفسك يكون فيه امل في بكره امل يتحقق على ايديك بس للاسف بتحس ان الامل ده بيموت جواك يوم بعد يوم .. بجد حاجة صعبة

و بعد اللي يحصل ده كله كل ما امشي الاقي الحاجة شيرين تطلعلي كدا من اي حته و تقول " مشربتش من نيلها طيب جربت تغنيلها " و الله يا شيرين شريبنا من نيلها و جربنا نغنيلها (لان ده اللي بنقدر عليه اصلا) و جربنا نمشي في شوراعها و نحكيلها (مهي الناس ماشية عماله تكلم نفسها ما هما كدا بيحكوا ليها) بس بصراحة يا شيرين مصر بئت بتستهبل اوي و نيلها بئى ملوث و شوارعها كلها زبالة حتى الاغاني بئت كلها نفاق فبعد اذنك شويه يا شيرين مش عايز اسمع صوتك تاني

سلام

Friday, April 25, 2008

جمال المرأة

يقال ان عندما تتحدث المرأة تفقد نصف جمالها .. نعم سيدي قد اتفق معك فيما قلت
و لكن دعني ازيد عليك و اقول
ان أحياناً اخرى عندما تتحدث المرأة تأسرك بجمالها

Sunday, April 13, 2008

استمراراً لمسلسل الغباء

مش عارف انا بقالي كام يوم كدا مضطهد اي تصرفات غبية او غير عقلانية للبني ادمين و كل ما خلاص هقتنع بأن التصرفات ديه ممكن تكون ناتجة من تلقائية الاشخاص ديه و ليس بقصد الغباء منهم ييجي حوار يرجعني تاني للأقتناع بأن الغباء او التخلف مستشري فعلا و ليست تلك مجرد تلقائية منهم المهم ايه اللي حصل بئى من كام يوم كدا وصلي كالمعتاد رسايل من اللي بتوصل للناس سواء و بيكون فيها ذِكر او ايه قرآنيه او حكمة او ما شابه يعني الا ان الحقيقة الرسالة اياها اللي هنتكلم عليها النهاردة كانت مختلفة ( و متخلفة ) شويه لدرجة تخليني اعتقد انها ممكن تكون بالفعل نكتة المهم نص الرسالة كان ايه بئى

----------------------------------
تحذير هام جدا // اذا وجدت مكالمه على موبايلك من رقم مجهول او دولى او وجدت صوره شبح وكتابه غير مفهومه لا تقوم بالرد اطلاقا هذه المكالمه عباره عن اشعاع فيروسى يدخل الى المخ مباشره ومن يصاب به يموت فى خلال عشره ايام هذه الاخبار من مستشفى بالسعوديه وبها 30 حاله مصابه بلغ هذه الرساله ارجوك ولا تجعلها تتوقف
----------------------------------

انا نقلت الرسالة ديه زي ما جاتني بالظبط و مازودتش حرف او نقصت حرف و بصراحة استفزتني لدرجة شديدة لدرجة ان لولا ان اللي بعت الرسالة ديه واحد زميل كنت بجد شتمته على ان هوا يمرر رسالة بالتخلف ده قال اشعاع فيروسي قال ( يااااا صلاة العيد ) .. لا و الله اشعاع فيروسي اقسم بالله العظيم ان ديه اول مرة في حياتي اسمع فيها كلمة اشعاع فيروسي ديه و طبعا انا مش هناقش الرسالة ديه لاني بالرغم من اني لم اتأكد من صحة الخبر ( و مش ناوي اتأكد ) اللي اني متأكد تماماً من انها هزار او واحد دمه خفيف شويه و حب يهزر مع الناس و مش هلومه انما اللوم هيكون على المتخلفين اللي نقلوا الرسالة ديه اعتقاداً منهم بصحتها

