Tuesday, October 13, 2009

الصحة في مصر 1

السلام عليكم

المرة ديه عدى وقت كبير على اخر تدوينة و ده بسبب ظروف كانت قوية و اللي ليها علاقة وثيقة بعنوان البوست لان الظروف اللي مريت بيها كانت استمرار لحالات الوفاة اللي بدأت بجدتي في التدوينة اللي فاتت لكن المرة ديه كانت لناس اكثر قرباً و هوا والدي (ادعو له بالرحمة و المغفرة) اللي توفاه الله من اكثر من شهرين تقريباً و اللي كان مصاب بالتهاب الكبد الوبائي فيرس سي و اللي فضل عايش بيه لفترة كبيرة بيعافر مع المرض الا ان في الفترة الاخيرة تطورت الاعراض و اصبحت حالة صعبة و حرجة للغاية و اللي ادت في النهاية للوفاة و طبعا الحمد لله على كل شيء لان الموت مكتوب علينا كلنا و ده قضاء الله و قدره و مهما طال بينا الزمن او قصر فالنهاية حتمية و صدق رسول الله صلى الله عليه و سلم حيث قال "عش ما شئت فإنك ميت وأحبب من شئت فإنك مفارقه" الا ان طبعا الامر لم ينتهي عند والدي لان بعديه بفترة قصيرة تعب عمي بردو و اللي مصاب ايضاً بنفس المرض فيرس سي و اللي تتطورت معاه الاعراض حتى وصل الامر ايضا للوفاة بعد وفاة والدي بشهر تقريباً و بكدا يكونوا حصلوا عمي اللي هو اكبرهم سناً و اللي اتوفى بردو بنفس المرض في بداية السنة ديه و اللي اسأل الله لهم الرحم و المغفرة و ان يكرم نزلهم و يطهرهم و يزكيهم و يسكنهم الفردوس الاعلى من الجنة هم و جميع الموتى و موتى المسلمين اللهم آمين يا رب العلمين

اللي عايز اقوله بئى و اللي بالفعل موضوع من اخطر ما يمكن و هو الصحة في مصر لاني رافقت الحالات ديه كلها في المستشفيات الحكومية و اللي خلاني اشوف حجات كتيرة اوي و اشوف مدى الفساد و الاهمال و القذارة الموجودة في نظامنا الصحي بالكامل و ابتدي الاول بكمية الامراض و اولهم المرض ده اللي هو التهاب الكبد الوبائي سواء فيرس بي او سي اللي وصل اعداد المرضى بيه في مصر الى اعداد مخيفة فعلا و اللي قدروها بعدد عشرين مليون مصري مصابين بالمرض ده و العدد مستمر و اللي بجد حاجة مفزعة يعني انتوا مش متخيلين العدد 20 مليون مصري يعني بنسبة 18% تقريبا من تعداد سكان مصر و السبب في الاعداد الكبيرة ديه ان مسببات المرض ده كانت جزء منها في الماضي بسبب تطعيم بحقن معينة و هي اللي نقلت الفيرس ده لاجيال بالكامل و اللي هوا جيل والدي و عمي يعني جيل الخمسينات تقريباً و جزء من المسببات موجود حاليا و هوا طبعا الاغذية اللي بيستخدم في زراعتها المبيدات و المياه الملوثة ولا تصلح اصلا للأستهلاك الادمي و الاهمال المتواجد في المستشفيات و اللي بيسمح بأنتقال الدم الملوث بالفيرس للناس السليمة و بينتهي الامر باصابتهم بالفيرس و كل ده بيخلي اعداد المرضى بتقفز بصورة جنونية و اللي للأسف كمان مش قاصر على كبار السن لأ دول كمان الشباب و بأعداد كبيرة للأسف مصابين بالفيرس اللعين ده و الاطفال كمان .. فأنا عايز اعرف فين المؤسسات الصحية في مصر من الكلام ده و بيعملوا ايه و على رأسهم الجبلي ؟؟

