اديني في الهايف

و انا بتصفح في المنتدايات كالمعتاد لقيت واحد كاتب موضوع كده مستفز..مستفز لدرجة هتخليني اعمله موضوع لوحده علشان اتكلم عليه..الموضوع ده بئى كان عنوانه متتفرجوش على توم و جيري فالعنوان شدني فدخلت اقرأ الموضوع فلقيت ان بيطلب من الناس انها متتفرجش على كارتون بتاع توم و جيري قال ايه ان ده لا يتفق مع تعاليم الدين الاسلامي؟؟فانا استغربت الموضوع جدا و قلت اكمل..فاتضح ان ايه الموضوع بئى ان واحد من اللي اسلموا جديد قال ايه ان الناس المفروض متتفرجش على توم و جيري لأنه لا يتفق مع تعاليم الدين الاسلامي لان جيري و هو الفار اللي يعتبر هو الضعيف بيفضل يهرب طول الحلقة و في النهاية بينتصر بعكس توم و هو القط اللي المفروض ان هو الاقوى بيجري ورى جيري طول الحلقة و في الاخر بينهزم بردو و ده هينمي في نفوس الاطفال فكرة انك تكون ضعيف لكن في النهاية هتتنتصر و ان القوي بينهزم في الاخر دايما.......يا سلام يعني بالزمة ده كلام يتقال ايه الكلام المتخلف اللي الناس بتقوله ده..اولا توم و جيري ده مسلسل دمه خفيف بنتفرج عليه علشان نضحك شويه و خلاص يعني حاجة كده كوميدي..ثانيا هل وصلت بينا الهيافة ان احنا نسيب المشاكل الحقيقية فعلا اللي بتواجهنا و نروح نعلق مشاكلنا على شماعة غبية زي الكلام اللي اتقال ده..ما اظنش يعني ان خلاص فرغت بينا المشاكل و متبقاش الا مسلسل كرتون هو اللي هيدمرنا..اللي هيدمرنا ان احنا ديما بنيجي في الهياف و نتنطط اوي و نتضايق و نتنرفز على حاجة اقل من ان تذكر اصلا انا مش عارف ليه بنبص تحت رجلينا و مبنبصش للصورة الكاملة امتى هنعرف ان مستقبلنا في التفكير السليم بأن احنا ننفض للكلام الفاضي ده كله و نبني نفسنا بالعلم و الايمان الكامل بربنا و قدرتنا على ان احنا نكون اسياد العالم ده كله بوحدتنا ذي ما كنا قبل كده..انا مش عارف ان كنت متحامل على الشخص اللي كتب الكلام ده ولا من حقي..ايه رأيكوا؟

و ده هيدفعني ان اكتب مثال تاني على الهيافة بتاعتنا بس هو قديم شويه و كان واحد بردو عامل موضوع كبير و بيقول الحق بسرعة امسح نجمة اسرائيل من على جهاز الكمبيوتر بتاعك طلع ان برنامج الاوفيس في صور الكليب ارت بتاعته من ضمن الصور ديه صوره نجمة اسرائيل و ممكن تمسحها عادي يعني...لكن المشكلة في ايه هو انا خلاص يعني لما همسحها كده ابقى حررت فلسطين..هل مشكلتنا متمثله في حته صورة على جهاز الكمبيوتر ولا تفريطنا في حقوقنا و ضعفنا

كنت مزنوق في الكلمتين دول بـس كده انا استريحت

منتظر ردودكوا..سلام

الريس جاي يا رجاله

يوم السبت الجاي اللي هيوافق يوم 10/2/2007 هيبتدي اسبوع شباب الجامعات و اللي هتستضيفه جامعة المنوفية طبعا انا شخصيا ميفرقش معايا الاسبوع ده او هما هيعملوا فيه ايه او حتى هو له لازمة اصلا ولا لأ..لكن اللي فارق معايا هو ان الريس جاي قال ايه هيفتتح المهرجان ده وهيقول خطاب تقريبا عن تعديلات الدستور او حاجة ذي كده يعني ما علينا يقول اللي يقولوا و يعمل اللي يعملوا لكن اللي نرفزني فعلا و عصبني جداً مع ان ده المعتاد التجهيزات اللي بيعملوها في البلد علشان موكب سيادته شوف بقى يا عم


طبعا الطرق يتحطلها اسفلت جديد ،صناديق الزبالة اللي فضيحتها بجلاجل على الطريق تتشال ، الكهربة و اشارات المرور تتصلح ، الاعلانات اللي متخزنة تتطلع وتتركب ، الرصيف كالمعتاد يدهن ابيض واسود ، الشارع يتغسل كل يوم المطبات الصناعية اللي في الارض تتشال و البيوت تتدهن من بره ابيض و الشجر يتغسل و كل القلق ده...ان بقى بصراحة عايز اعرف حاجة هو احنا مينفعش نكون شعب نظيف ابدا..ايه اللي هيحصل ان الشوارع تتنضف كويس كل يوم سواء في زيارة أو لأ ايه اللي هيحصل لما الرصيف يدهن مرة واحدة دهان نظيف محترم بدل ما بيدهنوا جير معفن يَدوب يقعد لحد فترة الزيارة و يختفي تاني او حتى يدهنوه ليه اصلا ايه اللي هيحصل لما الاشارات تتصلح على طول...الله يخرب بيتكوا هو انتوا متشتغلوش الا لما يكون في حد جاي انا مش فاهم احنا مخنا متركب ازاي


ده ناهيك طبعا يوم الزيارة نفسه اللي بيبقى يوم ما يعلم بيه الا ربنا طبعا الشوارع كلها بتتقفل شوارع ايه ده البلد كلها بتتقفل ده حتى الطريق السريع نفسه بيتقفل و بيفضوا البيوت اللي بتطل على الشارع اللي هيعدي فيه سيادته ده طبعا بعد ما يخدوا اسامي كل اللي في البيت حتى الاطفال منهم و الحرس يقف على سطح كل بيت و عربيات الامن المركزي اللي بتبقى بالعشرات...ايه ده كله يا عم انت داخل حرب من الاخر بيبقى يوم قلق يا ريت يا ريح نفسه و يريحنا و يخليه في بيته بلا شباب جامعات بلا بتاع...روح الاول شوف المسؤلين بتوعك اللي مبيشتغلوش الا في الزيارات..و عمار يا مصر.