طيب

انا بقول الحوار ده كله ليه بئى علشان اضرب مثل بس ان في بعض التصرفات اللي الناس بتقوم بيها بتكون فعلا بتنم عن حاجة من الاتنين يا اما غباء يا اما جهل لو في حالة الجهل ممكن نتعلم لكن في حالة الغباء هيكون صعب جدا ان احنا نصلح في الجزء ده و خد من التصرفات ديه حاجات كتير بنمر بيه كلنا و مش بنمر بيه بس لأ و بنقوم بيها كمان لاني بأنتقادي لافعال و تصرفات الناس لا يجعلني ابدا منزه او اعلى من الخطأ ده او اني اقوم بتصرفات زي ديه لكن هتكون حاجات بتختلف عن الحاجات اللي بيقع فيها الناس لاني طبعا مش هقدر انتقدها و انا مصاب بيها اصلا يعني اللي عايز اقوله ان ايوه يمكن كل واحد فينا غبي على طريقته الخاصة لكن يا بني ادمين في حاجات اعتقد يعني انها مش محتاجة عبقرية جبارة علشان نقدر نميز اذا كانت غلط او صح او تصرف غبي او سليم و ده السبب في اني ذكرت المقولة لفولتير في البوست اللي قبل فات و اللي كانت عايزة تقول ببساطة ان حتى البديهية اللي المفروض يتسم بيها الناس كلها او الاشخاص الطبيعين مش شائعة او موجودة يعني و ده شيء اعتقد ان كتير مننا ممكن يكون حاسه لو مش على المستوى الشخصي في تعاملاته مع الناس ممكن يقيسها على مستوى البلد و الحاجات اللي بتحصل فيها و تصرفات القائمين على شوؤنها اللي مش محتاجة عبقرية او عقول ذرية علشان ندرك قصور في مجال معين او في كل المجالات بمعنى اصح و ازاي نقدر نعالج و نحل المشاكل ديه الا انك تلاقي تصرفات او افعال يعني مش عارف اقول ايه لكن لو جبت تلميذ نجيب من الثانوي او من كلياتنا المرموقة و قولته فكر ازاي نحل المشكلة ديه هيجيبلنا حلول عجزت عن انتاجها من يدعون بأنهم مسؤلين عننا مش كدا ولا ايه ؟

الحقيقة ان النقطة المتعلقة بالبوست ده كنت عايز افردلها بوست تاني بشكل تاني لكن مواقف معينة هي اللي فرضت عليا انا هوا يخرج بالشكل فا كنت عايز اقول ان البني ادم مش غبي كدا ربنا و هبنا اغلى و اجمل و اروع و احسن هدية ممكن تتخيلها و هي العقل اللي ربنا ميز ادم و ابناءه بيه و قال على العقل ان هوا احب شيء ليه كما جاء عن رب العزة في الحديث القدسي على لسان سيدنا محمد صلى الله عليه و سلم " عندما خلق الله العقل .. قال له أقبل فأقبل .. ثم أدبر فأدبر ثم قال .. ما خلفت خلقا أعز على منك .. بك أجازى وبك أعاقب " يعني اللي عايز اقوله حاجة بالجمال ده ربنا مش وهبها لينا من فراغ لو كل واحد مننا يعني حكم عقله في امور حياتنا و امورنا الدنيويه و علاقتنا ببعض هنوصل لجمال الحياة اللي يجب ان تكون عليه اصلا الحياة برفضنا لكل سلوك او فعل غبي او جاهل من شأنه ان هوا يعكر صفو حياتنا

لكن الحقيقة في هنا سؤال مهم جدا جدا جدا جدا برشت ( من البرشوت ) على دماغي مرة واحدة و انا بكتب البوست ده متعلق اوي بالجزء اللي فات ده و لقيته فعلا ان ممكن يكون منطقي و السؤال هوا هل الانسان اللي هوا البني ادم يعني المفروض او من الطبيعي ان هوا يكون غبي ؟؟ بمعنى ان فيه تصرفات كتير بتحصل قدامنا في الحياة واضحة تماما انها غبية الا ان الناس بردو بتصر على انها تقوم بيها حاجة مثلا زي التدخين او ادمان المخدرات ديه افعال مثلا غبية جدا و مش محتاجة كتير مننا علشان نعرف ان اد ايه بيضر صحتنا و بتسبب في دمار صحتنا دمار شامل و هتؤدي للوفاة بعد كدا الا انك تلاقي بعض الناس مصممة انها تستمر على العادات المتخلفة ديه فلما نيجي نطبق بئى على السؤال و نقول هل من الطبيعي ان يكون في امثال الناس ديه علشان الافعال ديه تكون موجودة بمعني ان الناس ديه لو حكمت عقلها هتبطل الحاجات السيئة ديه و لو بطلت العادات السيئة ديه هنبقى مجتمعات جميلة و زي الفل و ده الشيء اللي مش المفروض يحصل في دنيتنا ديه يعني لازم يكون في غباء علشان مينفعش الحياة تكون حلوة و تمام يعني اللي اقصده ان لازم يكون في حاجة غلط في الدنيا لان مينفعش يكون في خير بس لازم يكون خير و شر و طبعا علشان الخير يتجازى في الاخرة و الشر بردو يتجازى فعلشان كدا بقول ان تقريبا الافعال ديه لازم تكون موجودة او من الطبيعي تكون موجودة علشان ديه حكمه ربنا في خلقه و طبعا انا هنا مش بتكلم على حوار التدخين و الادمان على وجه الخصوص انما دول انا كنت بضرب بيهم مثال فقط و ممكن ناخد على نفس الشاكلة حاجات كتير فعلشان كدا طرحت السؤال ده و الحقيقة ان اذا افترضنا صحة السؤال ده هيهون على الواحد حاجات كتير باعتبار ان اصبح ده امرا واقع بالرغم من ان ساعات الواحد مش بيحب ان هوا يتقبل حاجات كتير كأمر مواقع غير قابل تغيره


