محكمة

و انا قاعد لا بيا و لا عليا لقيت مُحضر جالي و بيقولي انت مطلوب للشهادة في قضية مهمة و اللي طلبوك للشهادة مها و سارة المهم انا طبعا قلقت لان محدش طلبني للشهادة قبل كده لكن اللي حصل حصل المهم رحت المحكمة و بعد ما نادوا اسمي دخلت علشان اشهد و اقسمت اليمين كمان "و الله العظيم اقول الحق"..المهم لقيت القاضي راح خبطني اول سؤال

اسم مدونتك ايه يا ابني؟؟

ايوه يا فندم اسمها انا افكر اذن انا مجنون

ايه ده يا ابني ايه الاسم المتخلف ده..اخترته ليه او تقصد بيه ايه ؟؟

و الله انا اخترته على اساس ان كل اللي بيحاول يفكر دلوقتي علشان يفهم اي حاجه مصيره الجنون و خصوصا في الدنيا اللي احنا عايشينها ديه و لا سيادتك مسمعتش الاغنية بتاعة باين اللي اسمه محمود العسيلي و هو بيقول ماجنونة..ماجنونة..ماج..ماج..ماجنونة..غير كده سيادتك لما تيجي تكلم اي حد في اي حاجة ممكن تكون غريبة شوية فممكن يفتكرك مجنون فانا قلت اوفر عليهم السكة ديه و اعترف احسن بس هو ده السبب

شكلك كده لمض..المهم فكرت تقفل المدونة ديه و ليه ؟؟

اه بصراحة..علشان نفس السبب اللي انا عملت المدونة علشانه مكنتش فاكر ان في ناس مجانين أقصد يعني بيفكروا في حاجات كتير غريبة و عايزين يفهموها لكن لما دخلت مجتمع المدونيين لقيت في ناس على نفس الشاكله كتير و بصراحة كمان حاسس ان انا مبعرفش اكتب كويس او مبعرفش اصيغ الموضوع اللي عايز اتكلم فيه بشكل كويس يعني افضل ارتب الموضوع في دماغي و لما احط ايدي على الكيبورد انسى كل اللي كنت عايز اكتبه..بس ديه الاسباب و بحاول اتخطاها

ماشي يا عم..تقولنا بئى صورتك في المدونة رمزيتها ايه يعني ؟؟

و الله انا اول ما شوفت الصورة ديه اعجبت بيها جدا جدا اولاً انا شخص بعشق البساطة جدا جدا و لو شوفت الصورة هتلاقيها عبارة عن شخص مرسوم ببساطة جدا عبارة عن مجموعة بسيطة من الخطوط اللي كونت شكله..ملوش ايدين..راسه فيها شعرة واحدة..اظن مفيش ابسط من كده..لكن الجمال الحقيقي في الفعل اللي بيقوم بيه و هو بيمشي و بيمشي و مبيقفش ابدا و طبعا للي ميعرفنيش انا من عشاق المشي بدرجة لا تتخيلوها خلاصي في المشي لو مضايق بمشي لو زعلان بمشي لو حتى فرحان بمشي لو عايز افكر في حاجة مهمة بردو بمشي و بكون سرحان لدرجة ان انا ممكن ماشوفش حد من اصحابي لو قابلني بالصدفة ممكن غير كده او كده بمشي مسافات كبير جدا...علشان كده الصورة ديه تضم اكتر حاجتين بحبهم..البساطة و المشي..فانا معجب بالصورة ديه جداً

اه هو انت منهم طيب..ايه طبيعة كتابتك في المدونة ديه يعني كتابة عامة ولا في السياسة ولا قصص و لا كلام فاضي ولا ايه النظام ؟؟

