Saturday, December 22, 2007

حدوتة لذيذة

السلام عليكم

اهلا بكل الناس و اهلا بيا في المدونة اللي سبتها تعيد براحتها و انا عيدت براحتي بردو المهم ايه اخبار الناس يا رب تكونو اتبسطوا و عيدتوا و كلتوا بردو لان اعتقد كان اهم حاجة الاكل في العيد ده بس يلا مش مشكلة المهم جاي احكي النهاردة موقف تحفة حصل معايا تالت يوم العيد قولت لازم اوثقه للتاريخ كدا

المهم ايه اللي حصل بئى و انا راجع من صلاة الجمعة و معدي بالصدفة على مخبز عيش المهم طبعا لقيت صف طويل كدا واصل لغاية نص الشارع و دا طبيعي الايام ديه و القلق اللي حاصل بسبب الدعم و الحوارات اللي انتوا عارفينها ديه مش هنخوض فيها يعني المهم لقيت واحد صاحبي واقف في الصف ده و مستني دوره علشان يشتري العيش فالمهم روحت سلمت عليه و كلمته و ازيك و اخبارك و بتاع فالمهم سألته سؤال طبيعي جدا و قولته امال انت واقف هنا من امتى ؟؟ فا الطريف بئى ان مش هوا اللي رد عليا و احد واقف قدامه في الصف ده هوا اللي رد عليا رد بصراحة عجبني جدا جدا جدا راجل كبير يعني فلقيته بصلي كدا مع ابتسامة خفيفة و بيقولي

احنا واقفين في الصف من ايام جمال عبد الناصر

بصراحة مقدرتش امسكي نفسي من الضحك و كلنا ضحكنا من جملته اللي اد ايه ليها مغزى و ليها مدلول بالرغم من ان الراجل قالها بابتسامة جميلة الا اني حسيت بالجملة و هي طالعة من جواه و بيقولها بحرقة اللي بيحاول يخفيها بالابتسامة ديه.. ياااه بنقف في الطوابير و الصفوف من ايام جمال عبد الناصر طبعا هوا مش يقصد ان هوا واقف في طابور العيش من ايام جمال عبد الناصر هوا يقصد الطوابير و الصفوف عموما اللي زهقنا و ملينا منها في كل مكان فيكي يا بلد

انا مش عايز اطول علشان احنا لسه طالعين من عيد و مش طالبة بؤس لكن تفتكروا

امتى هنبطل نقف في صفوف و طوابير حتى لو في مخبز للعيش ؟؟؟

سلام

Tuesday, December 18, 2007

كل عيد و انتوا طيبين


كل عيد و انتم طيبين و بخير و العيد الجاي تكونوا على عرفات بأذن الله

سلام

Posted by Picasa

Friday, December 07, 2007

Happy Birthday

كل سنة و انتي طيبة..انا بقول كدا للمدونة بسبب مرور عام كامل على انشائها لان زي النهاردة من سنة اخدت المبادرة اني اعمل مدونة خاصة بيا و اقول فيها كل اللي نفسي اتكلم فيه و افضفض بيه لان بجد من خلال المدونة ديه قدرت اخرج فيها كلام كتير كان في دماغي كنت عايز اشارك بيه و اعرف رأي الناس فيه مواضيع كتير كانت بتقلق راحتي و بتشغل تفكيري و اللي استريحت كتير جدا بعد ما كتبتها و شاركت الناس بيها و اللي بجد كانوا عامل مهم جدا بسبب اراءهم و مناقشتهم لي الكلام المطروح و اللي بجد استفدت كتير من افكارهم و خبراتهم سواء بتعليقهم على الموضوع او في مدوناتهم الخاصة و اللي من خلالها اتعرفت بناس قلما لما الواحد يلاقي زيهم حواليه.. في خلال السنة ديه قدرت اعيد تقييم حاجات كتير يمكن مكنتش واضحة قدامي و اللي حاولت على اد ما اقدر اني اشارك بيها علشان اعرف هل انا على صواب ام اخطأت..المهم خطوة انشاء المدونة ديه كانت خطوة مهمة بالنسبة ليا و ان شاء الله تعيش معايا لانها هتكون بمثابة عملية ثوثيق لكل اللي مريت بيه على مر حياتي فعلشان كدا بوقلك يا مدونة كل سنة و انتي معايا دايما

في النهاية احب اقول اني بعتذر عن انشغالي الفترة ديه لان الفترة ديه يمكن تكون فترة انتقالية مهمة محتاجة تركيز و وقفة (مش بتاعة العيد) لأعادة تقييم حاجات كتير يمكن تكون ليها الاثر على مجرى حياتي

تحياتي لكم جميعا

سلام

Monday, November 12, 2007

Pessimism VS optimism

اخيرا كتبت البوست ده اللي بصراحة اتأخر كتير جدا لكن الحقيقة كان نسبيا غصب عني لان الفترة اللي فاتت ديه كان فيها بعض الاحداث و المشاكل و الورق اللي كان لازم يخلص و اللي كان من ضمن الاحداث ديه كشف الجيش بتاعي اللي كان الاسبوع اللي فات و اللي الحمد لله اخدت فيها اعفاء نهائي بسبب النظر هما تقريبا قالوا يلا يا ابني من هنا الجيش مش ناقص قتلى و نظرك ما ينفعش لان ممكن تضرب في العساكر بتوعنا بدل العدو ولا حاجة ( هما طبعا مقالوش كدا بس انا افترضت كدا يعني ) هما بصراحة كانوا يومين مملين جدا و طوال جدا بس الحمد لله خلصت من الخطوة ديه لانها كانت مهمة و كانت كفيلة انها توقف زي ما بيقولوا المراكب السايره لان معظم اماكن العمل بتطلب الموقف من التجنيد و الحوارات ديه

طيب قبل ما نبدأ موضوعنا النهاردة عايز بس اعلن عن بدأ نشاط مدونة جديدة مدونة عملناها رغبة مننا في نشر نور لازم يضيء قلوب كل الناس نور يا رب يقدر و لازم يمس قلب كل شخص لان هوا النور اللي هيهدينا للخير في دنيانا و حسن مثوانا في الاخرة ايوه هوا نور الاسلام ، الدين القيم و المنهج اللي ربنا شرعه لينا علشان يكون اسلوب و منهج لينا في الحياة الدنيا و يكون منقذنا و وسيلتنا للنجاة من عذاب النار و قائدنا لجنات الخلد..في المدونة ديه عايزين نقول يا جماعة ان الاسلام دين يسر و ليس دين عسر عايزين مع بعضنا نبتدي نغير من تعاملتنا في الدنيا بمنهج سوي و قلوب و عقول سليمة عايزين نبتدي مع بعض صفحة جديدة مع نفسنا و مع ربنا علشان يكون لينا المعين و القائد و نورنا في الحياة..يارب قدرنا على طاعتك و حسن عبادتك...فمعا بنور الاسلام نتقرب الي الله

جميل جدا..دلوقتي بئى نبدا نتكلم على الموضوع اللي كنت عايز اتكلم عليه من فترة كبيرة و الحقيقة ان في الفترة اللي فاتت ديه حصل الكثير من المواقف اللي زودت عندي الرغبة في الكتابة عن الموضوع ده و من احد اهم المواقف ديه لما كنا في قعده كدا و جاء صديق ليا و قلي انت نظرتك للحياة تشائمية و ده مش شيء كويس..الحقيقة ان الراجل ده لما قلي الكلام ده مغلطش لا الحقيقة ان المشكلة مش فيا المشكلة في الدنيا اللي احنا عايشيين فيها و الحقيقة انا اجلت مناقشتي معاه لغاية ما ينزل البوست ده اللي عايز اوضح فيه الحتة بتاعه التشاؤم و التفاؤل و الحوارات ديه

اولا ليه اصلا الانسان بيكون متشائم اكيد لما بيشوف ان الحاجات اللي بتحصل قدامه في الدنيا مش كويسة و مش بس كدا دا كمان لا تبشر بالخير في المستقبل و ان الاحداث اللي بتحصل قدامنا في الحياة متديناش سبب علشان نتفائل ان الوضع القائم ده هيتحسن او يتغير بالرغم من رغبة الشخص ده الداخلية في ان الوضع ده لازم يتحسن للاحسن

الا ان دايما في مشكلة بالنسبة للموضوع ده و الكل دايما بيغفلها و هي ارتباط التشاؤم بالواقعية بمعنى ان سيدي الفاضل اني مثلا احب اشوف نفسي او نظرتي للحياة ديه اللي انت ممكن توصفها على انها تشاؤمية انا افضل اني اوصفها بانها واقعية لان زي ما قولت ان الواقع اللي بنعيشه غالبا ما بيفرض علينا شعور نفسي ما ، اللي بعض الناس بتحب تشوفه من ناحية ايجابية و ان الاحداث ديه مثلا ان شاء الله الى زوال و الخير جاي و ديه بتبئى نظرة تفاؤليه للحياة و بعض الناس بتحب تشوف للاحداث ديه ممكن بنظرة سلبية او تقدروا تقولوا بسواد و ان المستقبل مظلم لان الوضع الحالي او الواقع بيقول ان المستقبل لا يبشر ابدا بالخير و الحقيقة ان الاتنين نقدر نعتبرهم نظرتين مختلفين للحياة و احب ان الناس هنا تفصل بين التشاؤم ده و التشاؤم اللي هوا بمعنى التطير او الطيرة لان مش ده المقصود هنا لان تشاؤم التطير ده حاجة تانيه

علشان اوضح اكتر احب اتكلم في نقطة كمان يمكن توصل للناس انا عايز اقول ايه او ايه المعنى اللي انا اقصده و عايز اوصله و ان دايما في هناك مقوله الحقيقة بعتبرها مقولة غبية و هي بتقول يا عم انظر لنصف الكوب المليان او نص الكوباية المليان و متبصش للنصف الفارغ و ده في تشبيه بان بان انظر احسن للجانب المشرق و متبصش للجانب المظلم للموضوع طيب و ليه يا بشر انظر لنصف الكوبايه المليان اللي هوا المفروض لازم يكون مليان اصلا طيب ما انا انظر لنصف الكوب الفارغ و اعرف هوا ليه فارغ لان المشكلة هنا مش في النصف المليان المشكلة هنا في النصف الفارغ و ازاي اقدر املاه و اشوف ايه الاسباب اللي ادت ان النصف ده يكون فارغ علشان اقدر املا الكوبايه كلها و ما اكتفيش فقط بوجود النصف المليان منا ممكن لما اشوف النصف المليان ده افقد الدافع اللي هيدفعني لملأ النصف الفارغ من الكوب ( يارب يكون حد فاهم حاجة ) و ياريت ميجيش حد يقولي ما تكتفي بالنصف المليان و احمد ربنا على اللي معاك طبعا ربنا بنحمده في كل وقت و راضيين و شاكريين بما قسمه لينا لكن ليه نتوقف و نكتفي بشيء او مرحلة معين و نقول كويس كدا طالما نقدر نوصل بيه لاعلى حاجة نقدر نوصلها ( كدا هنرجع لأيه لو شاطرين ؟ ) ..انا حبيت اذكر بس المقوله ديه لان دايما بيضرب بيها في الجزء بتاع النظرة التشؤمية و التفاؤلية و ياريت تكون الجزء ده وضح انا اقصد ايه او يكون المعنى اللي عايز اوصله مفهوم علشان ميتفهمش بس غلط

طيب الحقيقة ان النظرة التشاؤميه ديه او اسمحولي استبدلها بالنظرة الواقعية ديه للحياة لطالما كانت هي في مكاناها لان العالم كل شويه بيثبت ان اصحاب النظرة الواقعية ديه بيكون ليهم الغلبه لان احساسهم بالواقع بتثبته الايام يوم بعد يوم يعني مثلا اوضحلكوا انا اقصد ايه في بعض المقولات اللي وردت على لسان كثير من الناس علشان هنقدر منها نخرج بالمعنى اللي عايز اوصله بمعنى الواقعية اللي اقصدة مش التشائمية

واحد قال الكلمة ديه و الحقيقة من خلالها عايز اوضح نقطة مهمة جدا جدا

" The nice part about being a pessimist is that you are constantly being either proven right or pleasantly surprised. "

و هوا عايز يقول ان احسن حاجة في كونك متشائم على حد وصفه ( واقعي على حد وصفي ) انك دايما و باستمرار ياما بتثبت انك على صواب او انك بتدهش بسرور او بتتفاجأ بسرور و الحقيقة انا عايز اقول ايه ان الواقعي ده لانه شايف ان الواقع ده لا يبشر بان هيحصل حاجة كويسة و ان اللي جاي هيكون اسوأ و هوا قال كدا بناء على نظرته للواقع فلما ييجي فعلا الاسوء يحصل هيكون فعلا دايما على صواب لان هوا كان متوقعه بسبب الاحداث الحالية لكن الجزء الاجمل بئى ان لو الاسوء ده محصلش هيندهش بس هيندهش بسرور و يكون فرحان لان هوا اصلا مش نفسه ان الاسوء ده يحصل بس الواقع بيقول كدا فلما يحصل حاجة كويسة هيكون هوا سعيد لاني انا افرحلك يا راجل لما حاجة كويسة تحصل بالرغم من انها مكنتش مثلا متوقع حدوثها و عايز كمان بئى اربط بالجزء ده حاجة من اقول العرب قديما على لسان واحد اسمه الحليمي لما قال " التشاؤم سوء ظن بالله تعالى بغير سبب محقق، والتفاؤل حسن ظن به، والمؤمن مأمور بحسن الظن بالله تعالى على كل حال " خدوا بالكوا من حتة بغير سبب محقق ديه لان انا لما هشوف الواقع ولا اتفائل خير فهناك اسباب لذلك يعني حاشا لله مش هسيء الظن ابدا بربنا لان ربنا اصلا هوا ملاذنا الوحيد و كل شيء باذن هو بامره و كلنا لازم يكون عندنا حسن الظن بالله لكن في النفس الوقت احنا امُرنا باننا ناخد بالاسباب علشان كدا لما اتوقع الاسوء يبئى ما اسأتش الظن بالله و يمكن اكون اخذت بالاسباب

و اللي جايه ديه كمان مقوله بتوضح ان بردو اللي له النظرة المتشائمة ( الواقعية ) ديه غالبا ما يساء ظنه لان غالبا ما بيصدق توقعاته في النهاية و كانت بتقول

"A pessimist is never disappointed."