المهم احب في النهاية بعد ما خرجت النرفزة اللي كانت فيه اني اقول اسف ان كنت طولت وده امر طبيعي طبعا الا اني اتمنى ان يكون اللي كتبته مفهوم بالرغم من اني مش فاهم حاجة اصلا و ديه حاجة بردو بتؤرقني لكن الحقيقة بستريح لما بشارك باللي في دماغي ده يمكن الاقي اجابات مقنعة بالرغم من اني عارف بردو ان مش هلاقي لان بردو يبدو ان المفروض كمان ان نعيش في الدنيا مش فاهمين حاجة اه و في حاجة كمان اسف للناس كلها اذا كنت انشغلت عن متابعتهم بس للاسف الفترة اللي فاتت كان ورايا كم امتحانات و مازلت الحقيقة لكن ربنا يستر و نخلص من الحوار ده على خير

بــــــــــــــس كدا

سلام

Friday, April 04, 2008

اياك

شيء جميل جدا ان الشخص مننا يكون ذكي

لكن من الغباء الشديد

ان احنا نُقلل من ذكاء الاخرين

Saturday, March 29, 2008

اللبيب بالاشارة يفهمُ

" Common sense is not so common."
Voltaire

الراجل ده بيقول كلام زي الفل
كفاية بئى غباء
تعبنا

Sunday, March 16, 2008

الثقة تاني و تالت و رابع

ايوه الموضوع ده زهقني جدا جدا بصراحة و في الفترة اللي فاتت لقيت ان بئى موضوع مهم جدا جدا بالنسبة لكتير من الناس لاني من الاخر كدا شوفت اللي يخليني افتح الموضوع ده تاني بعد ما كنت اتكلمت عليه اولاني لكن مش فاكر اتكلمت عليه امتى بصراحة لكن مش مهم المهم ايه بئى


ان في خلال الفترة اللي فاتت وضعني القدر رغم عن انفي بين مواقف بتحصل بين ناس و بعضيها و ان شئتم الدقة خلوني اقول بين الاصحاب و بعضيها و ان شئتم دقة اكتر كمان بئى مواقف بتحصل بين الاصدقاء و بعضيها ( و انتوا عارفيين طبعا ان في فرق بين الصاحب و الصديق ) المهم بئى ايه ان زي مقولتلكم كنت للاسف موجود في المواقف ديه اللي يمكن مكنتش انا طرف فيها اكتر ما كنت موضع ثقة من بعض الناس او ممكن تقولوا كنت اشبه بالقاضي او مش القاضي ممكن تقولوا مستشار في المواقف ديه الا ان ايه المشكلة بئى اني لقيت ان المواقف او بمعنى اصح المشاكل ديه بتحصل بين اصدقاء مرت على صداقتهم فترة كبيرة جدا او حتى مش كبيرة لكنها كانت صادقة ( ممكن مش اوي يعني ) في خلال الفترة اللي استمرت فيها العلاقة ديه المهم اني لقيت ان للاسف نفوس بعض الناس مش صافية لبعضيها و ان بعض المواقف قد تتسبب ( او تسببت بالفعل ) في انها تكون سبب في نهاية علاقة الصداقة ديه الا ان المشكلة ان الحالة ديه مكنتش حالة فردية كانت كذا حالة و حصلت في فترات قريبة جدا من بعضيها و اثارت في دماغي نقطة مهمة جدا جدا جدا

