ذاكر..ذاكر..ذاكر

تحديث

الامتحان الاول كان بتاريخ 4\6

الحمد لله بصراحة كان امتحان سهل جدا و لذيذ جدا و حلينا كلنا كويس جدا و دعينا ان بقية الامتحانات تكون سهلة زي الامتحان ده لكن يبدو ان احنا عملنا حاجة وحشة في دنيتنا و ربنا مستجبش لدعاءنا

الامتحان التاني بتاريخ النهاردة 9\6

و من الاخر الامتحان ده هو السبب في اني كتبت التحديث ده علشان افضفض قبل ما اطق من جنابي الامتحان بسم الله ما شاء الله اسئلة اول مرة نشوفها في حياتنا و بعون الله معظم الدفعة محلتش حاجة الا سؤال واحد اللي كنا نعرفو و الباقي خد عندك يا ريس كلام ما انزل الله به من سلطان تأليف للصبح و محدش بئى يقولي طالب عادي و اخر متفوق كله محصل بعض

بصراحة بئى ان قرفت و متغاظ فعلا من اللي بيعملوه فينا ده بجد حرام من الاخر شغل تعجيز

يا رب الكلية تولع يا رب و اشوفها مولعة كدهو لما المطافي تيجي تطفي الحريقة تكون الميه مقطوعة طول اليوم

و ميلقوش يملوا العربيات و لما يروحوا يملوا العربيات من من حنفيات المطافي تكون متوصلة بالغلط على مخلوط من البنزين و السولار

كل ما يرشوا..تولع اكتر

كل ما يرشوا..تولع اكتر

كل ما يرشوا..تولع اكتر

و اثناء ما هي والعة ابعت رسالة لامريكا و اقولهم ان الكلية والعة علشان تحتيها منشأة نووية و فيها صواريخ

تروح امريكا تتغاظ و تضرب على الكلية صاروخ كروز فيه ييجي تلت اربع خمس ست سبع روؤس نووية

يدغدغ الكلية..و لسوء الحظ يكون في فعلا تحت الكلية منشأة نووية وفيها قنابل و بسبب الصاروخ يحصل سلسلة انفجارات

تعمل حفرة كبيرة بحجم جمهورية مصر العربية

تولع فيا و في الدكاترة و في اللي بيقروا الموضوع الكئيب ده

لكن في النهاية الحمد لله على كل شيء

اخر امتحان هيكون يوم 27/6/2007

يا صبر ايوب
==========================================

في البداية احب اعتذر عن التأخير ده بس زي ما انتو عارفين احنا داخلين على موسم امتحانات و شكله كده موسم دسم جدا و رخم جدا اصل انا بصراحة اكتشفت مؤخرا اني من اول الترم مذاكرتش اي حاجة و زي ما انتوا عارفين انا مش من الدحاحين اللي بيبتدوا النضال من اول يوم في الترم

انا طالب على ادي مخنوق من الكلية اللي انا فيها لاني مش عايز اتعلم في المجال ده اصلا و على فكرة ده مش حالي انا لوحدي دا حال الناس كلها..فا زي ماتقولوا كده بروح الكلية ديه كده يعني تقضية واجب لكن مش معنى كده اني انفض على الاخر لأ طبعا بذاكر و بعمل اللي عليا و الباقي على ربنا...الا ان الترم ده مش عارف مالي مش قادر اذاكر مش عارف افتح كتاب و اذاكر ساعتين على بعض يمكن علشان زقهت بئى الله اعلم اهو عموما ده اخر تيرم عندي و اخلص و اتمنى انه يعدي على خير

و علشان كده اكيد طبعا النشاط في المدونة هيقل و يمكن ينقطع كمان علشان بصراحة مش عايز اي حاجة تشتتني...عايز احط كل تركيزي في المذاكرة بقدر الامكان..انا عارف ان ده صعب على الاقل على واحد زيي شايف نفسه طالب فاشل لانه مش قادر يتحرك في المجال اللي فُرض عليه فعلشان كده مش لاقي نفسي و حاسس اني تايه..هيوحشني و الله عالم التدوين بما فيه من ناس مبقتش قادر استغنى عن نقاشهم و دمهم الخفيف و مواضيعهم الاجمل..لكن هنعمل ايه حكم القوي مع اني حالي مش غريب عليكوا ما احنا كلنا في الهوا سوا و الغالب منكم بردو عندهم امتحانات و هم ما يتلم

و علشان كده بتمنى ليكوا كلكوا النجاح ان شاء الله و انا معاكوا و بسأل من ربنا النجاح و التوفيق و يوفق كل طالب علم لما يسعى اليه...اللهم امين...يلا كفاية عليكوا كده كل واحد بئى يقوم يذاكر و يشوف ايه اللي وراه...لكم مني اجمل التحيات و الي لقاء قريب...سلام