و يمكن بردو يكون وجهة نظره صحيحة لان زي ما قولت غالبا ما بتصدق التوقعات ديه لان ده حال الدنيا

اما المقولة اللي جاية ديه عجبتني اوي اوي بصراحة و كانت بتقول

"The difference between an optimist and a pessimist? An optimist laughs to forget, but a pessimist forgets to laugh."

وهي بتقول ان الفرق بين المتفائل و المتشائم ان المتفائل بيضحك علشان ينسى انما المتشائم ( الواقعي ) نسي ان هوا يضحك و ده بيبين الفرق بين الاتنين و عن حالة المتفائل اللي بردو الدنيا ما انصفتوش في نظرته التفائليه و بيضحك على ينسى كل اللي بيشوفه اما المتشائم ده فنسي يضحك اصلا بسبب الهموم اللي شايلها على اساس النظرة السوداوية الواقعية اللي غرقان بيها حتى اذنيه في الدنيا ديه ( فلا عجب ان الناس استغربت و قولولي بتحب الفرح زينا - لا تعليق ) هنفرح ازاي و مفيش حاجة بتثبتنا و بتمسكنا بالدنيا غير حاجة واحدة بس و هي زي ما اتفقنا حسن الظن بالله سبحانه و تعالى و اللي بيدينا امل احسن في بكره

لكن الحقيقة علشان اكون منصف ان حتى النظرة الواقعية ديه او التشائمية زي ما تحبوا تسموها ممكن فعلا تكون سبب في انها تدي يأس و تحبط الشخص في ان هوا يستغل فرص قدامه و يرفضها بغباءه بسبب ان شايف ان الوضع نحس فعلا و ده بالظبط هوا سوء الظن بالله و عدم التوكل عليه و الحقيقة اللي ممكن توضح كدا مقوله عجبتني بردو و هي لي هاري ترومن لما قال

"A pessimist is one who makes difficulties of his opportunities and an optimist is one who makes opportunities of his difficulties."

و بيقول ان المتشائم هوا الشخص اللي بيعمل عقبات و صعوبات للفرص اللي جياله و ممكن ينتهزها بينما المتفائل هو اللي بيعمل فرص ممكن ينتهزها من الصعوبات و المشاكل اللي ممكن تقابله بالرغم من كلامه ده بردو في حد ذاته نظره تفاؤليه مش واقعية

بالرغم من ان الناس مش عجبها اني بطول بس لازم اطول علشان اوضح بالظبط اللي اقصده و اللي عايز اقوله و الله انا مش متشائم انا افضل اني اشوف الواقع و الاسباب و اتحرك و افكر على هذا الاساس اه يمكن اكون كئيب حبتين بس مش متشائم علشان كدا بحب اقول انا يمكن يكون اصحابي بيقولوا عليا متشائم لكن انا احب اقول على نفسي واقعي و في نفس الوقت انا متأكد ان محدش عنده كمية الامل اللي انا بنظر بيها للدنيا انها ممكن تيجي في يوم ممكن تكون مكان احسن لينا كلنا علشان كدا سيبكوا بئى من مقولات الناس اللي فاتت ديه كلها و اقول انا كلمتي خذوها على لساني زي ما انا شايف الموضوع ده و احب اقول

المتشائم ما هو الا شخص متفائل و لكنه اكثر واقعية

احب اسمع رائيكم في الموضوع و سورري على الاطالة

سلام

Sunday, October 14, 2007

انا اُدون للبيئة


بسم الله الرحمن الرحيم



النهاردة يوم 15 اكتوبر و النهاردة يعتبر يوم عالمي للمدونين طبعا انا على يقين ان الكثير من المدونين ميعرفوش اصلا اليوم ده بتاع ايه لكن اقولوكوا انا اليوم ده بتاع ايه...شوفت الموضوع ده على موقع بلوجر نفسه في
البلوج بتاع بلوجر المهم الحملة ديه عبارة عن يوم عالمي هيجتمع فيه اكتر من 14000 مدونة على مستوى العالم علشان يتكلموا عن موضوع واحد وهوا موضوع البيئة عايزين يخلوا المدونين كلهم يجتمعوا في اليوم ده و كل واحد يشارك بموضوع متعلق بالبيئة و يوصل لمستمعيه اهمية الحفاظ على البيئة ديه اللي كلنا عايشين فيها و اللي باتت مهددة فعلا بسبب افعال البشر زي مهنتكلم دلوقتي فبصراحة حبيت اني اشارك مع الناس دول بان احنا لازم نوصل رسالة للناس اللي بتقرالنا و على فكرة ديه المرة الاولى اللي بتنظم فيها الحدث ده و هيتكرر كل سنة...فعلشان كدا بوست النهادره هنتكلم فيه على البيئة بتاعتنا و ندردش شويه عنها و اللي عايز يعرف اكتر عن الحوار ده يا أما يدخل على الموقع بتاع الحدث ده او ممكن تشوفوا الفيديو ده اللي يعتبر برومو عن الحوار ده كله




طيب..اولا زي ما احنا عارفين بالنسبة هنا لبلدنا الجميلة ديه ان احنا شعب جاهل (متفهمونيش غلط) اقصد ان احنا شعب تقريبا عنده جهل بيئي بان ازاي نحافظ على بيئتنا و نحميها من التلوث و ايه الطرق اللي ممكن نحمي بيها البيئة ديه و بعدين اصلا لما نفك جهل الامية بتاع القراءة و الكتابة نبئى نبص للجهل البيئي علشان نحل مشكلتة و ديه قضية تانيه سيبنا منها دلوقتي اللي اقصده مثلا لو سئلت واحد و تقلوا ازاي بتحافظ على البيئة هيقولك زي مهو مكتوب على الشيبسي من ورا حافظوا على نظافة مدينتكم و انه يرمي الكيس بعد كدا في الزبالة و تلاقيه في الاخر اصلا بيرميه في الشارع ممكن يكون ده اقصى علم عنده بالمحافظة على البيئة و بعدين له حق اصل مين اللي هيوعيه لكن بردو عليه غلط ان اذا ملقاش حد يوعيه لازم يسعى بنفسه و يعرف ازاي يقدر يحمي و يساهم في الحفاظ على البيئة اللي هوا عايش فيها


لكن يبدو ان احنا عندنا مشكلة عويصة اوي و ديه بئى فينا كلنا كبشر ان احنا عايشين في الدنيا ديه و فاكرين ان احنا ملناش تأثير على المكان اللي احنا عايشين فيه او على الكوكب كله حتى لان الناس فاكرة ان الكوكب اكبر من احنا ممكن نأثر على كوكب بالحجم ده لكن للاسف ده مش صحيح احنا لينا تأثير سلبي جدا على كوكب الارض و بدأ يتجلى التأثير ده في بما يسمى بالاحتباس الحراري و اللي هوا ببساطة ظاهرة بيحصل فيها ارتفاع لدرجة حرارة الارض بسبب زيادة نسبب بعض الغازات الضارة للغلاف الجوي زي ثاني اكسيد الكربون و الميثان مثلا و الغازات ديه طبعا سببها نشاطات الانسان اللي بيقوم بيها من صناعة لعوادم السيارات لعدة اسباب تانيه بتساهم كتير جدا في زيادة نسب الغاز ديه وده شرح بسيط للظاهرة ديه و الظاهرة ديه الحقيقة هتتسبب مشاكل كتير جدا جدا لو احنا كبشر مبدأناش ناخد بالنا من الظاهرة ديه لانها هي السبب في التغيرات المناخية اللي بدأنا نشاهدها زي الزيادة الملحوظة في عدد الاعاصير و الاضطرابات اللي بقينا نشوفها في الفصول المختلفة في مواعيدها و الفيضانات اللي بتجتاح العالم دا غير طبعا ذوبان الاقطاب بسبب ارتفاع درجة الحرارة و ده بدوره هيؤدي الي غرق الكثير و الكثير من المناطق المنخفضة بالنسبة لمستوى سطح البحر دا غير طبعا زيادة ظاهرة اسمها ظاهرة النينيو و الظاهرة ديه مشكلتها انها تعمل فيضان و اعاصير في مناطق و تلاقيها عملت جفاف و قحط في اماكن تانيه و ده هيسبب زيادة المناطق الجافة جفافا و بالذات طبعا في القارة الافريقية علشان تتبهدل اكتر مهي متبهدلة اصلا فطبعا هتجف منابع الانهار و ده هيهدد مناطق كتيرة مش بقلة الميه بس و بقلة الغذاء كمان

طبعا ده كلام بسيط عن اللي ممكن يحصل و الكلام اللي فات مش كلام هرتله دا كلام عن دراسة و علم من اكثر علماء الارض خبرة و الناس دول اكثر الناس صدقا لانهم بيتكلموا بالارقام مش من فراغ او ده بالنسبة ليا على الاقل..لمن ان مش عايز اتوغل في قصة الاحتباس ديه لان ممكن نفردلها موضوع لوحده لكن كنت عايز القي الضوء بس على مدى اثر الانسان و نشاطاته عل الارض و اد ايه الضرر ممكن يكون كارثي

طيب ايه اللي ممكن نعمله اقولكوا ممكن نعمل كتير لكن بالنسبة لينا في مصر ممكن متفرقش اوي لان احنا اسهاماتنا في الثلوث المسبب للظاهرة العالمية ديه ضئيل مش زي دول تانية مثلا زي امريكا و الصين و الاتحاد الاوربي و اليابان لكن ده مش معناه ان احنا معندناش تلوث لأ مصر من اكثر الدول اللي حالتنا حالا دا كفاية القاهرة لوحديها اللي تعتبر من المدن شديدة الكثافة السكانية و شديدة التلوث كمان و طبعا التلوث ده مش قاصر على التلوث في الجو دا تلوث في الجو و البر و البحر و تحت الارض و في كل حتة بسم الله ما شاء الله يعني و اكيد طبعا ان الحكومة ليها دور كبير جدا في كدا بس مش معنى كدا بردو ان احنا كبشر منقدرش نتصرف في حدود المتاح لينا يعني مثلا الاقتصاد في استهلاك الكهرباء مثلا ممكن الناس تقولك ايه يا عم انت خايف من الفواتير ولا ايه هقولوا يا سيدي ابدا لانك لما انت بتقتصد في استهلاك الكهربا هتقلل من الكهربا اللي انت بتسحبها و بالتالي لما الناس تعمل كدا هتجبر الشركة المنتجة للكهربة انها تقلل من انتاجها ده و اللي بتستخدم في انتاج الكهربة ديه البترول اللي بيكون عامل مهم في تلوث الجو فشوف لما كلنا نقلل من استهلاك الكهربا هنساهم بشكل غير ملحوظ في نظافة الجو اللي كلنا بنستنشقه و له تأثير كبير على صحتنا و مش معنى كدا اني بقولك متستخدمش كهربا لا استخدم زي ما انت عايز لكن للي ضروري و اللي انت محتاجة فعلا زي متشغلش الاضاءة في الاوض اللي انت مش قاعد فيها و اظبط التكييف على درجة مرتفعة نسبيا و متشغلوش بردو في الاوض اللي انت مش قاعد فيها يعني و الحقيقة في امثلة كتير ممكن تقولك ازاي تقتصد في الاستهلاك ده و الحقيقة ان الحكومة ليها دور في التوعية ديه و خير دليل على كدا اللي عاملاه دولة عربية اللي هي الكويت لو كنتوا بتابعوا الفضائية بتاعتها كنت هتشوف ده فز ماقولتلك بعض النشاطات اللي ممكن نعملها ممكن تفرق جدا في نظافة المحيط اللي حوالينا

طيب ممكن نعمل ايه كمان ممكن نهتم بالزراعة ايدينا في ايد الحكومة بين قوسين طبعا و ايد الناس اللي ممكن نقوم بيها بتشجير اماكن كتير ممكن تكون مستنقعات او اكوام زبالة لمناطق خضرة اللي اكيد هتساهم في نظافة البية سواء بالنسبة للتارب من الجو او امتصاص ثاني اكسيد الكربون و تقليل التلوث السمعي دا غير طبعا المنظر الجمالي اللي بيضفيه المناطق الخضرة على المكان علشان كدا العالم كله دلوقتي بئى يتجه لزيادة الخضرة و ده كان شعار يوم البيئة العالمي السنة اللي فاتت او اللي قبليها تقريبا و ده بردو اللي قدرت تحققه دولة عربية بحترمها جدا هلي الامارات مش فاكر فين بالظبط في دبي ولا ابو ظبي بس قدرو فعلا يحولوا مناطق صحراوية كبيرة جدا لخضار و اتمنى ان احنا نعمل حاجة زيهم