ايه هي بئى النقطة ديه ان ازاي يحصل كدا بين الاصدقاء و بعضيها ، ازاي يحصل كدا بين الناس اللي المفروض ان هما اقرب لبعض من الاخوات ، ازاي يحصل كدا بين الناس اللي المفروض ان هما الناس اللي هيقفوا جنبي في مشاكلي و الناس اللي المفروض اني احكيلهم على اي مشكلة بمر بيها و بطلب منهم ان هما بيساعدوني والعكس كذلك لما يحصل لهم اي حاجة سواء بسراء او بضراء ازاي حد يقدر يتخلى عن صداقة كدا بسهولة لبعض المواقف اللي المفروض ان الصداقة اللي بينا ديه هتكون سبب في اني اسامحك علي حاجات كتير ممكن تقع فيها للانك ببساطة صديقي و صداقتنا ديه هي اللي هتشفعلك كتير لو اخطأت حتى لو كنت تقصد ده في حالة طبعا لو كان خطأ صغير ( ياريت تركزوا اوي في الجملة اللي فاتت ديه لانها مهمة ) لان بردو ببساطة شديدة كلمة صداقة حقيقية ( حطوا تحت حقيقية ديه مليون خط ) كلمة اكبر من انها تتأثر ببعض المواقف اللي ممكن نختار ان احنا نتغاضى عنها علشان الصداقة ديه تستمر و خصوصا لو كانا حريصين فعلا على استمرار الصداقة ديه .. ايوه ساعات ممكن يكونوا اصدقائنا ممكن يتسببوا لينا بجرح نتيجة لموقف معين قاموا بيه بقصد او من غير قصد زي ما احنا بالظبط ممكن نسببلهم جرح بسبب فعل معين بردو سواء بقصد مننا او من غير قصد لكن اعتقد ان مينفعش ان احنا بسبب اخطاء زي ما قولت ممكن نتغاضى عنها ان احنا ننهي العلاقة ديه

الحقيقة ان المشكلة ديه مشكلة كبيرة او بمعنى اصح سببتلي مشكلة كبيرة و خلتني اعيش فترة في مزاج حاد جدا ( و يمكن مازلت ) لان لقيت ان خلاص على كدا مفيش امان بئى لحد و تثقتي ديه محدش هيحصل عليها لاني مش على يقين ان الشخص اللي قدامي ده هيبادلني نفس الثقة ديه فاذا اصبحت الثقة بين مش هقول الناس و بعضيها لأ بين الاصحاب او الاصدقاء و بعضيهم فيها خلل او مش متبادلة فا ديه كارثة في حد ذاتها
و ده للاسف اللي خلاني اعامل الناس في الفترة ديه من المنطلق ده و ده احساس او حاجة انا مش عايزها بالرغم من ان كل اللي حصل قدامي يديني دلالات بعكس كدا

زي ما قولت الاحساس بعدم الثقة ده احساس مرفوض بالنسبة ليا على الاقل على اعتبار ان ممكن في ناس اصابها اليأس من الثقة في الناس من كتر اللي بيشوفوه منهم و اللي خلاهم يختاروا انهم لا يثقوا في الناس علشان بعد كدا ميرجعوش يتجرحوا لو حصل موقف ممكن يعتبروه ان فيه اهدار للرابط اللي كان بيربط الاتنين دول ببعض زي الصداقة القائمة على التثقة المتبادلة بينهم .. انا حاسس اني بتكلم كلام غريب لكن اعتقد ان الناس هتفهم قصدي ايه بالظبط

طيب .... طبعا الكلام اللي قولته ده مش حالة عامة لانها اكيد طبعا بتختلف من اشخاص لاشخاص و من مواقف لمواقف تانية لكن اعتقد بسبب احتكاكي بكتير من الناس اللي لقيتهم بيعانوا من نفس المشكلة ديه بالظبط و ان المشكلة ديه بالفعل اصبحت مشكلة عامة و ان كتير جدا من الناس اصبحوا بيعانوا منها .. عموما ملخص الكلام بالنسبة ليا هيكون ان الصداقة ديه من اهم المشاعر الانسانية اللي احنا بنمر بيها خلال حياتنا و خلال تعاملنا مع بقية الناس او بمعني اصح اللي بيصبحوا اصدقاء منهم و ان كلمة الصداقة كلمة كبيرة اوي لازم كل واحد يعرف حقوقه منها و واجباته و انها شيء مهم جدا في حياة كل شخص منا و ما اعتقدش ان ممكن حد يعيش من غيرها و اني شخصيا اُقدر تماما كلمة الصداقة ديه و بحاول احافظ عليها بقدر الامكان ( ما لم يدفعني بعض تصرفات اشخاص بعينهم اني اتخذ مواقف محددة تجاهم ) و كنت دايما لما حد ييجي يسألني سؤال انت بتثق في الناس اللي حواليك بما فيهم اصدقاءك كنت بقوله طبعا بثق فيهم بمقدار معين حسب كل واحد لكن الحقيقة بعد المواقف اللي شوقفتها بعينيا لو حد سئلني نفس السؤال هتكون اجابتي بكل بساطة

