و انا بمتشى كدا على مواقع الاخبار كالمعاتد لقيت موضوع لذيذ اوي شدني بصراحة و الموضوع دع بتكلم على العلكة ( ايوه اللي هي اللبان مهو اللبان يعني علكة بالفصحى ) المهم ايه حوار بئى اللبان ده بيقولك يا سيدي ان العلماء توصلوا لنوع جديد من اللبان نوع مبيلزقش جامد و سهل تنضيفه و بيدوب في الميه بسرعه علشان لما ييجوا عمال النضافة ينظفوا اللبان اللي لازق على الارض او الرصيف يطلع معاهم بسرعة ( اه اه متستغربش عمال النظافة هناك بينضفوا اللبان اللي لازق على الارض ) المهم ليه بئى الحوار ده بيقولك يا سيدي ان الدول في العالم بتصرف فلوس كتير على تنظيف اللبان من الشوارع بس يعني مثلا بلد كدا في لندن قالت انها بتصرف في حدود 100000 الف جنيه استرليني علشان تنظيف اللبان ده و بلد تانه زي اوكسفورد بتصرف حوالي 45 الف جنيه استرليني على الحوار ده ...طيب دلوقتي انا عايز اسأل سؤالين مهمين جدا جدا جدا
اولا ايه اللي يخلي المدن ديه تصرف الفلوس ديه كلها على تنظيف اللبان ده من على الرصيف ؟
ثانيا ايه اللي يخلى العلماء دول يتعبوا دماغهم علشان يخترعوا اللبان ده ؟ثانيا ايه اللي يخلى العلماء دول يتعبوا دماغهم علشان يخترعوا اللبان ده ؟
طيب اجاوب عن السؤالين دول من وجهة نظري طبعا بالنسبة للسؤال الاول ان ليه المدن ديه تصرف الفلوس ديه على حاجة زي كدا ؟ انتوا عارفين انا لو حكيت الموضوع ده لاي بني ادم من البني ادمين اللي حوالينا يعني ابسط حاجة هيقولي يا عم سيبك دول عالم هايفه شوف بيصرفوا فلوسهم على ايه فا هرد على سيادته و اقوله ايوه يصرفوا فلوسهم على تنظيف اللبان من على الارض اللي ممكن سيادتك تشوف ان حاجة زي ديه متفرقش معاك لان على الارصفة بتاعتنا اصلا ( طبعا بعد ما نحمد ربنا على وجود الارصفة ) ان لزق اللبان حاجة بسيطة لان عندنا بتلاقي على الرصيف حاجات غريبة تلاقيها لازقه على الارض دا حتى ممكن تلاقي بني ادمين او حاجات تانيه كتير و مش عايز اكمل بصراحة علشان مش ناقصة قرف المهم فالبلاد ديه صرفت على كل حاجة و مهتمة بكل حاجة تمس نظافة مدنهم حتى لو كانت على اللبان اللي ممكن يكون لازق على الارض فدول ميبقوش ناس هايفة دول يبئوا بني ادمين محترمين غيورين على نظافة مدنهم حتى لو كانت من مجرد لبان...الا اني طبعا هكون ظالم لينا بالتأكيد اذا حاولت اقارن بينا و بينهم لاننا ابعد ما نكون من حاجة زي كدا لان احنا قدامنا حاجات كتير عايزه تتصلح و تتنضف و منهم الناس طبعا قبل ما نحاول ننضف الارصفة نفسها
اما عن اجابة السؤال التاني ان ليه العلماء دول بيتعبوا نفسهم انهم يدوروا على حل للبان ده و يخترعوا لبان مبيلزقش لان ببساطة سورري يعني ما يتحرق اللبان اللي يخلي ناس زي دول يقضوا مئات الساعات و ينفقوا الالاف و الالاف من الاموال في الابحاث اللي هتمكنهم انهم يوصلوا لحل للمشكلة ديه...اولا لان زي ما دول بيعملوا ابحاث على اللبان علشان يحلوا المشكلة ديه في كتير غيرهم من العلماء بيدرسوا للحاجات اللي ممكن احنا نشوفها اهم من الابحاث على اللبان و اللي بتكون على مختلف نواحي الحياة غير انا اذا احنا شوفنا ان ديه حاجة ملهاش لازمة لأ ليها لان حاجة زي كدا هتحل مشكلة نظافة المدن و هتوفر على بلديات المدن ديه الاموال اللي ممكن تصرفها على تنظيف اللبان و تصرفها على حاجة تانيه ( ممكن يشتروا بيهم لبان من اللي مبيلزقش و يوزعزهم على الفقرا ) و الفلوس ديه على فكرة هي اللي سجعت العلماء دول علشان يدوروا على حل للمشكلة ديه علشان يوفروا على بلادهم الاموال ديه لغاية منجحوا في النهاية للي عايزين يوصلوله