طيب ممكن نعمل ايه كمان اه و الله ممكن نبص بردو للزبالة بتاعتنا اللي بتتاخد (دا اذا كانت بتتاخد اصلا) و بعد كدا بتتحرق و تتسبب في تلوث الجو بطريقة فظيعة ممكن بئى نبئى زي الناس المحترمة و ناخد على ايد بعض الافكار اللي موجودة فعلا و نهتم ببما يسمى باعادة التصنيع يعني دلوقتي ناخد كل حاجة على كدا زي الزجاج و البلاستك و الورق و نعيد تصنيعهم لان اللي ممكن كتير من الناس ميعرفوش ان اعادة التصنيع ده مش بس بيخلينا نعيد استخدام الحاجة القديمة و بس دا بيوفر كتير جدا جدا في الطاقة اللي هتستخدم اصلا لتصنيع الشيء ده من جديد لان الطاقة ديه زي ما اتفقنا بتتاخد من اللي بينتجوها و خلاص احنا عرفنا انتاجها بيسبب ايه في باعدة التصنيع هنحقق نقطتتين مهمين جدا جدا و هما ان احنا اتخلصنا من الزبالة بطريقة نضيفه جدا جدا جدا بدون اي ضرر و في نفس الوقت قدرنا نوفر طاقة كتير جدا كانت هتستخدم في تصنيع الشيء ده من البداية و للاسف في دول العالم المتحضر قامت صناعات باكملها على فكرة اعادة التصنيع ديه لكن اتمنى انها تتاخد في مصر على حجم اكبر من كدا بدعم حكومي علشان توفر على نفسها كتير لان للاسف لو عندنا حكومات واعيد هتعرف ازاي تتخلص من مشكالها اللي هي الزبالة و توفر من طاقتها اللي بتتفع فيها فلوس اللي هي الكهربه و تشغل شبابها و بالتالي هتقلل من البطالة لان الحوار محتاج ايادي عاملة كتير لكن طبعا انتوا عارفين حال البلد اللي احنا عايشين فيها اللي حتى الزبالة مش عارفين يلموها ازاي اصلا مع ان ممكن تتحل هوا لو اعتمدت على الشعب حق الاعتماد

للاسف في حاجات كتير ممكن نقوم بيها لكن للاسف في الغالب بتكون فيه هيئة ما مسئولة عن التوعيه و انها تاخد بايد الناس لكن بردو احنا في النهاية لينا رب اسمه الكريم (حكومة بتفهم من عندك يا رب) للاسف ان عايز اكتب كمان عن الطرق اللي ممكن نحاول بيها ان احنا نحافظ على بلدنا و المكان اللي عايشيين فيه لكن كل ما اشوف حاجة الاقي ان احنا بعاد جدا عن ان احنا نحقق حاجة زي كدا لان للاسف ازا كنا محتاجين حكومة واعية فبردو عايزين كمان شعب واعي يعرف ازاي يتأقلم مع المتغيرات ديه و ايديهم في ايد بعض يحققوا المستحيل فحتى دا كمان مش شايفه

طبعا البوست ده ممكن يكون غريب عن الحالة العامة لغالبية الناس ممكن يستغربوا حتى انا ليه بكتب في حاجة زي كدا الا اني انا من المهتمين بالقضايا العالمية ديه و بتابع دايما اخر الاخبار عن كل الحاجات ديه لان احنا كلنا بشر كلنا راكبين نفس المركبة لو مخدناش بايد بعض المركبة ديه مش هتمشي دا بالعكس هتخرب مننا و هتخرب في الاخر و المركبة ديه طبعا اللي هيا كوكب الارض لازم نوحد جهودنا علشان نقضي على كل ما يعكر صفو الحياة على سطح الارض بالظبط زي ما عملنا مع طبقة الاوزون و اللي بفضل الجهود العالمية بدأ الثقب ده فعلا في التقلص ايوه نقدر نعمل كتير احنا بشر ربنا ادانا حاجتين مهمين الارض اللي عايشين عليها و اللي سبحان من خلق لو تعرفوا اد ايه قدرة الكوكب ده على التكيف مع الظروف اللي بيمر بيها لكن للاسف مبقاش يقدر لان احنا كبشر بئينا قاسيين عليه اوي و ربنا وهبنا بردو العقل اللي قدرنا بيه ان احنا ندرك كويس المشاكل ديه و كمان المقدرة ان احنا نقدر نعرف الحلول للمشاكل ديه ولا احنا دايما كدا بنتكلم بس و بنكر بس و مفيش فعل لأ في ناس شغالة و ناس بتنام و تصحي على المشاكل ديه و جل تفكيرهم في انهم يوصلونا لبر الامان علشان كدا بحمد ربنا على وجود ناس زي ديه و ان مش كل العالم زينا في مصر و بدعيلهم ان ربنا يديهم على اد نيتهم و يوفقهم و يزدهم علم على علمهم

انا اتكلمت كتير و صدقوني ممكن اتكلم اكتر و اكتر لولا ان الساعة داخله على تلاته بعد منتصف الليل و عايز انام بصراحة لان ضهري وجعني من كتر القاعدة و الكتابة لكن اتمنى اني مجهودي ده ميروحش هباء و يستفاد بيه ولو حتى شخص واحد عموما الموضوع مفتوح للنقاش و ابداء الاراء المختلفة و في النهاية احب اقول اني سعيد بمشاركتي في اليوم العالمي للمدونين للبيئة و اتمنى اني اكون على اد الحدث..يلا كفاية عليا و عليكوا

سلام

Saturday, October 13, 2007

عيد سعيد

بسم الله الرحمن الرحيم


كل سنة و انتوا طيبين و عيد سعيد علينا كلنا ان شاء الله و اسف ان كنت مشغول اليومين دول عن الناس الحلوين دول لكن ان شاء الله هيكون لينا كلام كتير و كلام كبير اوي اوي بس بعد اما كلنا نعيد..يلا اسيبكوا دلوقتي...سلام و كل سنة و انتوا كلكوا بخير و سعادة


سلام

Saturday, September 29, 2007

يا حسرة علينا


و انا بمتشى كدا على مواقع الاخبار كالمعاتد لقيت موضوع لذيذ اوي شدني بصراحة و الموضوع دع بتكلم على العلكة ( ايوه اللي هي اللبان مهو اللبان يعني علكة بالفصحى ) المهم ايه حوار بئى اللبان ده بيقولك يا سيدي ان العلماء توصلوا لنوع جديد من اللبان نوع مبيلزقش جامد و سهل تنضيفه و بيدوب في الميه بسرعه علشان لما ييجوا عمال النضافة ينظفوا اللبان اللي لازق على الارض او الرصيف يطلع معاهم بسرعة ( اه اه متستغربش عمال النظافة هناك بينضفوا اللبان اللي لازق على الارض ) المهم ليه بئى الحوار ده بيقولك يا سيدي ان الدول في العالم بتصرف فلوس كتير على تنظيف اللبان من الشوارع بس يعني مثلا بلد كدا في لندن قالت انها بتصرف في حدود 100000 الف جنيه استرليني علشان تنظيف اللبان ده و بلد تانه زي اوكسفورد بتصرف حوالي 45 الف جنيه استرليني على الحوار ده ...طيب دلوقتي انا عايز اسأل سؤالين مهمين جدا جدا جدا


اولا ايه اللي يخلي المدن ديه تصرف الفلوس ديه كلها على تنظيف اللبان ده من على الرصيف ؟

ثانيا ايه اللي يخلى العلماء دول يتعبوا دماغهم علشان يخترعوا اللبان ده ؟ثانيا ايه اللي يخلى العلماء دول يتعبوا دماغهم علشان يخترعوا اللبان ده ؟




طيب اجاوب عن السؤالين دول من وجهة نظري طبعا بالنسبة للسؤال الاول ان ليه المدن ديه تصرف الفلوس ديه على حاجة زي كدا ؟ انتوا عارفين انا لو حكيت الموضوع ده لاي بني ادم من البني ادمين اللي حوالينا يعني ابسط حاجة هيقولي يا عم سيبك دول عالم هايفه شوف بيصرفوا فلوسهم على ايه فا هرد على سيادته و اقوله ايوه يصرفوا فلوسهم على تنظيف اللبان من على الارض اللي ممكن سيادتك تشوف ان حاجة زي ديه متفرقش معاك لان على الارصفة بتاعتنا اصلا ( طبعا بعد ما نحمد ربنا على وجود الارصفة ) ان لزق اللبان حاجة بسيطة لان عندنا بتلاقي على الرصيف حاجات غريبة تلاقيها لازقه على الارض دا حتى ممكن تلاقي بني ادمين او حاجات تانيه كتير و مش عايز اكمل بصراحة علشان مش ناقصة قرف المهم فالبلاد ديه صرفت على كل حاجة و مهتمة بكل حاجة تمس نظافة مدنهم حتى لو كانت على اللبان اللي ممكن يكون لازق على الارض فدول ميبقوش ناس هايفة دول يبئوا بني ادمين محترمين غيورين على نظافة مدنهم حتى لو كانت من مجرد لبان...الا اني طبعا هكون ظالم لينا بالتأكيد اذا حاولت اقارن بينا و بينهم لاننا ابعد ما نكون من حاجة زي كدا لان احنا قدامنا حاجات كتير عايزه تتصلح و تتنضف و منهم الناس طبعا قبل ما نحاول ننضف الارصفة نفسها





اما عن اجابة السؤال التاني ان ليه العلماء دول بيتعبوا نفسهم انهم يدوروا على حل للبان ده و يخترعوا لبان مبيلزقش لان ببساطة سورري يعني ما يتحرق اللبان اللي يخلي ناس زي دول يقضوا مئات الساعات و ينفقوا الالاف و الالاف من الاموال في الابحاث اللي هتمكنهم انهم يوصلوا لحل للمشكلة ديه...اولا لان زي ما دول بيعملوا ابحاث على اللبان علشان يحلوا المشكلة ديه في كتير غيرهم من العلماء بيدرسوا للحاجات اللي ممكن احنا نشوفها اهم من الابحاث على اللبان و اللي بتكون على مختلف نواحي الحياة غير انا اذا احنا شوفنا ان ديه حاجة ملهاش لازمة لأ ليها لان حاجة زي كدا هتحل مشكلة نظافة المدن و هتوفر على بلديات المدن ديه الاموال اللي ممكن تصرفها على تنظيف اللبان و تصرفها على حاجة تانيه ( ممكن يشتروا بيهم لبان من اللي مبيلزقش و يوزعزهم على الفقرا ) و الفلوس ديه على فكرة هي اللي سجعت العلماء دول علشان يدوروا على حل للمشكلة ديه علشان يوفروا على بلادهم الاموال ديه لغاية منجحوا في النهاية للي عايزين يوصلوله




طيب محدش سألني انت ليه بتتكلم عن موضوع زي ده اصلا...طبعا بتكلم في موضوع زي ده علشان اقول الناس ديه مش هايفه الناس ديه علشان حاجة زي كدا بقوا دول متقدمة و الناس ديه طالما شايفة شغلها هيفضلوا في المركز اللي هما فيه و احسن كمان و ابدي اعجابي الشديد بالعقلية اللي الناس دول بيتاعملوا بيها مع كل حاجة حتى لو كانت اللبان و النظافة...و احب في النهاية اقول كمان بعد ما عرفنا مستوانا من مستواهم ياااا حسرة علينا

سلام

Friday, September 21, 2007

ِِAm I or are the others crazy ?