مش عارف

تفتكروا عندي حق ولا ؟

سلام

Saturday, February 16, 2008

اذا بليتم فاستتروا

السلام عليكم

طبعا كالمعتاد مش عارف ابتدي الموضوع ازاي لكن هندخل في الموضوع علطول لكن الحقيقة احب قبل ما ادخل في الموضوع اشكر ربنا و احمده على نعمتين غاليين قوي النعمة الاولي الا و هي نعمة الاسلام و النعمة التانية هي نعمة العقل و اللي بجد دول نعمتين غاليين اوي و اتمنى ان الناس تكون مقدرة قدر النعمتين دول علينا لان يبدو ان في ناس معدمة من الاتنين اصلا و هي ديه نقطة كلامنا النهاردة


الحوار كله ان كنت و بعض من زمايلي اشتركنا في مدونة اسلامية اللي هي نور الاسلام و اللي كان هدفنا منها ان احنا نحاول نتعرف اكتر على دينا الاسلامي بطريقة بسيطة و منهجية في نفس و الوقت

المهم في احد التدوينات دخل شخص يشتم و يسب الدين الاسلامي و سيدنا محمد و يتهمنا بالجهل ان احنا مقتنعين بالخرافات ديه على حد تعبيره يعني الا ان طبعا المشكلة ان الشخص ده مش شخص عادي الشخص ده شخص من المثليين و مش اي مثلي دا مثلي قوي كمان و للي ميعرفش المثليين دول يعني ايه دول اللي هما الشواذ جنسيا الا انهم اختاروا اسم اخف شويه

الحقيقة ان الشخص ده يعني مش عارف اقول عليه الحقيقة بس يعني مثال على الشخص اللي معدم من النعمتين اللي اتفقنا عليهم الا و هم الاسلام و العقل و الحقيقة انا دخلت المدونة عنده علشان اشوف البني ادم ده بيفكر ازاي و طبعا بغض النظر عن حالة الاشمئزاز اللي اعترتني اثناء تصفحي لمدونته (لانكوا عارفيين السبب طبعا يعني) اني لقيت ان في كمية كبيرة جدا من التناقض في افكاره و ديه هتُلاحظ بعد قراءة تدوينات قديمة مقارنة بالجديد منها الا ان الحقيقة انا مش ينرفزني اد ان هوا مثلي او شاذ جنسيا بمعنى اصح لاني كنت حاولت قبل كدا اني التمس العذر للناس ديه على اساس انهم مرضى مرض عضوي يعني لان في الحالة ديه هيبئوا مرضى و ليس عليهم من حرج و المطلوب هوا علاجهم الا ان الحقيقة بعد بحث لقيت ان حتى اذا كان في مرض عضوي عمره ما يكون سبب في انهم يسلكوا سلوك زي ده حتى ان لو ان الاشخاص دول اتعرضوا في ماضيهم لتجارب سيئة كانت ممكن تكون هي السبب في انهم يبئوا كدا يعني لاني شوفت امثلة للناس في بعض البرامج الي كانت بتتكلم على حوار زي كدا تعرضوا لحاجات و تجارب سيئة في ماضيهم و مكنتش سبب في انهم يقوموا بالافعال ديه ( مهو مش كلهم بئى هنتلمسلهم العذر بتاع عمارة يعقوبيان دا اذا كان عذر اصلا ) فا بعد بحثهم في الاسباب المختلفة اللي ممكن انها تكون سبب في الحوار ده لقوا ان الشذوذ اللي هما فيه ده هوا انحراف او انحدار اخلاقي و قيامهم باعمال منافية مش هقول للدين الاسلامي بس لأ ديه منافية اصلا لفطرة الانسان اللي خلقنا بيها ربنا يعني اذا كان منهم زي اخونا ده من لا يؤمنون بالدين الاسلامي او اي عقيدة تانية فان اصلا الفطرة اللي خلقنا عليها ربنا هي اللي بتخلي بعض الحاجات مستحيل نقوم بيها لان ده مخالف للفطرة اللي خُلقنا عليها كلنا كقول رسول الله صلى الله عليه و سلم في الحديث الشريف " ما من مولود إلا يولد على الفطرة " ( طبعا على اختلاف الحاجات اللي فطرنا عليها سواء بالنسبة للعقيدة او على بعض السلوكيات المعينة ) علشان كدا هنا في نقطة مهمة جدا و هي ان اذا كان المفروض ان الانسان مننا ولد على الفطرة و ان هناك بعض الاشخاص اللي بيقوموا ببعض الاعمال ديه فدا في نظري على الاقل شايفهم انهم هيحطهم في مستوي اوضع او اقل من مستوى البشر او الانسان السوي لان الحجات اللي فُطرنا عليها ديه حاجات كانت من شأنها انها تعلو بقدر الانسان و تطهره من حاجات ممكن تحط من قدره