و الله سيادتك تقدر تقول كده مليش حاجة معينة اكتب فيها او بمعنى اصح باكتب في اي حاجة و في كل حاجة طالما انا قادر على الكتابة فيها يعني هاكتب عن الحاجات اللي بتضايقني في اي حاجة و الله سواء سياسة في المجتمع في اي عفريت ازرق..ممكن كمان العلوم ..لكن فيه عقبة لغاية دلوقتي مقدرتش اتخاطاها بأن انا اكتب عن تجارب شخصية او حاجات من اللي بتحيرني داخليا لكن مش مستعد اني اشارك بيها في الوقت الحالي

طيب انت بدون ليه اصلا ؟؟

في نفسي: القاضي ده باين عليه شكله رخم و اسئلته كتير مش هنخلص بئى ولا ايه..انا بدون اصلا يا فندم بسبب مجتمع المدونين لما كنت بتصفح في البداية المدونات من قبل ما يكون عندي مدونة اصلا فلقيت في ناس دماغها عالية اوي اوي من ناحية تفكيرهم و فرصة ان انا اتعلم منهم و من خبرتهم في الحياة و لقيت بردو ناس دمهم خفيف اوي اوي لدرجة تخليني ممكن اقعد ربع ساعة اضحك على اسلوبهم الجميل و مواقفهم اللذيذة و لقيت ناس اللي بيتبنوا رسالة مهمة و بيناضلوا علشانها فقلت ليه مكونش فرد من المجتمع ده افيد و استفيد نتناقش في افكارنا و مشاكلنا لغاية منلاقي حل..و هكذا

ايه احلى جملة قيلت في وصف مدونتك ؟؟

صدقني حضرتك لو قلتلك مش فاكر حتى لو فاكر مش هقولك بردو لان انا من النوع اللي اذا حد مدحني مركزش اوي علشان يمكن مبصدقش ان الشخص ده بيتكلم جد يمكن بيجاملني بس او بينافقني بمعنى اصح..يمكن انا شايف اني ممكن مكنش جيد للدرجة اللي تخلي الشخص ده يقول اللي قاله ده و بصراحة ديه بتمثل مشكلة ليه

انت باين عليك معقد..طيب يا سيدي تعليقات الناس بتمثلك ايه ؟؟

تعليقات الناس..ديه اهم حاجة لان سبق و قلت لي سيادك اني كنت عايز اكون فرد من مجتمع المدونين دول و التفاعل اللي بينهم هو اجمل حاجة في المدونات هما اللي هيناقشوك في مشاكلك و المشاكل اللي حواليك و ينصحوك و يواسوك لو في مكروه و يفرحولك لو فيه مناسبة سعيدة..تعليقات المدونين هي الحاجة اللي يمكن متلاقيهاش في المجتمع الحقيقي و هي النقاش و الحوار مع ناس بتفهم

طيب ايه هو احلى بوست كتبته ؟؟

و الله طيب انا هاحدد احلى بوست كتبته ازاي بالنسبة لي كلهم حلوين..مش انا اللي احدد حاجة زي ديه الناس اللي هتقرأ الموضوع هما اللي بيحددوا مدى اهميته و جماله من خلال ردودهم

طيب يا شريف ايه احلى مدونة قريتها ؟؟

ياه كتير وشويه شويه باحطهم في خانة لينكات مهمة لكن اللي في الخانة ديه مش كل المدونات اللي بزورها يعني لو جيت شوفت المفضلة عندي في الاكسبلورر هتلاقي مدونات كتير كتير دول حتى معرفش عددهم و هحاول بقدر الامكان احطهم كلهم في لينكات تهمني و مش عايز اذكر بعض المدونات لانسى حد

يعني بتهرب..اوكي طيب ايه هو افضل بوست او موضوع قرأته ؟؟

في نفسي: انا قلت من الاول انه رخم مش مصدقني امري الى الله..و الله سيادتك مواضيع كتير كتير بس ممكن اكون قريت موضوع كويس في مدونة و اخرج و انسى اسم المدونة ديه كان ايه علشان ارجعلها تاني..بتحصل كتير..بس صدقني مش هقدر احصرلك كل المواضيع الجميلة اللي قريتها بسبب عددها الكبير