طيب محدش سألني انت ليه بتتكلم عن موضوع زي ده اصلا...طبعا بتكلم في موضوع زي ده علشان اقول الناس ديه مش هايفه الناس ديه علشان حاجة زي كدا بقوا دول متقدمة و الناس ديه طالما شايفة شغلها هيفضلوا في المركز اللي هما فيه و احسن كمان و ابدي اعجابي الشديد بالعقلية اللي الناس دول بيتاعملوا بيها مع كل حاجة حتى لو كانت اللبان و النظافة...و احب في النهاية اقول كمان بعد ما عرفنا مستوانا من مستواهم ياااا حسرة علينا
سلام
10 comments:
فعلا حسره علينا يا حسره علينا
لو نرجع لموضوع الكمال
كلما قربنا من الكمال تجدنا ندقق ونهتم بما لا يراه الغير
الفكرة ان المصائب الكبيره هناك خلصت واحده واحده
وطبيعي جدا نجد اهتمام بأشياء نجدها عندنا ترف
ولكن النظافه اي كانت ليس طرف بل من الايمان
اخي شريف هناك مسلمين بلا اسلام وعندنا كائن متبهدل تعبان خيبان من كتر فشله عمال بيهيس ويقلس ويستغرب وخلاص
شغالين فرجه
الحقيقة ان ده أمر طبيعى
لناس دى سبقتنا فكريا وتكنولوجيا وعمليا بأكتر من مائة سنة
وطبعا بيساعدهم فى ده ميزانية ضخمة
بتتقسم وتتوزع صح
ما بتتسرقش
ما بتتنهبش
تقدر تقول الدولار الصحيح فى المكان الصحيح
على فكرة الحسرة لينا شوية
ممكن تقول قهرة علينا
كل سنة وحضرتك طيب
فيه حاجة إسمعها المنفعة المباشرة اللي ممكن تحسبها زي مشروع تصرف عليه كذا وتبيع بكذا يبقى الفرق بينهم هو اللي كسبته
وفيه حاجات تانية بتبقى المنفعة فيها غير مباشرة .. وعلشان تحس بنفعها لازم تدور على إيه اللي هنستفيده من وراها ونحوله لأرقام ونقدر منها نعرف إستفدنا كام بطريقة غير مباشرة
زي اللبان كده
إحنا اللي تفكيرنا لسه قاصر كتير على الإدلراك العالي ده
الخيط الرفيع
بس الله ما شاء الله تسلميلي و الله دا بالظبط اللي جه في دماغي بس للاسف مكنتش عارف اعبر عنه لان الكلام بيهرب من دماغي بيهرب فين الله اعلم لان بردو و الله جه موشوع الكمال في دماغي لانهم قريبوا يصولوا للتقطة ديه بمعنى ان فعلا المشاكل الكبرية اللي عندهم بيحلوها علطول و بالتالي مبيتبقاش فعلا الا الحاجات الصغيرة ديه اللي ممكن احنا نشوفها انها حاجات تافه للغبي و ترف للي فاهم و طبعا ولا اي ترف بسم الله ما شاء الله الشوارع عندنا تفرح بكل اللي بنشوفه فيها (بهزر طبعا) المهم فالنقطة اللي انا كنت عايز اثيرها من الليلة ديه كلها لاني حاسس ان ممكن الناس تشوف ان ده موضوع متخلف ان الناس ديه مبتعملش الكلام ده كدا تضيع وقت او صرف فلوس وخلاص لأ دول ناس فعلا حلوا كل مشاكلهم و لغاية المشكلة اللي ممكن احنا اصلا منخدش بالنا منها و دا مش هيافه او فراغ و طبعا اذا كانت النظافة فعلا من الايمان فاحنا اولى الناس بالايمان ده الا اني مش هقول حاجة بعد كلمتك ديه