Friday, April 06, 2007

اكتشاف مذهل

اكتشف بعض العلماء المصريين بالصدفة الطريقة المثلى لحجب رؤية اقمار التجسس الصناعية.. واتى هذا الاكتشاف بسبب السعي المستمر للعلماء المصريين لتطوير التقنيات التي تمكنهم من حماية امن هذا البلد..و يُستخدم في هذا الاكتشاف اختراع مصري بحت صنع بالكامل على ايدي الخبراء المصريين ويتبع هذا الاختراع طريقة الزغللة في حجب رؤية اقمار التجسس



اتريد ان تعرف ما هذا الاختراع المذهل



شاهد تلك الصور









لسه مفهمتش..يمكن الصورة اللي جايه تفهمك اكتر لانها مع الشرح







طبعا سيبك من حكاية الاختراع و نتكلم جد بئى الصور اللي انتوا شايفنها فوق ديه ما هي الا صور لعامود نور المفروض ان هوا محطوط علشان ينور الشارع لكن يبدو ان المسؤلين لقوا فايدة اهم لعمدان النور من كده بانها يخلوها تبص لفوق و بالطريقة ديه نقدر نزغلل العدسة بتاع القمر الصناعي اللي بيصور من فوق او يمكن علشان ينوروا للطيارات اللي ماشيه في الجو كل ده كلام فاضي..تقريباً الشركة او العامل المختص عن تركيب الكشاف ده مكنش عايز يضيع دقايق من وقته الثمين اللي هيعدل فيهاالكشاف..طيب لو كان العامل وقته مهم للدرجة ديه فين الشركة المسئولة عن صيانة الحاجات ديه..و جابوا منين اصلا الغباء ده اللي يخليهم يعملوا حاجة زي ديه..يمكن مش غباء تقدر تقول عليه تخلف او اهمال او او..يبدو ان كل المصطلحات بقت شبه بعضيها..ده طبعا مثال بسيط جداً جداً عن مدى سورري يعني تخلفنا و ما خفي كان اعظم


ملحوظة:التقطت تلك الصورة بكاميرا موبايل على ويكا صديقي و شريكي في تلك المدونة و احنا ماشيين سوا على كوبري علوي
سلام

30 comments:

-_- said...

اختراع هايل

!!!

لو سمحت عايزك تزور مدونتى و دور على موضوع اسمه صورة و تعليق

بس خد اي مسكن عشان ميجيلكش صداع من اللى هتشوفه

!!!

Shreef said...

شارم عندنا يا اهلا..بجد انا سعيد بزيارتك ديه..وعلى فكرة مدونتك جميلة جدا زرتها قبل كده بس دايما حاجة تشغلني ان اعلق على مواضيعك الجميلة..و رجعت شوفت الصور اللي انتها مصورها بصراحة حاجة تنرفز بجد و خد من ده كتير بس للأسف ممعيش كاميرا او حتى موبايل علشان اخد صور للمهازل ديه..عموما شرفتني جدا بزيارتك..سلام

كلام لوجيك said...

جميل قوي الاختراع ده
دايما مصر متفوقة فى كل المجالات
اهنيك على تلك اللقطة الحصرية والتى تظهر ذكاء المواطن المصري المطحون

تحياتى

مدونتك هايله وواضح فيها جهدك

يساري مصري said...

ياناصح مش كدا
هو انت من اللي فاكرين ان القمر منور عشان دا انعكاس ضوء الشمس
لا يانااااصح
داحنا اللي نورنا القمر بفوانيس الشارع
ههههههههههههههههه

Music Gates said...

هيع هيع

اختراع جامد اوي هو ده فعلا الشعب المصري الي علي حق
يا سيدي هقولك كلمة واحده لو الحاكم فاسد ما بالك باهل الدار

Shreef said...

كلام لوجيك

ربنا يخليك ده بس من ذوقك المدونة جميلة بيكوا انتوا و بتعليقاتكوا..و المفروض يكون لينا فعلا حقوق النسخ لان ديه لقطة حصرية..و فعلا المواطن المصري لماح ميقدرش يفوت حاجة زي ديه..شرفتني بزيارتك..سلام

Shreef said...

يساري مصري

تصدق ممكن..ممكن يكون فعلا نور القمر بسبب كشافات العمدان بتاعتنا شوف بئى بجهلنا بنخدم كام واحد على الارض..دمك خفيف..شرفتني بزيارتك الجميلة ديه و اتمنى انها متكنش اخر زيارة..سلام

ـــــــــــــــــــــــــــــــــــــ

copa

طبعا يا ريس..احنا شعب ابن نكتة و الله اشك ان اللي ركبه كده قاصدها بيستظرف يعني..و بعدين فساد الحاكم لوحده مكنش السبب الوحيد ان الكشاف يتركب كده هو صحيح بيساهم بس مش هو اللي قال للعامل يركبه كده..لو العامل نفسه كان مراعي ضميره مكنش عمل كده..لكن عموما اذا اتبعت الهرم الوظيفي من اوله هتوصل في الاخر للراس الكبيرة..عندك حق..شكرا على زيارتك الجميلة ديه..سلام

ali weeeka said...