نرجع بئى للشخص ده .. الحقيقة اني استغربت جدا حاجة ان زي ما هوا واضح من عنوان البوست اذا بليتم فاستتروا الا اني لقيت ان الشخص ده بيفخر بكونه مثلي او شاذ و شايف ان ده حاجة كدا زي حق مكتسب و مش شايف ان هوا بيعمل حاجة غلط طبعا ممكن ييجي كتير من الناس و يقولوا ( زي ما شوفت في ردهم على سؤال في تاج معين ) ان قيام الناس بسلوك زي ده هي حرية شخصية و كل واحد حر في افعاله و ان احنا بكلامنا ده رجعيين و متخلفين و الكلام الفاضي ده فهرد اقولهم اه ماشي حرية شخصية بس حرية شخصية في حاجات مش بتأثر على اخلاقيات و سلوكيات المجتمع اللي احنا عايشيين فيه كلنا اللي عايز اقوله ان الافعال اللي بيقوم بيها الناس ديه مش من حقهم انهم يقوموا بيها اصلا لانها لا تتفق مع سلوكيات المجتمع اللي هما عايشيين فيه لاننا احنا هنا مش في اوروبا او امريكا اللي يمكن يكون للاشخاص دول حرية في ممارسة الرذيلة بالرغم من ان حتى في الدول ديه الناس دول غير مقبولين بالمرة لان السلوك اللي بيقوموا بيهم زي ما اتفنا منافي اصلا لسلوك البشر عموما و بيتسببوا في فساد المجتمع اكتر من الفوايد اللي بيقدموها دا طبعا غير الامراض اللي هما بيكونوا سبب فيها بسبب شذوذهم ده و ده ممكن تلاقوه في المقال ده المهم زي ما قولت ان رفضنا للناس دول عمره ما كان رجعية او تخلف او حتى كبت للحريات الشخصية الا ان الحريات ديه مش لازم تكون على حسابنا و حساب اخلاقيات مجتمعنا و اخلاقيات شبابنا و صحتهم كمان يعني من الاخر الناس دول مرفوض تماماً وجودهم في مجتمعنا زي ما هوا مرفوض وجودهم في اماكن كتيره في العالم

كل ما ندخل في جزئية نسرح شويه انا عارف بس خلونا نرجع تاني للشخص المريض عقليا ده و اللي بجد انا حزين جدا ان شخص زي ده خد من وقتي الوقت ده كله اصلا لان هوا شخص اقل من اني اضيع وقتي معاه لكن الحقيقة طريقة المستفزه استفزتني و خلتني اكتب الموضوع ده و خصوصا بعد زيارتي الاخيرة للمدونة اللي هوا عاملها لقيت ان البوست الاخير في مقدار من الاساءات و الصور المسيئة اللي ميقدرش اي شخص مسلم يستحمل رؤيتها اصلا الا ان بالرغم من انها حاجة مستفزة جدا الا انها ممكن تكون مش مستفزة اوي لو اخدنا في الاعتبار ان الشخص اللي صدرت منه الحاجات ديه صاحب عقلية مريضة و شخص مشتت عايش في اوهامه و محاولش يدور بجدية عن اجابات لأسئلة اللي ممكن تكون محيراه لكن يبدو ان هوا اصلا مش عايز يفهم و عجباه السكة اللي هوا ماشي فيها فاذا كان كدا فاعتقد ان هوا يبطل ادعاء عكس كدا بأن هوا صاحب افكار و مبادئ و وجهة نظر لان هوا اصلا غير قادر ان هوا يرد او يناقش و جهات نظرة ديه و ده كان بعد هروبه من الرد على بعض تعليقاته المتخلفة و اذا كان كلامي ده هيوصل للشخص ده فنصيحتي ليه ان هوا يأما يحاول يهتدي للطريق السوي و الهداية ديه طبعا من ربنا و انه يحاول يستخدم عقله لان التفكير السليم و المنطقي هوا اللي هيوصله للأجابات اللي ممكن تكون السبب في هدايته اما اذا كان بئى مش عايز اصلا هيفهم حاجة او عجباه اصلا سلوكه كدا و مش عايز اصلا يعتقد فأي حاجة فياريت يريحنا منه تماما و يعرف ان هوا شخص غير مرغوب فيه بالمرة و ياريت يريحنا و يريح المجتمع منه و من امثاله لانهم اشبه بالسوس اللي بينخر في المجتمع بتاعنا اللي هوا مش ناقصهم اصلا و لا ناقص امثالهم فيكفي المجتمع ما فيه من تردي واضح في الاخلاقيات و السلوكيات