فهناك مسلمين بلا اسلام و هناك اسلام بلا مسلمين و الحقيقة الكائن المتخلف اللي بيهيس و بيقلس هوا السبب في اني كتبت حاجة زي كدا علشان اوضح النقطة ديه و يا ويله لو قال حاجة من الحاجات ديه قدامي لاني مبسكتلوش و بجد بحتقر البني ادم ده جدا حتى لو كان صاحبي لانه غبي و مبيعملش حاجة اصلا يسبهم و يستخدم التكنولوجيا اللي هما عملوها و بيسخر منهم و هوا مش طايل ربع النعمة اللي هما عايشين فيها بسبب تقدمهم و عقلهم السليم...عموما اسف ان كنت طولت لكن بصراحة انا عاجز عن شكرك لانك اجزتي في سطور بسيطة اللي انا كنت ممكن اعجز عن شرحه في مواضيع عده...بجد شكرا و بعدين انتي اسمك ايه علشان مش كل مرة هقولك يا صاحبة الخيط..يلا سلام
ـــــــــــــــــــــــــــــــــــ
البرديــــــة
هوا فعلا امر طبيعي يا برديه و من الحاجات اللي شوفتها ان هما وصلوله دول سبقونا باكتر من مائة سنة ضوئيه مش عاديه على رأي احمد عيد و طبعا ديه مش مشكلتهم انا هنا كنت بتكلم على مشكلتنا احنا في عدم تقبل موضوع زي كدا و ممكن نعتبره من وجه نظرنا حاجة ملهاش لازمة لان الناس ديه مش مشكلتهم انهم متقدمين المشكلة في اننا احنا اللي متخلفين و مش هنفهم سبب تخلفنا طول محنا بنفكر بالطريقة ديه...و بعدين يا سيتي حسره او قهر اهي كلها من وسائل التعذيب النفسي...عموما شرفتينا بزيارتك و ان شاء الله متكنش اخر زيارة ليكي..سلام
ـــــــــــــــــــــــــــــــــــ
يا مراكبي
ايه يا بشمهندس بالراحة علينا شويه احنا مش قدك المهم اعتقد انك تقصد بالمنفعة الغير مباشره هي بعد حل المشكلة بتاع اللبان ديه و اختراعم لنوع اللبان الجديد و ان من ورا حل المشكلة ديه قدرنا نحصل على منفعه منهاو اللي بتتمثل مثلا في توفير الفلوس الكتير اللي ببتصرف على النظافة مثلا مش كدا ولا ايه عموما اتمنى انها تكون زي ما انا فهمت كدا..عموما شرفتني بوجودك يا بشمهندس..سلام
ازيك يا شريف
الموضوع ممتع واسلوبك لذيذ
فعلن حسرة علينا
لا بنعمل ابحاث على اللبان ولا حتى الفول السودانى
ملناش فى اى حاجه
كل حاجه بنرقص فيها على السلالم
ولا مننا بلد مهتم بالعلم ولا بالفن طبعن الراقى مش الفن بتاعنا الللى معتش لو اى طعم
ولا حتى الدين
مش عرفا احنا هنوصل لقاع امتر من كدا فين
ربنا يتولانا
اخبار الشغل ايه؟
بردو لسا مفيش
معلش مش بتابع من زمان لانى عندى امتحانات فى العيد
دعواتك يا بطل
شد حيلك فى العشر الاواخر
وربنا يتقبل منك
كل سنة وانت بالف خير
ههههههههههههههههه
بجد بوست عجبنى واسلوبه كمان قريب من الحقيقه فى طريقة السرد بتاعته
ونيجى بقى على السؤالين اللى انت سألتهم لان كل واحد وليه اجابه مختلفه عندى
اولا ليه بيصرفوا كل ده لنظافة اللبان من على الارض؟؟ ده لان لزقة اللبان فعلا لزقه صعبه جدا وحاجه مقرفه فوق ماتتخيل فلازم بما انهم نضاف يعنى هياثر معاهم الموضوع ده
ثانيا ايه فايدة اللبان اصلا ؟؟؟
لا ده بقى ياسيدى ليه فوايد عظيمه وخصوصا فى الحاجات اللى بنشوفها حوالينا