منوريين با جماعه والله ,انا سعيد جدا ب مشاركتم ف المدونه انا عارف انى مقصر ف المدونه بس بجد غصب عنى انا مطحون ف الكليه
طبعا بعد الاختراع الهايل اللى انتوا شفتوه ,كده احنا ب نثبت ل نفسنا كل يوم عن مدى تفانى الحكومه ف خدمه الشعب والعمل على راحته ,و"اراحته من الدنيا" و اللى ينكر كده يبقى معدى للساميه ولامواخذه... وسلام مربع للساميه
تعرفو انه لحد وقتنا هذا الكشاف ما اتعدلش
ces't la vi

عاشقة الوطن said...

ايه ياعم شريف مستخصر ان مصر تخترع اختراع زى ده

وبعدين انت بتقول ان عمود النور كانمنور بس المشكلى انه باصص لفوق بس

طيب احمد ربنا يارجل فيه حتت تانية العمدان محطوطة فيها منظر بس وخاصة الطرق السريعة طرق السفر

بس هما برضه اكيد كده بيضللوا الاقمار الصناعية

وتيجى بقي لحاجة تانية فى حين ان انت فى عز ماانت ماسافر وفى عز الليل والعمدان مضلمة
تيجى فى عز النهار وتلاقى العمود من دول منور لحد الضهر ولا حاجة

ياعم احنا فى بلد الاختراع الزريع
بدل الفشل الزريع يعنى

يالا ياعم شريف ورينا مصر اخترعت ايه تانى

سلام ياشريف انت وعلى وسلميلى على المخترعين المصريين

يا مراكبي said...

أنا من وجهة نظري المتواضعة شايف إن عمود النور مضاء وده معناه إن الكهرباء واصلة وإن اللمبة شغالة .. وده في حد ذاته إنجاز بكل المقاييس

أنا عشت أيام طفولتي وقدام بلكونتي عمود نور أعتقد إني شفته منور مرة واحدة في خلال 25 سنة .. وبعدين إتجوزت ومشيت وما أعرفش نور مرة تانية وألا لأ خلال العشر سنين اللي فاتوا

ibn nasser - ابن ناصر said...

هههههههههههه يخرب عقلك يا شريف انا بقول اختراع ايه ده بس هههه ل ماهو لدنا كلها اختراعات
تحياتي

عالمى ازرق said...

مايمكن بينوروا لاخواننا فى الفضاء
انت كمان عايزهم يعدلوا العامود و علاقه مصر تبوظ مع الكواكب التانيه
اسعدنى مرورى على مدونتك

Shreef said...

ali weeeka

و الله انتا اللي منورنا يا علي و احنا عارفين ان الدنيا مشاغل و ارتباطك بالكلية انك مش فاضي و بعدين انا مش هقولك على الاختراع محنا دافنينه سوا..اقصد مكتشفينه سوا..و متقلقش الكشاف مش هيتعدل قريب

ـــــــــــــــــــــــــــــــــــ

عاشقة الوطن

ما هي المشكلة انه منور عارفة لو كان مش منور هنقول مش مشكلة ديه حاجة طبيعية لكن انه يكون منور بس تقلبوه لفوق يا ولاد الهبلة..فده اللي مش طبيعي..و بجد مشكلة الطرق السريعة اللي مش منورة ديه تخيلي بئى الخطر اد ايه..و يا ريت حتى نكون في بلد لاختراع الزريع ده حتى ده مش موجود..ما علينا..تحياتي ليكي

ـــــــــــــــــــــــــــــــــــ

يا مراكبي

وجهة نظر في محلها..هو فعلا الكهربه واصلة و اللمبة شغالة بس باصة لفوق طيب يبئى لزمتها ايه اصلا بيغظونا مثلا..و عارف احنا بردو قدامنا عامود نور كان الوضع الغريب ان يكون العامود شغال..بس بصراحة دلوقتي هو شغال من فترة و ميت فل وعشرة و تمام..عقبال ما تيجي مصر و تشوف العمود بتاع طفولتك شغال كده و منور زيك زي ما انت منورنا في المدونة ويا
ريت تبئى تعرفنا..شرفتنا بزيارتك