طيب لو حد قل ادبه في التعليق ؟؟

و الله هو لحد دلوقتي محصلتش لكن لو حد عمل كده يبئى بني ادم واطي و اعرف ارد عليه كويس لان قله ادبه تنم عن جهل منه سواء على الموضوع او عن اداب الحوار اصلا..يعني عندي مبدأ "ناقشني..يا تقنعني يا اقنعك" بس بأسلوب حضاري مش همجي

السؤال ده الاجابة فيه اجبارية يعني هتجاوب هتجاوب..ايه هي اسوأ مدونة و ممكن تقول كذا اسم ؟؟

سيادة القاضي انا اعترض على الاجابة على السؤال ده لان الجلسة مش سرية لما تبئى الجلسة سرية ممكن اجاوبك على سؤالك..لكن اقدر اقولك ان اسوأ مدونة هتكون الي صحابها من المأنتخين في الحياة او اللي بيكتبوا كلام فاضي مضيعش وقتي في قرايته

زهقتني يابني..طيب اسوأ بوست او موضوع و اسوأ مدون ؟؟

في نفسي:ده مصمم بئى..المدون اللي فاكر ان رأيه بس هو اللي صح و بيجادل في الخطأ و مش هريحك وقولك على اسامي

انت تعبتني يابني و من الاخر اجابتك متكفيش لحل القضية ديه لازم تستدعي شركائك في الجريمة..اقصد في التدوين لازم يشهدوا هما كمان يمكن نوصل لحل..تستدعي مين قول بسرعة..لخص..انجز ؟؟

اللي هستدعيهم سيادتك هما

My Ego Today

Feelings

عاشقة الوطن

أنا أفكر اذن أنا موجود

رفعت الجلسة

ملحوظة :اسف لتأخيري في الرد على التاج لان بصراحة اخويا كان محتكر الكمبيوتر و كمان النت كان مقطوع عندي اليومين اللي فاتوا دول يعني كانت عيشة ضنك

انا و القمم العربية

ايه ده احنا في اخر شهر مارس..اه فعلا والله احنا في اخره…اخر شهر مارس بيبقى في تلت حاجات مهمة في اخر الشهر ده..عيد ميلاد واحد صاحبي و عيد الام و القمة العربية

و بما اني مبحبش اصلا اعياد الميلاد و كمان بما ان عيد الام او الام نفسها مش محتاجة يوم واحد علشان نفتكرها فيه…فقلت انتهز فرصة القمة العربية و احكيلكوا حكايتي مع القمم العربية

لما بدأت اوعى على الدنيا في السن بتاع 15 سنة و بدأت اشوف اللي بيحصل في الدنيا و اهتم بيها و مشاكلها و كأي عربي فتحت عيني على اللي كان بيحصل في فلسطين و اللي اسرائيل عملاه فينا و بدأت حياتي على الخراب و التدمير و القتل اللي اسرائيل بتقوم بيه ضد الفلسطينيين فكان سؤال منطقي جدا مني ان انا اسأل طيب احنا ليه مبانساعدش الناس ديه و نحميهم من اسرائيل؟؟ و طبعا كان وقتها كان عندي امل كبير في بلادنا العربية لغاية ما حصلت الانتفاضة اللي كانت تقريبا بتاعة سنة 2000 و بعد ازدياد القمع الاسرائيلي ضد الفلسطينيين و كان قرب معاد قمة عربية تقريبا المهم قلت ايوه كده الزعماء العرب هيجتمعوا و لما يجتمعوا اكيد هيعملوا حاجة كبيرة علشان توقف الناس دول عند حدهم و انعقدت القمة و كنت بتابعها و مستني بقى النصر و في الاخر يطلعوا يقولوا نحن بنشجب و ندين الاعتداءات الاسرائيلية و بندعو الاطراف الى مائدة الحوار...قلت ماشي يمكن هما فاهمين اكتر مننا مش مشكلة..لكن تمر الايام و الشهور و تكتر المشاكل لحد موصلنا للمشكلة اللي كانت حصلت في مخيم جنين تقريبا لم اسرائيل دغدغت البلد و موتت اهلها و مبقاش فيها حتة سليمة...قلت اكيد احنا المرة ديه مش هنسكت لازم هيكون رد فعلنا قوي لكن يبدو ان نغمة الشجب و التنديد عجبانا اوي و انتهت القمة ذي اللي قبليها..قلت ماشي مسيرنا نثور و نعترض على الظلم لغاية موصلنا لحرب العراق و قبل الحرب بشويه عقدوا قمة طارئة تقريبا و قلت لا المرة ديه مش هنسمحلهم دي حرب بجد مش اي كلام يعني هيكون لينا وقفة و تنتهي القمة زي اللي قبليها و اللي قبليها بمجرد تحذيرات و شجب و مش كده وبس ده بعض الدول كانت تؤيد الحرب و سمحت لامريكا انها تستخدم ارضها علشان تتدخل العراق و انتوا طبعا عارفين انا اقصد مين..ساعتها بئى ادركت الفاجعة و فقدت الامل في اللي بيقولوا عليهم حكامنا وقلت "مفيش فايدة" و بقيت حتى استخسر الدقايق اللي بضيعها في قراية اخبار القمة