ياااه و حشتني المدونة و وحشوني الناس اللي انا زعلان اني مش متابعهم بس للاسف غصب عني يعني هوا بسبب كذا سبب مش بسبب واحد و سبق اني ذكرت الاسباب ديه في بوست سابق علشان كدا بعتزلهم ان كنت اتأخرت في الرد عليهم المهم في البداية قبل ما ادخل في الموضوع اللي مضايقني اليومين دول عايز اعمل اعلان. هوا اعلان عن مدونة جديدة مازلت في اطار البث التجريبي زي ما بيقولوا لان لسه محتاجة شويه تعديلات و تظبيط و اسمها مدونة عذب الكلام

المدونة ديه اشتركت فيها مع اصدقاء ليا اللي انا سعيد بالصداقة ديه لان معاهم حققت اللي مكنش ممكن احققه لوحدي ابدا و بردو ليا كانوا بمثابة عامل نفسي حفزني على اني اكون اكثر اصرارا على تحقيق ما ارغب في تحقيقه و احب اوجهلهم الرسالة ديه ان اد ايه انا سعيد فعلا بصداقتكوا ديه اللي شرفتني فعلا فتحياتي لكم جميعا..المهم المدونة ديه هتكون خاصة للشعر او النثر و خصوصا بعد ما اتفاجئنا بان معانا ناس موهوبة فعلا في كتابة الشعر الا ان طبعا مش كل القائمين عليها ليهم في كتابة الشعر فطبعا اللي ملوش في الكتابة زي حالاتي كدا هيكون مشاركته بالقصائد اللي اعجبته في اي مكان لاي شاعر و ربنا يوفقنا في ان احنا نعمل حاجة كويسة

اما الاعلان التاني فهوا عن ان واحد من الموهبين اللي معانا في مدونة عذب الكلام و اللي اسمه محمد انشأ مدونته الخاصة علشان يكتب فيه اشعاره الجميلة و اللي انصحكم بقرايتها لانه فعلا جميلة جدا و اد ايه كلها احساس و المدونة اسمها حياة قلب و عينان

اما بئى عن الموضوع اللي عايز اتكلم فيه و اللي هوا مضايقني فعلا ان اد ايه انا كنت غلطان في حاجات كتير او بصراحة معرفش هل انا كنت غلطان ولا الناس هي اللي المفاهيم عندها ملخبطة لدرجة تخلي الواحد مش فاهم حاجة فعلا فالفترة اللي فاتت ديه شوفت حاجات كتير خلتني بصراحة واقف حيران و بشد في شعري و الحاجة ديه عبارة عن الناس بتعمل حاجات و تصرفات غريبة و على اعتقاد منهم ان الحاجة اللي بيعملوها ديه صح او بمعنى اصح مش صح انما هما ممكن ميكنوش عارفين انها ممكن تكون غريبة او مش غريبة انما فاكرين ان الناس مش شايفه او مش مدركة التصرفات ديه…و علشان منتوهش و توهوا معايا نضرب مثلا مثال على التصرفات ديه الانحياز مثلا لشخص ما او شيء ما على حساب الاشخاص او الاشياء الاخرى بمعنى ان في بعض الناس بتنحاز في حاجات معينه تجاه شخص ما سواء في اقواله او افعاله و معتقدين ان مفيش حد شايف ان في انحياز للبنى ادم ده مثلا..فالسؤال هنا هل من حق الشخص او من حق اي شخص الانحياز لشخص ما على حساب مجموعة ما ولا مش من حقه طالما اقر بضرورة المعاملة السويه بين كافة البنى ادمين…عارف و الله لأ الكلام مش غريب ولا حاجة اصلها بجد حاجة تنرفز و علشان تكونوا مدركين النقطة ديه هطلب منكم قياس الشيء ده على تصرفات الناس اللي حواليكوا و اللي انا مدرك انكوا هتلاقوا عينه من الناس ديه في كل مكان

قبل ما اكمل احب اوضح نقطة مهمة جدا جدا جدا اني بكلامي على الناس و كلامي عن نقائصهم لا انفي بالمرة احتمالية اني اكون انا واحد من الناس دول لاني بكلمي عليهم فانا لست بمنزه عن الخطأ او العيوب و انما انا بشوف المشاكل اللي بشوفها قدامي موجودة في مجتمعنا و بحللها و ممكن اكون ان واحد من اللي فيهم المشكلة او بيسببوا المشكلة ديه و بحاول اوصل لحل منطقي او فهم معقول اقدر ابرر بيه تصرفات الناس على هذا النحو و اذا لقيت اني واحد من الناس دول بحاول اني اصحح من نفسي بناءا على الفهم اللي خرجت بيه من تحليلي للتصرفات ديه و اللي غالبا لا اجد لها تفسيرا منطقيا سوا انها مجرد طبيعة البشر

المهم سيبكوا من حته الانحياز ديه و خلونا نتكلم عن نقطة تانية بردو بقت تايه جدا بين الناس و بعضيها و لدرجة انها بقت تأثر حتى بين الاصدقاء و بعضيهم و النقطة ديه اثيرت الفترة اللي فاتت ديه كتير جدا و من ناس كتير الا و هي الثقة...ايوه الثقة بس للاسف في كل المرات اللي ذكرت فيها كلمة الثقة بين الناس كانت مرتبطة معاهم دايما بانعدامها و ليست بوجودها بمعنى ان للاسف الثقة بئت مفقودة بين الناس و بعضيها و حتى هما فضلوا انهم لا يثقوا في بعض حتى يتبين صدق نية كل واحد...فالمهم كالعادة سألت نفسي هل من حق الناس انهم فعلا ميثقوش في بعض ؟ فللاسف لقيت نفسي بجاوب ايوه يبدو ان من حقهم ان ميتقوش في كل الل بيشفوه و خلي بالكوا كويس انا بقول من حقهم انهم ميثقوش مش لازم ميثقوش في بعض لان اذا انعدمت الثقة بين الناس فاعرف انك بقيت تتكلم في مجتمع مقطع اوصاله...المهم السبب في كدا بئى اني كنت دايما و بحاول استمر في اني لازم افترض حسن النية في الشخص اللي بكلمه و اثق فيه الا اني بردو في الفترة السابقة ديه لقيت ان للاسف فعلا مش كتير من الناس يستحقوا الثقة ديه و ده كان بسبب مواقف انا كنت ركن اساسي فيها و مواقف تانية كنت فيها بمثابة طرف وسط بين ناس و بعضيها و اللي عرفت فيها ان كل واحد بيتكلم عن الناس ازاي و ده خلاني استغرب عن مقدار الثقة اللي ممكن تكنه الناس لبعضيها و ممكن يكون مش في محله و المشكلة الاكبر ان الناس ديه مش ناس وحشة ابدا دول ناس محترمة جدا فالنقطة اللي بتحيري ايه اللي خلانا منثقش في بعض بالصورة ديه ؟ ايه اللي خلانا نسأل نفسنا الف مرة هل الشخص اللي بيكلمني ده صادق معايا و لا بيسرح بيا ؟ لان مجرد سؤال زي ده يبئى انت كدا فرضت سوء النية و لم تثق في كلام الشخص اللي بيكلمك..هل هي مادية الحياة اللي خلتنا كدا ؟ هل انتشار الكذب و الفساد و الغش بين الناس كان السبب في ان احنا نفترض سوء النية بينا و بين بعضينا ؟ هل كل المصطلحات اللي زي الاخلاق و الامانة و الثقة و حب الخير و الصدق بقت مصطلحات مشوهه في مجتمع مريض ؟ هل انا غلطان اني بسأل اسئلة زي ديه ؟

طبعا انا قعدت اكتب بتلقاءية و معنديش استعداد اني اقرا و ارجع اعمل ايدت على كلامي اعدل فيه يعني فهوا زي مخرج هيفضل مكتوب حتى لو كانت ملامحه غريبة شويه او مش مفهومة علشان كدا اتمنى انكوا تلقطو اللي عايز اقوله

و انتوا عارفين في حاجة ممكن توصف حالتي و انا بشوف الناس بالحالات ديه و و تصروفاتهم على الطريقة ديه و هيه مقولتي المفضلة اللي موجودة في البروفيل لحبيب قلبي البرت اينشتين لما كان بيقول :

A question that sometimes drives me hazy: am I or are the others crazy?

الراجل بيقول ان السؤال اللي دايما بيحيرني و بيخليني مشوش : هوا انا اللي مجنون ولا الناس هما اللي مجانين ؟

عنده حق

سلام

Monday, September 10, 2007

قول للزامان إرجع يا the man

مفيش داعى كل شويه اعتذر على تاخيرى,بس والله غصب عنى

وان قاعد اتفرج على الست وهى ب تعصر منديلها الشهير" عايزنا نرجع زى زمان قو للزمان ارجع يا زمان" طبعا كلنا سمعنا الجمله دى كتير وحفظنها كمان ,لكن المره دى وانا بسمعها وقلت ف بالى هيا تقصد ايه تقصد :الزمان اللى هو الوقت والايام والسنين,ولا تقصد the man لو حبينا ننطقها بالانجليزى يعنى تقصد تقول (لو عايزنا نرجع زى زمان خلى الرجل بتاع زمان يرجع تانى)

طب لو فكرنا مين الراجل ده؟ وايه اساسا كان زمان؟وليه نرجع, ليه؟ يعنى هو كان احسن من دلوقتى؟!

تعالوا نرجع بالذاكره شويه هتلاقى إن زمان كان احسن ف كل حاجه-مش كلها اوى يعنى- المجمل بس يعنى مش هقولك: أن جوز الحمام كان 3 فرد , والفرخه ب 4رجول ,والكفته ب تتباع بالمتر , واقولك دلوقتى الحمام بقى رمز بس, والفراخ عندها انفلونزه و بتكح , والكفته اتلغت من اللحمه ولا الشاورمه ذلك الاختراع الافرنجى تبص تلاقى الراجل بيقطع فيها كإنه بيقطع فى لحم إبن اخته,وناقص يعيط لا طبعا عمرى ما هقولك كده.بس فعلا تلاقى كل حاجه موجوده ولها سعر ثابت ,مش زى دلوقتى اى حاجه بتتباع باى سعر والنهارده بسعر و بكره بسعر تانى وانت وشطارتك ,دا غير انها كانت طبيعيه مش دلوقتى كلها مضروبه كيميا ومسرطنه وحالتها زى الفل.

أضيف ل كده إن اللى كان موجود ف مصر مصرى و "صنع فى مصر" دلوقتى لا عاد مصرى ولا صنع فى مصر بقى كله "صينى" ما فضلش غير ال بنى آدمين . بس الشعب يستاهل ضرب الصرم علشان احنا بقينا بشوات صحيح نتعب نفسنا ليه ونشتغل ليه ,دا الناس بياجوا من آخر بلاد المسلمين والكفار لحد عندك ف بيتك ويجيبلك اللى انت عاوزه .

زمان برضه كنت تشوف الناس فى الشوارع ماشيه نضيفه كده وتحس ان كل واحد مستحمى قبل ما ينزل وملمع الجزمه ولابس نضيف..... إنما دلوقتى تلاقى الناس ماشيه ف الشارع ضاربه شعرها ف الاتجاهات الاربعه واللى مكهرب شعره واللى مزحلقه ,ولابسين لبس مقطع و تسألهم يقولك روشنه عادى خليك كول مى باك.

زمان لغوا الدعاره لكن دلوقتى بقيت علنى بس بأسماء منقحه شويه,زمان كان فيه "إشتراكيه"يعنى كانوا بيقولوا تاخد من الغنى تدى الفقير ...... دلوقتى "سبيليه" يعنى إفقر الفقير لحد ما تغنى الغنى و أهو سبيل اللى عاوز ياخد منه ياخد ............................................................؟؟؟؟؟؟؟؟؟؟؟؟؟؟؟؟؟

ويبقى سؤال مهم يا ترى بعد ده كله لو رجع ال"The man" هنرجه تانى زى زمان؟

Friday, August 24, 2007

و للارهاب اقنعة

اولا كالمعتاد احب اعتذر عن تاخيري لان انتوا عارفين حبة مشغول على شوية النت فاصل على شويه اخويا محتل الجهاز على حبتين مخنوق من الليلة كلها فكل ده بيعمل كوكتيل لذيذ من الخنقة..المهم

النهاردة انا عايز اتكلم عن موضوع مهم جدا و طبيعي جدا بالنسبة لينا كلنا كمصريين و الموضوع دا ان ايه الفترة اللي فاتت ديه مسك عندنا البلد مدير امن جديد غير اللي كان ماسك اصلا و طبعا مع احترامي لمدير الامن القديم اللي انا معرفوش اصلا الا انه احسن ان هوا سابها لان البلد كانت في حالة سيئة من الفلتان الامني المتمثل في انتشار توزيع الحشيش و البانجو و ان بئى بالساهل تقدر تحصل على الحاجات ديه مهما كان سنك طبعا و انتشار كمان البلطجية اللي بيتعدوا على خلق ربنا و زي ميكونوا متخلقوش الا لجر الشكل و الخناقات و الفتونة دا غير طبعا جرايم حصلت كانت غريبة عن مجتمعنا زي القتل مثلا و الاغتصاب المهم فطبعا مدير الامن القديم خلع و مسك مكانه واحد جديد..طيب و ماله

مدير الامن الجديد بئى طبعا جاي جديد و عايز يبين نفسه ان هوا اللي هنا و هوا اللي هناك فراح الراجل ده لامم حواليه بتوع الامن المركزي و نزل يتمشى في البلد يا مرحب يا حاج بس نزل يعمل ايه بئى طبعا نزل اول حاجة بيعملوه هو و امثاله ان يبص على الاشغالات اللي في الشارع و يبدأ حملة تطهير لكل اللي في الشارع من اشغالات يعني اللي هوا مقصود بيه الانضباط ينزلوا يلموا كل حاجة اللي له لازمة و اللي ملوش و ارمي يا ريس في العربية النص نقل..دا مش كدا و بس دا كمان كانوا بيوقعوا التند (جمع تندة) بتاع المحلات و يهدوه طيب ليه يا عم التند ديه عملالك ايه طيب يا باشا يا بيه و التند ديه اصلا مترخصه فيقولولهم يا باشا احنا معانا رخص بالتند ديه فيردوا ببرود طبعا تعالا و اعمل رخص جديدة -اه ياولاد الهبلة مهم معاهم رخص اصلا- ...المهم يا ريت طبعا كانت على التند وبس لأ و الارصفة كمان ساعات في محلات بتبئى معليه الرصيف بتعهم شويه و ده مش من حقهم فطبعا بتوع الامن لازم يتصرفوا و انا نسيت اقولوكوا ان كان معاهم بلدوزر من الصغططين دول فهوب لو معجبوش رصيف من دول يروح البلدوزر داخل فيه شمال مدغدغه ميت حته طيب و اصحاب المحلات ديه محدش بيعترض ؟؟ لا يا ريس كانوا بيعترضوا بس اللي يعترض من دول بتوع الامن المركزي موجودين ياخد العلقة الصح من هنا و يترمي زي الباقي في البوكس و من كتر البهدلة اللي الناس شافتها سمعت ان في ناس ماتت في الاسواق بس انا بقول سمعت يعني معرفش الكلام ده صح ولا غلط..طيب هو ايه يا عم مفيش حد صور الكلام ده ؟؟ لأ ازاي يا راجل في ناس صورت الكلام ده بس لسوء حظهم بتوع الامن شفوهم و طبعا كالمعتاد خدوا العلقة التمام و الموبيلات اتسحبت...طبعا القلق اللي حصل ده كله بسبب انه مدير امن جديد فلازم يعمل الشويتين دول في الاول علشان يبين ان الراجل حامي و بتاع لكن بعد كدا للأسف بترجع ريما لعادتها القديمة و يرجعوا للطرمخة من تاني ودا طبعا مش غريبة لاننا عرفين كويس ان احنا اكيد في مصر...و طبعا من الاطلاع الجرايد ان الحوار ده مش عندنا بس دا للأسف في مناطق كتير من البلد و اخرهم الللي حصل فيها قلق جامد المطرية تقريبا الي بئى اشبه بارهاب دولة زي ما اقصد بعنوان التدوينة


