Friday, August 24, 2007

و للارهاب اقنعة

اولا كالمعتاد احب اعتذر عن تاخيري لان انتوا عارفين حبة مشغول على شوية النت فاصل على شويه اخويا محتل الجهاز على حبتين مخنوق من الليلة كلها فكل ده بيعمل كوكتيل لذيذ من الخنقة..المهم

النهاردة انا عايز اتكلم عن موضوع مهم جدا و طبيعي جدا بالنسبة لينا كلنا كمصريين و الموضوع دا ان ايه الفترة اللي فاتت ديه مسك عندنا البلد مدير امن جديد غير اللي كان ماسك اصلا و طبعا مع احترامي لمدير الامن القديم اللي انا معرفوش اصلا الا انه احسن ان هوا سابها لان البلد كانت في حالة سيئة من الفلتان الامني المتمثل في انتشار توزيع الحشيش و البانجو و ان بئى بالساهل تقدر تحصل على الحاجات ديه مهما كان سنك طبعا و انتشار كمان البلطجية اللي بيتعدوا على خلق ربنا و زي ميكونوا متخلقوش الا لجر الشكل و الخناقات و الفتونة دا غير طبعا جرايم حصلت كانت غريبة عن مجتمعنا زي القتل مثلا و الاغتصاب المهم فطبعا مدير الامن القديم خلع و مسك مكانه واحد جديد..طيب و ماله

مدير الامن الجديد بئى طبعا جاي جديد و عايز يبين نفسه ان هوا اللي هنا و هوا اللي هناك فراح الراجل ده لامم حواليه بتوع الامن المركزي و نزل يتمشى في البلد يا مرحب يا حاج بس نزل يعمل ايه بئى طبعا نزل اول حاجة بيعملوه هو و امثاله ان يبص على الاشغالات اللي في الشارع و يبدأ حملة تطهير لكل اللي في الشارع من اشغالات يعني اللي هوا مقصود بيه الانضباط ينزلوا يلموا كل حاجة اللي له لازمة و اللي ملوش و ارمي يا ريس في العربية النص نقل..دا مش كدا و بس دا كمان كانوا بيوقعوا التند (جمع تندة) بتاع المحلات و يهدوه طيب ليه يا عم التند ديه عملالك ايه طيب يا باشا يا بيه و التند ديه اصلا مترخصه فيقولولهم يا باشا احنا معانا رخص بالتند ديه فيردوا ببرود طبعا تعالا و اعمل رخص جديدة -اه ياولاد الهبلة مهم معاهم رخص اصلا- ...المهم يا ريت طبعا كانت على التند وبس لأ و الارصفة كمان ساعات في محلات بتبئى معليه الرصيف بتعهم شويه و ده مش من حقهم فطبعا بتوع الامن لازم يتصرفوا و انا نسيت اقولوكوا ان كان معاهم بلدوزر من الصغططين دول فهوب لو معجبوش رصيف من دول يروح البلدوزر داخل فيه شمال مدغدغه ميت حته طيب و اصحاب المحلات ديه محدش بيعترض ؟؟ لا يا ريس كانوا بيعترضوا بس اللي يعترض من دول بتوع الامن المركزي موجودين ياخد العلقة الصح من هنا و يترمي زي الباقي في البوكس و من كتر البهدلة اللي الناس شافتها سمعت ان في ناس ماتت في الاسواق بس انا بقول سمعت يعني معرفش الكلام ده صح ولا غلط..طيب هو ايه يا عم مفيش حد صور الكلام ده ؟؟ لأ ازاي يا راجل في ناس صورت الكلام ده بس لسوء حظهم بتوع الامن شفوهم و طبعا كالمعتاد خدوا العلقة التمام و الموبيلات اتسحبت...طبعا القلق اللي حصل ده كله بسبب انه مدير امن جديد فلازم يعمل الشويتين دول في الاول علشان يبين ان الراجل حامي و بتاع لكن بعد كدا للأسف بترجع ريما لعادتها القديمة و يرجعوا للطرمخة من تاني ودا طبعا مش غريبة لاننا عرفين كويس ان احنا اكيد في مصر...و طبعا من الاطلاع الجرايد ان الحوار ده مش عندنا بس دا للأسف في مناطق كتير من البلد و اخرهم الللي حصل فيها قلق جامد المطرية تقريبا الي بئى اشبه بارهاب دولة زي ما اقصد بعنوان التدوينة