و تتوالى الانتكاسات في القمم التي تليها من رؤساء مبيحضروش القمة اصلا و مش اي رؤساء دول رؤساء لدول كبيرة لخناقات وشتايم لبعض و بهدلة و رؤساء تنسحب من القمة لمزيد من الصلف الاسرائيلي امتد لغاية الحرب الاخيرة على لبنان و كالمعتاد لم يحرك حاكم منهم ساكن و اختلفوا في رؤيتهم للموقف كالمعتاد و ادركت فعلا كلمة كنت سمعتها و هي ان "يبدو ان العرب اتفقوا على ان لا يتفقوا"..بصراحة في البداية كان عندي امل كبير في حكامنا لكن بعد ما شوفت المهازل ديه فقدت الامل فيهم لكن مازال فيه جزء مني بيقولي لسه الامل موجود يمكن لما يحكمنا ناس غير دول...اتمنى انه ييجي اليوم اللي اتفرج فيه على قمة عربية يتحقق بها كل احلامنا و يكون لينا كلمة مسموعة و يعملنا العالم الف حساب...تفتكروا هييجي اليوم ده

اتمنى اني مكنتش طولت عليكوا لكن ديه ببساطة حكايتي مع القمم العربية

أنـا الـبحرُ فـي أحشائِهِ الدرُّ كَامِنٌ

انا عارف ان في ناس كتير اتكلمت عن الموضوع ده وهو موضوع العربي كلغة وعدم اهتمامنا بيها ان اد ايه اللغة العربية لغة جميلة جدا بس احنا للأسف اهملناها و مبنميهاش لدرجة ان احنا مبقيناش نعرف حتى نكتب عربي...يمكن تستغربوا ازاي مبيقناش نعرف نكتب عربي لكن ديه الحقيقة وادي الدليل

و احنا ماشيين بالصدفة انا و اصحابي لقينا في محلات في عمارة بيعرضوها للإيجار هتقلولي طيب ايه المشكلة في كده هقلوكم مفيش مشكلة هما احرار لكان المشكلة لما كتبوا كلمة للإيجار على المحلات كتبوها بطريقة لذيذة جدا..و انا بصراحة اصريت ان احنا نصورها علشان اعرضها و نشوف العار :

و ديه الصورة

شفتوا العار..هما طبعا كانوا عايزين يكتبوا كلمة للإيجار لكن كتبوها بالطريقة ديه (للائجار)...الحركة ديه بصراحة هي اللي استفزتني و خلتني اكتب الموضوع ده