ـــــــــــــــــــــــــــــــــــ

ibn nasser- ابن ناصر

هو فعلا يا ابن الناصر بلدنا كلها اختراعات..بس اختراعات فينا و اشتغالات شكرا على زيارتك الجميلة ديه و على فكرة احسنت اختيار الصورة بجد عقبال ما ننتهج نهجه..سلام

ـــــــــــــــــــــــــــــــــــ

عالمي ازرق

لأ احنا فعلا نخليهم ميعدلوش الكشاف لا ييجوا اخوانا اللي في الفضاء يرفعوا علينا قضية في مجلس الكواكب برعاية الامم الكونية المتحدة و بعد كده ييجوا يحاربونا علشان نرجع العمدان تاني لفوق..اظن ديه اول زيارة ليكي لمدونتنا شرفتينا بزيارتك الجميلة و تعليقك الاجمل و اتمنى انك تزورينا دايما..سلام

الراقـــص مع الذئـــــاب said...

السلام عليكم
ممكن كمان ياشريف يكون هدفهم اسمي من كدا بكتير
ممكن يكونوا عاوزين ينوروا القمر
شوف انت ازاي ممكن تكون ظالمهم؟؟

موضوع لذيذ ومدونة جميلة
دمت في خير اخي الكريم

Shreef said...

الراقص مع الذئاب

و الله انا مش ظالمهم ولا حاجة وعلى فكرة ده نفس الكلام اللي قاله يساري مصري ان القمر مبنورش بسبب الشمس ده احنا اللي بنوره بالعمدان بتاعتنا..شكرا على زيارتك الجميلة و اتمنى انها متكنش اخر زيارة..سلام

FemTo said...

وانتا ايش عرفك فى تكنولوجيا الفضا دول بيرشدوا المركبات الفضائية عشان متعملش حادثة :)

Shreef said...

FemTo

ياه ده احنا طلعنا بنخدم ناس كتير بالحوار ده يعني مش بس بنور القمر ده احنا كمان بنور الفضاء علشان المركبات الفضائية متعملش حوادث..دا احنا الفروض ناخد جايزة على كده..شرفتنى يا فمتو بزيارتك

أنا أفكر إذن أنا موجود said...

يا شريف زعلان ليه بس
أحمد ربنا أن اللمبة بتنور
فوق لتحت مش قضية
المهم أنها بتنور
ده في شوارع الأعمده محطوطة زينة .. ديكور

وتركيب اللمبات الجديدة اللي بتنور بتحتاج واسطة
لازم تكون عارف حد مسئول في الحي في ادارة الكهرباء

شوفت بقى

تنور لينا أو للمخلوقات الفضائية
ليست هي القضية ؟؟

kaed said...

عزيزى شريف
يا بنى أنت فاهم غلط
إحنا تخطينا المرحلة دي بكتييييير
أنت عارف اللمبة دى محطوطة لإرشاد سفن الفضاء و سكان الكوكب التانية عن موقع مصر مش كدة ولا إية
دمت بخير

Shreef said...

أنا أفكر إذن أنا موجود

و الله العظيم..!!..حتى علشان اركب لمبة محتاج واسطة..انا كنت فاكر حتى لو كان عندي واسطة مش هتتركب بردو ديه ناس ماشية بدماغه..و بعدين الحمد لله يا ستي انها منورة بس يكملوا جميلهم ويعدلوها..ولا على رأيك مبقتش تفرق ناهي بايظة بايظة..تحياتي ليكي

ـــــــــــــــــــــــــــــــــــ

kaed

تقصد يعني على سبيل السياحة بنعرفهم بئى ان هنا مصر و تعالوا اتفسحوا و بتاع و هما اول ما يشوفوا العامود من فوق هيعرفوا على طول لان مصر واخدة الحقوق الحصرية لهذا الاختراع..اختراع الهطل..شرفتني بزيارتك و تشرفنا دايما ان شاء الله..سلام

حبيبة الرحمن said...

هههههههههههههههههههههههه....ظلمتوا الراجل

هتلاقى الشخص اللى مركب اللمضه ده

بيحب يسمع اغنيه (مهما يحاولو يطفوا الشمس) كتيييير

فالحماسه اخدته وقال لازم يبقى ليا دور ايجابى يطفوها ازاى يعنى وانا موجود ....لازم اتصرف :D

3lool said...

هههههههههههههههه

ياسيدي كويس انها جت علي اد لمبه العامود هي اللي مقلوبه

احسن اليومين دول مش بقي فيه حاجه عدله خالص

سكتم بكتم said...

المصريين مش محتاجين عمدان نور الشعب المصري شعب منور بحد ذاتة.فقلنا نوزع شوية علي سكان الكواكب الأخري.مقال ظريف خالص وعلي العموم منور ياباشا وياريت تشرفني.تحياتي

khaled said...