من الاخر بئى علشان ننتهي من الحوار ده انا لا التمس اي عذر للناس دول و لا احترم اي شخص لا يحترم عقلية و اخلاق الناس اللي قدامه حتى لو كان يختلف معاهم في الفكر او العقيدة و اذا الاشخاص ديه مش هتحترم حتى اداب الحوار فتجاهلهم هوا احسن حاجة نعملها في حق الناس ديه و احب انهي ببيت شعر كنت قريته في مدونة ممكن يكون فيه الرد على اي واحد بعد كدا مش هيحترم اداب الحوار و النقاش و طريقته في عرض الافكار بالسب و ما شابه و البيت هوا

لَو كلُ كلبٍ عَوى أَلقَمته حجراً *** لأَصبحَ الصخرُ مثقالاً بِدِينـــــــار

ومنْ عاتبَ الجُهَال أتعب نفسه *** ومنْ لام مَنْ لا يعرف اللوم أفسدَا

سلام

Saturday, January 26, 2008

التعليم و سوق العمل

اولا احب اعتذر عن انشغالي عن المدونة و حشتني و الله و وحشوني الناس بس للاسف الوقت بئى اضيق من ان الواحد يكون متواجد و الحقيقة ان انشغالي ده طبعا مش بارادتي و السبب اللي يمكن بعض الناس تعرفه و البعض لأ، اني الحمد لله ربنا وفقني لشغل و الحقيقة هوا شغل كويس جدا لان المجال شيق بالنسبة ليا و كنت طول عمري احب اني ادرس في مجال زي ده الا و هوا مجال الطيران المدني .. الا ان هناك سبب واحد مخليني سعيد جدا و هوا هوا نفس السبب اللي مخليني حزين جدا و مضايق جدا و السبب ان طبيعة العمل ده بعيدة تماما عن مجال دراستي يعني تقدروا كدا تقولوا دا في الشرق و ده في الغرب و الحقيقة انا سعيد بالسبب ده لاني مكنتش حابب اصلا مجال التجارة و كنت باتمنى و بطلب من ربنا اني لما اشتغل ما اشتغلش في مجال المحاسبة و الحوارات المتخلفة ديه ( بالنسبة ليا طبعا ) فيبدو ان ربنا استجاب لدعائي و وفقني للعمل ده .. اما بئى انا حزين و مضايق لنفس السبب لاني حاسس ان اربع سنين دراسة قضتهم في الكلية كانوا في الهوا او بمعنى اصح في الزبالة .. هما اكيد طبعا مش في الزبالة لاني اكيد استفدت من الاربع سنين دول لو مكنش على مستوى التعليم او المستوى الاكاديمي اللي ممكن تعتبرها كمعلومات عامة هيكون على الاقل بالنسبة للخبرات الحياتية اللي اكتسبتها من الفترة ديه و بردو لسبب كمان و هوا يبئى اسمنا حاصلين على مؤهلات عليا لكن بسبب سوء الحالة التعليمية في بلدنا فاصبح كل الخريجين بيتميزوا بشيء واحد و ان هما من المؤهلات العليا ( لكن المؤهلات ديه هتؤهله لأيه الله اعلم ) .. اللي اقصده هنا ان اصبح كل الخرييجين متساويين مع بعضهم و مفيش فرق بين كل واحد بيحمل شهادة ايه المهم ان هوا بيحمل شهادة وخلاص بغض النظر عن مجال دراسته كان ايه اصلا و ديه في حد ذاتها مشكلة لان اصحاب المؤهلات اللي يمكن متكونش متعلقة اصلا بعملاً ما من قريب او بعيد هيشغلوا اماكن الناس الحاصلين اصلا على الشهادة اللي ليها الاحقية في انها تشتغل في المكان ده ( كلام مكلكع مش كدا ؟ ) اللي اقصده ان في حاله منيله بنيله من الشتات الي بيمر بيها الشباب تبتدي من اول يوم دخلوا في الكلية بيحلموا بشهادة هتمكنهم بعد كدا ان هما يشغلوا اماكن معينة و بعد انقضاء اربع سنين ( او خمسة او سبعة ) من الضغوط النفسية و حرقة الدم و الاعصاب يلاقي اصبح بيحمل شهادة ليست لها قيمة الا اذا هوا عملها قيمة بأن هوا يدعمها بالكورسات المختلفة و المعرفة اللي لازم يحصلها من مصادر خارجية اللي هتمكنه من ان هوا يوصل لاماكن الشهادة وحدها ليست كفيلة بانها توصله ليها ( يعني عايز ايه من الاخر ؟ ) .. من الاخر عايز اقول ان في الفترة الاخيرة ديه احتكيت كتير ببعض مساعي الشباب و اللي انا واحد منهم في السعي وراء عمل لا ينسف ( او يُدمر علشان حبايبنا البعدا ) اربع سنين او اكتر من الدراسة ( اللي يمكن هوا مكنش عايزها اصلا ) و يجد عمل اقل بكثير من ان هوا يدفن فيه نفسه بعد دراسة الفترة ديه كلها و اذا وجدوا العمل ده هيلاقوا ان العائد المادي اصلا ممكن ميكفيش حتى الموصلات و ده اللي هيدفعه ان هوا يسعى ورا عمل يمكن يرضيه من الجانب المادي الا انه لا يساوي بالمرة قدراته و مؤهلاته الحقيقة .. الا ان طبعا ده مش حالة عامة لاني في فعلا فرص جميلة جدا تطلب مؤهل الشخص ده و العائد المادي كويس جدا لكن للاسف الفرص ديه قليلة جدا و طبعا لا تكفي لاعداد الخريجيين المهولة