زي ما قلت المشكلة ان احنا اهملنا اللغة يعني مثلا في عالم النت حاجة بتضايقني جدا جدا تلاقي بعض الناس لما تيجي تكتب موضوع او تعليق يكتبوا بالطريقة اللي هي كلام عربي و الحروف نفسها انجليزي مش عارف ليه بصراحة لما اجي اقرأ مثلا حاجة زي ديه بكون عامل زي الطفل اللي لسه بيتعلم قرايه جديد بتبقى حاجة تخنق بصراحة ما هوا حاجة من الاتنين يا اما تكتبوا عربي و بحروف عربي ياما تكتب انجليزي كامل بحروف انجليزي انت كده بتفقد اللغة العربية حروفها و بتستخدم حروف تانية بتحل محلها...يمكن ترد عليا و تقول "و الله احنا بنعمل كده علشان اسرع و حاجة كده في الانجاز" هقولك والله المسألة مسألة مبدأ و ان احنا المفروض مانبهدلش اللغة بالمنظر ده الا بقى سيادك مش فارقة معاك و في الحالة دي هقولك متنساش ان اللغة انتماء و حفاظك عليها يعني حفاظك على هويتك مش كده ولا ايه...و حاجة كمان بتنرفزني جدا وهي انك تلاقي بعض الناس في اثناء حديثها العادي تلاقي كلامهم مليان مصطلحات انجليزي طبعا لزوم المنظرة و ان هو استايل و بتاع مع اني عارف ان في ناس بسبب دراستهم مثلا الالفاظ ديه بتدخل في كلامهم غصب عنهم بسبب استخدامهم الدائم للغة ديه فا بيبقى صعب عليهم انهم يفصلوا اللغات عن بعضيها لكن زي ما سبق و قلت بتبقى في الغالب لزوم الرسم و من امثال كده في التلفزيون و البرامج بالهبل و بصراحة بتبقى حاجة رخمة

على فكرة للي مش مدرك اد ايه احنا لغتنا جميلة و تستاهل الحفاظ عليها انصحه بانه يرجع للشعر و النثر او الادب عموما و خصوصا القديم منه..و لزوم الموضوع بردو فانا هضرب عصفورتين بحجر واحد و هاذكر قصيدة لشاعر النيل حافظ ابراهيم و كان اسمها تقريبا "اللغة العربية تنادي أهلها" و هو بيتحدث على لسان اللغة العربية و هي بتبكي امجادها و على الناس اللي ضيعوها..و يا سبحان الله يشاء القدر ان القصيدة ديه تضم بين ابياتها بيت اصبح للأسف مضغة في افواه اللي يسوى واللي ميسواش بعد ان صدر عن من يطلقوا على انفسهم مطربين وهما للأسف ولا حاجة اسيبكو مع القصيدة و انتوا هتعرفوا قصدي :

رَجَـعْتُ لـنفسي فـاتَّهَمْتُ حَـصَاتي ـــــ ونـاديتُ قَـوْمي فـاحْتَسَبْتُ حَـيَاتي

رَمَـوْني بـعُقْمٍ فـي الشَّبَابِ وليتني ـــــ عَـقُمْتُ فـلم أَجْـزَعْ لـقَوْلِ عُدَاتي

وَلَـدْتُ ولـمّا لـم أَجِـدْ لـعَرَائسي ـــــ رِجَــالاً وَأَكْـفَـاءً وَأَدْتُ بَـنَـاتي

وَسِـعْتُ كِـتَابَ الله لَـفْظَاً وغَـايَةً ـــــ وَمَـا ضِـقْتُ عَـنْ آيٍ بـهِ وَعِظِاتِ

فـكيفَ أَضِـيقُ اليومَ عَنْ وَصْفِ آلَةٍ ـــــ وتـنـسيقِ أَسْـمَـاءٍ لـمُخْتَرَعَاتِ

أنـا الـبحرُ فـي أحشائِهِ الدرُّ كَامِنٌ ـــــ فَـهَلْ سَـأَلُوا الغَوَّاصَ عَنْ صَدَفَاتي