طيب ده اللي حصل طيب ما تيجي نتكلم جد شويه و دا الحوار الللي انا دخلت فيه مع زمايلي في جدال طويل و كان السؤال عبارة عن هل الناس تستاهل اللي بيجرالهم ؟؟ مش هكون ظالم للناس لو قولت اه لكن بردو مش هكون منصف..بمعنى ان فعلا الامن مزودها حبتين و مبتبقاش طالبة له ده كله او بمعنى اصح كتير منكم بيقول يا عم سيب الناس تاكل عيش ليه نعمل فيهم ده كله..هقول لسيادتك انك متقدرش تنكر ان في من الناس دول اللي مزودينها فعلا ان الاشغالات اللي بيعملوها في السكة بتقفل الطرق فعلا و خنق على المرور اكتر مهو متخنق يعني يوم من الايام اللي كان حال فيهم القلق ده ماشي من شارع اللي يعتبر شارع تجاري او زي سوق كدا فخير اللهم اجعله خير لقيت الشارع فااااااضي و وااااسع بطريقة غريبة لدرجة يمكن كانت اول مرة اشوفها ان لما شالوا الاشغالات اللي في الشارع ديه فعلا الطريق وسع اللي اقصده ان انت كصاحب محل مش من حققك انك تحط قدام محلك اي حاجة م اللي بتبيعها تحت الرصيف بشويه زي ما انت من حققك انك تبيع من حقي كدولة ان الشارع بتاعي يكون فاضي للناس و انت بردو كمحل مش منحققك انك تعلي الرصيف فوق المتر مثلا زي اخينا اللي فوق..اللي اقصده ان بتكلم بمنطق حقي و حقك صحيح ان الحكومة معندهاش حكاية حق المواطن ديه هوا حقها بس الا ان ساعات بشوف ان ممكن يكون ليهم حق في الحملات الي زي ديه دون المساس طبعا بالشخص و التعرض ليه بالضرب مثلا زي ما هما بيعملوا يعني علشان محدش يفهمني غلط علشان ان مشجعش سلوك زي ده بانك ترهب الناس بالطريقة ديه و تعاملهم بالطريقة ديه لكن في نفس الوقت اه الناس ساعات مبتعرفش ايه اللي ليها و ايه اللي عليها..علشان كدا لما تيجي تجاوب على السؤال خد في اعتبارك حقي و حقك بالرغم من ان معظم كلامي بيكون على الحالة المثالية..انا مش مع الحكومة و لا مع الناس انا مع اللي انا شايفه صح...علشان كدا عايز اعرف رأيكوا في الليلة ديه

بس دا اللي كنت عايز اققوله اما دلوقتي احب اسيبكوا مع فيديو كنت شوفته على جروب لناجي العلي على الفيس بووك فيديو لي واحدة من شعب، شعب بردو متعرض لارهاب دولة، انصحكم انكم تشوفوا الفيديو اللي بجد ابكاني على حالنا و حال الشعب ده

سلام

Thursday, August 09, 2007

جيد..!!..يا راااجل

بسم الله الرحمن الرحيم

الصورة اللي جايه ديه بصراحة كانت مفاجأة ليه



ايوه انا الحمد لله نجحت في سنة البكالريوس بتقدير 66% عندنا يعني جيد..طبعا المفاجأة كانت في تقدير جيد لاني بيني و بينكوا دي اول مرة اعرف فيها تقديري لان مش كل سنة كنت بطلع صافي..لكن اللي عرفته ان ده مش التقدير التراكمي ده بتاع رابعة بس و التراكمي لسه هعرفه بعدين و بالمنظر اللي مشيت بيه طول السنين في الكلية فأكيد هتصفى على مقبول عموما كل اللي يجيبه ربنا كويس انا مش هكون زعلان على تقديري بالرغم من انه ممكن يكون سبب في عوائق ممكن تقابلني في حياتي العملية و خصوصا ان المقياس في بلدنا في الغالب بيبئى بالورق و مش بالكفاءة الفعلية للشخص

_____________________________________________


دا كان اولا اما ثانيا بئى فهو حاجة كنت عاملها ممكن تكون الناس استغربتلها و هي الاستطلاع اللي في السيد بار و هو استطلاع كان بيسأل هو انت لابس نظارة و لا نظرك ستة على ستة و سبب الاستطلاع ده لما كنت شوفت صور لبعض مقابلات المدونين و لقيت ان كان في كتير منهم لابسين نظارات فطبعا اللمبة نورت و قولت هو كلنا بنلبس نظارات علشان بنقعد قدام الكمبيوتر كتير و على طول نظرنا بيضعف بسبب الشاشات و القعدة لفترات طويلة و خصوصا كمان لاني نسيت اقولوكوا اني من اصحاب النظارات بردو و بسبب القعدة لفترات طويلة دايما الوالدة تقولي يا ابني نظرك حافظ على الشويه اللي بقايلنك فيكون ردي المعتاد ضربوا الاعور على عينه

اما بئى عن نتايج الاستفتاء فكانت في صالح النظرية لان جاوب على الاستفتاء ده تلاتين بني ادم

حداشر منهم قالوا ايوه احنا لابسين نظارات و دول طبعا حبايبي لاني بعز اللي لابسين نظارات بصراحة مع ان الناس بتفتكرنا دحيحة او بمعنى اصح جيجز (الكلمة ديه هيفهموها طبعا اللي يفهموها حاجة كدا امريكاني) المهم ده طبعا مش صحيح و الا مكنش دا يبئى حالنا ادي اخرها تجارة..و العشرة دول كانوا بيمثلوا الاغلبية بنسبة 37 في الميه

اما المجموعة التانيه كان عددهم 8 و دول اللي قالوا ان نظرهم 6/6 طبعا ربنا يكملهم بنظرهم لان احنا اصحاب النظارات مدركين تماما معنى كلمة النظر دا انا بدعي و الله على طول للراجل اللي اخترع النظارات..فطبعا ربنا يكملكوا بنظركوا كمان و كمان

اما عن المجموعة التالتة فكانت للي لابسين عدسات و دا يا عيني كان شخص واحد بنسبة 3 في المية و غالبا هتكون بنت لانهم بيخافوا ان النظارة تكون شكلها مش حلو بالنسبة ليها مع ان ده مش صحيح لاني بردو بصراحة بحترم البنت اللي لابسة نظارة اكتر و محدش يسأل ليه هو كدا الطيور على اشكالها تقع حاجة غريبة اوي..طبعا انا مش معترض على العدسات بس اعرف انها ممكن تسبب مشاكل للعين حساسية و ما شابه المهم مش دخلنا دلوقتي

اما بئى المجموعة الرابعة فديه المجموعة اللي انا متغاظ منها جدا و محترمهم جدا جدا بالرغم من غلاستهم سورري يعني المهم دول كانوا الحتة بتاعة بتسأل ليه و كان عددهم عشر بني ادمين و كانوا بنسبة تلاتة و تلاتين في الميه..متغاظ منهم ليه بئى لان بالرغم من اني كاتب العنوان جاوب و متسألش ليه الا انهم اصروا على انهم يختاروا بتسأل ليه طيب حد فيكوا يقولي طيب انت حاتطها ليه اصلا هقولوا علشان اعرف الناس دول و اشوف كام واحد هيعمل كدا ليه بئى لاني بحترم الناس دول زي ما سبق و قولت لان فضولهم غلب اتجاههم للاجابة على السؤال و دول اللي عايزين يعرفوا سبب كل حاجة و مينجرفوش ورا الاجابة بسرعة دون المعرفة الحقيقية اللي دفعتني لطرح السؤال ده و دا طبعا شيء كويس لان الفضول لمعرفة سبب كل حاجة عمرها ما كانت شيء سيء الا انها متعبة جدا يعني مثلا كانوا هيعملوا ايه لو مريحتهمش و قولتهم على السبب

الحوار ده عايزين تعتبروه تهييس براحتكوا ولا انتوا نسيتوا عنوان المدونة

عموما تحياتي لكم جميعا

سلام




Saturday, July 28, 2007

الى من اهواها

عبثا ما اكتب سيدتي

أحساسي اكبر من لغتي

و شعوري نحوكِ يتخطى صوتي

يتخطى حنجرتي

عبثا اكتب مادامت

كلماتي اوسع من شفتي

اكرهها كل كتاباتي


مشكلتي انكِ مشكلتي

نزار قباني

Friday, July 13, 2007

perfectionism

بسم الله الرحمن الرحيم


اولا احب اعتذر عن التأخير لكن كالمعتاد انتوا عارفيين الدنيا و مشاغلها غير كدا او كدا يبدو ان الواحد هيدخل في الجد علطول و يبتدي فعلا يسعى ورا المستقبل اللي بيتمناه. اما ثانيا فهو موضوع البوست ده و انا شايف انه موضوع مهم جدا جدا و يمكن اهميته تكمن في ان القرار الناتج عن الموضوع ده لانه ممكن يحدد كتير في مستقبل الانسان و قراراته اللي بيتخذها على مر حياته


الموضوع ده له شقين الشق الاول هيكون تمهيد للشق التاني


اما الشق الاول ممكن يتلخص في كلمة واحدة بس


"الكمال"


طبعا في ناس هتقول دلوقتي حالا الكمال لله وحده. طبعا يا عم الكمال لله وحده و انتا شفتني قولت غير كدا طبعا بلا ادنى شك الكمال لله وحده لكن اللي انا اقصده يا سيدي الكمال على مستوى البشر و عارف كويس طبعا ان مفيش بشر كامل و دا شيء انا متأكد منه لكن لما اقصد الكمال على مستوى البشر يبئى اقصد اقصى الدرجات اللي ممكن يبلغها الانسان في سعيه للكمال سواء في الاخلاق او العلم او الرياضة او اي مجال من المجالات لان سعينا ورا الكمال ده من اللي اتفطرنا عليها و ربنا حببه في نفوسنا علشان يعلى بالانسان لاعلى الدرجات. احب اكرر تاني علشان حبيابنا اللي انا عارفهم مفيش بشر كامل و ده صحيح لكن مش غلط ان الانسان يسعى ورا الكمال او يسعى ان يوصل لاعلى درجة موجودة في المجال اللي بيسعى فيه


لكن المشكلة هنا في نقطة هل الانسان بيوصل فعلا للكمال بمعنى اذا كان الانسان بيبذل كل الجهد للوصول للهدف السامي ده هل فعلا بيوصل للكمال؟؟ لو حد فيكوا رد عليا و قال لأ هقوله طيب و سيادتك عرفت منين ما يمكن يكون وصل لاعلى نقطة يقدر يوصلها بشر فعلا في المجال ده و وصل فيه لمبلغ العلم او القدرة (مع ان ده ممكن يكون مستحيل) و ممكن حد يقولي ايوه دا وصل للكمال في مجاله هقوله و انتا عرفت منين ما يمكن لسه في حاجات تانيه لسه مقدرش يوصلها!!... المشكلة اللي هنا هي ازاي هتحكم على اي شيء او شخص ان وصل لمرحلة الكمال اذا كنا احنا اصلا منعرفش هي درجة الكمال ديه، منعرفش هل قدرنا نحقق كل اللي نقدر نحققه ولا احنا مسعيناش كفايه للوصول للمرحلة ديه و خلي بالكوا في كلامي هنا على الكمال زي ماسبق و قولت الكمال في اي مجال سواء رياضة مثلا او علم او اي حاجة او حتى اخلاق علشان متفتكروش اني اقصد الكمال في شخص بوجود كل الصفات الحسنة فيه ان ممكن يكون الكمال حتى في مكان واحد او حته واحدة.


