Monday, September 10, 2007

قول للزامان إرجع يا the man

مفيش داعى كل شويه اعتذر على تاخيرى,بس والله غصب عنى

وان قاعد اتفرج على الست وهى ب تعصر منديلها الشهير" عايزنا نرجع زى زمان قو للزمان ارجع يا زمان" طبعا كلنا سمعنا الجمله دى كتير وحفظنها كمان ,لكن المره دى وانا بسمعها وقلت ف بالى هيا تقصد ايه تقصد :الزمان اللى هو الوقت والايام والسنين,ولا تقصد the man لو حبينا ننطقها بالانجليزى يعنى تقصد تقول (لو عايزنا نرجع زى زمان خلى الرجل بتاع زمان يرجع تانى)

طب لو فكرنا مين الراجل ده؟ وايه اساسا كان زمان؟وليه نرجع, ليه؟ يعنى هو كان احسن من دلوقتى؟!

تعالوا نرجع بالذاكره شويه هتلاقى إن زمان كان احسن ف كل حاجه-مش كلها اوى يعنى- المجمل بس يعنى مش هقولك: أن جوز الحمام كان 3 فرد , والفرخه ب 4رجول ,والكفته ب تتباع بالمتر , واقولك دلوقتى الحمام بقى رمز بس, والفراخ عندها انفلونزه و بتكح , والكفته اتلغت من اللحمه ولا الشاورمه ذلك الاختراع الافرنجى تبص تلاقى الراجل بيقطع فيها كإنه بيقطع فى لحم إبن اخته,وناقص يعيط لا طبعا عمرى ما هقولك كده.بس فعلا تلاقى كل حاجه موجوده ولها سعر ثابت ,مش زى دلوقتى اى حاجه بتتباع باى سعر والنهارده بسعر و بكره بسعر تانى وانت وشطارتك ,دا غير انها كانت طبيعيه مش دلوقتى كلها مضروبه كيميا ومسرطنه وحالتها زى الفل.

أضيف ل كده إن اللى كان موجود ف مصر مصرى و "صنع فى مصر" دلوقتى لا عاد مصرى ولا صنع فى مصر بقى كله "صينى" ما فضلش غير ال بنى آدمين . بس الشعب يستاهل ضرب الصرم علشان احنا بقينا بشوات صحيح نتعب نفسنا ليه ونشتغل ليه ,دا الناس بياجوا من آخر بلاد المسلمين والكفار لحد عندك ف بيتك ويجيبلك اللى انت عاوزه .

زمان برضه كنت تشوف الناس فى الشوارع ماشيه نضيفه كده وتحس ان كل واحد مستحمى قبل ما ينزل وملمع الجزمه ولابس نضيف..... إنما دلوقتى تلاقى الناس ماشيه ف الشارع ضاربه شعرها ف الاتجاهات الاربعه واللى مكهرب شعره واللى مزحلقه ,ولابسين لبس مقطع و تسألهم يقولك روشنه عادى خليك كول مى باك.

زمان لغوا الدعاره لكن دلوقتى بقيت علنى بس بأسماء منقحه شويه,زمان كان فيه "إشتراكيه"يعنى كانوا بيقولوا تاخد من الغنى تدى الفقير ...... دلوقتى "سبيليه" يعنى إفقر الفقير لحد ما تغنى الغنى و أهو سبيل اللى عاوز ياخد منه ياخد ............................................................؟؟؟؟؟؟؟؟؟؟؟؟؟؟؟؟؟

ويبقى سؤال مهم يا ترى بعد ده كله لو رجع ال"The man" هنرجه تانى زى زمان؟

12 comments:

sa'7so'7te said...

يااااااااااااااااه
بقالى زمن بفتح البلوج و الاقى كلمة" للارهاب..."

بس الموضوع لذيذ اوى
و هى نظرية تحترم
:)

Shreef said...