طيب ده اللي حصل طيب ما تيجي نتكلم جد شويه و دا الحوار الللي انا دخلت فيه مع زمايلي في جدال طويل و كان السؤال عبارة عن هل الناس تستاهل اللي بيجرالهم ؟؟ مش هكون ظالم للناس لو قولت اه لكن بردو مش هكون منصف..بمعنى ان فعلا الامن مزودها حبتين و مبتبقاش طالبة له ده كله او بمعنى اصح كتير منكم بيقول يا عم سيب الناس تاكل عيش ليه نعمل فيهم ده كله..هقول لسيادتك انك متقدرش تنكر ان في من الناس دول اللي مزودينها فعلا ان الاشغالات اللي بيعملوها في السكة بتقفل الطرق فعلا و خنق على المرور اكتر مهو متخنق يعني يوم من الايام اللي كان حال فيهم القلق ده ماشي من شارع اللي يعتبر شارع تجاري او زي سوق كدا فخير اللهم اجعله خير لقيت الشارع فااااااضي و وااااسع بطريقة غريبة لدرجة يمكن كانت اول مرة اشوفها ان لما شالوا الاشغالات اللي في الشارع ديه فعلا الطريق وسع اللي اقصده ان انت كصاحب محل مش من حققك انك تحط قدام محلك اي حاجة م اللي بتبيعها تحت الرصيف بشويه زي ما انت من حققك انك تبيع من حقي كدولة ان الشارع بتاعي يكون فاضي للناس و انت بردو كمحل مش منحققك انك تعلي الرصيف فوق المتر مثلا زي اخينا اللي فوق..اللي اقصده ان بتكلم بمنطق حقي و حقك صحيح ان الحكومة معندهاش حكاية حق المواطن ديه هوا حقها بس الا ان ساعات بشوف ان ممكن يكون ليهم حق في الحملات الي زي ديه دون المساس طبعا بالشخص و التعرض ليه بالضرب مثلا زي ما هما بيعملوا يعني علشان محدش يفهمني غلط علشان ان مشجعش سلوك زي ده بانك ترهب الناس بالطريقة ديه و تعاملهم بالطريقة ديه لكن في نفس الوقت اه الناس ساعات مبتعرفش ايه اللي ليها و ايه اللي عليها..علشان كدا لما تيجي تجاوب على السؤال خد في اعتبارك حقي و حقك بالرغم من ان معظم كلامي بيكون على الحالة المثالية..انا مش مع الحكومة و لا مع الناس انا مع اللي انا شايفه صح...علشان كدا عايز اعرف رأيكوا في الليلة ديه

بس دا اللي كنت عايز اققوله اما دلوقتي احب اسيبكوا مع فيديو كنت شوفته على جروب لناجي العلي على الفيس بووك فيديو لي واحدة من شعب، شعب بردو متعرض لارهاب دولة، انصحكم انكم تشوفوا الفيديو اللي بجد ابكاني على حالنا و حال الشعب ده

سلام

20 comments:

الخيط الرفيع said...

للارهاب اقنعه عند اللي بيكسفو لكن بلدنا ما شاء الله معديه في الموضوع دا
ما الغلبان مش بيشبع غلب في بلدنا
يعني اصحاب المحلات كانوا شافوا نظام في مدارسهم ولا اي مصلحة حكوميه ولا في اي مستشفي عشان يتعلموا احنا بندور في دائرة مفرغة
واشمعني النظام في اول كام ساعة
المهم بلدنا عيزة معجزة
والشعب بسكوته وقله حيلته يقرف بجد
انا رديت علي التعقيب
ما شفناش حضرتك عندنا من زمان
تحياتي
واسفه علي التطويل

Shreef said...