قبل ما تزهقوا وتقولوا انت عايز ايه مننا يا عم و ايه كل الكلام الغريب اللي انت بتقوله ده ارد انا و اقول اصبر يا عم انا جايلك في الكلام زي ما قولت اللي فات كان تمهيد للشق التاني اللي هو ده، الشق اللي يمكن يكون بيمس كل شخص فينا و بيأثر على تصرفاته و هو ان للأسف نقطة الكمال ديه مش غاية بس لكن للأسف ديه كمان مرض. ايوه مرض بيصيب الشخص اللي بيحاول يسعى للكمال في اي حاجة و الناس دول بيسموهم ان انجلش


Perfectionists


او بمعنى اصح الناس اللي بيسعوا بجهد انهم يوصلوا للكمال في كل اللي بيعملوه و خلوا بالكوا الناس دول ممكن يكون فيهم انتوا وانا و ناس كتير من اللي حوالينا اللي من خصائصهم انهم بيقللوا من شأن الشيء اللي بيعملوه و انجزوه (حتى لو كان ممتاز) لانهم معتقدين انهم ممكن يحققوه فيه افضل من كدا و دايما بينتقدوا نفسهم و صفاتهم حتى لو كانت صفات كويسة لانهم عايزين الاكوس (محدش يتريق انا اقصد الاحسن) و على فكرة من الناس دول من اللي بيقدروا انهم يحققوا انجازات هايلة جدا لانهم عمرهم ما هيكتفوا باللي انجزوه. لكن بيكون مرض لما تحط لنفسك اهداف عالية صعب انك توصلها و بالتالي هتعود عليك بالكبت و العقد النفسية لما ما تحققهاش



حد فيكوا يقولي طيب ايه المشكلة ؟ المشكلة سيادتك مش في سعيك ورا الكمال المشكلة ان لما يكون السعي ده بيمثل عائق اكتر منه حافز بمعنى ان ممكن تكون شايف نفسك انك مش هتقدر تحقق نسبة 100% نجاح للشيء اللي انت عايز تعمله مع رفضك للنسب اللي اقل من كدا يعني بمعنى اصح يأما 100% يأما 0% او بالمعنى اللي انا عايز اوصله بئى هو في صعوبة تحصيل الكمال ده في وجود الظروف المحيطة بيك اللي اكيد هتمنعك من انك تقدر تحقق الانجاز اللي انت عايز توصله و تبدأ تسأل نفسك هل هقدر احقق الدرجة ديه في اللي لنا عايز احققه ولا لأ.


المهم تخليص الليلة ديه كلها هل ممكن الانسان يوصل لاعلى درجة في اللي عايز يعمله اذا سعى حق السعي ولا الواحد بيحط لنفسه متطلبات عالية مش ممكن و لا يمكن انه يقدر يوصلها مهما عمل و بالتالي ييأس من حتى التفكير في الوصول للشيء ده؟؟


المشكلة ان الموضوع كبير و له مداخل تانيه و زوايا تانيه مقدرتش اصيغها في الكلام فالحقيقة ديه نقطة بتؤرقني فعلا لكن مش عارف انا قدرت اوصل لكوا اللي عايز اقوله ولا لأ، انا حاولت استرسل في الكتابة و اوضح على اد ما اقدر لكن اذا مفهمتوش حاجة فاعتبروها تخاريف مجنون


سلام


Saturday, June 30, 2007

اخيراً..اخيراً

اخيرا و بعد عناء اربع سنين من الكفاح المتواصل خلصت دراسة و خلصت امتحاناتي في كلية التجارة..خلصت يدوب
قبل ما كانت هتخلص عليا انتهيت من الكلية ديه اللي تعبتني فعلا و بصراحة انا سعيد جدا ان خلصنا بعد كل اللي شوفناه في الكلية سعيد اني مش هشوف اشكال دكاترة بيطلعوا علينا البلاء..هستريح من الموظفين اللي بيكلموك من طرف مناخيرهم زي ما تكون بتشحت منهم..هستريح من الطلبة اللي مش فارقة معاهم اي حاجة في الدنيا غير انهم يقضوا وقت لذيذ لا جايين لا تعليم و لا زفت هستريح من مقررات و مواد يكاد نكون مبندرسهمش اصلا من قلة ما يقال فيها من شرح و كثرة ما يطبق عليك منها او مواد مش هتفيدك في حياتك العملية اصلا..المهم فعلا الواحد سعيد فعلا بس للأسف السعادة ديه ما استمرتش كتير فجأة بعد ساعات من انتهاء اخر امتحان حسيت بفراغ كبير
ادركت ان الفراغ ده جاي من الحيز اللي كان بيشغله التعليم في عقولنا و حياتنا لكن بمجرد اما ادركت ان الشيء ده اللي كان بيشغل وقتنا انتهى فحسيت فعلا بالفراغ. اكيد طبعا الفراغ ده مش هيستمر لطالما كنت مدرك ان فترة الكلية او حياتي كلها لغاية اللحظة ديه هي كانت الجزء الاسهل من حياتنا الجزء اللي مكنش علينا في اي مسؤلية و كانوا اهالينا هما المسؤلين عنا لكن و من دلوقتي فعلا هتبدي الحياة الفعلية اللي كل واحد فينا لازم يتملك زمام اموره في الحياه. الحياة اللي هيبدو انها هتكون قاسية علينا المشكلة ان الواحد مش عارف يبتدي ازاي حتى لو عارف و في نيتك انك في حاجات انت عايز تعملها و متأكد ان هيكون فيها خلاصك و بدايتك الحقيقية الا ان الناس مبتشجعكش عليها او بمعنى اصح بتحبط احلامك اللي ممكن تكون هي سر نجاحك
فعلا الموضوع كبير انتوا ايه رأيكوا من بعد ما ننتهي من الدراسة اللي الخطوات اللي الواحد ممكن يتتبعها على الاقل علشان يضمن مكان لنفسه في سوء العمل او بمعنى اصح سوق العمل محتاج مني ايه علشان اقدر اوفره ليه؟ انا بوجه السؤال ده للناس اللي بدأوا مسيرتهم فعلا في الدنيا ديه على الاقل اللي وصل منهم لمراكز كويسه
لكن الحقيقة في نقطة تانية بتؤرقني فعلا و هي ببساطة هل الواحد ينجرف لروتين الحياة المعتاد اللي الناس كلها بتمر بيه زي البحث عن عمل و بعد كده يكون نفسه و يدور على عروسه و يتجوز و يخلف ولاد و بنات و يعيشوا في تبات و نبات ولا يحاول يسعى ورا حلم و انا بكررها (حلم) كان الواحد بيتمنى انه يقدر يحققه و يقوم بالحاجة اللي نفسه و منى عينيه انه يوصلها هل السعي ورا الحلم ده يعتبر جنون اذا مكنش الحلم ده مستحيل؟
المهم احب اقول اني سعيد جدا اني رجعت للمدونة تاني و حبايبنا اللي افتقدتهم بجد و احب اقول في النهاية اني سعيد فعلا بوجود ناس من امثالكوا اللي بحترم ارائهم فعلا...لكم مني كل الاحترام و التقدير
سلام

Friday, May 11, 2007

ذاكر..ذاكر..ذاكر

تحديث


الامتحان الاول كان بتاريخ 4\6


الحمد لله بصراحة كان امتحان سهل جدا و لذيذ جدا و حلينا كلنا كويس جدا و دعينا ان بقية الامتحانات تكون سهلة زي الامتحان ده لكن يبدو ان احنا عملنا حاجة وحشة في دنيتنا و ربنا مستجبش لدعاءنا


الامتحان التاني بتاريخ النهاردة 9\6



و من الاخر الامتحان ده هو السبب في اني كتبت التحديث ده علشان افضفض قبل ما اطق من جنابي الامتحان بسم الله ما شاء الله اسئلة اول مرة نشوفها في حياتنا و بعون الله معظم الدفعة محلتش حاجة الا سؤال واحد اللي كنا نعرفو و الباقي خد عندك يا ريس كلام ما انزل الله به من سلطان تأليف للصبح و محدش بئى يقولي طالب عادي و اخر متفوق كله محصل بعض


بصراحة بئى ان قرفت و متغاظ فعلا من اللي بيعملوه فينا ده بجد حرام من الاخر شغل تعجيز



يا رب الكلية تولع يا رب و اشوفها مولعة كدهو لما المطافي تيجي تطفي الحريقة تكون الميه مقطوعة طول اليوم

و ميلقوش يملوا العربيات و لما يروحوا يملوا العربيات من من حنفيات المطافي تكون متوصلة بالغلط على مخلوط من البنزين و السولار


كل ما يرشوا..تولع اكتر


كل ما يرشوا..تولع اكتر


كل ما يرشوا..تولع اكتر


و اثناء ما هي والعة ابعت رسالة لامريكا و اقولهم ان الكلية والعة علشان تحتيها منشأة نووية و فيها صواريخ

تروح امريكا تتغاظ و تضرب على الكلية صاروخ كروز فيه ييجي تلت اربع خمس ست سبع روؤس نووية

يدغدغ الكلية..و لسوء الحظ يكون في فعلا تحت الكلية منشأة نووية وفيها قنابل و بسبب الصاروخ يحصل سلسلة انفجارات


تعمل حفرة كبيرة بحجم جمهورية مصر العربية

تولع فيا و في الدكاترة و في اللي بيقروا الموضوع الكئيب ده

لكن في النهاية الحمد لله على كل شيء

اخر امتحان هيكون يوم 27/6/2007

يا صبر ايوب
==========================================

في البداية احب اعتذر عن التأخير ده بس زي ما انتو عارفين احنا داخلين على موسم امتحانات و شكله كده موسم دسم جدا و رخم جدا اصل انا بصراحة اكتشفت مؤخرا اني من اول الترم مذاكرتش اي حاجة و زي ما انتوا عارفين انا مش من الدحاحين اللي بيبتدوا النضال من اول يوم في الترم

انا طالب على ادي مخنوق من الكلية اللي انا فيها لاني مش عايز اتعلم في المجال ده اصلا و على فكرة ده مش حالي انا لوحدي دا حال الناس كلها..فا زي ماتقولوا كده بروح الكلية ديه كده يعني تقضية واجب لكن مش معنى كده اني انفض على الاخر لأ طبعا بذاكر و بعمل اللي عليا و الباقي على ربنا...الا ان الترم ده مش عارف مالي مش قادر اذاكر مش عارف افتح كتاب و اذاكر ساعتين على بعض يمكن علشان زقهت بئى الله اعلم اهو عموما ده اخر تيرم عندي و اخلص و اتمنى انه يعدي على خير

و علشان كده اكيد طبعا النشاط في المدونة هيقل و يمكن ينقطع كمان علشان بصراحة مش عايز اي حاجة تشتتني...عايز احط كل تركيزي في المذاكرة بقدر الامكان..انا عارف ان ده صعب على الاقل على واحد زيي شايف نفسه طالب فاشل لانه مش قادر يتحرك في المجال اللي فُرض عليه فعلشان كده مش لاقي نفسي و حاسس اني تايه..هيوحشني و الله عالم التدوين بما فيه من ناس مبقتش قادر استغنى عن نقاشهم و دمهم الخفيف و مواضيعهم الاجمل..لكن هنعمل ايه حكم القوي مع اني حالي مش غريب عليكوا ما احنا كلنا في الهوا سوا و الغالب منكم بردو عندهم امتحانات و هم ما يتلم




و علشان كده بتمنى ليكوا كلكوا النجاح ان شاء الله و انا معاكوا و بسأل من ربنا النجاح و التوفيق و يوفق كل طالب علم لما يسعى اليه...اللهم امين...يلا كفاية عليكوا كده كل واحد بئى يقوم يذاكر و يشوف ايه اللي وراه...لكم مني اجمل التحيات و الي لقاء قريب...سلام

Saturday, April 28, 2007

دماااااااااااااااااااااااااااااااااااااااااااااااااااااااااااااغ

جربت تعمل دماغ
لو فى يوم لقيت نفسك مضايق ومخنوقوملكش نفس تكلم حد ومش لاقى حاجه تعملها "كالعاده.."انزل الشارع اتمشى لوحدكوتأمل فى الناس....
هتلاقى الموضوع مسلى ...اصل الشعب المصرى ده دمااااااااااااااااااااااااااااغ

هتلاقى ناس طالع عين اهلهم فى اتوبيس فيه مالايقل عن 200 نفر والناس طالعه من الشبابيك والجو حر..والناس لسه بتركب واللى يغيظك انهم "مبتسمين!"وحسين بالكفاح وتلاقى واحده ست تخينه-ف الغلب موظفه-دخلت وسط ال200 نفر اللى واقفين وتلاقيها سلكت نفسها برشاقه غريبه تحسد عليها

هتلاقى بنت لابسه هدوم المدرسه ومزوغه مشيه مع ولد-ممكن تحلف من شكله انه مش هيلاقى شغل ولا بعد100سنه- وان لقى شغل اول حاجه هيعملها انه يسيب البنت دى...

هتلاقى واحد ومراته -عوجيز-ماشين على الكورنيش بياكلوا ترمس ف منتهي السعاده و مش عايزيين حاجه تانى من الدنيا ....

هتلاقى واحد شكله تعبان طحن ومش لاقى ياكل ,بس جايب أحدث "موبيل"وشغال رغى بصوت عالى علشان يسمع اللى حواليه

هتلاقى واحد واقف مع خطبته او صحبته قدام قفص الاسود فى جنينه الحيوانات بيقولها :بصي..أهو ده بقى الاسد....!!!!قال ايه الود كده منحها العلم والمعرفه المطلقه واسرار الكون

هتلاقى بنات ب "كرش "لابسه body stomach علشان دى الموضه

هتلاقى اسره من 4 افراد اب و ام و بنت شابه و ولد ف اعدادى قاعدين ف كافيه طلبوا عصير و2 شيشه .. واللى شرب الشيشه ؟! البنت وامها ..."الموقف ده بجد حصل قدامى..."