فـيا وَيْـحَكُمْ أَبْـلَى وَتَبْلَى مَحَاسِني ـــــ وَمِـنْكُم وَإِنْ عَـزَّ الـدَّوَاءُ أُسَـاتي

فــلا تَـكِـلُوني لـلزَّمَانِ فـإنَّني ـــــ أَخَــافُ عَـلَيْكُمْ أنْ تَـحِينَ وَفَـاتي

أَرَى لـرِجَالِ الـغَرْبِ عِـزَّاً وَمِـنْعَةً ـــــ وَكَــمْ عَــزَّ أَقْـوَامٌ بـعِزِّ لُـغَاتِ

أَتَــوا أَهْـلَهُمْ بـالمُعْجزَاتِ تَـفَنُّنَاً ـــــ فَـيَـا لَـيْـتَكُمْ تَـأْتُونَ بـالكَلِمَاتِ

أَيُـطْرِبُكُمْ مِـنْ جَـانِبِ الغَرْبِ نَاعِبٌ ـــــ يُـنَادِي بـوَأْدِي فـي رَبـيعِ حَـيَاتي

وَلَـوْ تَـزْجُرُونَ الـطَّيْرَ يَوْمَاً عَلِمْتُمُ ـــــ بـمَا تَـحْتَهُ مِـنْ عَـثْرَةٍ وَشَـتَاتِ

سَـقَى اللهُ فـي بَطْنِ الجَزِيرَةِ أَعْظُمَاً ـــــ يَـعِـزُّ عَـلَـيْهَا أَنْ تَـلِينَ قَـنَاتي

حَـفِظْنَ وَدَادِي فـي الـبلَى وَحَفِظْتُهُ ـــــ لَـهُـنَّ بـقَـلْبٍ دَائِــمِ الـحَسَرَاتِ

وَفَاخَرْتُ أَهْلَ الغَرْبِ ، وَالشَّرْقُ مُطْرِقٌ ـــــ حَـيَـاءً بـتلكَ الأَعْـظُمِ الـنَّخِرَاتِ

أَرَى كُــلَّ يَـوْمٍ بـالجَرَائِدِ مَـزْلَقَاً ـــــ مِــنَ الـقَبْرِ يُـدْنيني بـغَيْرِ أَنَـاةِ

وَأَسْـمَعُ لـلكُتّابِ فـي مِصْرَ ضَجَّةً ـــــ فَـأَعْـلَمُ أنَّ الـصَّـائِحِينَ نُـعَــاتي

أَيَـهْجُرُني قَـوْمي عَـفَا اللهُ عَـنْهُمُ ـــــ إِلَــى لُـغَـةٍ لـم تَـتَّصِلْ بــرُوَاةِ

سَـرَتْ لُوثَةُ الإفْرَنْجِ فِيهَا كَمَا سَرَى ـــــ لُـعَابُ الأَفَـاعِي فـي مَـسِيلِ فـُرَاتِ

فَـجَاءَتْ كَـثَوْبٍ ضَـمَّ سَبْعِينَ رُقْعَةً ـــــ مُـشَـكَّـلَةَ الأَلْــوَانِ مُـخْــتَلِفَاتِ

إِلَـى مَـعْشَرِ الـكُتّابِ وَالجَمْعُ حَافِلٌ ـــــ بَـسَطْتُ رَجَـائي بَـعْدَ بَسْطِ شَكَاتي

فـإمَّا حَـيَاةٌ تَـبْعَثُ المَيْتَ في البلَى ـــــ وَتُـنْبتُ فـي تِـلْكَ الـرُّمُوسِ رُفَاتي

وَإِمَّــا مَـمَـاتٌ لا قِـيَامَةَ بَـعْدَهُ ـــــ مَـمَاتٌ لَـعَمْرِي لَـمْ يُـقَسْ بمَمَاتِ

اتمنى تكون القصيدة عجبتكوا

سلام