اه صحيح مش عارف ايه البجاحة ديه هما واخدنها وش كدا دا اذا بليتم فاستتروا بس يبدو ان مبئتش تفرق معاهم اي حاجة بص اقصد ان ده بئى حاجة عاملة زي ارهاب و مقنع في شكل دولة و بعدين بئى كلامك ده ردي بيه على بتوع كل واحد يبدأ بنفسه و ديه نقطة مهمة جدا يعني النظام هييجي منين اذا هما مشفوش نظام قبل كدا لكن ديه مش حالة عامة بردو الناس عندها عقول و احنا شعب مفتح و مكن يعرف ايه اللي ليه و ايه اللي عليه لكن احنا ساعات بنستهبل و فكرينها فهلوه لما ناخد حق مش حقنا احنا كدا و مش كلنا طبعا فديه النقطة اللي انا بتكلم عليها لكن طبعا في حالتنا بالتحديد حظنا سيء لاننا واقعين مع دولة فارض نفسها عليك سواء ليك حق او ملكش..هي مش معجزة اوي اللي محتجانها لان حريتنا حلم لكن مش صعب تحقيقه..عموما شرفتيني بزيارتك و و الله الل بيأخرني عنكوا بس مشاغل الدنيا..يلا ما علينا..سلام

Anonymous said...

والله البلد كلها عايزة غسيل مخ عشان نشيل منهم الافكار الزبالة كلها ومنها التواكل و الاستسهال و البجاحة

loza said...

بصراحه انا مشفتش الحكايه دى
ولا اعرف حتى انهم غيروا مدير الامن

بس كنت ناويه اتكلم فى موضوع الامن

حبيبة الرحمن said...

عنوان جميل :)

احييك على أختيارك لعنوان البوست والموضوع كمان جميل ومهم

خلاص كلمة امن عندى بقت تساوى كلمة خوف فى البلد دى

الشرطه فى خدمة الشعب بقت تساوى عندى الشرطه فى رهبة واهانة الشعب

طبعا رايك صح ان الناس ممكن تاكل عيش من غير بلطجه ولا يبوظوا الشوارع بمهملاتهم وبلطجتهم لكن بطريقه افضل من كده الامن يقدر يقاوم الموضوع ده ومن غير اهانه وهمجيه

حياة الأحلام said...

بوست جميل بيحكى شويه من اللى بنشوفه
واللى بيخلينا نقول يبقى أنت أكيد أكيد فى مصر بس بجد أحنا الشعب اللى المفروض نقطه النظام دى عندنا من غير توجيه يعنى لو كل واحد بدأ بنفسه فى النظام والنظافه مش هتبقى مصر كده ولو فضلت كده يبقى العيب مش مننا
وعموما هو الشعب والأمه فى خدمه الشرطه
والأرهاب اساسا جوه البلد ربنا يرحمنا أن شاء الله
ودى لا باظت ولا خربت ولا جابت جاز
عايشين فى حريه زمن القيود أختفى
بالتوفيق فى مدونتك الجميله

بالتوفيق فى البوست

sa'7so'7te said...

elmawdo3 gamel we ye3gebne fek el7eyadeyya fe eltafker
2amma 3an elvideo fa no comment :S

Shreef said...

Saso0o

سسلأسف يا سارة كلنا عايزين غسيل مخ من اكبر راس لاصغر راس فيكي يا بلد و بعدين نحط حماية على مخاخانا علشان منرجعش تاني لتخلفنا و تسلبيتنا اللي موديانا في داهية..يلا ما علينا..شكرا يا سارة

ـــــــــــــــــــــــــــــــــــ

loza

ممكن لان يمكن محصلش قلق من النوع ده في المنطة اللي انتي عايشه فيها بس الحوار ده معروف يعني و يا ريت فعلا تتكلمي عن الامن اللي بئى فعلا مشكلة في مجتمعنا...تحياتي للوزا..يلا سلام