للأسف طبعا هما مش فاضيين لان المشكلة في مصر مش مشكلة التهاب كبد وبائي و بس المشكلة مشكلة امراض بالكوم و بأعداد تخليك تقول و مين في مصر دلوقتي سليم لان يوجد في مصر ما يقرب من اربعة ملايين مصاب بالسكر و خمسة ملايين مصاب بالفشل الكلوي دا غير ما يقرب من ربع مليون مصاب بالسرطان غير بقية الامراض التانية و اللي كنت قريتها في احصائية على احد المواقع لكني مش لاقيها للأسف لكن عموما يبقى الوضع سيء اللي اقصى حد و غير مقبول بالمرة لكن طبعا مين اللي هيقول الكلام ده اذا كان تقريبا بالارقام ديه 50% من الشعب المصري مريض بامراض ينتظر بها الوفاة و النصف الاخر بيجري على علاج النص الاولاني و مش ملاحق

عموماً اعذروني يمكن كلامي مش مرتب لكن حبيت ابتدي الموضوع و مكنتش ملاقي الوقت المناسب الحقيقة بسبب ظروف شغلي لكن ان شاء الله يتبع لان لسه عايزين نتكلم عن المستشفيات و العك اللي بيحصل فيها و عن بقية الامراض و ازاي المفروض الحكومة تتعامل معاها عموما نكمل في الجزء التاني ان شاء الله
تحياتي لكم جميعاً و اسأل الله ان يديم عليكم نعمة الصحة و العافية و العمر المديد

سلام



Wednesday, July 01, 2009

البقاء لله وحده

احساس صعب اوي لما بنفقد الناس الطيبة اللي حوالينا اللي بيخلوا للحياة معنى و خصوصا لما نكون متعلقين بيهم اوي سواء كانت برابط الصداقة او القرابة لكن كمان ادراكنا بأن حياة كل فرد فينا الي زوال هي اللي بتهون على الواحد شويه فراقهم .. انا بقول الكلام ده لاني خلال الاسبوع اللي فات فقدت شخص غالي عندي شخصياً و غالي عندنا كلنا كعائلة و هي جدتي اللي اتوفت من اسبوع تقريبا و اللي وفاتها كان امر متوقع بسبب مرضها اللي اشتد عليها الفترة الاخيرة و خصوصا انه كان ملازمها فترة كبيرة لكن طبعا بحكم السن و الشيخوخة عموما اصبح الجسم غير قادر على تحمل مشاق المرض و مشاق الحياة اكتر من كدا الى ان توفاها الله اللي اسئله الرحمة و المغفرة لها و لكل اموات المسلمين يا رب .. لكن زي ما قولت فقدانها كان شيء صعب علينا كلنا لانها كانت الحضن اللي ضمنا كلنا اجيال متتالية و اللي كلنا اتربينا على ايدها و اللي بالفعل كانت و نعم التربية اللي يشهدلها الكثير من الناس
جدتي كانت ام زي الكثير من الامهات في مصر اللي عانوا علشان يقدروا يوفروا لابنائهم متطلبات الحياة و خصوصا بعد ان تخلى الزوج عن مسؤليته تجاه اولاده و بالرغم من الحالة المادية الصعبة اللي كانت بتمر بيها الا انها قدرت انها تتحمل مسؤلية اولادها و تشتغل و توفرلهم المال المطلوب علشان يقدروا يكملوا تعليمهم و يعيشوا حياة كريمة و يقدروا بالتالي يوفروا حياة كويسة لاولادهم و هكذا على مر الاجيال المتتالية يعني بالفعل هي كانت مثال للست اللي بيقولوا عليها بميت راجل وبالفعل قدرت الحمد لله انها تحقق لولادها حياة كريمة بالرغم من كل الظروف الصعبة اللي عصفت بيهم