طيب ليه ؟؟

عايز اعرف اي ذنب اقترفهوه الشباب دول بانهم يستحقوا بأن تهان كرامتهم باعمال لا تليق ابدا بدراستهم و خصوصا لما تكون الدراسات ديه دراسات مهمة لكن للاسف ملهاش عمل او بمعنى اصح التخصص ده لا يلاقي الاهتمام الكافي من الجهات المسؤلة ( و مش شرط تكون الجهات ديه حكومة ) ؟؟

الا اني الحقيقة عارف ايه هوا الذنب اللي اقترفوه و اللي يمكن هما ملهمش ذنب فيه الذنب ده انهم في دولة زي دولتنا المبجلة اللي اسمها جمهورية مصر العربية اللي القائمين على حكمها يكاد لا يعنيهم الشيء ده اللي اسمه كرامة المواطن المصري بالرغم من ادعائهم عكس كدا .. و اهدار كرامة المواطن مش محتاجة كلام لان اكيد كلنا بنمر بيها و عارفينها كويس و مفيش بني ادم عايش في مصر مبيعانيش من كدا .. يلا ما علينا

على فكرة مش ده الموضوع اللي انا كنت عايز اتكلم فيه اصلا انا كنت عايز اتكلم في موضوع تاني خالص لكن تقدروا تقولوا ان استرسلت زيادة عن اللزوم في المقدمة فنخلي الموضوع التاني للبوست الجاي و اللي هيكون عنوانه ( اذا بليتم فاستتروا ) .. يلا اشوفكم على خير و اتمنى للجميع حياة طيبة و كريمة و بالتوفيق للناس كلهم و على رأسهم الشباب اللي كل يوم همومهم بتزيد عن اليوم اللي قبله

تحياتي للجميع

سلام

Wednesday, January 02, 2008

بطاقه تموين

رساله رايحه .....
ورساله جايه ...
والقلب طاير ...
والدنيا حلوه ...
والهو طير ..
كل الستاير ..
قالتلى صورتك جميله
قولتليها كان عيد ميلادى
والدنيا برد أواخر يناير
والاموره دى حضرتك
قالتلى دى اول مره
اسيب شعرى كده
من غير ضفاير
إنت باين عليك ابن حلال
قولتيلها اوى والله
وخجول جدا
لا قهوه ولا شاى
ولا سجاير
خريج علوم قسم كيميا
وبشتغل ف التنسيق الحضارى
وعندى وصله دش ونت
شركه مع كل العماير
قالتلى أنا زراعه
قسم حشرات
وموظفه ف الشهر العقارى
طول النهار أختم توكيلات
معظمها للبيع وللمحامى
مصر كلها ف المحاكم
ومفيش ضماير
قلتلها عامله إيه
مع الزحمه والناس
قالتلى باخد توك توك
واكمل بميكروباص
وكل ما ارسم قمر
يطلع يا دوب
شويه دواير
إحنا خمسه إخوات
ولد على خمس بنات
أمى عايشة
وابويا مات
والموت علينا حق
وده كاس وداير
قلتلها يعنى يتيمه زى
أنا أبويا وأمى ماتوا
وسابوا الستر
وبطاقة تموين
ونص فدان مانجا
من تلاتين سنه
لسه بشاير
قالتلى مش عارفة ليه
ارتحتلك وفتحتلك قلبى
قولتلها وأنا كمان
ولسه هـــا قولها أنا حبيتك .....
النت فصل يا معلم
ولاقيتنى أنا وروحى
وبطاقه التموين
وشويه زراير