ـــــــــــــــــــــــــــــــــــ

Kitty

عجبك العنوان انا عارف لانه بصراحة في محله و فعلا الخوف بئى مكان لامن يعني انا مش عارف هو الموضوع اكيد له جذور كتير بس الاول كان في فعلا امان اكتر من دلوقتي بكتير كل حاجة بئى فيها سرقة و مجرايم و مشاكل يترى السبب علشان الامن مش شايف شغله كويس ولا الناس بقت اجرأ او من احوال البلد تعبت و اضطرت انها تعمل كدا ولا ايه بالظبط دا اذا مكنتش المشاكل ديه كلها سبب في قلة الامن في مجتمعنا..بالظبط يا كيتي ده اللي اقصده ان الناس بردو ممكن تشوف اكل عيشها من غير متبوظ حواليها او من غير ماتشغل الشوارع او تضايق الناس باي وسيلة و بردو الامن ممكن يحل المشاكل ديه من غير همجيه ديه بالظبط الحالة المثالية اللي بندور عليها و بنحلم انها تكون موجودة في مجتمعنا..شكرا على تعليقك المهم ده يا كيتي..سلام

Shreef said...

حياه الأحلام

حياة الاحلام اظن ديه اول زيارة ليكي عندنا هنا و اتمنى ان تكون المدونة عجبتك و تشرفينا ديما برأيك اللي اكيد يهمنا طبعا ده اولا..اما ثانيا مش عارف ليه احنا كشعب المفروض تكون عندنا حته النظام ديه من غير توجيه ما اعتقدش اعتقد ان لازم يكزن فيه اللي يوجه الناس تجاه النظام ده و يجبرهم عليه اذا كان في منهم مبيحبش النظام انما ان النظام يكون نابع من لشخص لوحده صعبة اصل المشكله هيجيبه منين اصلا على رأي تعليق الخيط الرفيع اذا كان مبيشوفش النظام ده في اي حته فصعب يكون منظم من تلقاء نفسه كل واحد منظم اظن في حاجة اثرت عليه و خلته يكون بالنظام ده..شكرا ليكي على تعليقك و تشرفينا دايما ان شاء الله..سلام

ــــــــــــــــــــــــــــــــــ

sa'7so'7te

اهلا باختنا الي لسه مش عارف معنى اسمها لغاية دلوقتي ما علينا المهم شكرا ليكي و انا قعدت شويه على اما قريت كلمة الحيادية يلا ما علينا المهم طبعا لازم يكون الواحد حيادي في تفكيره يعني بينرفزني اوي اللي دايما بيبص كل حاجة من اتجاه واحد او من طرف واحد و مبيكنش شايف الصورة الكاملة اللي ممكن تكون صح او على حق من منظور تاني بعكس المنظور اللي هوا بيبص منه و يعني دايما المعظم تلاقيه بيشتم في الحكومة و مبهدلها و مش مدرك انه جزء من اللي بيحصل و انه عامل مؤثر فيه بطريقة او باخرى..ياه اخيراا حد شاف الفيديو احمدك يا رب..شكرا ليكي ياااا اللي اسمك غريب...سلام

sa'7so'7te said...

sara ya shref
aw zozo as u like
ana bafakkar 2a'3ayyar elesm elkol msh 3aref yenta2o

Shreef said...

sa'7so'7te

ايوه كدا يا سارة يااه ريحتيني و الله و كويس ان مطلعتش بس انا اللي مش عارف اقراه و ان الشعب كله مش عارف يقراه بس هوا صحيح معناه ايه اصلا؟؟

يا مراكبي said...

فيه وجهين للموضوع ده

الوجه الأول إن الحكومة متمثلة في مدير الأمن ده إهتمت صحيح بشيء يقع تحت الغمكانيات القانونية ليها لكنها في نفس الوقت طبقته بإسلوب غير قانوني متمثل في إهانة الناس وكمان اللي إهتمت بيه ده فيه اللي أهم منه بكتير كان ممكن يركزوا فيه جهودهم

والوجه التاني هو إن الناس برضه بتتعدى على حقوق بعض متمثلة في الإشغالات الموجودة في الشارع ومش عاجبها إن الحكومة تشيلها .. وشايفة إن الحكومة أصلا مقصرة في حاجات تانية كتير

كل وجهة نظر منهم فيها الصواب والخطأ .. لكن كل طرف شايف الصح من وجهة نظرة بس

Shreef said...