انا لو فضلت اتكلم عليها و على احتوائها لينا و للناس كلها اللي حوالينا و اللي بيكنوا ليها كل الحب مش هقدر اوفيها حقها مقدرش الا اني دلوقتي ادعيلها ان ربنا يرحمها و يغفر ليها و يتجاوز عن سيئاتها و يرزقها الفردوس الاعلى من الجنة مع النبيين و الشهداء و الصديقين و الصحابة وحسن اولائك رفيقا و يبدلها بيتاً خيراً من بيتها و زوج خير من زوجها و ان يجعل قبرها روضة من رياض الجنة آمين آمين يا رب العالمين

جدتي تعبتي كتير في حياتك و جه الوقت علشان ترتاحي
اسألكم الدعاء لها و لجميع المسلمين الاحياء منهم و الاموات

تحياتي

Thursday, May 21, 2009

مصر و شعبها و حكومتها و الانفلونزا

بصراحة الموضوع الاخراني ده بتاع انفلونزا الخنازير خلاني اتأكد او اعرف حاجات كتير مكنتش عارفها و هنا مش هتكلم عن الانفلونزا ديه كمرض و عن الحوارات الخاصة بيها اللي كلنا عارفينها لكن عايز اتكلم عن استجابتنا احنا كمصريين و كحكومة للموضوع كله لاني كنت معتقد اه ان احنا متخلفين لكن للأسف مكنتش اعرف ان احنا في قمة التخلف والغباء ومتعصبين وهمجيين كمان و قول كل اللي انت عايز تقوله ليه بئى ؟؟؟ لان الواحد اتفرج على مهازل بمعنى الكلمة سواء من استجابة الحكومة و تجاوب الشعب مع المرض و الموضوع كله و خصوصا ان الموضوع تشعب بطريقة غريبة لدرجة انه خرج من مجرد كونه مرض كأي مرض و اتحول في بلدنا بس علشان يكون مشكلة اقتصادية و دينية و اجتماعية بالاضافة لكونه مشكلة صحية و ده ببساطة شديدة لقدرتنا العبقرية على جعل اي مشكلة اكبر من حجمها عشرات بل مئات المرات .. و لو ابتدينا بتجاوب الحكومة مع المرض هنلاقي ان هما اخدوا اول قرار بذبح و اعدام جميع الخنازير الموجودة في مصر (و اللي كان لا يختلف كتير مع القرار اللي اخذته لكما قررت بأعدام كافة الطيور حتى غير المصابة منها ايام انفولنزا الطيور و اللي عمل مشكلة كبيرة) و ده طبعا حل غير منطقي بالمرة لانه مش علشان عايز اتفادى حدوث مشكلة اقضي على العامل اللي (ممكن) يكون اساس للمشكلة ديه مش علشان الانفلونزا بتصيب الخنازير اعدم كل الخنازير الموجودة في البلد و خصوصا ان الفيرس مش اساسه الخنازير لكن اصاب الخنازير زي ما اصاب الطيور زي ما بيصيب البشر لان فيرس الانفلونزا واحد لكنه بيتحور لاكثر من صورة و خصوصا كمان ان كل الاصابات اللي حصلت كانت بسبب اختلاط البشر ببعض مش اختلاط البشر بالخنازير و علشان كدا منظمة الصحة العالمية استغربت للقرار و قالت ان علشان اللبس ده هتبطل تستخدم كلمة انفلونزا الخنازير كمصطلح للمرض و هتستخدم مسمى تاني