يخرب عقلك يا علي ضحكتني و الله و حشتنا مواضيعك ديه بس انت عارف ايه مشكلته ان الواحد لو جه يتكلم عن كل نقطة هنقعد نتكلم من هنا لبكره بس بجد تحفه..المهم دماغ اوي البوست ده و حلوة الفكرة بس تفتكر ان زمان لو رجع هيبئى حلو زي زمان اذا كانت بتتكلم على شيء ثابت المفروض ان ميكنش يفرق كتير زمان من دلوقتي فهو الاخلاق لان ده مش بيتغيرش مع متغيرات الزمن لكن اي حاجة تانيه اكيد لازم هتتغير لان زي مبيقولوا بقاء الحال من المحال يعني لما ييجي حد يسئلني زمان احسن ولا دلوقتي هقلوا دلوقتي طبعا بس في حاجات معينة و زمان في حاجات تانيه طبعا مش في ان جوز الحمام تلاته فرد و الحوارت اللذيذة ديه لكن زمان يمكن كانت لسه الاخلاق بخيرها و الناس بتراعي ضميرها في كل حاجة طبعا مش كل الناس بس كانت الاغلبية اما دلوقتي مع الايقاع السريع للحياة و المتغيرات الكتير اللي مرينا بيها كانت سبب في فساد اخلاق الناس علشان كدا اخلاق الناس هي الحاجة اللي عايزنها من الراجل اقد من زمان اما دلوقتي فانا شايف ان احنا اصبحنا متطورين في كافة مجالات حياتنا و في الحاجات اللي ممكن نستخدمها علشان تكون حياتنا احسن لكن المشكلة فينا مش في الحداثة و خليني اضرب مثال اللي انت قلته عن الاكل ان الاول كان كويس و دلوقتي مسرطن و كل كيماوي بسبب التقدم و صلنا ان ممكن نكافح مثا امراض كانت موجودة زمان اللي في وقتها مكنتش عندهم الامكانية انهم يكافحوا المرض ده لكن بالرغم من التطور مقولتلكش تستخدم الجانب السيء مين الكيماوي ده في انك تكبر الزرع مثلا و ده يخليه مسرطن و يضلر الناس يعني من الحداثة الكويس و الاحسن من زمان لكن المشكلة في الاستخدام الامثل للحاجات ديه..انا مخرجتش عن الموضوع لكن اللي اقصده بالمثال ده ان مش شرط التقدم شر، الشر فينا احنا لكن مش في التقدم..ديه الفكرة اللي عايز اوصلها..فهمت قصدي؟؟..حلوة نازلين مستحمين ديه و مكهرب شعره انا مش عايز اتوغل يا علي بس بصراحة انت فاهم لو سيبتني اتكلم هفصص البوست ده ميت حته و نتكلم فيه للصبح..عموما متتأخرش عننا تاني بمواضيك الجميلة ديه..سلام

Shreef said...

اه و كنت عايز ارد على زوزو او سارة ان و الله بس الفترة ديه كنا مشغولين جدا و بصراحة يعني كان الوقت بيبئى اضيق من اني ارد او انزل بوست جديد..يلا سلام

أمــانــى said...

كل رمضان وحضرتك بخير وربنا يكرمك ويوفقك يااااارب آمـــــــين
ويبغلك رمضان ياااارب آمـــــين

عاشقة الوطن said...

السلام عليكم

ازيك ياشريف

هو الزمان ولا the man
تصدق الواحد مبقاش عارف ليه الناس بقيت كده واتغيرت كلى وجزئي عن زمان
طيب الشكل يتغير ماشي
بس الاخلاق والناس تتغير ليه بس
زمان ياريت نبقي زى زمان وربنا معانا

كل سنة وانت طيب ياشريف ورمضان كريم

Music Gates said...

بص يا معلم خدها كلمه من كوبا علشان تكسب الزمان الي فات كان حلو علشان مكنش في فساد ولما كان بيجي فساد كانت الناس بتصدوا و تقدر تصدوا لاكن لما الفساد بقي ضغوطوا اقوي و معاه اسلحة اكتر علشان ففسد الزمان بتاع دلوقتي فبقينا مش حلوين دي كل الليله

وغير كدا كل سنه وانت طيب رمضان كريم
انت مبتجيش ليه مش تبقي تيجي

يا مراكبي said...