يا مراكبي

لكن كل طرف شايف الصح من وجهة نظرة بس..تمام كدا يابشمهندس كل طرف فيهم شايف ان هوا بيعمل الصواب و ديه مشكلة هما اه يمكن جزؤء من اللي بيعملوه من حقهم لكن يمكن الطريقة هيا اللي غلط يعني من حقك يا حكومة تشيلي الاشغالات لكن في نفس الوقت تعاملي الناس معاملة كويسة اللي اكيد هيكونوا ساخطين عليكي لانك كدا بتقطعي رزقهم و انت بردو ياللي بتشغل الطريق من حقق انك تبيع و تاكل عيش لكن مش من حقك ان تتعدى على حدود الاخرين الا ان انتوا الاتنين في النهاية عندكوا مفاهيم لازم تعدل..و تتعلموا ازاي تتعايشوا مع بعض لكن اظن ان ده ابعد ما يكون في بلدنا انه يحصل الا اذا جات حكومة واعية تقدر تحقق النقطة ديه..شرفتني يا بشمهندس برأيك الجميل ده..سلام

عروس البحر said...

مدونة جميل
و عايزة اقوللك عادل لبيب ده
محافظ اسكندرية
اللي مشقلبها

Shreef said...

عروس البحر

شكرا يا عروس و كويس انك قلتي مين ده لاني افتكرته واحد مشهور يعني و انا اللي جاهل بس بدام طلع محافظ فخلاص براءة..شرفتيني يا عروس...سلام

عاشقة الوطن said...

السلام عليكم

ازيك ياشريف

عجبنى اوى ان انت اتكلمت وقولت ان الناس والحكومة لهم حق وعليهم واجبات
مش بس أظهرت ان الحكومة هى الغلط لا احنا كمان فينا حاجات كتير ومش بنصلحها

وانت عندك حق زى ما الحكومة عاوزة تاخد حقها وتحافظ على الشارع للناس عشان تعرف تمشي فيه برضه لازم اصحاب المحلات يحافظوا على حق الناس

الموضوع اصله خد وهات
حاجة زى البدل اديتنى حقي هاديك حقك
بس بصراحة برضه الحكومة بتزودها وبتعيش الناس فى ارهاب
وحكاية ان اللى يعترض ياخد العلقة المحترمة وبعدين يترمى فى البوكس
كده يبقي الحكومة أهدرت حق المواطن
اذا متجيش بقي تطلب منه انه يسمع الكلام بعد كده
بالعكس ده ممكن يعند ويعمل اللى هو عاوزه برضه
ونرجع تانى نعيد الكرة من تانى
والحكومة تهد وتكسر واصحاب المحلات تعترض
وحق الحكومة بتاخده وحق اصحاب المحلات بيروح
او العكس

ربنا يهدينا ونقدر نغير من نفسنا ونعرف الصح من الغلط

بالنسبة للكليب انا مشفتوش دلوقتى بس شوفته قبل كده وبصراحة كليب يقطع القلب
ربنا يفك أسر الشعب اللى عايش فى ارهاب مستمر

تحياتى ياشريف
وشكرا على الموضوع

ali weeeka said...

ازيك يا عبقرى

انا عارف انى مقصر معاك جدا,بس غصب عنى والله انت عارف الظروف
موضوع ده مهم جدا وخصوصا ان العمليه بقت سيبه بشكل ملحوظ ,من كام سنه كانت الناس دى ب دارى على نفسها ,دلوقتى بقوا بجحه اوى بس انا ليه تعقيب صغنون

المشكله ما بقيتش فى فساد النظام بس ,المصيبه الاكبر ان ان النظام غير كفء فى الفساد طب قولولى انتو : ازاى ظباط يعذبو معتقلين ويقتلوهم ويسيبو اثر الحريق والاغتصاب على اجسامهم دول "إحمره" ابسط قواعد ذكاء التعذيب ف اى بلد فيه فساد واستبداد انهم ما يسبوش اثر .يعنى كمان بقو غشم واغبيه واحنا اللى كان بينضرب المثل بظباط الشرطه المصريين حسره علينا وما خفى كان اغظم

Shreef said...