المهم القرار كان غبي لكن ممكن يكونوا مدركين ان هوا قرار غبي لان كان هدفهم اصلا حاجة تانية و هي حاجة متعلقة بالخنازير نفسها في مصر و طرق تربيتها و اماكن تربيتها و خصوصا بعد ما شوفنا ان اساس تربيتها و تغذيتها قائم اصلا على مقالب الزبالة و اللي موجودة في وسط اماكن سكنية و علشان كدا لقوا ان ديه فرصة لا تعوض علشان يخلصوا من عدة مشاكل في بعض و هما عندهم حق انها مشكلة لكن اللي صدمني و اثر فيا بجد الناس اللي قايمين على تربية الحيوانات ديه لان شوفنا قد ايه هما ناس معدمين و تربية الخنازير ديه هي مصدر رزقهم الوحيد (بغض النظر عن مسألة حرام ولا حلال مش ديه نقطتنا كل واحد عارف الحرام من الحلال و هوا اللي بيتحمل وزرها و قياساً على كدا الخمور و اللي بيقبلوا انهم يشتغلوا فيها) و ان بقرار زي ده كان بمثابة اعدام ليهم و خصوصا انهم يعني رضيوا بعمل زي ده وسط مقالب الزبالة و بيحاولوا يعيشوا و راضيين و في الاخر كمان بعد ده كله جاي تاخد منهم مصدر رزقهم و مش هنسى الراجل اللي شوفته كان على العاشرة مساءا تقريبا لما قال خلاص يعدمونا احنا كمان مع الخنازير علشان تبئى مرة واحدة و خلصنا فتخيلوا قد ايه كان قرار صعب بالرغم من الحكومة قالت انها هتعوض الناس ديه بملغ معين و بالفعل كان فيه تعويضات لكن اقل من اللي قالوا عليها و احنا عارفيين كلام الحكومة .. علشان كدا سواء كانوا الناس دول مسيحين او مسلمين فبجد هيعانوا كتير جدا بسبب قرارات غير محسوبة


نيجي بئى للجانب الديني و القلق و المشاكل اللي حصلت ديه كلها و بصراحة مكنش ذنب الحكومة بل ذنب الناس و خصوصا بعد ما تابعت ردود فعلهم على النت و كان من المسلمين والمسيحين على حداً سواء و كانت البداية لما ناس قالت ظهر الحق و علشان كدا ربنا محرم اكل الخنازير و مصدقوا مسكوا حاجة و كانت نقطة غريبة اوي طيب اشمعنى مسكتوا في النقطة ديه طيب ما كان فيه قبلها انفلونزا الطيور ولا لحقتوا نسيتوا اللي عايز اقوله ان ربنا مش محتاج يجيب مرض في حاجة محرمها علشان نتأكد من حكمته في تحريمها لان احنا علينا الطاعة بغض النظر عن الضرر او المنفعة اللي هيعود علينا من الحاجة ديه و كمان لقيت ناس كتير مستغربة اوي و بتقول "ايه ده كل الخنازير ديه في مصر امال احنا دولة اسلامية ازاي" بصراحة مش عارف ارد على الناس ديه و اقول ايه يعني الخنازير هي اللي جات اوي على الوجيعة طيب ما تتكلموا على الخمور اللي السياحة لا تقوم لها قائمة من غيرها ولا تتكلموا عن نوادي الليل و اللي بيمارس فيها ولا المخدرات ولا البلاوي اللي معششة في البلد و هي ابعد ما تكون عن الاسلام .. و النقطة التانية بردو اللي استغربتلها جدا رد فعل المسيحين في مصر و خصوصا لما اعتبروا ان قرار ذبح و اعدام جميع الخنازير بمثابة اضطهاد ليهم و ده مش صحيح لان لو فرضنا ان ديه كانت هتكون سبب رئيسي من اسباب انتشار المرض (مجرد افتراض) هل بردو هتقولوا لا الخنازير متدبحش و ده اضطهاد و الكلام الكبير ده ؟؟ لأ طبعاً لأن المفروض ان الغاية هي دفع الضرر بقدر الامكان حتى لو كان على حساب حاجة مهمة بالنسبة لينا و هرجع اقارن بالطيور اللي كانت مهمة لي 100% من الشعب المصري مش 10% بس و مع ذلك اخذوا قرار بذبحها (بغض النظر متفقين مع القرار ده او لأ) .. لكن يمكن يكونوا مسيحين الداخل براء من القلق ده و يكون المتهم الرئيسي هم من يلقبون نفسهم بأقباط المهجر و على رأسهم اللي اسمه مايكل منير تقريباً و مش شايف انهم بيعملوا اكتر من انهم بيقلبوا الرأي العام في الخارج على مصر بأنها بتضهد المسيحين و كلام فراغ كتير كدا ملوش اي لازمة .. يا جماعة انا مش مع حد ضد حد لكن بصراحة قمة الغباء و التفكير المحدود لان مصر هي الدولة الوحيدة (على ما اعتقد يعني) اللي حصل فيها ازمة دينية بسبب الموضوع ده