هو عموما ورد عن السلف إن كل زمان بيكون أسوأ من اللي قبله

وكل عصر تلاقي الناس اللي فيه بيقولوا إن ما فيش أسوأ من كده .. لكن دايما بيطلع الأسوأ

دي بقى سنة الحياة لحد يوم القيامة

كل سنة وإنت طيب

ali weeeka said...

Shreef
والله منور الموضوع يا عبقرى ,تعرف انا مش عايز الزمان يرجع لان اكيد فى مميزات ف الزمن اللى احنا فيه احسن من زمان بس احنا المفروض نتعلم من اللى فات يعنى نشوف الناس كانمت بتحكم ضمائرها ف ايه؟ كانت ايه القيم اللى ف حياتهم؟ والعادات اللى نشأو عليها؟ احنا فين من الناس دى ؟؟؟ الموضوع طويل ومحتاج قعده بس لما اشوفك يا عبقرى كل رمضان وانت بخير

يا مراكبي

كل رمضان وانت طيب,انا معاك ان كل زمن بيكون اسوأ من اللى قبله ده حاجه واقعيه واكيد النهارده السئ أحسن من بكره الاسوأ وده شئ يحزننا بس المفروض الناس تتعلم من النهارده,واللاسف الناس اما مابقيتش عايزه تتعلم ,او مافيهاش دماغ تتعلم يلا ربنا يسترها معنا ومعاك

šσяšαяαα said...

أسأل الله لكم فى شهر رمضان حسنات تتكاثر وذنوب تتناثر وهموم تتطاير وأن يجعل بسمتكم سعادة وصمتكم عبادة وخاتمتكم شهادة ورزقكم فى زيادة..أدعو الله أن يتقبل منا و منكم الصيام و القيام وصالح الأعمال

Shreef said...

أمــانــى

كل سنة و انتي طيبة يا اماني و يا رب يكرمنا كلنا و يفقنا ان شاء الله..شرفتينا بزيارتك يا اماني..سلام

ــــــــــــــــــــــــــــــــــــ

عاشقة الوطن

بالظبط يا رضوى دا اللي بنتكلم عليه الدنيا بتتطور ماشي بس الاخلاق ديه ثوابت ليه تتأثر الا اذا بئى مع التطور الحياة و ان علشان نتواكب معاها و مع ايقاعها السريع ان احنا لازم نتنازل عن بع اخلاقنا و ده طبعا مش صحيح و عمرها متكون معادلة صحيحة..و انتي طيبة يا رضوى و الله اكرم..مع السلامة

ــــــــــــــــــــــــــــــــــ

copa

يااه يا كوبا فينك يا راجل من زمان انت اللي فينك انت مش عارف ايه اللي حصل لمدونتك و انت كمان انقطعت عن التدوين لفترة فا نييجي فين بئى يا عم المهم و حتى لو كان اسلحة الفساد اكتر فعمر ده ما كان مبرر على استمراره..و كل سنة و انت طيب يا كوبا و رمضان كريم...سلام

Shreef said...

ŞoŖśậŖấầ

أمين يا سارة و تقبل الله منا و منكم و كل سنة و انتي طيبة و رمضان كريم..سلام

خليك ف حالك said...

الموضوع لذيذ وشكرا علية جدا بجد يا ROMEO

المهم انا عايزة اسالك سؤال

لية فكرت ان الست تقصد ان الراجل يرجع راجل زى زمان؟

مش ممكن تكون ضربت خناقة مع جوزها وزهقتة لحد ما ساب البيت

ف راحت الست وجابت منديلها اللى بتعصرة ووقفت تقولة ياراجل ارجع وطبعا تقصد يرجع البيت

او تقصد انة مثلا بيعاملها مش حلو ف بتقولة ارجع زى زمان

بصراحة الموضوع كبير وحلة الوحيد نعمل جلسة تحضير ارواح ونحضر روح الست ونسالها هى تقصد اية؟؟؟؟