عاشقة الوطن

الله يسلمك يا رضوى و اظن ده اللي لازم يعمله اي شخص ان يناقش بحيادية تامة و ميكنش منحاذ لشخص او على الشخص و لا ازاي بئى بنتكلم على الحق و احنا مبنقولهوش اصلا..بالظبط كدا مع اهدار حق المواطن الماطن اصلا هيكن كره للحكومة هيخليه يعاند فعلا و بالظبط و الله ده اللي حصل يعن الاخ بتاع الرصيف العالي ده اللي اتكسر اقسملك ان منتهاش اليوم التالي للمشكلة ديه الاو كان الرصيف اتعمل تاني و بنفس الارتفاع يبئى احنا كدا محليناش حاجة و مازلت المشكلة قائمة لكن تفتكري حتى لو كانت الحكومة طلبت بالذوقو قالتله انك كدا مخالف كان هيشيل الرصيف ؟؟ ما اعتقدش و ده بالظبط اللي بنتكلم عليه ان العنف محلش المشكلة لانه هيولد عند و بردو اللين مش هيحل المشكلة الا اذا الشخص ده اقتنع من قراره نفسه بضرورة ان يعمل الصح علشان هو صح مش علشان هوا مجبر عليه فللاسف المشكلة كلها تربية اصلا مهو لو الناس متربيه و بتحترم نفسها هيحترموا حدودهم و لو الشرطوة متربية بردو هتحترم حدودها و هيكون الاحترام متبادل لكن يبدو ان ديه حاجة ما اظنش انها ممكن تتحقق الا اذا الحكومة فتحت مع الناس صفحة جديدة و تبنى العلاقة على الثقة المتبادلة بينهم..شرفتيني يا ردو بتعليقك اللي انا بحترمه جدا..تحياتي ليكي..سلام

ـــــــــــــــــــــــــــــــــــ

ali weeeka

اهو انت اللي عبقري و بعدين ولا يهمك انا عارف الظروف المهم الحته بتاعتك ديه بتفكرني بفيلم السادات لما كان بيقول "دول لازم يتحاكموا بتهمة الغباء السياسي"اهم دول كدا لازم يتحاكموا بتهمة الغباء الفسادي حلو الغباء الفسادي ديه يعني فاسد و غبي في حاجة اغبى من كدا المهم دول طبعا لان انت زي ما قولت بجحه و حتى مبقتش تفرق معاهم لان اي صوت هينادي بالحقوق ديه هيكمموه كالمعتاد..يلا ما علينا يلا سلام يا مان و متبأش هتتاخر تاني..بيس

mohamed emera said...

بص ياشريف ممكن الكلام دا يحرق الدم
ممكن يبوظ الاعصاب ممكن يجننك
وخاصه انك لما تلاقى انسان بيهين انسان
يعنى مش فيه فرق انا رايي
اهم حاجة فى الحياه احترام الانسانيه
لان انسان دا يعنى حاجة كبيرة قوى
ومهما كانت المبررات او اللى عملوه الناس الضرب دا شئ غير ادمى
ورايي هما اللى بيصنعوا الجريمه
لان انا نفسى لو مثلا انضربت بجد بجد
هجيب مسدس او رشاش واقتل كل اللى موجود بدون وعى علشان زى ماقولت دى كرامه وانسانيه لازم نحترم بعض اكتر اللواء زى الزبال كلنا انسان على راى كاظم

Shreef said...

mohamed

بالظبط يا محمد يبئى الانسانية..الانسانية المهانه في كل مكان في العالم الانسان المهان هنا في بلدنا الانسان المهان في فلسطين و العراق الانسان المهان في افريقيا و مجاعات افريقيا الانسان اللي بيهان بسبب العنصرية سواء بسبب دينه او لونه او جنسه..بس للاسف مبيحترمش الانسان و ادميته الا الانسان اللي زيه انما اي واحد بيهين ادمية شخص فحرام نقول عليه انسان..و فعلا ده بيسبب مشاكل للشخص ده و خصوصا لو رزقه اتقطع بسبب حاجة زي كدا فبعد كدا هيفكر في السرقة ان ياخد حقه بالعافية بعد اما معرفش ياخده بالذوق و ده هيولد عنف ممكن يحرق المجتمع كله..شكرا يا محمد على تعليقك و تقريبا دا اول تعليق ليك عندنا و ان شاء الله ميكنش الاخير..سلام