اللبان ده لما الواحد يتنرفز ويتضايق من حاجه ويتعصب يقوم ياكله اهو يطلع نرفزته فيه بدل القرف اللى بنشوفه حوالينا وفى ظل الديمقراطيه طبعا ان كل واحد بيقدر يعبر براحته وبمنتهى الصراحه ويقدر يقول رايه فى اى حاجه مش عاجباه يبقى فعلا اللبان ليه فايده وفايده كبيره اوى فى الحاله دى كل واحد يحط لبانه فى بقه وهى تستحمل بقى اظن انت فاهمنى
:)
وهى دى فوايد اللبان وانا بحبه جدا
وربنا يخليلنا اللى اخترع اللبان
سلاااام :)
كائن نورانى
الحمد لله ازيك كدا يا كائن يا نواني فينك كدا محدش بيشوفك انتي وراكي امتحانات اه منتي طب صحيح ماشي يا دكتور ربنا يوفقك ان شاء الله ربنا يكون في عونكوا امتحانات حتى في العيد يلا ما علينا المهم احنا منعملش ابحاث على اي حاجة تقريبا حتى لو بنعمل اصلا ما اعتقدش ان احنا هنطلع منه بفايده لان حاجة زي كدا عايزه فلوس كتير و احنا طبعا الحمد لله في فلوس لكن بتتصرف على الهلس الحمد لله و ميتصرفش منهم على البحث العلمي الا القليل و القليل جدا بصراحة و بصراحة اتمنى ان ميكنش في قاع اكتر من كدا يا خوفي ليكون لسه فيه تحت..لا و الله لسه مشتغلتش على فكرة انا منتظر بس خطوة الجيش لانها ممكن تكون عقبة علشان الموقف من التجنيد و الحوارات ديه ادعيلنا انتي بس و ربنا يوفق الجميع ان شاء الله و يقوينا كلنا على قيام و صيام الشهر الكريم و يتقبل مننا كلنا ان شاء الله و كل سنة و انتي طيبة و بخير...شكرا يا كائن النور على زيارتك الجميلة ديه...سلام
ـــــــــــــــــــــــــــــــــــ
Kitty
ربنا يخليكوا لبعض يا كيتي انتي و اللبان بئى لزقة اللبان صعبة منا عارف يا كيتي و بعدين انا مشككتش ففوايد اللبان انا كنت اقصد ان ايه اللي خلى العلما دول يوجعوا دماغهم في حاجة احنا فاكرينها تافه و عموما عارف ان فوايد اللبان اللبانه من دول يا عيني بتشوف بلاوي المفروض يعملوا فيلم و يسموه حياة لبانه زي توي ستوري كدا و هيكون فيلم لذيذ و بعدين شوفي اخر اللبانه يا عني بتترمي اخرها على رصيف و لازقه في نعل محترم كبد امها و الله بتصعب عليا...يلا ما علينا شكرا يا كيتي بينتيلنا حاجتين مهمين مدى صعوبة لزقة اللبان و مدى المعاناه اللي بتشوفها اللبانة..سلا سلام
بوست جميل
واظن ان حرصهم على النظافة نابع كمان من خشية نقل الامراض لان اللبان/ العلكة بالفصحى هههههه اكيد لما يبصق على الارض بكثرة ممكن يكون سبب من نشر امراض وفيروسات ... بالاضافة طبعا لما تفضلتم به من النظافة... لكن طبعا نحن في عالم اخر عالم الجهل الكثيف ...
خالص تحياتي
كل سنه وانت والامه الاسلاميه بخير ياشريف
osama
حلوة يا اسامة حته عالم الجهل الكثيف ديه و هوا كثيف بعقل خليني ساكت احسن المهم فعلا اكيد ديه ممكن تكون من الاسباب اللي تخليهم يعملوا حاجة زي كدا لانهم لو بردو هيمنعوا ان الامراض تتنقل بين الناس و بالتالي فتوفرهم في حاجات كتير زي الفلوس اللي هيصرفوها على التأمين الصحي للناس مثلا و هكذا والسلسلة ممتدة يعني حل مشكلة واحدة هتحلنا ازمات تانيه ممكن منكنش واخدين بالنا منها اصلا..عموما شكرا يا اسامة على زيارتك و خلينا نشوفك كدا علطول..يلا سلام
___________________________________
kitty
كل سنة و انتي طيبة يا كيتي و بخير دايما يارب و يوفقك و سائر المسلمين لكل ما هو خير..يلا سلام
Post a Comment