هنبقى شعب منور
هههههههه
الكائنات الفضائية هاتعدلنا للصبح
هى دى مصر يا عبلة

Shreef said...

kitty

هو من ناحية التصرف الراجل اتصرف بصراحة..وسيادته بئى فكر انه هينور الشمس بالكشاف و هو مقلوب..كان يبئى احسن لو مفكرش..شرفتينا يا كيتي

ـــــــــــــــــــــــــــــــــــ

3lool

بحسب كنت هتقولي دلوقتي بيركبوا العمدان نفسها بالمقلوب يعني يبئى الكشاف تحت و بقيت العمود فوق..و من ناحية مفيش حاجة عدلة لأ متقلقش مفيش حاجة عدلة يبدو ان الدنيا اصلا المفروض تبئى ماشية بالمقلوب لان مفيش معدول اصلا..شرفتني بزيارتك و اتمنى انها متكنش اخر زيارة..سلام

ـــــــــــــــــــــــــــــــــــ

سكتم بكتم

انت اللي منور يا سيدي زي بقية الشعب اللي بينور بحد ذاته مع اني معرفش ازاي يمكن الناس بتضرب فسفور على الريق الصبح..و ايه يا عم السرية اللي انتى فيها ديه كل حاجة سر..ماشي نبئى نشوف الموضوع ده بعدين..شرفتني بزيارتك الجميلة ديه

ـــــــــــــــــــــــــــــــــــ

khaled

اهلا بيك يا خالد شرفتني بزيارتك انتا و المخلوقات الفضائية..بس ليا سؤال..مين عبلة ديه؟؟..تحياتي ليك..سلام

صلاح الدين said...

الى يبص لفوق يتعب
وممكن يقع فى حفره
يعنى فوق فى اذاى
وتحت فى خراب
بس انا مازلت مصر ان فى امل
ومش لازم نظهر عيوب بعض
والى يقدر يصلح شىء يصلحه
ضاقت ولمكا استحكمت حلاقاتها فرجت
ومازلت مصر ان الفرج قريب وقريب جدا
مع خالص شكرى وتقديرى
صلاح الدين

šσяšαяαα said...

هههههههههههههههههههه
ههههههههههههههههههههه
ههههههههههههههههههههههه
العمود دا فكرنى بمصاصه لولى بوب
وماتقوليش ليه
لانى مش عارفه
ههههههههههههههههههههههه
مصاصه جنان كلها الحان وبتنور فى الضلمه كمان
واقفه بالشقلوب ونورها مقلوب
والسما بعدها ضربت الوان
ههههههههههههههههههه

صباح التهيييس:)

Shreef said...

صلاح الدين
و الله اللي هيبص فوق هيتعب و اللي هيبص تحت بردو هيتعب فبما انها سيان في الحالتين فامبقتش تفرق كتير..و طبعا في امل لاني سبق و قلت لو مفيش امل يبقى نروح نموت احسن لان مينفعش نعيش بيأسنا..و بعدين ادراك المشكلة هي نص حلها و النص التاني هو العمل على اصلاحها..و فعلا لازم كل واحد اذا قدر ان هو يصلح و لو شيء بسيط يمكن الوضع يتغير و هتفرج ان شاء الله...شرفتني جدا بزيارتك ديه و بتعليقك كمان..تحياتي ليك

ـــــــــــــــــــــــــــــــــــ

SoRsaRaa

صرصارة هانم..حاجتين لحد دلوقتي معرفهمش..ايه علاقة المصاصة بالعمود و ايه علاقتك انتي بالصراصير..لغزين محيرني اوي و اكيد هوصل لحلهم..مساء الدروشة..سلام

šσяšαяαα said...

ههههههههههههههههه
انا يوميها كنت بوزع اقراص صراصير وقلت لما اجربلى واحده كدا
مش بيقول طباخ السم بيدوقه:)

وبالتالى كل تعليقات اليوم دا كانت تهيييييييييس ولخبطه يعنى ماتخدش فبالك خالص مالمصاصه دلوقتى قلبناها عسليه:)

وبالنسبه لعلاقتى بالصراصير فسأتركه لغزا محيرا بدون إجابه:)

Shreef said...

SoRsaRaa

انتي بتضربي اقراص صراصير..انا اعرف ان هما بيخدوها لما يكونوا داخلين خناقة علشان ميحسوش بالضرب فا ايه حكايتك بالظبط..و مسيرنا هنعرف حكايتك مع الصراصير هتعترفي في يوم من الايام..و على فكرة لذيذة اوي صورة البنت و القطة اللي بيرقصوا دول..تحياتي ليكي..سلام