جربوا تعملو دماغ وقولولى

Wednesday, April 25, 2007

مهو يا اما احنا اللي اغبيا يا هما اللي متخلفين

انا تعبت الحقيقة و انا بدور على اجابة للسؤال ده لاني معرفش الغلط عند مين بالظبط عندنا و لا عندهم...طبعا انتوا عايزين تعرفوا هما مين بالظبط؟؟..ايوه هما دول اللي اسمهم دكاترة في الكليات بتاعتنا و احنا طبعا معروفين اللي مغلوبين على امرنا و بيسمونا الطلبة
من ساعة ما دخلت الكلية ديه (انا في كلية تجارة على فكرة) و انا عايز اعرف هو احنا كطلبة اللي اغبيا و مبنفهمش حاجة و لا الداكترة اللي عندنا هما الي متخلفين و مبيفهموش في البتنجان..انا الحقيقة الاول كنت فاكر ان احنا كطلبة اللي مش عارفين نفهم الدكاترة و العطلة جيه من عندنا احنا دا انا حتى بقول يمكن بقية الطلبة فاهمين و انا بس اللي غبي لان مش معقول ان الداكترة دول مبيفهموش في حاجة دول دكاترة يا عم و ناس خرجت و خدوا الدكتوراه بتعتهم من برا مصر كمان يعني اكيد الناس ديه فاهمة شغلها كويس و مش معقول السنين ديه كلها و الخبرة ديه و يبئوا قراطيس يعني...من الاخر كنت شايف الدكتور ده راجل علامة مُلم بحاجات كتير و شخصية عبقرية فذة...لكن للأسف يبدو اني كنت غلطان فتمر الايام و الشهور و الاقي الحقيقة المفزعة و الاقي ان احنا كطلبة مظلومين و غلابة و الدكاترة اللي مبهدلنا و مطلعين عنينا و اقولكوا كام مثال منهم علشان افضفض مع اني عارف ان جامعتنا و كلياتنا بتضم من الاشكال ديه العشرات بل يمكن المئات يعني تلاقي مثلا دكتور يدخل طول المحاضرة يهزر مع ده و مع ده و ميقولش كلمتين على بعض تقدر تربطهم ببعض و تخلص المحاضرة على شوية كلام بسيط و يقرب الترم يخلص و هوب يروح خبطلك شبترين تلاتة في محاضرة واحدة قبل الامتحان يدوب باسابوعين تلاته (يقلبهم يعني) لأ و مش كده و بس تدخل الامتحان تلاقي كلام غريب اول مرة تشوفه و تحل انت كلام اغرب منه و اللي يذهلك اكتر انك تنجح في الاخر (يا سلاااااام) طيب تيجي ازاي ديه معرفش....ده طبعا غير دكتور تاني يدخل و تلاقي اسلوبه في الشرح و الكلام ينيم بلد بحالها ده حتى لما نعرف انها محاضرته تلاقي الكل مبسوط طبعا يا ريس لاننا هنام و طبعا بما ان اسلوبه بالطريقة ديه فطبعا محدش هيكون صاحي اصلا علشان يعرف هو بيقول ايه...خدوا بئى الاخ ده دكتور اصلا لا يصلح ان يكون دكتور و الكلام ده على لسان واحد من الدكاترة اللي كانوا بيشرفولوا على الدكتوراه بتاعته و الدكتور ده نكتة لان واحد مش فاهم اي حاجة في اي حاجة اصلا ده حتى الكلام اللي بيشرحه في المحاضرة بيكون مجهزه قبل المحاضرة يعني من الاخر يخش يرش الكلمتين اللي عنده و يلحق يخرج بسرعة ده طبعا بعد ما منع الطلبة انها تسأله (ده اذا كانوا هيسألوه اصلا) في الموضوع اللي بيتكلم عليه لانه طبعا مش هيعرف يجاوب و بيتحجج بأن الاسئلة تكون بعد ما يخلص...غير كده او كده ده كمان مثال من الدكاتره اللي عينيهم زايغة و ما ادراك باللي عينيهم زايغة ده غير لسانهم السليط (على ايه معرفش) و صدقوني ما خفي كان اعظم من البلاوي التانيه اللي بتحصل و الدكاترة العاهات اللي بيشرحولنا (سورري يعني على لفظ عاهات بس هما كده فعلا اعمل ايه يعني)...المشكلة يا اخي ان احنا اللي دايما اللي منفهمش و غوغاء و رعاع و كلام كتير مليان حقد طبقي من اللي بيسممونا بيه و الغريب كمان ان عمر ما بييجي على دماغهم ان هما اصلا اللي مش عارفيين يشرحوا او مش عارفين يوصلوا المعلومة للطالب و دايما الطالب هو اللي غلطان و مبيفهمش و كل واحد فاكر نفسه مؤسس علم الاقتصاد الحديث و مش مدركين انهم سبب من اسباب تدهور النظم التعليمية في مصر
لكن ده مش معناه ان كل الدكاترة بالمنظر ده اطلاقا في بعض الدكاتره محترمين جدا جدا و على درجة كبيرة من العلم و من الناس اللي بتعامل الطلبة كبني ادميين بتحترم اختيارتهم و ارائهم و بيشجعوا الطلبة على المشاركة و يجبروك انك تحترمهم بسبب معاملتهم ليك او حتى بسبب علمهم الغزير يعني مثلا افتكر دكتورة عندنا كان لسانها متبري منها و تبهدلنا اخر بهدلة لكن بصراحة كمادة علمية ملهاش حل عبقرية بجد او عندك دكتور تاني يمكن مبنفهمش منه اوي لكن بيعاملنا بطريقة محترمة جدا لكن للأسف ساعات مبنقدرش اللي بيحترمنا و بنفتكروا ضعف و نبهدل فيه (احنا كده منعرفش نحترم اللي يحترمنا).. فالدكاترة دول هما اللي بيصبرونا على ام نخلص و خصوصا ان احنا اخيرا في اخر ترم و هننجح ان شاء الله احتمال كبير يعني
و على فكرة احنا مش طلبة و حشة اوي احنا ناس بنحضر تقريبا كل المحاضرات و بنعمل اللي علينا (على قد ما نقدر) لكن يبدو ان مفيش فايدة...انا اسف ان كنت طولت عليكوا بس حبيت اشاركوا في اللي كلنا بنمر بيه من معاملة مع علمي التام بوجود امثلة افظع بكتير من كده في كل جامعتنا المصرية...و المفروض ان بعد ده كله ميجوش يطلبوا انجازات مننا و علم لانهم المفروض مينتظروش حاجة بعد كل اللي بنمر بيه ده (لان ببساطة شديدة فاقد الشيء لا يعطيه)...اللي انا حكيته على فكرة جزء ضئيل من المهازل اللي بتحصل بس زي ما قولتلكوا بفضفض و مازلت ابحث عن اجابة للسؤال ده
احنا اللي اغبيا و لا هما اللي متخلفين؟؟

Friday, April 13, 2007

نتحدث عن ال(...............)

السلامو عليكو

فى الفتره الاخيره دى انا كنت مطحون بشكل غريب فى الكليه,اول مره تحصلى مع انى طول عمرى ضربها طناش المهم ربنا يهدي الجميع .انا قرات مقاله عجبتنى اسمها
عن ال(......)نتحدث
فاهم إنت طبعا !

المقال ركز على مشكلات مهمه ,او انا شايف انها مهمه من وجه نظرى المقال بيقول:- إن 90%من مشكلات الشعب المصرى هى نتيجه لثقافه ال(.....)وده السبب فى تدهور جميع المجالات السياسيه والاجتماعيه ...إلخ و إن ال(......)كسلوك بقى عاده عند الشعب المصرى لحد ما بقى الاساس فى معظم تصرفاته خد عندك مثلا فى التعليم
الطلبه ب تغش عن جهل غريب و ب بجاحه شديده-بأماره ايه؟- علشان ينجحوا ويتفوقو!!!!!! والغريبه ان المدرسين بتساعدهم او بتساعد ال(.....)قال ايه يلا خلى العيال تنجح -او-يا عينى الواد اهله طفحين الكوته علشان يعلموه

اللى ينقطك لما تسمع الوزير وهو بيوعد الاهالى ان الامتحان جاى فى مستوى الطلب المتخلف والكلام اللى انتو عرفينو ولو حد حط سؤال فى فكره ولو بسيطه يقولك اللامتحان جاى "لافف"والعيال تعيط والناس تندب حاجه تنقط وفى الاخر يلغى السؤال علشان صعب ...يعنى ايه (يلغى السؤال علشان صعب؟!!!)طب ما هو لازم يكون فى سؤال صعب ايه الغلط ف كده .............الغلط ان المجموع يبقى 103% ده اسمه تهريج وعبط تعالو نبص للنتيجه النهائيه
(جيل من الجهله حاملى الشهادات واصحاب المجاميع الفلكيه) و فى الاخر زغرطى يللى مانتيش غرماانه!!! وكمان ال(.....)فيه منه فى المرور تقف فى لجنه الظابط يقولك :رخصتك...انت سايق على 170.مفيش حزام امان..و مفييم العربيه ؟ -انت مش علرف انت بتكلم مين انا ابن.... وخالى يبقى.... وعمتى تبقى..... يا حيوان؟؟ والظابط :بكل برود ..اتفضل يا باشا آسفين على الازعاج. يرد عليه يقوله :عالم بهايم ..انا عارف بيجبوكم منين؟ ده مثال صغير فى بقه العربيات اللى معلقه نمر مميزه و مبتقفش خالص ...إلخ
اما آخر ما وصل اليه الشعب المصرى فى ال(.....)انه بقى يعمل ال(.....)على نفسه فى سلبيه غريبه والرضى بالذل والمهانه للى بيحصل فى اقسام الشرطه و المصالح الحكوميه والتزوير و بيع صوته فى الانتخابات يعنى "بقى يطلع بأى مصلحه...يله ماهى خربانه خربانه"سرق خطوط التليفونات و التيار الكهربى
ارتضى العرى والاباحه ....هى الناس ما بتشوفش بناتهم لابسين ايه؟ولا بيلبسوهم كده علشان يتجوزو؟
من الواضح ان ال(............)اصبح نوع من انواع التكيف السلبى مع الواقع المؤلم بس للاسف وصلنا لنتائج مدمره ........ولا انتو لكم راى تانى؟
اسمعو بقى آخر نكته
حاكم عربى راح جهنم وهو على ابوابها سألوه عن اسمه وأعماله فى الدنيا ولما قالهم ...وشهم اتغير واعطوله كارت مكتوب عليه 25,ف استغرب ف راح جهنم علشان يشوف مصيره ف دخل عنبر 1 :لقى الناس ب تتلسع بشمع
كمل طريقه وراح عنبر 2 :لقى الناس بيلسعوهم ب فحم وصل عنبر 3 :لقى الناس بيلسعوهم ب السيخ المحمى ف وقف حائر ف واحد شافه حب يخفف عنه ف صاحبنا ال "الحكم العربى" قال له : وانا على باب جهنم اعطونى الرقم ده ف الراجل بص للرقم وقد جحظت عيناه ...قاله:"يا خبر اسود 25 ليه ..انت عملت ايه فى دنيتك؟..دا انا أبو لهب و22؟
لما قولت النكت دى لواحد قريبى ف انا علقت عليها وقولتله : على كده فرعون هتلاقيه يدوب 17
قالى :فرعون...!فرعون ياسلام على فرعون ده فرعون كان راجل محترم ..ده كان بيقولهم "ذرونى أقتل موسى"؟؟ّ! ده كان بيستأذنهم

Friday, April 06, 2007

اكتشاف مذهل

اكتشف بعض العلماء المصريين بالصدفة الطريقة المثلى لحجب رؤية اقمار التجسس الصناعية.. واتى هذا الاكتشاف بسبب السعي المستمر للعلماء المصريين لتطوير التقنيات التي تمكنهم من حماية امن هذا البلد..و يُستخدم في هذا الاكتشاف اختراع مصري بحت صنع بالكامل على ايدي الخبراء المصريين ويتبع هذا الاختراع طريقة الزغللة في حجب رؤية اقمار التجسس



اتريد ان تعرف ما هذا الاختراع المذهل



شاهد تلك الصور









لسه مفهمتش..يمكن الصورة اللي جايه تفهمك اكتر لانها مع الشرح







طبعا سيبك من حكاية الاختراع و نتكلم جد بئى الصور اللي انتوا شايفنها فوق ديه ما هي الا صور لعامود نور المفروض ان هوا محطوط علشان ينور الشارع لكن يبدو ان المسؤلين لقوا فايدة اهم لعمدان النور من كده بانها يخلوها تبص لفوق و بالطريقة ديه نقدر نزغلل العدسة بتاع القمر الصناعي اللي بيصور من فوق او يمكن علشان ينوروا للطيارات اللي ماشيه في الجو كل ده كلام فاضي..تقريباً الشركة او العامل المختص عن تركيب الكشاف ده مكنش عايز يضيع دقايق من وقته الثمين اللي هيعدل فيهاالكشاف..طيب لو كان العامل وقته مهم للدرجة ديه فين الشركة المسئولة عن صيانة الحاجات ديه..و جابوا منين اصلا الغباء ده اللي يخليهم يعملوا حاجة زي ديه..يمكن مش غباء تقدر تقول عليه تخلف او اهمال او او..يبدو ان كل المصطلحات بقت شبه بعضيها..ده طبعا مثال بسيط جداً جداً عن مدى سورري يعني تخلفنا و ما خفي كان اعظم


ملحوظة:التقطت تلك الصورة بكاميرا موبايل على ويكا صديقي و شريكي في تلك المدونة و احنا ماشيين سوا على كوبري علوي
سلام

Friday, March 30, 2007

محكمة

و انا قاعد لا بيا و لا عليا لقيت مُحضر جالي و بيقولي انت مطلوب للشهادة في قضية مهمة و اللي طلبوك للشهادة مها و سارة المهم انا طبعا قلقت لان محدش طلبني للشهادة قبل كده لكن اللي حصل حصل المهم رحت المحكمة و بعد ما نادوا اسمي دخلت علشان اشهد و اقسمت اليمين كمان "و الله العظيم اقول الحق"..المهم لقيت القاضي راح خبطني اول سؤال
اسم مدونتك ايه يا ابني؟؟