بصراحة كدا من الاخر احنا وصل بينا الحال لمستوى سيء جدا (انيل مما كنت متوقع بصراحة) علشان كدا بدعي ربنا انه يسبب لينا الاسباب و يخرجنا من الوضع السيء ده و يرجع لينا تاني عقولنا و اخلاقنا و يردنا للدين رداً جميلاً و يستر علينا من الانفلونزا ديه لان لو دخلت مصر (أذا مكنتش دخلت اصلا) هنتبهدل بهدلة سودا نتيجة الكثافة السكانية العالية وقلة الوعي و النظام و الاهتمام سواء من الشعب اومن الجهات المسئولة


عموما اسف جداً لطول البوست لكن بصراحة قولت اهو يكون جرعة مكثفة و خصوصاً اني بعدت عن التدوين الفترة اللي فاتت بالرغم من متابعتي لبقية المدونات لكن اهو ربنا يسهل .. تحياتي لكم جميعا

Thursday, February 19, 2009

What Do You Think ?

قريب كنت بتفرج على فيلم بس مكنتش مركز معاه لاني شوفته مرة قبل كــدا
لكن المرة ديه سمعت جملة علقت معايا اوي مكنتش اخدت بالي منها

الجملة كانت

" We like people for their qualities, but love them for their defects. "

عايز يقول ان احنا بنعجب بالناس لصفاتهم الحسنة لكن بنحبهم و بنعشقهم لعيوبهم عجبتني الجملة ديه لاني لقيت فيها حاجة مكنتش شايفها و فهمتها من منظوري انا لكن كنت عايز اعرف رائيكم انتم ايه و ايه اللي فهمتوه من الجملة ديه و متفقين معاها ولا لأ ؟ و نتناقش فيها سوا
.....

Thursday, January 08, 2009

لكي الله يا غزة

شوفت امبارح صورة في جريدة من الجرايد مش فاكر كانت ايه لطفلة مدفونة في وسط حطام منزل مهدم في غزة
الحقيقة كنت عايز احط الصورة ديه بس لانها كانت تكفي انها تعبر عن الوضع اللي بيمر بيه اهالي غزة
المهم دورت في جوجل بعد ما عملت بحث عن اطفال غزة لكن للأسف مقدرتش استحمل اخلص الصفحة التانية من الصور و المشاهد المفزعة اللي شوفتها وعملت بحث تاني على غزة في بيكازا ومقدرتش اكمل الصفحة الاولى من نتايج البحث من هول اللي شوفته بجد حرام علينا انا مش فاهم ازاي قادرين نعيش مع كل اللي بيحصل للناس في غزة
سوري يعني طظ في فتح و حماس و لعبة السياسة القذرة اللي الواحد بئى مش عارف مين الصح و مين الغلط
و مين المسؤل و مين الضحية و مين الجاني
لكن اللي اعرفه كويس ان فيه عائلات بالكامل بتموت
لم يقترفوا اي ذنب الا انهم في بلد اسمها فلسطين و بينتموا لينا احنا العرب اللي يبدو ان احنا بيعنا القضية لكن اللي باع القضية انظمتنا الفاسدة و اللي احنا كشعوب من تصرافتهم براء
بالرغم من ان احنا مسؤلين بشكل او بأخر عن انظمتنا و سكوتنا على ظلمهم
مش عارف اقول اي بصراحة لكن لكم الله يا اهالي غزة لانه هوا ارحم بيكوا من أي حد
و عذراً مش هقدر اشارك بالصورة ديه لأني لقيت انها ولا حاجة مقارنة باللي بيحصل في غزة
مكرهتش نفسي قد ما كرهتها دلوقتي لاحساسي بالعجز
حسبنا الله ونعم الوكيل