ايوه يا فندم اسمها انا افكر اذن انا مجنون

ايه ده يا ابني ايه الاسم المتخلف ده..اخترته ليه او تقصد بيه ايه ؟؟

و الله انا اخترته على اساس ان كل اللي بيحاول يفكر دلوقتي علشان يفهم اي حاجه مصيره الجنون و خصوصا في الدنيا اللي احنا عايشينها ديه و لا سيادتك مسمعتش الاغنية بتاعة باين اللي اسمه محمود العسيلي و هو بيقول ماجنونة..ماجنونة..ماج..ماج..ماجنونة..غير كده سيادتك لما تيجي تكلم اي حد في اي حاجة ممكن تكون غريبة شوية فممكن يفتكرك مجنون فانا قلت اوفر عليهم السكة ديه و اعترف احسن بس هو ده السبب

شكلك كده لمض..المهم فكرت تقفل المدونة ديه و ليه ؟؟

اه بصراحة..علشان نفس السبب اللي انا عملت المدونة علشانه مكنتش فاكر ان في ناس مجانين أقصد يعني بيفكروا في حاجات كتير غريبة و عايزين يفهموها لكن لما دخلت مجتمع المدونيين لقيت في ناس على نفس الشاكله كتير و بصراحة كمان حاسس ان انا مبعرفش اكتب كويس او مبعرفش اصيغ الموضوع اللي عايز اتكلم فيه بشكل كويس يعني افضل ارتب الموضوع في دماغي و لما احط ايدي على الكيبورد انسى كل اللي كنت عايز اكتبه..بس ديه الاسباب و بحاول اتخطاها

ماشي يا عم..تقولنا بئى صورتك في المدونة رمزيتها ايه يعني ؟؟

و الله انا اول ما شوفت الصورة ديه اعجبت بيها جدا جدا اولاً انا شخص بعشق البساطة جدا جدا و لو شوفت الصورة هتلاقيها عبارة عن شخص مرسوم ببساطة جدا عبارة عن مجموعة بسيطة من الخطوط اللي كونت شكله..ملوش ايدين..راسه فيها شعرة واحدة..اظن مفيش ابسط من كده..لكن الجمال الحقيقي في الفعل اللي بيقوم بيه و هو بيمشي و بيمشي و مبيقفش ابدا و طبعا للي ميعرفنيش انا من عشاق المشي بدرجة لا تتخيلوها خلاصي في المشي لو مضايق بمشي لو زعلان بمشي لو حتى فرحان بمشي لو عايز افكر في حاجة مهمة بردو بمشي و بكون سرحان لدرجة ان انا ممكن ماشوفش حد من اصحابي لو قابلني بالصدفة ممكن غير كده او كده بمشي مسافات كبير جدا...علشان كده الصورة ديه تضم اكتر حاجتين بحبهم..البساطة و المشي..فانا معجب بالصورة ديه جداً

اه هو انت منهم طيب..ايه طبيعة كتابتك في المدونة ديه يعني كتابة عامة ولا في السياسة ولا قصص و لا كلام فاضي ولا ايه النظام ؟؟

و الله سيادتك تقدر تقول كده مليش حاجة معينة اكتب فيها او بمعنى اصح باكتب في اي حاجة و في كل حاجة طالما انا قادر على الكتابة فيها يعني هاكتب عن الحاجات اللي بتضايقني في اي حاجة و الله سواء سياسة في المجتمع في اي عفريت ازرق..ممكن كمان العلوم ..لكن فيه عقبة لغاية دلوقتي مقدرتش اتخاطاها بأن انا اكتب عن تجارب شخصية او حاجات من اللي بتحيرني داخليا لكن مش مستعد اني اشارك بيها في الوقت الحالي

طيب انت بدون ليه اصلا ؟؟

في نفسي: القاضي ده باين عليه شكله رخم و اسئلته كتير مش هنخلص بئى ولا ايه..انا بدون اصلا يا فندم بسبب مجتمع المدونين لما كنت بتصفح في البداية المدونات من قبل ما يكون عندي مدونة اصلا فلقيت في ناس دماغها عالية اوي اوي من ناحية تفكيرهم و فرصة ان انا اتعلم منهم و من خبرتهم في الحياة و لقيت بردو ناس دمهم خفيف اوي اوي لدرجة تخليني ممكن اقعد ربع ساعة اضحك على اسلوبهم الجميل و مواقفهم اللذيذة و لقيت ناس اللي بيتبنوا رسالة مهمة و بيناضلوا علشانها فقلت ليه مكونش فرد من المجتمع ده افيد و استفيد نتناقش في افكارنا و مشاكلنا لغاية منلاقي حل..و هكذا

ايه احلى جملة قيلت في وصف مدونتك ؟؟
صدقني حضرتك لو قلتلك مش فاكر حتى لو فاكر مش هقولك بردو لان انا من النوع اللي اذا حد مدحني مركزش اوي علشان يمكن مبصدقش ان الشخص ده بيتكلم جد يمكن بيجاملني بس او بينافقني بمعنى اصح..يمكن انا شايف اني ممكن مكنش جيد للدرجة اللي تخلي الشخص ده يقول اللي قاله ده و بصراحة ديه بتمثل مشكلة ليه

انت باين عليك معقد..طيب يا سيدي تعليقات الناس بتمثلك ايه ؟؟

تعليقات الناس..ديه اهم حاجة لان سبق و قلت لي سيادك اني كنت عايز اكون فرد من مجتمع المدونين دول و التفاعل اللي بينهم هو اجمل حاجة في المدونات هما اللي هيناقشوك في مشاكلك و المشاكل اللي حواليك و ينصحوك و يواسوك لو في مكروه و يفرحولك لو فيه مناسبة سعيدة..تعليقات المدونين هي الحاجة اللي يمكن متلاقيهاش في المجتمع الحقيقي و هي النقاش و الحوار مع ناس بتفهم

طيب ايه هو احلى بوست كتبته ؟؟

و الله طيب انا هاحدد احلى بوست كتبته ازاي بالنسبة لي كلهم حلوين..مش انا اللي احدد حاجة زي ديه الناس اللي هتقرأ الموضوع هما اللي بيحددوا مدى اهميته و جماله من خلال ردودهم

طيب يا شريف ايه احلى مدونة قريتها ؟؟

ياه كتير وشويه شويه باحطهم في خانة لينكات مهمة لكن اللي في الخانة ديه مش كل المدونات اللي بزورها يعني لو جيت شوفت المفضلة عندي في الاكسبلورر هتلاقي مدونات كتير كتير دول حتى معرفش عددهم و هحاول بقدر الامكان احطهم كلهم في لينكات تهمني و مش عايز اذكر بعض المدونات لانسى حد

يعني بتهرب..اوكي طيب ايه هو افضل بوست او موضوع قرأته ؟؟

في نفسي: انا قلت من الاول انه رخم مش مصدقني امري الى الله..و الله سيادتك مواضيع كتير كتير بس ممكن اكون قريت موضوع كويس في مدونة و اخرج و انسى اسم المدونة ديه كان ايه علشان ارجعلها تاني..بتحصل كتير..بس صدقني مش هقدر احصرلك كل المواضيع الجميلة اللي قريتها بسبب عددها الكبير

طيب لو حد قل ادبه في التعليق ؟؟

و الله هو لحد دلوقتي محصلتش لكن لو حد عمل كده يبئى بني ادم واطي و اعرف ارد عليه كويس لان قله ادبه تنم عن جهل منه سواء على الموضوع او عن اداب الحوار اصلا..يعني عندي مبدأ "ناقشني..يا تقنعني يا اقنعك" بس بأسلوب حضاري مش همجي

السؤال ده الاجابة فيه اجبارية يعني هتجاوب هتجاوب..ايه هي اسوأ مدونة و ممكن تقول كذا اسم ؟؟

سيادة القاضي انا اعترض على الاجابة على السؤال ده لان الجلسة مش سرية لما تبئى الجلسة سرية ممكن اجاوبك على سؤالك..لكن اقدر اقولك ان اسوأ مدونة هتكون الي صحابها من المأنتخين في الحياة او اللي بيكتبوا كلام فاضي مضيعش وقتي في قرايته

زهقتني يابني..طيب اسوأ بوست او موضوع و اسوأ مدون ؟؟
في نفسي:ده مصمم بئى..المدون اللي فاكر ان رأيه بس هو اللي صح و بيجادل في الخطأ و مش هريحك وقولك على اسامي

انت تعبتني يابني و من الاخر اجابتك متكفيش لحل القضية ديه لازم تستدعي شركائك في الجريمة..اقصد في التدوين لازم يشهدوا هما كمان يمكن نوصل لحل..تستدعي مين قول بسرعة..لخص..انجز ؟؟

اللي هستدعيهم سيادتك هما
رفعت الجلسة
ملحوظة :اسف لتأخيري في الرد على التاج لان بصراحة اخويا كان محتكر الكمبيوتر و كمان النت كان مقطوع عندي اليومين اللي فاتوا دول يعني كانت عيشة ضنك

Tuesday, March 20, 2007

انا و القمم العربية

ايه ده احنا في اخر شهر مارس..اه فعلا والله احنا في اخره…اخر شهر مارس بيبقى في تلت حاجات مهمة في اخر الشهر ده..عيد ميلاد واحد صاحبي و عيد الام و القمة العربية

و بما اني مبحبش اصلا اعياد الميلاد و كمان بما ان عيد الام او الام نفسها مش محتاجة يوم واحد علشان نفتكرها فيه…فقلت انتهز فرصة القمة العربية و احكيلكوا حكايتي مع القمم العربية

لما بدأت اوعى على الدنيا في السن بتاع 15 سنة و بدأت اشوف اللي بيحصل في الدنيا و اهتم بيها و مشاكلها و كأي عربي فتحت عيني على اللي كان بيحصل في فلسطين و اللي اسرائيل عملاه فينا و بدأت حياتي على الخراب و التدمير و القتل اللي اسرائيل بتقوم بيه ضد الفلسطينيين فكان سؤال منطقي جدا مني ان انا اسأل طيب احنا ليه مبانساعدش الناس ديه و نحميهم من اسرائيل؟؟ و طبعا كان وقتها كان عندي امل كبير في بلادنا العربية لغاية ما حصلت الانتفاضة اللي كانت تقريبا بتاعة سنة 2000 و بعد ازدياد القمع الاسرائيلي ضد الفلسطينيين و كان قرب معاد قمة عربية تقريبا المهم قلت ايوه كده الزعماء العرب هيجتمعوا و لما يجتمعوا اكيد هيعملوا حاجة كبيرة علشان توقف الناس دول عند حدهم و انعقدت القمة و كنت بتابعها و مستني بقى النصر و في الاخر يطلعوا يقولوا نحن بنشجب و ندين الاعتداءات الاسرائيلية و بندعو الاطراف الى مائدة الحوار...قلت ماشي يمكن هما فاهمين اكتر مننا مش مشكلة..لكن تمر الايام و الشهور و تكتر المشاكل لحد موصلنا للمشكلة اللي كانت حصلت في مخيم جنين تقريبا لم اسرائيل دغدغت البلد و موتت اهلها و مبقاش فيها حتة سليمة...قلت اكيد احنا المرة ديه مش هنسكت لازم هيكون رد فعلنا قوي لكن يبدو ان نغمة الشجب و التنديد عجبانا اوي و انتهت القمة ذي اللي قبليها..قلت ماشي مسيرنا نثور و نعترض على الظلم لغاية موصلنا لحرب العراق و قبل الحرب بشويه عقدوا قمة طارئة تقريبا و قلت لا المرة ديه مش هنسمحلهم دي حرب بجد مش اي كلام يعني هيكون لينا وقفة و تنتهي القمة زي اللي قبليها و اللي قبليها بمجرد تحذيرات و شجب و مش كده وبس ده بعض الدول كانت تؤيد الحرب و سمحت لامريكا انها تستخدم ارضها علشان تتدخل العراق و انتوا طبعا عارفين انا اقصد مين..ساعتها بئى ادركت الفاجعة و فقدت الامل في اللي بيقولوا عليهم حكامنا وقلت "مفيش فايدة" و بقيت حتى استخسر الدقايق اللي بضيعها في قراية اخبار القمة

و تتوالى الانتكاسات في القمم التي تليها من رؤساء مبيحضروش القمة اصلا و مش اي رؤساء دول رؤساء لدول كبيرة لخناقات وشتايم لبعض و بهدلة و رؤساء تنسحب من القمة لمزيد من الصلف الاسرائيلي امتد لغاية الحرب الاخيرة على لبنان و كالمعتاد لم يحرك حاكم منهم ساكن و اختلفوا في رؤيتهم للموقف كالمعتاد و ادركت فعلا كلمة كنت سمعتها و هي ان "يبدو ان العرب اتفقوا على ان لا يتفقوا"..بصراحة في البداية كان عندي امل كبير في حكامنا لكن بعد ما شوفت المهازل ديه فقدت الامل فيهم لكن مازال فيه جزء مني بيقولي لسه الامل موجود يمكن لما يحكمنا ناس غير دول...اتمنى انه ييجي اليوم اللي اتفرج فيه على قمة عربية يتحقق بها كل احلامنا و يكون لينا كلمة مسموعة و يعملنا العالم الف حساب...تفتكروا هييجي اليوم ده

اتمنى اني مكنتش طولت عليكوا لكن ديه ببساطة حكايتي مع القمم العربية